《ꀊꌱꑘ》（ꉬ 、ꃘ）-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀊꌱꑘ》（ꉬ 、ꃘ）

ꄜꃑꄮꈉ： 2011-10-23 　|　ꁰꄻꊿ：ꇓꆈꀋꃀ

(ꉬ)
ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꉪꃅꉪꇬꆹ:
ꉩꑍꉒꈻꉼꀒꇭꑟꁈ,
ꏂꆨꆲꆈꄡꑟꁈ;
ꊸꑋꄂꈻꆫꁯꃄꑟꁈ,
ꃮꆪꊷꑭꑋꑟꁇ;
ꄇꇉꀒꆷꋨꑟꁈ,
ꄄꁁꎿꆈꏹꑟꁈ;
ꄂꐎꈁꎰꋨꑟꁈ,
ꃅꑆꈬꄅꐁꑟꁈ。

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꉠꌱꉣꑊꆹ,
ꐰꃅꐰꇐꈤ,
ꏤꃅꏤꇐꈤ。
ꀊꆨꏤꇁꏤꇬꆹ,
ꁦꀑꉆꄉꏃꏾꃬꐮꄉ,
ꇉꐤꉆꄉꇇꌋꂢꐮꄉ。

ꀊꆨꐰꇁꏤꇬꆹ
ꆎꑌꁮꇁꂥꅍꁧꀋꐰ,
ꉡꑌꑮꒃꋑꋉꐮꀋꄉ;
ꒉꃹꏁꈬꃅꐮꄉ,
ꆼꏻꏣꏢꃅꐮꄉ,
ꐤꑌꋍꑷꃅꐮꄉ,
ꌥꑌꋍꇤꐗꐮꄉ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꀃꑍꋍꄮꆏ,
ꉣꑊꇨꇀꊋꌠꆹ,
ꉒꏂꌡꃅꁦꈌꏣꇰꃲ,
ꆂꒉꌡꃅꈜꀸꇊꇰꃲ,
ꃪꅪꌡꃅꁨꁧꉆꇰꃲ,
ꍀꇁꌡꃅꈛꁧꎍꇰꃲ,
ꆲꊭꌡꃅꌩꀑꏀꇰꃲ,
ꉠꌱꉣꑊꈍꃅꂯ!

ꀂ,ꉠꌱꑕ!
ꀂ,ꉠꌱꑕ!
ꌡꌺꐙꉘꉩ,
ꇨꌠꇧꊋꏗꑟꃲ,
ꎆꁨꇇꇐꏗꑟꃲ。
ꆺꑳꍿꎧꃹꃅꃹ,
ꏦꐵꂽꉼꀽꃅꀽ,
ꆼꏦꍿꌺꑣꃅꑣ,
ꅩꃅꀋꇷꇖꇈꃲ。

ꉠꌱꑕꑘꑠꍈꑌ,
ꌌꌠꌌꆹꃲ,
ꉠꌱꌌꆹꃲ;
ꆿꅪꑿꌊꌡꃅꌌꆹꃲ,
ꆿꌌꌿꉘꈬꁍꈴꆹꃲ。

ꉠꌱꑕꑘꑠꍈꑌ,
ꌌꌠꌌꆹꃲ,
ꉠꌱꌌꆹꃲ;
ꃬꐎꏬꌌꌡꃅꌌꆹꃲ,
ꏬꌌꃅꑆꈬꄅꈴꆹꃲ。

ꉠꌱꑕꑘꑠꍈꑌ,
ꌌꌠꌌꆹꃲ,
ꉠꌱꌌꆹꃲ;
ꁮꌌꁮꅍꑟꆹꃲ,
ꂥꌌꂥꅍꑌꆹꃲ。
ꀃꑍꇈꉈꆏ,
ꂸꂿꇁꎜꄉꁧꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꊨꊭꎔꀕꏬꆉꑬꌋꎑꁧꃲ,
ꑌꑿꎔꀕꆿꅪꈌꇬꃹꁧꃲ,
ꌧꉙꃨꎔꐻꇁꉈꈌꌸꁧꃲ,
ꀉꐔꅪꎔꁭꇁꂥꄸꊝꁧꃲ,
ꉠꌱꑕꑘꈍꃅꂯ!

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꉂꐒꉁꋩꁮꇁꂥꅍꑌꁧꃲ,
ꄸꅣꎭꑣꊈꇁꌒꐰꐥꁧꃲ;
ꈌꃅꏸꇬꀀꄉꉩꃮꏿꁧꃲ,
ꃆꇭꆧꇬꀀꄉꀅꍠꀕꁧꃲ,
ꉠꌱꑕꑘꈍꃅꂯ!

