《ꀊꌱꑘ》（ꈬ、ꊰ）-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀊꌱꑘ》（ꈬ、ꊰ）

ꄜꃑꄮꈉ： 2011-10-23 　|　ꁰꄻꊿ：ꇓꆈꀋꃀ

(ꈬ)
ꀂ,ꉠꌱꑕ!
ꀂ,ꉠꌱꑕ!
ꆗꀊꑘꀕꑌ,
ꂸꇷꂸꇱꋠ,
ꉂꑘꈥꉆꑌ,
ꌂꑘꈥꂸꉆꇊꃲ。

ꀃꑍꋍꄮꆏ,
ꅐꅑꋍꂷꊿꋋꌂ,
ꉐꆈꀉꐚꋍꂷꊿꋋꌂ;
ꃰꅑꋍꂷꊿꋋꌂ,
ꀊꌱꌐꊈꋍꂷꊿꋋꌂ,
ꃰꊿꉘꉩꇁꌠꊿꋋꌂ。

ꀂ,ꉠꌱꑕ!
ꀂ,ꉠꌱꑕ!
ꅪꎔꉱꈐꀀ,
ꅩꃅꉱꈐꎤ,
ꉘꉩꅩꎭꊐꌠꄰ,
ꌺꍂꀋꈔꇖꍂꈔꎂꀕ;
ꅩꃋꅪꎔꉘ,
ꉌꎔꌺꉘꇯ,
ꌺꉘꌒꏡꅓꌠꄰ,
ꌺꍂꀋꋦꇖꍂꋥꎂꀕ。

ꀑꑌꀐꒉꄰ,
ꀉꁧꀕꏸꄰ,
ꎆꉂꊿꀋꉂ,
ꎆꏣꊿꀋꏣ,
ꎆꇝꊿꀋꇝꑟꃲ。

ꆗꀊꑘꀕꑌ,
ꂿꃋꎆꊰꇁꎼꑟ,
ꐍꆹꂻꃅꈤ,
ꀑꑌꀐꒉꁵꎼꑟ;
ꃄꅉꎆꁖꇁꎼꑟ,
ꏁꆹꍔꃅꈤ,
ꀉꁧꀕꏸꁵꎼꑟ,
ꉠꌱꉣꑊꉌꃀꉪꅉꐛꎼꑟ。

ꉢꄹꑌꄘꑿꉐꁨꎼꑟ,
ꈎꇁꀑꑌꀐꒉꁵꎼꑟ;
ꉢꄹꆿꄙꍮꉐꁨꎼꑟ,
ꈤꇁꀉꁧꀕꏸꁵꎼꑟ;
ꉢꄹꁍꄙꑖꉐꁨꎼꑟ,
ꃷꇁꀑꑌꀐꒉꁵꎼꑟ;
ꉢꄹꑳꎔꇣꃨꁨꎼꑟ,
ꃷꇁꀉꁧꀕꏸꁵꎼꑟ,
ꉠꌱꉣꑊꉌꃀꉪꅉꐛꎼꑟ。

ꀊꌱꌐꊈꆎꂷꑌ,
ꀊꉘꇇꇬꉌꊭꇑꂷꄸ,
ꍀꇁꌡꃅꉈꉩꑋꂷꄸ,
ꌦꆅꌡꃅꌺꅪꑢꂷꄸ。
ꁯꋒꉐꆈꐂ,
ꀊꌱꌐꊈꏖꎼꑟ;
ꌋꐓꉨꌺꇴ,
ꀊꌱꌐꊈꇴꎼꑟ;
ꏃꃅꉬꉎꐱꉙꌕꇷꊰꎼꑟ,
ꋍꇷꊰꇁꀊꌱꌐꊈꌸꎼꑟ,
ꉠꌱꉣꑊꈁꒉꈁꌒꀕꎼꑟ。

