ꀨꏾꌠ > ꋊꃆꌧꇐ

《ꃰꎝ》(ꇖ)
ꄜꃑꄮꈉ: 2011-08-25  | ꁰꄻꊿ:ꇓꆈꀋꃀ

 
ꇖ、ꉒꀊꋊꉬꑴ
ꉒꉾꑍꌺꇢ,
ꇐꁧꃋꈌꄃ。
ꉒꁌꃋꃴꌺ,
ꃋꃴꌺꆏꋍ,
ꌺꊌꌺꃼꑍ,
ꌺꃼꌺꈍꌕ,
ꌺꈍꀋꌌꇖ,
ꀋꌌꀋꄙꉬ,
ꀊꄙꇐꁍꃘ。
ꉒꌅꉒꇐꁍ,
ꒆꊂꊯꊪꈎ,
ꑌꅪꑇꇐꋧ,
ꑌꅪꑇꇐꌌ,
ꒆꊂꊯꌕꈎ,
ꎹꀕꑇꇐꋧ,
ꎹꀕꑇꇐꌌ;
ꒆꊂꊯꈬꈎ,
ꂿꃋꑇꇐꌌ;
ꒆꊂꊯꈬꈎ,
ꂿꃋꑇꇐꌌ;
ꒆꊂꑍꊏꑋꈓꆏ,
ꉗꈌꑇꇐꋧ,
ꉗꈌꑇꇐꌌ,
ꉒꌅꉒꇐꁍ,
ꃀꊃꉒꇐꆂ,
ꀘꊃꄀꅪꏂ,
ꋋꌕꑌꆹꍂ,
ꌅꇓꑍꆀꃅ,
ꌅꊂꃺꌺꉬ。
ꍰꒆꀕꊂꍯ,
ꒉꁧꃼꀻꀀ。
ꒉꁧꃼꀻꍯ,
ꌦꈌꊖꆂꀀ。
ꌦꈌꊖꆂꍯ,
ꄹꑘꌺꈌꀀ。
ꄹꑘꌺꈌꍯ,
ꏂꆠꈨꇐꀀ。
ꆃꀕꏂꀑꀀ(ꂱꀕꏂꀑ)。
ꆃꀕꏂꀑꍯ,
ꑿꃅꈢꆹꀀ。
ꑿꃅꈢꆹꍯ,
ꒈꀑꌕꇉꀀ。
ꒈꀑꌕꇉꆏ,
ꌅꑴꉒꇐꁍ,
ꃀꑴꉒꇐꆂ,
ꀘꑴꄀꅪꏂ,
ꃄꎖꆹꂿꄷ。
ꉘꇌꋍꋒꅥ,
ꌿꑊꆷꊂꄉ,
ꃰꏃꋍꊂꍯ;
ꁭꑛꋍꋒꅥ,
ꐞꐰꆷꊂꄉ。
ꇌꆂꇁ,
ꀊꉼꋦꋍꋏ,
ꎰꆂꋦꑍꋏ。
ꌅꊂꉒꇐꁍ,
ꍰꒃꀕꊂꍯ,
ꍞꑌꃅꆂꀀ。
ꍞꑌꃅꆂꍯ,
ꇌꆂꃅꆦꒉ,
ꑿꁮꅔꇉꀀ。
ꑿꁮꅔꇉꆏ,
ꁍꀊꉒꇐꁍ,
ꃘꈎꀋꏃꐋ,
ꆀꃅꆀꀋꀀ,
ꎰꃅꉙꀑꃅ,
ꎰꃅꁮꄉꃅꄸꉬ,
ꀂꍯꄚꈜꀀ。
ꑿꁮꅔꇉꍯ,
ꄯꄲꃰꇐꀀ。
ꄯꄲꃰꇐꆏ,
ꆫꀊꉘꂇꀕ;
ꄯꄲꐯꑊꆏ。
ꂿꀊꅔꁮꀕ,
ꇭꆹꇭꑴꇬ,
ꋍꑍꐚꊰꋩꅉꇬ,
ꐚꊰꊋꂸꉆ,
ꋍꉖꃥꊰꋩꅉꇬ,