ꉠꌱꑕꑘꑠꍈꑌ,
ꀃꑍꋍꄮꆏ,
ꂸꂿꇁꎜꄉꁧꃲ。
ꐛꑿꈳꅉꇬ,
ꃨꎔꊁꆹꋦ;
ꉣꑊꑌꇁꉆꈉꇬ,
ꉠꌱꀋꑌꃲ。
ꑌꑿꈳꅉꇬ,
ꁖꐪꊁꆹꁭ;
ꉣꑊꎼꇁꈳꏦꇬ,
ꉠꌱꀋꐺꃲ。
ꈥꏂꈳꅉꇬ,
ꂾꃚꊁꆹꌒ;
ꉣꑊꐰꇁꏤꈉꇬ,
ꉠꌱꀋꇁꃲ,
ꉠꌱꈍꃅꂯ!

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꀃꑍꋍꄮꆏ
ꂸꂿꇁꎜꄉꇈꃲ。
ꑍꇢꉖꇢꆸꑟꃲ,
ꈎꇢꆪꇢꆸꑟꃲ;
ꁧꇢꇉꇢꆸꑟꃲ,
ꒉꇢꃪꇢꆸꑟꃲ,
ꂸꂿꇁꎜꄈꑟꃲ。

ꉠꌱꉣꑊꈍꃅꂯ!
ꆫꇁꃨꌠꅑꎼꅀ,
ꈧꇁꆧꌺꅑꎼꅀ?!
ꍞꇁꁱꌠꅑꎼꅀ,
ꃅꃴꃄꅉꅑꎼꅀ?!
ꍣꇁꉺꌠꅑꎼꅀ,
ꐧꇁꃰꊿꅑꎼꅀ?!
ꃰꊿꐮꉂꐰꇑꐯꂸꉂꎼꅀ?!
ꃰꊿꂄꂷꐰꇑꄷꂷꊝꎼꅀ?!

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꉪꐪꐛꉆꑟ,
ꉣꑊꈼꇁꋧꌠꉐꆂꁮꏂꄵꎼꑟ,
ꉣꑊꆈꇁꍮꌠꑓꋪꁮꑱꃹꎼꑟ,
ꉣꑊꎟꇁꀖꌠꈂꏠꁬꃷꂅꎼꑟ,
ꉣꑊꏂꇁꇫꌠꉌꃀꌩꁮꋠꎼꑟ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꀃꑍꇈꉈꆏ,
ꃅꇁꉩꅇꆹ,
ꉐꆈꀉꐚꌌꄉꄜꁧꃲ;
ꂮꇁꈠꅇꆹ,
ꇉꄩꇪꀮꌌꄉꄜꁧꃲ;
ꉂꇁꑟꅇꆹ,
ꃅꃴꈥꏂꌌꄉꄜꁧꃲ。

ꉠꌱꉣꑊꀃꑍꇈꉈꆏ,
ꃅꈊꃅꄜꆹ,
ꆺꑳꃪꀮꌌꄉꄜꁧꃲ;
ꃅꋆꃅꑌꆹ,
ꁦꀑꃰꐎꌌꄉꄜꁧꃲ。

ꀂ,ꉠꌱꑕ!
ꀂ,ꉠꌱꑕ!
ꉣꑊꉂꇁꑟꅇꆹ,
ꆳꐊꑳꐌꑆꉆꑟ,
ꆎꌕꉡꇰꃅꉆꑟ;
ꉣꑊꉂꇁꑟꋚꆹ,
ꉙꄝꀜꇓꄀꉆꑟ,
ꆎꉈꉡꍈꃅꉆꑟ。

ꀂ,ꉠꌱꑕ!
ꀂ,ꉠꌱꑕ!
ꐧꋦꉘꉩꑌꇈꃲ,
ꉠꌱꐤꆹꎴꁧꃲ,
ꆗꀑꉁꆹꎴꁧꃲ。
ꃰꊿꉘꉩꑌꇈꃲ。
ꌱꏣꁭꂥꎭꁧꃲ,
ꉠꌱꎭꏡꎴꁧꃲ。
ꉠꌱꉣꑊꈍꃅꂯ!

