《ꀉꏂꃀ》(ꉬ、ꃘ、ꏃ)-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀉꏂꃀ》(ꉬ、ꃘ、ꏃ)

ꄜꃑꄮꈉ： 2011-08-21 　|　ꁰꄻꊿ：beley工作室

　
　ꉬ
　
ꉇꀱꉈꅇꏮ,
ꀋꎃꅔꐯꑟ。
ꌬꁯꁞꇁꄰ,
ꎧꅝꏸꐉꏃ,
ꋍꉐꑋꊏꏃ;
ꈬꊯꈬꇌꅸ,
ꑮꒃꎆꃅꁵ;
ꁮꂮꈬꊰꄹ,
ꅪꈚꃢꃅꁵ;
ꇇꈯꇇꀘꑌ,
ꅩꃚꄀꃅꁵ。
ꉹꒃꇱꄓꀵ,
ꉈꈻꇇꁉꊭ,
ꐳꎵꆼꁠꏦ,
ꃅꉻꊌꉻꐷ,
ꃅꏈꂾꎓꀕ。
ꍪꋠꍪꊂꄑ,
ꀋꎃꅔꐯꄓ,
ꀋꎃꅔꉐꑟ。
ꇰꅔꉋꌬꑌ,
ꋍꅇꀕꎼꇁ:
“ꉌꇨꎧꏸꄐ,
ꊰꑻꉉꂸꎞ;
ꉬꑻꉉꂸꀱ;
ꆎꑌꅇꄤꎪ,
ꉡꑌꉉꄤꎪ,
ꂸꁵꅇꄤꉉ。”
ꈩꇎꒉꆀꄰ,
ꋍꅇꀕꎼꇁ:
“ꂸꃝꇈꂸꃝ,
ꂸꅝꇈꂸꅝ。”
ꉋꌬꋍꅇꀕ:
“ꅜꑌꆐꅪꈁ,
ꂸꅝꆐꅪꈁ。”
ꅪꎔꀉꏂꃀ,
ꋍꇬꋌꇁꅇ:
“ꂸꉬꄷꂸꄿ,
ꑍꋌꊿꆠꒃ,
ꇔꃅꇔꂸꄐ。”
ꐒꇁꈄꌊꏹ。
　
　ꃘ
　
ꈩꇎꒉꆀꃌ:
“ꉣꅪꀉꏂꃀ,
ꌬꁯꁞꇁꇑ,
ꃀꉌꎬꆏꉩ,
ꑓꁴꌧꉙꇤ,
ꇇꁉꑓꁴꄽ,
ꌧꉙꄽꉆꑌ,
ꑓꁴꄽꂸꉆ。
ꀉꂿꅩꄂꇆ!
ꅩꒆꃀꋴꐥ,
ꐛꑿꎬꈌꌡ,
ꃅꄜꑘꅍꄜ,
ꃅꈊꑘꅍꈊ;
ꍬꎹꍬꋚꃅ,
ꍪꎹꍪꋚꃅ。
ꊨꊭꋚꎹꀕ,
ꌺꄐꌺꒉꐛ,
ꃆꎥꃀꇇꀤ,
ꑟꑊꃀꇇꀤ。
ꀉꂿꅩꄂꇆ,
ꈀꄸꃀꇇꀤ?
ꏃꈓꑱꀱꑊ,
ꑊꇁꀿꃢꐛ。
ꅪꎔꀉꏂꃀ,
ꈀꄸꀿꃢꄻ?
ꅩꄂꇤꁦꉆ,
ꃀꑓꇤꁦꉜ,
ꋚꃅꃀꇇꀤ,
ꅩꄂꂸꐥꊂ,
ꃀꉌꋍꃢꎭ。
ꄡꄤꅪꑋꅉ,
ꑳꂾꅪꐹꅉ,
ꅪꐥꇿꁧꇆ!
