《ꀉꂿꅩꌺ》(ꑍ)-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀉꂿꅩꌺ》(ꑍ)

ꄜꃑꄮꈉ： 2011-11-30 　|　ꁰꄻꊿ：ꇓꆈꀋꃀ

ꀉꂿꅩꌺꑌ,
ꑋꅐꑋꈌꁏꇁꃲ,
ꑋꈌꉙꏦꀕꇁꃲ。
ꎹꄯꐯꑐꆏ，
ꒀꈩꎭꐎꁱ,
ꂷꊪꀨꆺꍈ,
ꎭꃹꁓꋩꏢ,
ꑌꑿꂴꇯꅸ，
ꎭꋩꑿꊂꐊ。
ꈨꅐꁧꎏꅐ，
ꎹꄓꉘꁮꑭ，
ꈁꌸꐝꇅꀕ,
ꄓꎸꉘꉨꇴ。

ꀉꂿꅩꌺꑌ,
ꁮꈤꉘꊂꈤ,
ꅩꈤꁮꊂꈤ。
ꀋꆀꁦꀑꆏ,
ꏂꆈꈬꁱꃢ,
ꂃꐎꃽꇗꀕ;
ꃽꇇꁭꎭꐎ,
ꁭꎭꉒꐎꄓ,
ꑴꇇꎭꑟꈻ,
ꎭꃹꀱꇗꀕ,
ꎭꑟꎃꑐꀕ;
ꎭꋩꁵꄿꏡ,
ꎭꑊꋒꌦꀜ。

ꀉꂿꅩꌺꑌ,
ꅔꐎꈬꊂꏭ,
ꅔꈌꏁꆙꀕ,
ꑬꊸꐝꇅꀕ,
ꇭꂷꅧꇗꀕ;
ꋯꇬꂚꃨꀕ,
ꂚꃨꐍꇬꀕ;
ꈯꇬꁬꃨꀕ,
ꁬꃨꀕꈍꀕ;
ꅔꄩꏰꌺꋶ,
ꏰꋶꍅꇙꀕ;
ꁬꈬꐛꑿꇖ,
ꐛꑿꇖꈭꀕ;
ꅙꑭꎽꀮꊝ,
ꎽꀮꊜꃚꌒ;
ꂷꑭꉑꀮꍻ,
ꉑꀮꍅꄹꍻ;
ꐪꆮꅲꇢꈻ,
ꆲꐊꁧꀮꁏ,
ꈧꌦꂸꈨꌦ;
ꉼꉹꃬꋓꇖ,
ꏜꀑꆲꌙꀕ,
ꁬꃨꐚꍘꇖ。

ꀉꂿꅩꌺꑌ,
ꂸꆪꐯꑎꆏ,
ꆫꇁꃨꌠꑌ,
ꆮꁬꍽꐎꃰ,
ꏃꏾꁬꈬꄅ,
ꑉꏾꑉꆧꄅ,
ꒀꇗꒀꊪꄅ。
ꑌꑿꑉꂿꈬ,
ꑉꂿꃽꇗꀕ;
ꑈꑌꑿꂿꈬ,
ꑿꂿꄄꃨꀕ。
ꒀꃀꑉꏾꋠ,
ꑾꌺꑍꐎꅝ。
ꀋꆀꁦꀑꏭ,
ꑿꐥꐍꐷꀕ,
ꑿꂿꐝꄧꀕ;
ꀋꆀꁧꐧꆏ,
ꈾꃨꑍꉻꏂ。
ꁮꏮꁧꐮꐥ,
ꑌꑿꁦꃨꄀ;
ꅩꏮꁧꉎꑌ,
ꁧꉎꉨꌋꋽ。
ꑌꑿꐤꃅꌒ,
ꅩꑌꈩꃅꌒꇈꃲ。

ꀉꂿꅩꌺꑌ,
ꍴꅐꍴꈌꁏꇁꃲ,
ꍴꈌꏂꆘꆚꇁꃲ,
ꁦꀑꉘꑊꇖꇁꃲ,
ꉒꈌꊱꆺꀕꇁꃲ。
ꅩꌺꁮꆫꁧꊂꈤ,
ꀱꇊꀋꆀꁦꀑꑌꇬꆏ,
ꁦꀑꂚꃨꀕꊰꃲ,
ꅔꐎꏰꌺꋵꈘꃲ,
ꅙꑭꎽꀮꊜꈘꃲ,
ꂷꑭꉑꀮꍺꈘꃲ。