ꉠꌱꌐꊈꄷꂶꌠ,
ꌉꈿꁻꏤꒉꎼꑟ,
ꊿꌉꌦꄷꈨꇁꑟ,
ꉠꌱꉣꑊꈁꒉꈁꌒꀕꎼꑟ。
ꈌꌋꉆꈹꒉꎼꑟ,
ꃪꐛꌦꄷꈨꇁꑟ,
ꉠꌱꉣꑊꈁꒉꈁꌒꀕꎼꑟ。

ꉠꌱꌐꊈꄷꂶꌠ,
ꒉꇁꃪꈴꒉꎼꑟ,
ꆲꁏꒉꉱꊐꄷꈨꇁꑟ,
ꉜꏂꋚꈁꏽꄷꈨꎼꑟ,
ꉠꌱꉣꑊꈁꒉꈁꌒꀕꎼꑟ。
ꃅꋩꃪꄧꈴꇁꑟ,
ꃅꇔꃪꃹꊐꄷꈨꇁꑟ,
ꁬꃷꋚꈁꀖꄷꈨꇁꑟ,
ꉠꌱꉣꑊꈁꒉꈁꌒꀕꎼꑟ。

ꉠꌱꌐꊈꄷꂶꌠ,
ꉈꃅꈛꎼꒉꎼꑟ,
ꏁꁏꀑꊥꈜꅪꎍꄷꈨꇁꑟ,
ꉠꌱꉣꑊꈁꐥꈁꌒꀕꎼꑟ。
ꆀꇁꉷꃅꒉꎼꑟ,
ꃺꒌꆅꏂꄅꄷꈨꇁꑟ,
ꉠꌱꉣꑊꈁꐥꈁꌒꀕꎼꑟ。

ꉠꌱꉣꑊꇨꇁꊋꂶꌠ,
ꀋꇴꀊꏢꃅꊭꌸꎼꑟ,
ꈬꑍꂿꒃꊿꂸꊌꎼꑟ,
ꈬꉖꂿꏢꊿꂸꊌꎼꑟ,
ꉠꌱꉣꑊꈁꐥꈁꌒꀕꎼꑟ。
ꆺꑳꆅꅣꃹꎼꑟ,
ꋍꏅꁬꇗꏿꎼꑟ;
ꐥꑋꎮꈁꂸꊌꑟ,
ꌦꑋꈩꂪꂸꊌꑟ,
ꉠꌱꉣꑊꈁꐥꈁꌒꀕꎼꑟ。

ꉠꌱꉣꑊꏢꇁꇍꈧꌠ,
ꏦꑳꈬꀨꈬꄅꃹꎼꑟ。
ꏦꑳꐎꇬꄑ,
ꏦꑳꋓꇬꃹꎼꑟ;
ꏦꑳꋓꇬꄑ,
ꏦꑳꆈꇬꃹꎼꑟ;
ꏣꅔꆹꂸꊌꎼꑟ,
ꂸꀱꇁꎜꄉꎼꑟ,
ꉠꌱꉣꑊꈁꐥꌒꀕꎼꑟ。

ꉠꌱꉣꑊꏂꇁꇭꈧꌠ,
ꂿꃋꈔꈤꊰꎼꑟ,
ꋍꏅꈔꆹꋍꁯꋒꎼꑟ,
ꋍꁯꈔꆹꋍꂷꋒꎼꑟ,
ꋍꂷꈔꆹꑷꌬꋒꎼꑟ,
ꑷꌬꌩꍹꐛꎼꑟ,
ꌩꍹꂥꍹꅿꎼꑟ,
ꂥꍹꉐꆈꀉꐚꌌ,
ꌿꉘꈬꁍꃹꎼꑟ,
ꉠꌱꉣꑊꈁꐥꈁꌒꀕꎼꑟ。

ꀂ,ꉠꌱꑕ!
ꀂ,ꉠꌱꑕ!
ꄩꆹꃅꃴꄂꀋꅑ,
ꈧꇁꆧꌺꏹꃅꏹꄸꌒꎼꑟ;
ꀏꆹꎽꃀꇓꀋꑌ,
ꉜꊪꉜꍽꆗꃅꆗꄸꌒꎼꑟ;
ꐧꇁꃰꊿꑗꁦꈨꁨꐥꎼꑟ,
ꉠꌱꉣꑊꈁꐥꈁꌒꀕꎼꑟ。