ꌵꋂꊌꂸꅲ。
ꄯꄲꃰꇐꍯ,
ꄯꄲꅔꃴꈴ,
ꋍꆀꄹꈬꀀ。
ꋍꆀꄹꈬꍯ,
ꉒꊃꃀꒉꌺ,
ꑌꈭꅔꏯꆏ,
ꄮꑟꌕꎔꃨ。
ꄅꈌꉘꌒꍯ,
ꉒꌅꉒꇐꁍ,
ꍰꉙꃅꆂꑟ。
ꍰꉙꃅꆂꆏ,
ꉒꍯꉾꍯꌆ,
ꉒꑌꉾꂸꌧ,
ꊈꅐꇁꀐꄷ;
ꉾꑌꉒꂸꌧ,
ꊴꐷꇁꀐꄷ。
ꉾꍯꐙꅍꀕ。
ꉒꀋꃀꌺꒉ,
ꌠꈯꄹꃀꉙ,
ꉒꍯꐙꅍꀕ。
ꋋꆹꉬꊂꆏ,
ꉒꀘꊪꏃꉐ,
ꉾꀘꉾꀊꃼ。
ꌙꄹꀜꃅꉆ。
ꂴꆽꉒꂓꄜ,
ꉾꄜꆹꇈꊂ,
ꉾꑌꉂꇖꀕ。
ꊁꆏꉾꂓꄜ,
ꉒꄜꆹꇈꊂ,
ꉾꑌꒊꌋꀕ。
ꋋꆹꉬꊂꆏ,
ꉾꀘꉾꊃꃼ,
ꁙꋍꅔꅐꇁ。
ꉒꇁꉾꑍꁯ,
ꋋꊂꃝꄷꋯ,
ꋌꊂꐛꄮꋯ。
ꉒꇁꉾꑍꁯ,
ꉒꃅꉾꏣꅔ。
ꉾꇌꅥꉒꍈ。
ꃝꄷꋯꇈꆏ,
ꀒꑍꐛꇌꉴ,
ꐛꇌꋠꋍꑍ,
ꃋꃴꇴꇖꀕ,
ꃄꅉꆈꃱꀕ,
ꅔꁍꉐꒉꌬ。
ꊂꑋꄮꇌꅥ,
ꄮꇌꅥꋍꑍ,
ꉒꋍꀕ,ꉐꂳꀕꃅꐛ。
ꊁꇁꃝꇌꋠ,
ꃝꇌꋠꋍꑍ,
ꃋꌒꄂꂸꅑ,
ꃅꌒꇓꂸꎍ,
ꈨꅐꄎꌬꀕ,
ꆪꅐꁨꇅꀕ。
ꋍꑍꌕꇌꋠ,
ꑍꀕꃘꇌꋠ。
ꉒꇁꉾꑍꁯ,
ꃝꇉꃼꊂꆏ,
ꉾꆹꊰꁍꁵ,
ꉒꃀꐎꇖꒃ,
ꉾꌺꊰꁍꁵ,
ꉾꃀꏂꉐꒃ,
ꉒꌺꊰꁍꒆ。
ꉒꇁꉾꑍꁯ,
ꃝꇈꃼꊂꆏ,
ꄯꁏꇁꎜꄉ。
ꌕꃀꐔꀋꑌ,
ꌩꄩꑙꀋꐔ,
ꉺꇓꃅꀋꐔ,
ꅔꁍꐔꀋꐔ,
ꄡꁏꇁꎜꄉ。
ꌕꃀꏸꀋꑌ;
ꇈꈬꎼꀋꏸ,
ꉺꀑꃅꀋꏸ;
ꅙꁍꍀꀋꏸ,
ꄡꁏꇁꎜꄉ。
ꌕꃀꂥꂸꅿ,
ꒉꃴꉛꂸꂥ,
ꅔꃴꏂꂸꂥ,
ꅔꄩꀠꂸꂥ,
ꄡꁏꇁꎜꄉ。
ꂸꐈꃋꂸꐈ,
ꃋꐎꀿꂸꐈ,
ꄂꏸꋦ、ꉒꆉꎑꌦꈐ,
ꂸꁏꇁꎜꄉ。
