《ꀉꏂꃀ》(ꉆ、ꈬ)-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀉꏂꃀ》(ꉆ、ꈬ)

ꄜꃑꄮꈉ： 2011-08-21 　|　ꁰꄻꊿ：beley工作室

　ꉆ
　
ꃄꆜꀉꉈꑌ,
ꁞꇁꋦꑎꑟ,
ꁞꇁꑳꂾꆏ,
ꀉꉈꋍꇬꇴ:
“ꌬꁯꁞꇁꄰ,
ꐔꀋꉘꌩꅂ,
ꋍꐘꅂꉏꂿ。
ꄇꈜꃀꊰꑋ,
ꈛꌎꌺꊯꌕ,
ꄇꈜꈴꂯꅀ,
ꈜꌎꈴꇁꂯ?”
ꁞꇁꑳꂿꑟ,
ꁞꇁꀕꅇꀱ:
“ꄇꈜꃀꊰꑋ,
ꈛꌎꌺꊯꌕ,
ꄇꈜꈳꑌꄿ,
ꈛꌎꈴꑌꄿ。”
ꀉꉈꋍꊱꊝ:
“ꑋꈌꑟꇁꃲ,
ꑋꈌꈀꄸꁉ?
ꑋꆳꆲꌙꀕ;
ꑋꊭꂾꎓꀕ,
ꇪꀮꂾꄧꀕ,
ꑋꈌꇪꀮꁉ。”
ꁞꇁꋍꊱꊝ:
“ꃅꎸꑟꇁꃲ,
ꃅꎸꈀꄸꁉ?
ꃅꃴꄄꆈꄓ,
ꂿꃋꇴꇐꀕ,
ꎰꄹꉐꌦꊰ,
ꁧꈪꒉꇁꇉ,
ꁧꈪꀠꃀꇖ,
ꃅꎸꀠꃀꁉ。”
ꀉꉈꋍꊱꊝ:
“ꃅꍵꑟꇁꃲ,
ꃅꍵꈀꄸꁉ?
ꃅꃴꆳꐎꂇ,
ꃄꅉꆳꏂꂇ,
ꆳꏂꉼꏒꀕ,
ꆲꆈꇴꇐꀕ,
ꃅꍵꑾꃅꁉ。”
ꀉꍝꋍꊱꊝ:
“ꃅꋆꑟꇁꃲ,
ꃅꋆꈀꄸꁉ?”
ꀉꍝꊝꂸꇮ,
ꌩꏪꌩꇽꋓ,
ꋓꑌꏣꂸꄿ;
ꀀꃌꀀꊪꋓ,
ꋓꑌꏣꂸꄿ。
ꁞꇁꑳꂾꏭ,
ꀉꉈꉹꁻꌺ,
ꃀꇁꋍꇅꁻ,
ꁭꅐꊖꎐꍣ;
ꊁꇁꋍꇅꁻ,
ꁮꐚꊖꎐꍣ;
ꌕꇅꁻꇬꆏ,
ꒈꂪꊖꎐꍣ;
ꇖꇇꁻꇬꆏ,
ꒈꃶꊖꎐꍣ;
ꉬꇇꁻꇬꆏ,
ꄡꄤꈯꇬꍣ。
ꁞꇁꋋꋍꑷ,
ꋍꑷꄓꉈꍠ,
ꄹꑌꁨꂸꒉ,
ꈺꑌꉈꂸꇁ。
ꀉꏂꃀꇁꍠ,
ꑻꄹꍠꎼꇁ。
ꌬꁯꁞꇁꄰ,
ꈀꏂꀕꂸꄿ。
ꋇꄓꋯꇈꃅ:
ꆿꃅꌕꂾꄝ,
ꀉꉈꇱꂿꄷ。
ꅫꎔꏂꃀꈨ,
ꅫꎔꏂꃀꑌ,
ꇇꈻꂢꇁꉉ:
“ꅫꇂꀉꏂꃀ,
ꂸꏦꇈꂸꏦ,
ꃅꆜꀉꉈꑌ,
ꉹꆹꇱꄓꀵ,
ꉈꈻꇇꁉꊭ,
ꄤꐒꉢꄤꐒ。”
ꃄꆜꀉꉈꑌ,
ꑳꂾꉆꄉꉜ,
ꆿꃅꌕꂾꂿ,
ꋍꇅꋌꇁꄝ,
ꆿꃅꌕꂾꑌ,
ꉈꌸꉈꇇꆺ。
ꃄꆜꀉꉈꑌ,
ꋍꉔꆿꑆꐒ,
ꑆꐒꆿꂿꉱ,
ꆿꂿꈬꇬꀀ,
ꆿꂪꑬꏸꑐ。
ꊂꑋꏃꃅꄜ,
ꁞꇁꋍꈭꆈ,
ꆿꂪꆣꈭꀕ。
ꁞꇁꋍꅇꀕ:
“ꀉꉈꆿꇣꋠ。”
ꊁꇁꋍꅇꀕ:
“ꂸꋠꇈꂸꋠ,
ꆿꃅꆿꌕꂾ,
ꆿꌦꐦꆺꀮ。”
