ꀨꏾꌠ > ꋊꃆꌧꇐ

ꊿꐈꃀꀊꂵꌋꆀꁦꋠꃅꊨꂷ
ꄜꃑꄮꈉ: 2012-03-21  | ꁰꄻꊿ:

ꋍꑍꆏ,ꌞꁦꋠꌠꆗꂷꆏ,ꁡꁠꄸꀳꇈꈬꃅꊨꁧ。ꁧꅷꃅꊨꅉꑟꇬꆏ,ꊿꐈꃀꀊꂵꂷꇫꑌꇈ。ꊿꐈꃀꀊꂵꂶꌠꀕꆗꋋꂷꂿꇬꆏ,ꇬꏭ:“ꉏ!ꁦꋠꃅꊨꂶꌠ,ꅽꁡꁠꂶꌠꌌꉡꍈꇁꉏ!”ꄷ。ꌠꆗꂶꌠꆏꇬꏭ:“ꇿꍑꂯ,ꉠꁡꁠꆎꍈꑲꆏ,ꉢꋠꅍꀋꊌꀐ,ꀃꃀꂮꑲꆏꈍꃅꀕꊨꂯ?”ꄷ。ꊿꐈꃀꀊꂵꂶꌠꅇꂷꋋꇬꈨꇬꆏ,ꃃꋩꃅ:“ꁡꁠꉢꀋꍈꑲꆏ,ꉢꆎꋠꌠꉬ”ꄷ。ꁦꋠꂶꌠꊿꐈꃀꀊꂵꌌꇷꇋꄉ,ꁡꁠꂶꌠꀋꍈꀋꉆꃅꇫꍈꇈ,ꊨꏦꆏꐧꃬꉊꄉꃅꊨꅷꃅꈊꑲꆀꈻꁧ。

  ꊁꄹꉇꑌꌠꆗꂶꌠꁡꁠꂷꄸꀳꃅꊨꁦꌦ。ꇁꌊꃅꊨꅈꑟꇬꆏ,ꊿꐈꃀꀊꂵꂶꌠꇫꑌꇈꌦꀐ。ꊿꐈꃀꀊꂵꂶꌠꁦꋠꂶꌠꇁꄷꆏꇬꏭ:“ꁦꋠꃅꊨꂶꌠ,ꆏꀃꑍꁡꁠꀵꇀꇁ?ꇀꆏꌌꉡꍈꇁ”ꄷꌦꀐ。ꊿꐈꃀꀊꂵꅇꋋꇬꈨꇬꆏ,ꁦꋠꂶꌠꑊꆹꐓꉩꃅꇬꏭ:“ꀋꄹꉇꃤꄻꆎꍈꄉꀐꇬ,ꀃꑍꑌꌌꆎꍈꑲꆏ,ꉢꑞꋠꂯ?ꀃꑍꆏꉠꊨꏦꋠꄉꃅꊨꂿ,ꊁꋚꎴꒉꎴꇬꆏ,ꉢꀉꑌꃅꀕꌊꆎꍈꇁꂿ”ꄷ。ꊿꐈꃀꀊꂵꋋꇬꈨꈭꐨꆏ,ꎄꏒꃅꇬꏭ:“ꈀꄸꂷꋍꉗꏢꇁꉚꆷꇊ,ꀋꃅꇯꆐꁡꁠꂶꌌꉡꍈꇁ,ꋌꀋꉬꑲꆏ,ꉢꆎꋠꇁꀐꌠꉬ”ꄷ。ꁦꋠꂶꌠꅇꂷꋋꈨꀕꇬꆏ,ꐬꆠꌊꃅꅍꎷꀋꊌꃅꁡꁠꂶꌠꄻꇫꍈꌦ。

  ꁡꁠꂶꌠꊿꐈꃀꀊꂵꇣꋠꌐꈭꐨꆏ,ꀱꁦꋠꃅꊨꂶꌠꋟꏢꉥꌦꇈ,ꊿꐈꃀꀊꂵꂶꌠꉪꅉꉪꅉꃅꉌꂵꑳꇁꀐ:ꄚꋠꂯꑌ,ꁦꋠꂶꌠꊨꃀꇇꋏꄉꌠꉥꇬꏭꇤꇁꏦ,ꀋꋠꂯꇬꑌ,ꋠꏾꌦꄉꏽꀐ。ꁦꋠꂶꌠꑌꌳꉔꐯꌳꉔ,ꀃꃀꂮꇬ,ꊼꇅꑌꑬꀋꆏꃅꋪꃅꀕꌠꎷ,ꊨꃀꏼꌠꋍꇅꑌꄝꇫꀋꎭ。ꑠꃅꄉ,ꊿꐈꃀꀉꂵꂶꌠꑓꒉꄧꃅꇬꐍꑌꅷꃅꃤꇈ,ꇇꐛꀋꌒꃅ,ꈌꉬꀧꃅꁦꋠꂶꌠꆫꅷꀁꇬꎭ。

