ꀉꑐꌺꑠꑍꍈꆏ,ꋍꑊꐮꋍꈜꈩꇬꈩꌒꐯꈩꌒ。ꄚꑍꂷꌠꋍꑵꍈꊝꇁꑲꆏ,ꈀꄸꑌꏆꐯꁳꀋꅲꇬꎷ。

   ꋍꑍꆏ,ꑍꂷꐯꇯꂱꑱꀀꑳꂶꌠꎏꐡꀐꄷꄉ,ꑳꀊꏀꍅꐯꍅꑠꑍꂷꋉꂿꄷꇕꄟꄉꀐ。ꋍꑊꆹꌊꌩꏪꇬꌩꇽꁧ。ꌩꇽꄮꇬꆏꃅꊸꅩꌬꀕ,ꁮꌺꈧꌠꃄꇖꄹꊂꃅꇁꋍꑊꀵꌐ,ꀂꏾꇬꇵꂷꈧꌠꑌꇗꃅꊰ,ꄚꋍꑊꑞꑌꀋꇝꃅꀒꇽꑟꄉ,ꀊꉗꀋꐛꇬꆏ,ꑲꋉꌩꏦꇽꇎꀐ。

   ꋍꑊꋍꑍꄷꀋꄸ,ꃅꄜꃅꀋꄜꃅꄓꄉꃅꅷꌋꐓꆺꄜꀕꄮꇬꑟꑲꆀꑬꆏꇬꎷ。ꈍꑋꑍꀋꐛꇬꆏ,ꑳꏀꑍꂷꌠꋉꌐꇁꂯꄉꀐ;ꑳꋍꂷꆏꀃꈈꄀꄉꀐ,ꋍꂷꆏꀃꈈꄀꂯꄉ。ꀉꑐꊼꇅꀉꒉꍇꌠꄹꇬꆏ:“ꉢꁳꂴꀀꄉꎻ,ꆎꆏꊂꂶꌠꀃꈈꄀꄉꈭꐨꑲꆀꇬꀀꒉ”ꄷ。ꀉꑐꊼꇅꀄꊭꍇꌠꄹꇬꆏ“ꑲꆹꉣꑊꐯꇯꋉꄉꌠ,ꆏꑞꐛꅹꂴꀀꒉꄡꑟ?”ꄷ。

   ꑠꃅꄉ,ꋍꂷꆏꀂꈍꃅꑌꂴꑳꏀꇬꀀꒉꂿꄷꇬꎷ,ꋍꂷꆏꉬꀋꅲꇬꎷ。ꄚꄉꇇꏸꑓꐬꌉꄉꐯꊨꐮꏈꀐ。ꊨꏈꅷꆏꇁꀋꉆꃅꄚꎍꇯꇬꆏ,ꀉꐩꂷꇁꄚꑟ:“ꀊꀒ,ꐋꀨꑋ,ꆐꑊꑞꈨꅔꄉꐮꏈ?”ꄷꅲꇈ,ꀉꑐꑍꍈꌠ,ꆏꄿꉢꀋꄿꃅꅔꈿꏿꄉꑞꐛꅹꐮꏈꇁꌠꉉꀉꐩꇰꀐ。ꀉꐩꅲꌐꈭꐨꆏ,ꀒꆺꇤꄉ:“ꌤꋍꒈꑠꍈꑌꆐꑊꌌꐮꏈꅍꐛꅀ?ꇁꉢꋭꋽꃅꉉꆐꑊꁵꂿ”ꄷꇬꆏ,ꀉꑐꑍꍈꌠꈨꆷꂿꀋꆷꃅꋓꄉꇬꏭꈀꎭꀕꀐꄷ。

   ꀉꐩꆏꀥꇤꈏꇬꃆꄔꋌꀕꌊꇁꄉ,ꉜꇊꂾꆏꑳꑍꂷꌠꋌꄀꇧꎭꇈ,ꆼꆣꆹꈧꃅꇧꈴꁧꀐꅊꇈ。ꄧꀕꃅꋋꇅꇬꆏ,ꃅꆳꄲꇁꄚꊐꄉ,ꆳꇁꃅꉈꑄꄉ,ꃆꄔꅑꅉꒈꅉꑟꀐ,ꀉꑐꑍꍈꌠꃆꄔꌉꒉꂿꄷꇬꑌꇥꀋꎫꀐ,ꄚꄉꃅꅍꎷꀋꊌꃅꏏꑍꄷꑌ。