ꌬꁯꁞꇁꑌ,
ꋍꅇꀕꎼꇁ:
“ꆿꑆꐒꇁꋓ,
ꐥꑌꀑꑌꒉ,
ꌥꑌꀑꑌꒉ,
ꀑꑌꑅꒉꐒ。”
ꃄꆜꀉꉈꑌ,
ꇇꇤꆿꂪꌭ,
“ꅐꇁꆿꅐꇁ!”
ꆿꑆꏅꄹꐒ。
ꌭꁯꁞꇁꄰ,
ꆿꌺꑆꑍꁬ,
ꎹꄓꐯꑎꐒ,
ꐒꑌꐒꂸꈤ。
ꌬꁯꁞꇁꄰ,
ꋍꅇꀕꎼꇁ:
“ꃄꆜꀉꉈꑌ,
ꈁꃅꉪꉎꎆ。”
ꌬꁯꁞꇁꄰ,
ꅪꎔꀉꏂꃀ,
ꈁꂸꀬꃅꈪ。
　
ꈬ
　
ꃄꆜꀉꉈꑌ,
ꅫꎔꏂꃀꏃ,
ꏮꇁꈜꈢꑟ,
ꃪꃹꃪꑭꑟ。
ꃪꃅꐛꑿꌺ,
ꇁꇊꋍꅇꄜ:
“ꈊꇁꉪꅍꈽ。”
ꏃꇊꃪꐬꃹ,
ꃪꑭꉓꍚꀕ。
ꅪꎔꀉꏂꃀ,
ꇇꎇꃪꊂꌎ,
ꑕꇊꃪꊂꎑ,
ꂸꍕꇁꊜꄉ。
“ꃇꌺꀉꉈꇆ!
ꉡꉈꇬꃲꆏ,
ꃢꐎꋍꂷꎹ,
ꍶꐎꋍꂷꎹ,
ꑷꐎꋍꂷꎹ,
ꌕꑞꌕꐎꆦ,
ꅽꅫꈭꋏꇁ。”
ꃄꆜꀉꉈꑌ,
ꎹꇈꆹꇈꃅ,
ꂸꑟꅉꂸꐥ。
ꃄꆜꀉꉈꑌ,
ꀱꇊꇁꇈꃅ,
ꊰꑋꃪꑭꂿ,
ꊰꑋꃪꐬꇬ,
ꅫꇂꀉꏂꃀ,
ꐎꈯꋍꁆꂿ。
ꊰꑋꃪꑭꆏ,
ꃅꃴꄄꆈꄓ,
ꄄꆈꉐꌦꄟ,
ꎰꄹꉐꊰꇁ。
ꃢꐎꃢꋍꂷ,
ꃢꆉꊖꐎꍀ,
ꊖꐎꉐꎟꊰ,
ꅫꈭꋏꂸꄿ。
“ꃇꌺꀉꉈꇆ!
ꉡꉈꇬꃲꆏ,
ꁧꏡꋍꏢꈴ,
ꀏꄹꋍꇬꇴ,
ꅽꅫꀉꏂꃀ
ꃪꑭꉼꏒꀕ,
ꅽꅇꀰꎂꀕ。”
（ꌐ）
　　
ꉉ ꀽ:
　
ꀑꃅ:ꆃꇤꄜ,ꒉꆈꃅꄷꆏꆃꇤꏭ“ꀑꃅ”ꄷꅉꐥ。
ꀋꍞ:ꊿꑞꑵ。
ꆲꑌ:ꊿꑞꑵ。
ꃆꃀ:ꃆꃀꉐꂷꈀꊝꈁꉙꌠꃅꄜ。
ꒌꆀ:ꋦꊜꌺꁨꇖꄜꃆꂮꀘꌠ。
ꑣꃴ:ꌌꁱꑳꇬꄔꌠ,ꑣꀊꃴꑵꌠꄜ。
ꋪꌸꀉꑳ:ꊾꂓ。
ꃉꌸꀊꊼ:ꊾꂓ。
ꉬꂻ:ꊾꂓ。
ꐞꇪ:ꒊꆈꌜꇑꇂꑤꇬ,ꆈꌠꌒꆀꋌꑵꆏ,ꊿꀉꑌꃅꏓꐮꋍꈜꑌꄉ,ꃆꃀꉐꂷꊝꋒꇬ,ꂷꁧꐞꇪꅑꑠꁧꋐꌌ,ꇢꊪꇬꍣꄉꇈ,ꑕꄲꆺꂷꆸꀮꃅꄉ,ꉙꀊꏂ、ꀊꐎ、ꀊꃴ、ꀊꅪꑠꀉꑌꑵꃅ,ꄻꂷꇪꇬꄀꄉꇈ,ꋍꊱꊝꌐꄎꂶꌠꆏ,ꑕꄲꋍꂷꑢꋠꇬꎷꑠꑵꄜ。

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꃰꎝ》(ꋍ) ꊁꁬꌠ：《ꀉꏂꃀ》(ꉬ、ꃘ、ꏃ)...

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