ꍀꇁꐥꋊꏢꎼꑟ,
ꑌꑿꐤꃅꌒꎼꑟ;
ꏬꆉꃀꈥꅐꎼꑟ,
ꃬꐎꐤꃅꌒꎼꑟ;
ꉠꌱꉣꑊꈁꐥꈁꌒꀕꎼꑟ。

(ꊰ)
ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꉣꑊꀱꇊꋍꈜꅐꎼꑟ,
ꑬꎼꑬꅮꇺꇁꑟ,
ꑭꁆꄔꐪꋍꈜꁮꎼꑟ;
ꑳꅝꑶꀱꇺꇁꑟ,
ꎐꂷꑝꐪꋍꈜꁮꎼꑟ;
ꎧꅝꍔꌺꇺꇁꑟ,
ꂱꑆꃉꐪꋍꈜꁮꎼꑟ。

ꉠꌱꅽꉣꑊ,
ꋙꋠꀀꍹꇺꇁꑟ,
ꆎꏮꉠꃀꄀꎼꑟ;
ꃅꋩꊀꋧꇺꇁꑟ,
ꆏꇔꉡꊪꃅꎼꑟ;
ꒇꑍꒇꈌꇺꇁꑟ,
ꆏꒇꉢꇯꃅꎼꑟ;
ꋩꑍꄸꉺꇺꇁꑟ,
ꆏꏶꉢꂾꄀꎼꑟ;
ꃤꀳꆏꈉꇺꇁꑟ,
ꆏꏆꉡꆏꃅꎼꑟ。

ꉠꌱꅽꉣꑊ,
ꑭꋑꈝꃀꍬꇁꑟ,
ꇇꉈꇇꈩꃅꎼꑟ;
ꑓꋓꏷꌺꆫꇁꑟ,
ꎮꑑꇇꑭꉜꎼꑟ;
ꇇꋓꑱꉻꏂꇁꑟ,
ꋍꁯꋍꑷꃅꎼꑟ。

ꀂ,ꉠꌱꑕ!
ꀂ,ꉠꌱꑕ!
ꉠꌱꅽꉣꑊ,
ꇭꀧꂸꂿꑌ,
ꒌꐛꆠꐙꂿꇁꑟ;
ꈌꁯꑓꂷꂸꂿꑌ,
ꃚꐛꉐꐙꈨꇁꑟ。

ꉠꌱꑕꑘꑠꍈꑌ,
ꆏꐈꆎꌅꀕꀋꐚ,
ꆏꐈꆎꌅꆏ,
ꎹꄓꈧꌺꅐ,
ꉠꌱꈧꐊꃅꈬꌬꇁꑟ,
ꆏꇁꉠꄩꌬꎼꑟ,
ꈁꌸꊷꆣꀕꎼꑟ;
ꁯꋒꃄꒌꏮ,
ꉠꌱꁮꆈꃄꒌꐊꇁꑟ,
ꆏꇁꉠꃀꑟꎼꑟ,
ꈁꉉꑖꈈꀕꎼꑟ;
ꌋꐓꅂꐛꐎ,
ꉠꌱꆧꐊꊛꑭꁨꇁꑟ,
ꉂꅇꇧꈘꀕꇁꑟ;
ꈥꀒꆲꁏꆳꐊꇁꎼꑟ,
ꆲꁏꉡꒆꇁꎼꑟ,
ꌗꅐꁦꉘꀕꎼꑟ。

ꉠꌱꑕꑘꑠꍈꑌ,
ꆏꐈꆎꌅꀕꀋꐚ,
ꆏꐈꆎꌅꆏ,
ꌱꐈꏬꐛꃅꈬꃰꇁꑟ,
ꇭꀧꋍꈜꀋꑟꑌ,
ꁰꒌꋍꈜꐛꎼꑟ;
ꌱꐈꃅꃴꃅꄂꐛꎼꑟ,
ꆏꇁꆗꀊꑘꀕꒌꎼꑟ,
ꒌꐛꆠꐙꂿꎼꑟ,
ꋍꏯꐤꉈꌦꎼꑟ。
ꆏꐈꆎꌅꆏ,
ꌱꐈꇉꄩꇪꀮꐛꇁꑟ,
ꋍꆪꌔꏮꀋꂿꑌ,
ꋍꈓꋍꏮꂿꎼꑟ;
ꌱꐈꃅꃴꈥꏂꐛꎼꑟ,
ꇭꀧꀋꂿꑌ,
ꂾꃚꋍꇬꈨꇁꑟ。
ꆏꐈꆎꌅꆏ,
ꌱꐈꁮꑟꁀꁻꐛꎼꑟ,
ꆗꀑꉅꇊꉌꃀꑕꎼꑟ,
ꒃꇁꈶꅉꃅꎼꑟ,
ꉂꇁꑟꅇꄜꎼꑟ;
ꌱꐈꉼꉹꃬꋓꐛꎼꑟ,
ꆗꀑꉅꇊꂱꀯꄡꎼꑟ,
ꂢꇁꈶꅉꃅꎼꑟ,
ꌕꇁꈈꅇꄜꎼꑟ。