ꂸꐈꃅꂸꐈ,
ꊖꆈꃀꂸꐈ,
ꌿꉘꋦ,ꐔꇌꐥꌦꈐ,
ꄡꁏꇁꎜꄉ。
ꂸꐈꃪꂸꐈ。
ꃪꍆꀕꂸꐈ
ꃀꑌꅐꁱꀕ,
ꌺꑌꅐꁱꀕ,
ꅐꈁꁱꌦꈐ,
ꋋꑌꃝꎜꄉ。
ꂸꐈꑛꂸꐈ,
ꒉꑛꃀꂸꐈ,
ꃀꑌꃚꆷꀕ,
ꌺꑌꃚꆷꀕ,
ꃚꈁꆷꌦꈐ,
ꋋꑌꃝꎜꄉ。
ꉒꌅꉒꇐꁍ,
ꍰꒃꀕꊂꍯ,
ꍰꉘꃅꆈꀀ。
ꍰꉘꃅꆈꍯ,
ꋪꀕꅔꌒꀀ。
ꅔꌒꃅꄸꉬ,
ꐧꌒꃅꂸꉬ。
ꅔꌒꏂꐩꈜ,
ꃋꇁꀊꊂꆏ,
ꆃꋦꋍꊂꂅ,
ꎰꋦꋍꊂꂅ。
ꋋꆹꃅꄸꉬ。
ꀀꍯꄚꂸꄃ。
ꋪꀕꅔꌒꍯ,
ꈭꍬꀕꉘꉆ。
ꉒꌅꉒꇐꁍ,
ꆃꏯꃋꈌꉜ,
ꉒꍯꃋꈌꈭ,
ꌵꒉꃋꈌꐛ。
ꅔꌒꃋꈌꐥ,
ꄯꈍꉒꆂꀀ。
ꄯꈍꉒꆂꆏ,
ꁍꒃꊌꌅꑌ,
ꉒꌅꉒꇐꁍ,
ꉒꃀꀘꀊꑌ,
ꉒꀘꄐꏃꉐ,
ꋌꌕꒆꆹꍂ,
ꑍꆏꋯꇌꋠ,
ꌋꆏꆹꑛꅸ,
ꑀꐳꌬꊂꊐ,
ꅉꁮꄙꑛꈎ,
ꅉꎹꉐꑛꈎ,
ꄙꑻꌉꇈꇁ,
ꉐꑛꈎꅸꇁ。
ꆀꃅꆏꌠꈤ。
ꉒꊂꌺꈬꈤ。
ꃘꍯꃋꃴꆹ,
ꌕꍯꃅꈋꋦ。
ꐎꊃꏂꏓꋠ,
ꀑꉘꀑꅪꐩ,
ꆀꊃꎰꃥꌵ,
ꀑꏃꊂꎭꐥ,
ꃅꏂꈬꂷꋩ。
ꋌꄹꉘꃀꉆ。
ꋋꉬꐥꌠꆹ,
ꌥꌅꆃꁌꀿ。
ꁌꊃꀊꌒꋍ,
ꀊꌒꌥꌅꑍ,
ꌥꌅꀊꑌꌕ,
ꀊꑌꇐꁫꇖ,
ꇐꁫꁍꏃꉬ,
ꁍꏃꁉꑴꃘ,
ꁉꑴꀊꃼꏃ,
ꀊꃼꄹꄙꉆ,
ꄹꄙꇐꁉꈬ,
ꇐꁉꂷꉬꊰ,
ꂷꉬꑣꒉꋍ,
ꑣꒉꀊꈌꑍ,
ꀊꈌꀊꁮꌕ,
ꀊꁮꂷꊪꇖ,
ꂷꊪꂷꇇꉬ,
ꂷꇇꀊꁉꃘ,
ꀊꁉꄆꁫꏃ,
ꄆꁫꇉꀕꉆ,
ꇉꀕꏂꑴꈬ,
ꏂꑴꒉꌒꊰ,
ꀊꇨꆂꈈꋍ,
ꆂꈈꀊꌅꑍ,
ꀊꌅꐩꁮꌕ,
ꐩꁮꊈꂻꇖ,
ꊈꂻꀊꊡꉬ,
ꀊꊡꇜꑌꃘ,
