ꀨꏾꌠ > ꋊꃆꌧꇐ

《ꀊꌱꑘ》
ꄜꃑꄮꈉ: 2011-10-23  | ꁰꄻꊿ:ꆃꎭꍏꁰꁏꏳ ꁰꄻ

                                                   ꅇ ꌐ ꁌ
《ꌱꑕ》ꋋꎴꆹ,ꈬꉘꃅꄷꆈꌠꑵꉙꈐꇬꉂꐪꑵꉙꂓꅑꂒꋦ,ꉙꌒꅲꌒ,ꀊꅰꃅꈎꄜꀊꏀꌠꋌꉗꋋꅲꏽꑠꎴꉬ。ꋋꆹ,ꉂꐪꉂꐛꉙ,ꎭꃆꅧꑘꄜ;ꃜꏦꀉꆹꌠꏭꁏ,ꃝꐨꑴꑳꌅꌠꅔ;ꀋꇮꀋꑳꌠ。ꀋꑗꀋꈨꌠꊂꍃꏽ,ꑗꇖꈨꂟ,ꑖꄏꈨꎹꌠꉬ。
《ꌱꑕ》ꋋꎴ,ꆈꌠꃅꄷꀋꐥꅉꀋꐥ,ꀋꉙꅉꀋꐥ。ꄚ,ꀋꉊꂴꆽꄯꒉꃅꁱꄉꌠꀊꅰꀋꐥ,ꀉꑌꌠꈍꊉꈻꄉꉙꑵ,ꑠꅹ,ꂱꑱꃅꄷꅇꂷꀁꑌꀉꑌ,ꀁꎴꀊꎴꐨꀊꅰꐯꀋꌡ。ꀋꃋꆺꃅꂿꈬ、ꇢꇑꃀꁧ、ꀉꉷꄮꌅ、ꒈꏂꁌꐘ、ꂮꑴꍿꆈ、ꆺꃅꏪꐦ、ꐟꈮꇤꇉꃅꄷꋋꈨꇬꄉ,ꋍꈨꉪꏓꈹꌊꋊꇱꍬꇱ,ꁰꄻꄉꄯꒉꋐꃅꅐꀐ。ꋊꇱꍬꇱꄉꊂ,ꋍꎆꋍꎆꃅꌗꇬ,ꋍꄘꉬꉐꎆꀋꋌꐥ。


ꌱ ꑕ
ꀂ,ꉠꌱꑕ!
ꀂ,ꉠꌱꑕ!
ꑍꆏꈧꌺꎔꀕꃅꈬꌬ,
ꄂꎔꈍꑍꋍꈫꋍꇌꏮꀋꐚ;
ꌊꆏꆧꌺꎔꀕꃅꈬꅑ,
ꏸꎔꈍꑍꋍꈫꋍꇌꏮꀋꐚ。

ꀂ,ꉠꌱꑕ!
ꀂ,ꉠꌱꑕ!
ꁧꎔꃧꃨꆎꂷꑌ,
ꄀꉘꈍꑍꋍꈫꋍꄩꃰꀋꐚ;
ꇉꎔꇉꃨꆎꂷꑌ,
ꉆꎔꈍꑍꋍꈫꋍꇌꀜꀋꐚ;
ꌩꎔꌩꃨꆎꋍꁧ,
ꊨꊭꎔꀕꈍꑍꌩꄩꐛꀋꐚ;
ꁧꎔꂚꃨꆎꋍꀮ,
ꐛꑿꎔꀕꈍꑍꃨꄩꍘꀋꐚ。

ꀂ,ꉠꌱꑕ!
ꀂ,ꉠꌱꑕ!
ꀊꄸꄩꏯꏭ,
ꑌꇀꑿꈜꆎꋍꏢ,
ꁮꎔꈍꑍꄚꈴꉗꅐꁧꀋꐚ,
ꆫꌠꈍꑍꉌꁠꄚꊂꈹꀋꐚ。

ꀊꄸꀏꏯꏭ,
ꆂꒉꒊꃀꆎꋍꂡ,
ꒉꎔꈍꑍꄚꈴꒈꂪꌕꏃꈤꀋꐚ,
ꉛꎔꈍꑍꉌꁠꄚꐊꉙꐛꁧꀋꐚ。

ꀊꄸꅶꁉꏭ,
ꈜꐎꈜꎔꆎꋍꏢ,
ꅪꎔꈍꑍꄚꈴꁮꇀꂥꅍꁧꀋꐚ,
ꆗꎔꈍꑍꉌꃀꄚꁠꆟꁮꁧꀋꐚ。

ꀂ,ꉠꌱꑕ!
ꀂ,ꉠꌱꑕ!
ꊸꐪꈧꌺꌌ,
ꈧꌺꑍꊸꉖꂸꊸꇈꃲ;
ꎔꐪꆧꌺꈻ,
ꆧꌺꃅꒉꃅꅂꇢꁧꃲ;
ꉂꐪꀊꌱꁨ,
ꑍꇁꌊꉂꏿꇈꃲ。
 

ꇁꀦ: ꆀꉙꊅ ꁰꄻꌠ:  |  ꄜꃑꌠ: beley ꌤꃅꅉ