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꌱꐈꁧꎔꋍꂷꐛꎼꑟ,
ꉢꐈꉒꏂꋍꌅꐛꎼꑟ,
ꉒꏂꁦꆽꒆꎼꑟ;
ꌱꐈꅔꎔꋍꁍꐛꎼꑟ,
ꉢꐈꑌꑿꋍꊈꐛꎼꑟ,
ꑌꑿꅔꊂꉘꎼꑟ。

ꌱꐈꃨꎔꋍꀮꐛꎼꑟ,
ꉢꐈꐛꑿꌹꋒꐛꎼꑟ,
ꁬꃨꐚꍘꌒꎼꑟ;
ꌱꐈꌩꎔꋍꁧꐛꎼꑟ,
ꌱꐈꌩꎔꋍꁧꐛꎼꑟ,
ꉢꐈꊨꊭꅩꋒꐛꎼꑟ,
ꊨꊭꌩꀑꈌꎼꑟ。

ꌱꐈꒉꎔꋍꂡꐛꎼꑟ,
ꉢꐈꉜꏂꌹꋒꐛꎼꑟ,
ꉜꏂꒉꊂꆗꎼꑟ;
ꌱꐈꌿꉘꈬꁍꐛꎼꑟ,
ꉢꐈꐓꇁꇍꌺꐛꎼꑟ,
ꌿꊂꐓꇌꀛꍂꎴꎼꑟ。

ꀂ,ꉠꌱꑕ!
ꀂ,ꉠꌱꑕ!
ꀋꃀꀋꆗꆹ,
ꈧꇁꆧꌺꐥ。
ꉠꌱꅽꉣꑊ,
ꈧꇁꆧꌺꌡꃅꐤꑟꁈ,
ꆎꏮꉢꉚꐤꑟꁈ。

ꀋꌦꀋꆅꆹ,
ꃅꃴꃄꅉꐥ。
ꉠꌱꅽꉣꑊ,
ꃅꃴꃄꅉꌡꃅꐤꑟꁈ,
ꍞꇁꁱꃅꐤꑟꁈ。

ꀋꐔꀋꐷꆹ,
ꆂꒉꒊꃀꐥ,
ꉠꌱꅽꉣꑊ,
ꆂꒉꒊꃀꌡꃅꐤꑟꁈ,
ꋍꑍꀋꈿꋍꑍꈿꑟꁈ。

ꀂ,ꉠꌱꑕ!
ꀂ,ꉠꌱꑕ!
ꉢꆗꀊꑘꀕꑌ,
ꃅꈋꂾꆏꃄꏦꉂ,
ꃄꏦꂾꆏꐊꏦꉂꇁꃲ;
ꆺꑳꂾꆏꀉꂿꉂ,
ꀉꁧꂾꆏꀊꌱꉂꇁꃲ。

ꉢꆗꀊꑘꀕꑌ,
ꁬꃨꂾꆏꐛꑿꉂ,
ꐛꑿꂾꆏꐚꒉꉂꇁꃲ;
ꅔꐎꂾꆏꑌꑿꉂ,
ꑌꑿꂾꆏꏃꐎꉂꇁꃲ;
ꌡꐋꂾꆏꀃꐋꉂ,
ꌡꌱꂾꆏꀃꌱꉂꇁꃲ。
ꌡꌱꈁꎔꀕ,
ꀃꌱꉂꂸꋌꇈꃲ。

ꇁꀦ： ꆀꉙꊅ ꁰꄻꌠ： 　｜　 ꄜꃑꌠ： beley ꌤꃅꅉ

ꂴꁬꌠ：《ꀊꌱꑘ》（ꊯꊪ、ꊰꑋ）... ꊁꁬꌠ：《ꀊꌱꑘ》（ꏃ 、ꉆ）...

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