《ꀊꌱꑘ》（ꑍ）-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀊꌱꑘ》（ꑍ）

ꄜꃑꄮꈉ： 2011-10-23 　|　ꁰꄻꊿ：ꇓꆈꀋꃀ

(ꑍ)
ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ
ꅘꉘꂸꃃꌡꃅꋓꃅꅾꍈꄸ,
ꈥꇁꃹꌺꌡꃅꋓꃅꒅꍈꄷ,
ꎺꇁꆳꌺꌡꃅꋓꃅꃧꍈꄸ,
ꐓꇁꇍꌺꌡꃅꋓꃅꀛꍈꄸ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꈌꅑꑍꁆꆏꉉꉢꒉꏽꍈꄸ,
ꅺꅑꑍꂷꆏꉉꉢꅲꃄꍈꄸ,
ꑓꅑꑍꍈꆎꏮꉢꉚꃄꍈꄸ,
ꇇꆹꑍꍈꆏꃅꉢꉜꋼꍈꄸ。

ꀂ,ꉠꌱꑕ!
ꀂ,ꉠꌱꑕ!
ꌧꈿꁉꈿꑳꈫꑳꊂꑋꄮꇬ,
ꏂꃴꏂꆈꆏꍔꉢꇢꃄꑌꌒ,
ꉢꍔꆏꇢꃄꑌꈜꀕꌒꇈꃲ;
ꌕꇀꈈꅇꆏꉉꉡꇰꃄꑌꌒ,
ꉢꉉꆎꇰꃄꑌꈜꀕꌒꇈꃲ;
ꉂꇀꑟꐪꆎꏮꉢꉚꃄꑌꌒ,
ꉡꏮꆏꉚꃄꑌꈜꀕꌒꇈꃲ。

ꉠꌱꉣꑊꆹ,
ꉌꃅꑓꌒꈵꃴꈵꎓꑋꄮꇬ,
ꉼꉹꃬꋓꆏꂢꉡꇰꃄꑌꌒ,
ꉢꂢꆎꇰꃄꑌꈜꀕꌒꇈꃲ;
ꀊꌱꁮꀋꐭ,
ꉼꉹꌱꅇꄛꑌꈜꀕꌒꇈꃲ。
ꁮꑟꁀꁻꉢꂢꆎꇰꃄꑌꌒ,
ꆏꂢꉡꇰꃄꑌꈜꀕꌒꇈꃲ;
ꆗꑘꁮꀋꐭ,
ꁀꁻꁮꐭꇀꑌꈜꀕꌒꇈꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꌩꏓꒉꇸꌩꑭꈬꊂꏭꄮꇬ,
ꑾꑌꇁꁦꆏꑣꉠꈌꊐꑌꐔ,
ꉢꑣꅽꈌꊐꑌꈜꀕꐔꇈꃲ;
ꎯꂚꏶꏹꆏꏻꉢꄎꃄꑌꐔ,
ꉢꏻꆏꄎꃄꑌꈜꀕꐔꇈꃲ;
ꃮꀠꌧꑀꉢꈹꆏꄎꇁꌠꂄ,
ꆏꈹꉢꄎꇁꌠꈜꀕꂄꇈꃲ。

ꉠꌱꉣꑊꆹ,
ꁮꆫꁮꈩꅔꐎꏂꊂꐹꄮꇬ,
ꁬꈬꋃꆦꆏꈹꉢꄎꃄꑌꌒ,
ꉢꈹꆏꄎꃄꑌꈜꀕꌑꑟꉬ;
ꊨꊭꁉꆪꉢꄵꆏꁳꈩꑌꌒ,
ꆏꐗꉡꍈꃄꑌꈜꀕꌑꑟꉬ。

ꉠꌱꉣꑊꆹ,
ꇤꍤꇤꄻꏦꎫꈜꐯꑋꄮꇬ,
ꉷꃅꎧꏸꆏꃼꉢꄎꃄꑌꌒ,
ꉢꅝꉢꑱꇀꑌꈜꀕꌑꑟꉬ;
ꉷꃅꎬꐚꉢꃼꆎꍈꃄꑌꌒ,
ꆏꏻꆏꏪꇀꑌꈜꀕꌑꑟꉬ。
ꎽꁁꎽꏸꆏꃼꉢꄀꇀꑌꌒ,
ꉢꅑꉢꋽꇀꑌꈜꀕꌑꑟꉬ;
ꀙꀬꏸꆧꉢꃼꆏꇢꇀꑌꌒ,
ꆏꈚꆏꎔꇀꑌꈜꀕꌒꇈꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꑍꆏꏂꐎꄩꄵꑌ,
ꏂꐎꄵꄉꌒꒉꏿꍈꄸ;
ꌊꆏꏂꆈꇂꃴꈈ,
ꏂꆈꈈꄉꃅꏸꆫꍈꄸ。

ꉠꌱꉣꑊꆹ,
ꆧꁨꋍꁆꃅꂯꑌ,
ꇇꈌꋌꂸꅓꇈꃲ;
ꑭꆹꋍꁆꃅꂯꑌ,
ꆞꑭꋌꂸꅓꇈꃲ;
ꉌꃀꋍꂷꃅꂯꑌ,
ꇬꇉꋌꂸꅓꇈꃲ。

ꉠꌱꉣꑊꆹ
ꅇꈐꉏꑟꆹ,
ꆗꀑꑘꀕꇯꍈꄸ;
ꅇꃅꉐꎔꆹ
ꌱꇁꑕꑘꇯꍈꄷ;

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꏬꆉꌡꃅꀕꈬꃰ,
ꁰꒌꋍꈜꐛꍈꄷ;
ꆿꅪꌡꃅꇉꇬꏷ,
ꃰꁮꋍꐪꄔꍈꄸ;
ꂚꃨꌡꃅꇉꇬꃨ,
ꃨꎔꋍꀮꃄꍈꄸ;
ꐛꑿꌡꃅꁬꈬꇖ,
ꁬꃨꋍꀮꍘꍈꄸ。

ꉠꌱꉣꑊꆹ,
ꉋꆹꉪꐪꐉꍈꄸ,
ꈋꆹꐭꐪꐉꍈꄸ,
ꇇꆹꃅꐪꐉꍈꄸ,
ꑬꆹꄔꐪꐉꍈꄸ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꁦꀑꑍꂷꑍꄷꐛ,
ꁦꒌꋍꈜꏭꍈꄸ;
ꒉꎔꑍꂡꑍꄷꒉ,
ꒉꂪꋍꈜꏓꍈꄸ;
ꌩꎔꑍꁧꑍꄷꋦ,
ꌧꏾꋍꈜꆴꍈꄸ。

ꉠꌱꉣꑊꆹ,
ꑋꀑꌕꆪꆏ,
ꁬꃨꈀꃨꁯꆮꃰ;
ꀊꌱꇿꑌꆏ,
ꆗꀑꉌꃀꇿꇬꃰ。
ꍴꀑꌕꆪꆹ,
ꈿꏂꈀꋦꊨꊭꃰ;
ꀊꌱꇿꐥꆏ,
ꆗꀑꇿꉜꑋꍈꄸ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꑍꆏꄂꐎꈧꌺꐊ,
ꌫꀕꋍꈜꌬ,
ꂸꌬꐊꈢꋑꍈꄸ;
ꌊꆏꏸꇁꆧꌺꐊ,
ꎔꀕꋍꈜꎔ,
ꂸꎔꐊꈢꋑꍈꄸ。

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꀊꌱꑘ》（ꌕ 、ꇖ）... ꊁꁬꌠ：《ꀊꌱꑘ》（ꋍ）

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