   ꊁꆏꄡꆀꀉꑐꊼꇅꀉꒉꍇꌠꄹꇬ:“ꀞꐔꀐ,ꉣꑊꊨꏦꏆꐯꁳꀋꅲꐛꅹꃅ,ꉪꑳꈏꊋꃸꀕꌋꆀꃹꄉꋉꐛꄉꌠꑌꀉꐩꁳꐔꄀꇨꎭꎻꀐ!ꀋꃉꀃꃀꑌꂮꌦꄉꏽꀐ,ꂴꋍꑵꍈꎹꋠꁧꂿ”ꄷ。ꄚꄉ,ꑍꂷꌠꀋꇊꆏꀋꃉꌌꐯꊨꀋꋻꌠꀊꏭꃅꐮꇴꋩꆽꃬꌊꁧꀐ。

   ꋍꑊꀱꒊꀱꃅꐺꅷꇁꇬꆏ,ꁧꐧꑠꂷꇬꄉ,ꎭꃪꀋꋠꉈꉩꀕꑠꂷꊌꅜ。ꀉꑐꀉꒉꍇꌠꄹꇬꆏ,ꏼꐯꃅꐯꒉꃅꄉꋠꂿꄷ。ꊼꇅꀄꊭꍇꌠꆏ:“ꑠꀋꉬꆏ,ꌌꇁꉢꁸꂿ!”ꄷ,ꉉꌐꉉꀋꌐꃅꇬꆏ,ꎭꃪꂶꌠꇢꊭꇬꄉꋌꏼꑍꁆꃅꀐ。ꉘꀋꇉꃅꏼꌌꋍꁆꀄꊭꋍꁆꀉꒉꅊꇈ。ꋍꑊꐯꇯꑗꉘꂿꋺꌠꀋꎺꃅ,ꊼꇅꀉꒉꁆꌠꆏ,ꆎꑌꆏꋠꂿꄷ,ꉡꑌꉢꋠꂿꄷ,ꏆꐯꁳꀋꅲꃅ,ꈌꌺꑓꌺꍻꌊꐮꏈꌦꀐ。

   ꄧꀕꃅꀊꑙꂷꄚꈴꇁꌦꇈ,ꀉꑐꑍꍈꌠꐮꏈꃆꂮꌌꇬꁳꑖꇜꎻꌦ。ꋌꉬꅍꀋꐥꏭꃅ:“ꌤꑱꉀꀋꇎꃬꄲꑠꍈꇯ,ꆐꑊꐯꏈꅍꐛ,ꌌꇁ,ꉢꐯꃅꐯꒈꃅꁸꆐꑊꁵꂿ”ꄷ。ꀉꑐꑍꍈꌠꋋꇅꃅꇿꌊꀊꑙꏯꎭꏿꀐꄷ。

   ꀉꑙꆏꊋꑆꀋꑌꂷꉬꉗꃅ,ꏣꋬꋌꄌꌊꎭꃪꑍꁆꌠꋌꌌꏣꇈ,ꑞꁆꀉꇖꆏ,ꑞꁆꋌꌃꋠꇬꎷ,ꏣꅉꋠꅉꃅꄽꂫꇬꆏ,ꎭꃪꑍꁆꐯꇯꋌꌃꋠꌐꀐ。

   ꀉꑙꋠꌐꈭꐨꆏ,ꂱꀯꌩꅉꃅ:“ꐋꀨꑊꀋ,ꇁꌊꋚꑌꒉꁁꐚꋠꀐ,ꆐꑊꈀꎭꀕꀐ”ꄷꇈ,ꋌꎼꇧꈴꁧꀐ。

   ꀉꑐꑍꍈꌠ,ꋋꇅꇬꑲꆀꋍꑊꀊꑙꇱꊏꅞꀐꌠꋍꑊꌧꇈ,ꃅꅍꎷꀋꊌꃅ,ꀃꑊꊨꏦꅑꀐꄷ。 vy0彝族人网（彝人网）- 彝族文化网络博物馆