ꑋꈌꁏꇁꃯ,
ꊨꊭꂾꎓꀕ,
ꁬꆰꉘꁇꁉ,
ꑋꊭꇪꀮꑌ,
ꇪꇬꂾꄧꀕ,
ꑋꊭꐋꐥꑌ,
ꀉꂿꃀꇁꃲ,
ꃀꇁꐋꂸꊌ。
ꉬꂻꈌꄂꉘ,
ꈌꄂꉘꄎꑌ,
ꅪꎔꀉꏂꃀ,
ꀉꂿꉘꂸꄐ。”
　
　ꏃ
　
ꆀꃅꀋꎃꅔ,
ꀋꎃꅔꉐꏭ,
ꈩꇎꒉꆀꄰ,
ꀉꉈꁮꆫꌺ,
ꆫꏹꃅꉇꆫ,
ꒊꃀꒉꋴꆫ。
ꀉꉈꁯꆫꌺ,
ꃅꉇꃅꄷꐥ,
ꁮꆫꌕꈎꆫ,
ꃆꃀꌕꆪꌷ,
ꏂꅪꐞꋍꇪ,
ꐎꏂꐞꋍꇪ,
ꐯꅪꐞꋍꇪ,
ꑱꏃꐞꋍꇪ,
ꍩꐎꐞꋍꇪ,
ꍩꆉꐞꋍꇪ,
ꐞꇪꊰꑋꇪ,
ꋌꌷꋌꌧꈤ。
ꃄꆜꀉꉈꑌ,
ꃅꐛꃅꋍꉔ,
ꌋꐓꀄꂼꂻ:
ꉪꏤꑳꂾꏭ,
ꑳꂾꏂꃢꀕ,
ꄯꊰꃴꇉꀕ,
ꒊꄜꃴꃅꃴ,
ꈌꊰꎹꊈꑝ。
ꉪꇊꉌꋲꀕ。
ꒊꃀꅶꁉꈴ,
ꈴꇊꉈꉜꏮ,
ꌕꑍꌕꉖꏮ,
ꀃꃅꑟꇁꃲ。
ꉪꏤꑳꂾꏭ,
ꄯꊰꃴꇉꀕ,
ꈾꏜꉻꈈꌡ,
ꈼꇊꈈꇉꏽ,
ꈌꊰꎹꊈꑝ。
ꌺꀱꃀꅇꅲ:
“ꄲꃅꄯꊰꉬ?
ꄲꃅꏜꁧꉬ?
ꄲꃅꊉꅍꉬ?
ꄲꃅꄹꃥꉬ?”
ꀉꉈꀉꂿꑌ,
ꋍꇬꅇꇁꆏ:
“ꈌꎂꍿꂸꌋ,
ꊿꎂꅇꂸꈨ,
ꈨꅍꂸꐥꅀ?
ꅽꅫꀉꏂꃀ,
ꌬꁯꁞꇁꇑ,
ꌌꁧꌕꑍꐛ。”
ꌺꀱꃀꅇꅲ:
“ꃅꆈꁨꏂꌺ,
ꆧꇬꉆꀕꌦ?”
ꃀꇁꋍꅇꀱ:
“ꃄꑌꆧꇬꉆ,
ꊀꑌꆺꑳꎍ。”
ꃄꆜꀉꉈꑌ,
ꃅꒃꃅꊀꄅ,
ꉹꒃꇱꄓꀵ,
ꉈꈻꇇꁉꊭ。
ꌣꄹꃅꄩꑌ,
ꏅꄹꌕꇇꏶ,
ꁧꏡꋍꏢꁏ,
ꇭꋓꑍꏢꈹ,
ꑭꉅꃀꌠꊝ。
ꑭꉅꃀꌠꏭ:
“ꊿꈨꈴꂾꀕ?”
“ꄲꃅꊿꂸꐚ,
ꋍꈨꈴꁧꃲ。”
ꃄꆜꀉꉈꑌ,
ꏅꄹꋍꇅꏶ,
ꑍꁧꌔꇉꈴ。
ꇌꆫꃀꌠꊝ:
“ꆏꐥꄚꇬꐥ,
ꊾꈨꈴꂾꀕ?”