(ꃘ)
ꀂ,ꉠꌱꑕ!
ꀂ,ꉠꌱꑕ!
ꉌꃀꉪꅉꐛꉆꑟ,
ꏮꌠꏮꇁꑟ,
ꉠꌱꏮꇁꑟ;
ꀱꌠꀱꇁꑟ,
ꉠꌱꀱꇁꑟ。

ꉠꌱꑕꑘꑠꍈꑌ,
ꂃꐎꇂꃬꄑꇁꑟ,
ꂃꐧꀨꄂꃅꇁꑟ,
ꂃꂪꑶꌩꃅꇁꑟ,
ꇇꈯꊪꄹꊪꇁꑟ,
ꇇꀘꏋꄹꏋꇁꑟ。
ꉠꌱꑕꑘꆏ,
ꀋꇁꀋꇁꇂ,
ꎴꌠꎴꄉꀋꇁꇂ,
ꃮꇁꃬꉘꎴꃅꀋꇁꇂ,
ꌩꏓꒉꇸꎴꃅꀋꇁꇂ;
ꑘꃅꊖꑣꎴꃅꀋꇁꇂ,
ꁮꆫꁮꈩꎴꃅꀋꇁꇂ;
ꎝꁭꎝꄍꎴꃅꀋꇁꇂ,
ꏣꎼꑞꈴꎴꃅꀋꇁꇂ,
ꋋꑌꀋꇁꀋꇁꃲ,
ꉠꌱꑕꑘꀋꇁꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꀋꇁꀋꇁꃲ,
ꉠꌱꀋꇁꃲ。
ꒉꊩꀋꍽꃨꇁꃲ,
ꁦꀑꂚꃨꐎꇁꃲ,
ꉠꌱꀋꇁꃲ。
ꉻꈫꃭꇤꃨꇁꃲ,
ꃭꇤꏂꅈꅊꇁꃲ,
ꁯꆮꃨꎔꎠꇰꃲ,
ꐛꑿꃨꎔꍘꇰꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꐦꇬꃅꈑꐝꇰꃲ,
ꇗꐾꃅꊎꆨꉬꃲ,
ꉠꌱꀋꇁꃲ。
ꊨꊭꉙꁊꇀꑟꃲ,
ꉘꃅꈾꏿꆨꉬꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꍴꈤꉐꌦꏮꇁꃲ,
ꄹꇭꏜꉘꃴꇁꃲ,
ꉙꃅꍯꊪꆨꉬꃲ,
ꉠꌱꀋꇁꃲ。
ꌩꑭꁯꎓꂿꇁꃲ,
ꇉꅶꒊꊝꐂꇁꃲ,
ꃃꇁꉘꃙꆨꉬꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ,
ꑌꑿꉙꐛꇀꑟꃲ,
ꆿꍯꉻꃹꆨꉬꃲ,
ꉠꌱꀋꇁꃲ。
ꈥꏂꍯꊂꑳꇁꃲ,
ꅩꃅꀿꈻꆨꉬꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꌿꌺꐍꈠꈚꇰꃲ,
ꎺꌺꏁꈠꈚꇰꃲ,
ꈥꀒꌋꈤꊪꇁꃲ,
ꉠꌱꀋꇁꃲ。
ꃆꇭꏮꎐꁎꇰꃲ,
ꌺꃅꈬꇬꄜꇰꃲ,
ꅩꃅꈬꇬꎔꇰꃲ,
ꉠꌱꀋꇁꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꀋꇁꀋꇁꃲ,
ꉠꌱꀋꇁꃲ。
ꉐꆈꇭꀕꌿꋦꁧꑎꐥꌠꑟꇁꃲ,
ꍆꀕꅐꋑꌩꈤꐎꑎꐥꌠꑟꇁꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꀉꐚꀮꆈꃀꄳꇉꋮꐥꌠꑟꇁꃲ,
ꀉꃹꆈꋓꉷꃅꇉꈽꐥꌠꑟꇁꃲ。
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꌧꆳꁧꑘꑑꀕꃪꑭꐥꌠꑟꇁꃲ,
ꑍꁵꏮꇉꃱꆉꐝꈯꐥꌠꑟꇁꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꏬꆉꃺꆜꃀꉙꃪꉻꐥꌠꑟꇁꃲ,
ꆪꍝꅐꅪꇤꇉꆹꀸꐥꌠꑟꇁꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。

ꇉꄩꇪꀮꀋꁮꇉꉱꁧꌠꏮꇁꃲ,
ꃅꃴꈥꏂꈥꍫꀕꉘꁧꌠꏮꇁꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꊴꐷꀞꄏꂵꉘꇁꄿꁧꌠꏮꇁꃲ,
ꇍꀮꍫꐎꁴꇑꌿꆈꁧꌠꏮꇁꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꋓꃱꇷꆈꃅꑎꇴꇐꁧꌠꏮꇁꃲ,
ꄆꆾꅐꋑꅔꁉꒉꅝꁧꌠꏮꇁꃲ,
ꉠꌱꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꎺꑌꃱꇌꄄꁁꎿꆈꁧꌠꏮꇁꃲ,
ꃪꏂꄯꆪꃱꅔꆫꐎꁧꌠꏮꇁꃲ,
ꉠꌱꀋꇁꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꀋꇁꀋꇁꃲ,
ꉠꌱꀋꇁꃲ。
ꁦꀑꉆꐞꄙꃅꌱꇁꉚ,
ꉆꀕꑭꆹꐝꑌꀋꇁꃲ;
ꈜꅪꑓꆫꏿꃅꌱꇁꉚ,
ꉜꉚꑓꏣꈗꑌꀋꇁꃲ。

ꀋꇁꀋꇁꃲ,
ꉠꌱꀋꇁꃲ。
ꁦꀑꉆꄉꏃꏾꃬ,
ꃫꀕꇇꆹꐝꑌꉠꌱꀋꇁꃲ,
ꇉꐤꉆꄉꇇꌋꂢ,
ꂢꂡꈁꐞꈢꑌꉠꌱꀋꇁꃲ。
ꀋꇁꀋꇁꃲ,
ꉠꌱꀋꇁꃳ。

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꀊꌱꑘ》（ꏃ 、ꉆ）... ꊁꁬꌠ：《ꀊꌱꑘ》（ꌕ 、ꇖ）...

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