   ꁦꋠꃅꊨꂶꌠꀁꇬꑟꇁꈭꐨꆏ,ꋍꐋꀨꈧꌠꋌꇴꌊꇕꄟꄉ,ꏡꁈꏢꏂꄉꊿꐈꃀꀊꂵꋋꂷꉻꏂꂿꄷ。ꄚꈍꉗꏢꉪꇈ,ꏡꁈꂄꏢꉪꎼꇁꀋꄐ。ꊁꑲꆀꌠꆗꀑꁮꑠꂷꋍꏢꉪꎼꇁꇈ,ꋌꎼꁦꋠꃅꊨꂶꌠꏭ:“ꃆꏂꑍ,ꆎꆏꄡꇗꁡꁠꂷꌌꆹꌦ,ꉪꆏꆈꅽꃅꊨꅉꌩꏪꇬꀀꄉ,ꆏꆹꈭꐨ,ꊿꐈꃀꀊꂵꂶꌠꇁꌊꅽꂴꆽꑟꄮꇬꆏ,ꉪꆏꊿꐈꃀꀊꂵꀋꌧꎴꀕꃅꄉꆎꅲ:‘ꉏ!ꁦꋠꃅꊨꂶꌠ,ꅽꃀꑌꂶꌠꑞꂷꉬ?ꊿꐈꀊꂵꉫꉬ?’ꄷꅲꇬꆏ,ꊿꐈꃀꀊꂵꂶꌠꈍꃅꑌꅽꏯ:‘ꀋꉬ,ꀋꉬ’ꄷꎁꀕꋋꇅꇬꆏ,ꉪꅽꏯ:ꋋꆏ,ꆏꊨꃀꌌꊼꇅꅥꉪꀨꉏꄷꄮꇬꆏ,ꆏꊨꃀꌊꅱꈯꃅꊿꐈꃀꀊꂵꀂꏾꉜꄉꄃꄹꌶ”ꄷ。

   ꊁꄹꉇꎸꄑꆏ,ꁦꋠꃅꊨꂶꌠꀒꄹꉖꐮꇖꄿꌠꇬꈴꄉ,ꁡꁠꄸꀳꊨꁧꀐ。ꇁꌊꃅꊨꅉꑟꄷꆏ,ꊿꐈꃀꀊꂵꂶꌠꇀꌦꀐ。ꊿꐈꃀꀊꂵꂶꌠꇁꌊꁦꋠꂶꌠꏭ:“ꉐ!ꁦꋠꃅꊨꂶꌠ,ꉆꐥꃅꁡꁠꍇꌠꌌꉡꍈꇁ,ꉢꀃꃀꂮꌦꄉꏽꀐ”ꄷ。ꁦꋠꃅꊨꂶꌠꇬꏭ:“ꀒ!ꆎꀋꍈꈀꄸꍈꂯ!”ꄷꇈ,ꉉꅉꃅꁡꁠꂶꌠꄻꊿꐈꃀꀊꂵꁵꀐ。ꊿꐈꃀꀊꂵꂶꌠꁡꁠꂶꌠꋠꌐꇬꆏ,ꋋꇅꃅꌩꏪꆸꈈꃅꊿꈨꇫꈌꐚ:“ꉏ!ꁦꋠꃅꊨꂶꌠ,ꅽꂴꑌꂶꌠꑞꂷꉬ?”ꄷ。ꊿꐈꃀꀊꂵꈨꇬꆏ,ꋌꇷꇧꁠꀐ,ꋌꉪꇬ,ꀋꐯꀐꉂꄉ,ꋋꇅꃅꁦꋠꃅꊨꂶꌠꏭ:“ꌩꉒꏢꄸ”ꄷ,ꁦꋠꃅꊨꂶꌠꉇꉈꃅꃚꏦꋌꈻꄉ“ꁦꋠꈧꌠ—ꋌꉉꇬꀂꌩꉒꏢꉬꑶ!”ꄷ。“ꅽꑞꉬ?”ꄷ,ꊿꐈꃀꀊꂵꂶꌠꋌꎼꀊꅰꃅꃵꋩꌊꋋꇅꃅ:“ꊿꊇꏯ,ꇓꂵꂷꉬꄷ”ꄷ。ꁦꋠꃅꊨꂶꌠꄡꇗꉇꉈꃅꃚꏦꋌꈻꄉꊿꊇꏭ:“ꁦꋠꈧꌠ—ꋍꋋꉉꇬꀂꇓꂵꂷꉬ”ꄷ。ꋋꄮꇬꆏ,ꌩꏪꇬꁦꋠꌠꆗꈧꌠꆏ,ꁦꋠꃅꊨꂶꌠꏭ:“ꃶꐚꃅꇓꂵꂷꉬꑲꆏ,ꆏꊨꃀꌊꅥꉪꀦꉏ”ꄷꇬꆏ,ꊿꐈꃀꀊꂵꋌꇷꌊꁱꐭꀋꄐꀐ。ꄚ,ꇬꁳꀋꅥꑌꀋꍑꄉ,ꃅꅍꎹꀋꊌꃅ,ꈌꐚꄯꀕꄮꃅꁦꋠꃅꊨꂶꌠꏭ:“ꆏꌠꇍꆏꀊꅰꃅꇍ,ꅥꆏꀅꌳꃅꅥ,ꉈꑴꆏꉠꀍꂷꇬꀍꆫꂷꄚꐛ,ꆏꑴꌡꀍꆫꋋꍈꇬꅥꀋꉆꂸ”ꄷ。ꁦꋠꃅꊨꂶꌠꌗꇬꑌꀋꏂꃅ,ꊋꑌꊋꀮꍝꄉ,ꊨꃀꏼꌠꀊꂥꃅꇍꄉ,ꋌꊡꊿꐈꀊꂵꀂꏾꀍꆫꂶꌠꇬꄀꇬꆏ,ꊿꐈꃀꀊꂵꂶꌠꋌꅥꀜꇤꌊꍻꇬꄚꀐ。
 

ꇁꀦ: 《ꆃꎭꉜꇐꁱꀕ》 ꁰꄻꌠ:  |  ꄜꃑꌠ: beley ꌤꃅꅉ