“ꃅꊿꉐꑋꊏ,
ꐳꒃꆽꁠꏦ,
ꈴꌠꈴꁧꃲ。”
“ꈹꇁꂪꄿꀕ?”
“ꅽꃅꃨꃲꆏ,
ꈹꑌꂪꄿꑴ。”
ꏅꄹꋍꇅꏶ,
ꃅꆈꑬꈁꃰ。
ꌬꁯꁞꇁꄰ,
ꎺꐎꁧꃴꑟ,
ꌩꏪꆈꊉꀕ。
ꉋꌬꋍꅇꀮ:
“ꋋꆹꁞꇁꄰ,
ꃅꂁꂽꁿꌩ。”
ꅪꎔꀉꏂꃀ,
ꋍꇬꋌꇁꀱ:
“ꋌꐥꋌꇧꄮ,
ꃅꂁꂽꁿꌩ,
ꋌꐥꋌꊯꄮ,
ꎟꃀꅤꈉꐛ。”
ꁧꇈꈴꇊꃅ,
ꒊꃀꒉꋴꑟ。
ꉋꌬꋍꇬꀮ:
“ꌬꁯꁞꇁꄰ,
ꃢꎔꋌꒉꉬ。”
ꅪꎔꀉꏂꃀ,
ꋍꇬꋌꇁꀱ:
“ꋌꐥꋌꇧꄮ,
ꃢꇁꈚꋌꅉ,
ꋌꐥꋌꊯꄮ,
ꃱꇁꀖꋋꅉ。”
ꁧꇈꈴꇊꃅ,
ꃪꃹꃪꑭꑟ。
ꉋꌬꋍꇬꀮ:
“ꌬꁯꁞꇁꄰ,
ꅰꌋꊐꅉꉬ。”
ꋌꐥꋌꇧꄮ,
ꅰꌋꊐꅉꐛ,
ꋌꐥꋌꊯꄮ,
ꍀꇁꐤꅉꐛ。
ꁧꇈꈴꇊꃅ,
ꐦꃀꐦꊂꑟ,
ꉋꌬꋍꇬꀮ:
“ꌬꁯꁞꇁꄰ,
ꃢꇁꈚꆗꅉ。
ꋌꐥꋌꊯꄮ,
ꁬꇁꆰꆗꐦ。”
ꃄꆜꀉꉈꑌ,
ꏅꄹꋍꇅꏶ,
ꁦꌕꇈꇖꈴ,
ꁮꆫꃀꌠꊝ:
“ꆏꐥꄚꇬꐥ,
ꅫꇂꀉꏂꃀ,
ꈴꇁꆏꂾꀕ?”
ꁮꆫꃀꌠꑌ,
ꋍꇬꋌꇁꀱ:
“ꀐꆹꅩꇅꀕ,
ꃢꆹꊫꇵꈚ,
ꃆꍬꉐꑋꊏ,
ꅫꎔꀉꏂꃀ,
ꉫꀕꆹꂸꐚ,
ꈴꌠꈴꁧꃲ。”
ꏅꄹꋍꇅꏶ,
ꁦꇖꇈꉬꈴ,
ꍶꆫꃀꌠꂿ:
“ꆏꐥꄚꇬꐥ,
ꅫꎔꀉꏂꃀ,
ꈴꇁꆏꂾꀕ?”
“ꉫꀕꆹꂸꐚ,
ꈴꌠꈴꁧꃲ。”
ꃄꆜꀉꉈꑌ,
ꏅꄹꋍꇅꏶ,
ꎺꐎꁧꃴꑟ,
ꀏꄹꌔꇬꇴ,
ꂸꈨꇈꂸꈨ。

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꀉꏂꃀ》(ꉆ、ꈬ) ꊁꁬꌠ：《ꀉꏂꃀ》(ꇖB)

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