ꇜꑌꈎꇇꏃ,
ꈎꇇꌕꅪꉆ,
ꌕꅪꀊꄸꈬ,
ꀊꄸꅪꁫꊰ,
ꅪꁫꉂꑴꋍ,
ꉂꑴꇐꍝꑍ,
ꇐꍝꑘꎺꌕ,
ꑘꎺꁌꍀꇖ,
ꁌꍀꇐꇱꉬ,
ꇐꇱꃀꋓꃘ,
ꃀꋓꀘꍀꏃ
ꀘꍀꀘꆿꉆ,
ꀘꆿꐬꌒꈬ,
ꐬꌒꀋꏃꊰ,
ꀋꏃꆿꌺꋍ,
ꆿꌺꇐꈍꑍ,
ꇐꈍꁮꀕꌕ,
ꁮꀕꈍꑴꇖ,
ꈍꑴꀊꃅꉬ,
ꀊꃅꃨꎭꃘ,
ꐯꇯꇖꊰꃘꋏꉬꑴ。
ꀊꑐꑌꌒꋍ,
ꑌꌒꆿꎑꑍ,
ꆿꎑꐚꃋꌕ,
ꐚꃋꁨꉙꇖ,
ꁨꉙꁠꉐꉬ,
ꁠꉐꌅꀋꎭꊏꃘꒉꃶꆀ,
ꃅꆹꀕꄰꄜ。
ꆹꀕꀊꃅꃘ,
ꀊꃅꀊꈍꏃ,
ꀊꈍꁌꈬꉆ,
ꁌꈬꇂꀠꈬ,
ꇂꀠꏂꑴꊰ,
ꑍꇜꀊꃼꋍ,
ꀊꃼꆿꎐꑍ,
ꆿꎐꐬꑘꌕ,
ꐬꑘꀊꑗꇖ,
ꀊꑗꁌꈬꉬ,
ꁌꈬꀊꑳꃘ,
ꀊꑳꀊꌒꏃ,
ꀊꌒꇐꃀꉆ,
ꈬꆳꀋꏂꈬ,
ꀋꏂꀋꃰꑍꊏꋊꇉ。
ꉒꊃꌠꌺꐭ。
ꇉꃋꌕꇉꀀ,
ꆃꃅꆹꀕꇜ。
ꌀꀋꏂꉬꄀ,
ꐎꀋꏂꏓꋠ。
ꆹꀕꀊꃅꀋꎝꎭꂵꈤ。
ꏉꊃꇉꃅꀀ。
ꄚꀀꄚꋦꀐꄷ。
ꐚꃋꁨꉙꌺꇖꇐꅔꈤ,
ꏉꊃꇉꃅꀀ;
ꀘꁵꀋꑍꈤ,
ꀊꆫꀊꎺꀀ。
ꄜꈬꆀꁌꀿ,
ꌅꊰꌅꋌꇭ。
ꌺꒉꐥꑐꈤ,
ꌩꇤꃰꑊꀀ。
ꐚꃋꁨꉙꈤ,
ꁨꉙꁠꉐꈤ,
ꁠꉐꉒꎐꈤ,
ꉒꎐꇖꉬꆃꃤꇈ。
ꐚꃋꀑꉬꈤ,
ꀑꉬꄹꑊꈤ,
ꄹꑊꁧꃅꈤ,
ꁧꃅꂷꃅꈤ,
ꆀꃤꂵꉌꇈ。
ꐚꃋꁨꉙꈤ,
ꁨꉙꁠꉐꈤ,
ꁠꉐ(ꌅꀊꎭꊏꈤ)
ꎭꊏꒉꀑꈤ,
ꒉꀑꒉꄸꈤ,
ꒉꄸꀉꎵꈤ,
ꀉꎵꆂꈨꈤ,
ꆂꈨꆿꁌꈤ,
ꆿꁌꄹꊈꈤ。
ꋍꊌꑛꅥꐔ,
ꑛꅥꅔꁱꐛ。
ꐚꃋꌺꌕꄜ。

ꇁꀦ: ꆀꉙꊅ ꁰꄻꌠ:  |  ꄜꃑꌠ: beley ꌤꃅꅉ