ꀉꂿꅩꌺꑌ,
ꂸꆪꐯꑎꆏ,
ꉐꌦꀱꑐꀕꇁꃲ,
ꏜꀑꍑꉻꀕꇁꃲ,
ꁮꇤꁍꇑꀕꑟꃲ。
ꁮꋒꐯꑎꆏ,
ꁮꏮꌊꉜꅑꒉꃲ,
ꁯꋒꃄꒌꏮꇁꃲ,
ꄄꁁꆈꋧꋪꇁꃲ,
ꑌꑿꏪꎵꏿꇁꃲ。
ꑿꏮꂴꆽꅑ,
ꅪꏮꊁꆹꐊ,
ꐞꇊꊁꆹꊰꇬꆏ,
ꇉꈫꆿꅪꐙꉘꉩ,
ꆿꇁꑿꁌꀗꇰꃲ。
ꅩꌺꄸꌋꊪꇖꀕ,
ꇬꇉꉘꅍꀕ,
ꇇꁮꇣꍠꀕ,
ꉎꇴꀿꂸꈨ,
ꐰꇴꃀꂸꈨ;
ꅩꌺꇓꉅꆿꊂꎭ,
ꆿꉘꇉꇬꊎ,
ꑿꇔꑿꊂꎭ,
ꑿꉘꅔꇬꅞ。
ꑌꑿꆿꈌꌸ,
ꅩꌺꉌꎭꊐꆹꃲ,
ꅩꌺꎮꑍꅉ!

ꀉꂿꅩꌺꑌ,
ꏃꃅꈊꇁꃲ,
ꏃꈢꋒꇁꃲ,
ꁮꏮꁦꇤꑐꒉꃲ。
ꀉꐚꉗꊂꈻꆹꃲ,
ꀊꍆꉙꊂꈻꆹꃲ,
ꌧꆳꐧꊂꈻꆹꃲ;
ꁦꀑꆫꌠꈻꇁꃲ,
ꇉꅶꂿꌠꈻꇁꃲ;
ꁮꈻꑳꉎꆈꇁꃲ,
ꋧꈻꃪꏦꐎꇁꃲ,
ꃢꈻꊫꉻꆈꇁꃲ,
ꌺꈻꀿꅇꄜꇁꃲ,
ꅩꈻꃀꐮꑟꇁꃲ。
ꅩꈻꆺꑳꏂꃴꑟꇬꆏ,
ꀋꁧꀊꇫꑳꂸꐥ。
ꀋꁧꀊꇫꑌ,
ꈌꌋꉆꌋꁧꎻꈁ,
ꋋꑌꈍꃀꀈꇭꈵꃴꀀꑴꌦ;
ꃆꉉꑘꉉꁧꎻꈁ,
ꋋꑌꃅꐜꉨꌺꇣꁁꉆꑴꌦ;
ꁮꏝꐙꎭꁧꎻꈁ,
ꋋꑌꐳꐎꏥꌺꑱꇉꎍꑴꌦ;
ꉈꃅꈛꎼꁧꎻꈁ,
ꋋꑌꇍꀮꇌꆱꉱꁧꎑꑴꌦ;
ꃄꂿꉐꊨꁧꎻꈁ,
ꋋꑌꌩꈪꇁꄉꃀꄳꆽꆈꎍꑴꌦ;
ꉛꈹꉛꑣꁧꎻꈁ,
ꋋꑌꉛꑣꏦꈵꃴꎑꑴꌦ。

ꀉꂿꅩꌺꑌ,
ꎹꇈꎹꇈꃅ,
ꎹꅷꑳꉎꑟ,
ꑳꉎꋯꌠꑌ,
ꋯꌠꌕꋉꑌ,
ꀋꁧꀊꇫꇬꂸꐊ;
ꎹꅷꑳꐮꑟ,
ꑳꐮꒉꌠꑌ,
ꒉꌠꌕꋉꑌ,
ꀋꁧꀊꇫꇬꂸꐊ;
ꎹꅷꑳꂾꑟ,
ꑳꂾꇖꌠꑌ,
ꇖꌠꌕꋉꑌ,
ꀋꁧꀊꇫꇬꂸꐊ;
ꎹꅷꑳꊂꑟ,
ꑳꊂꌕꋉꑌ:
ꋯꇀꒉꌠꑌ,
ꇖꇀꄟꌠꑌ,
ꌕꇀꈈꌠꑌ,
ꀋꁧꀊꇫꄚꐊꇈ。
ꀋꁧꀊꇫꑌ,
ꋊꇁꃣꌺꇖꅊꇈ,
ꊈꇂꌐꌺꋯꅊꇈ,
ꃝꐨꃜꇤꋯꅊꇈ。
ꋌꋯꋍꃅꋯꎻꈁ,
ꋋꑌꅩꃝꅩꋠꋯꅊꇈ。

ꀉꂿꅩꌺꑌ,
ꅩꌺꄸꌋꊪꇖꀕ,
ꄩꆹꃋꊰꅩꌺꉱꌠꌡ,
ꀏꆹꅉꁏꅩꌺꂄꌠꌡ。
ꉌꃀꄏꄹꊰ,
ꑓꁴꑰꀕꇤ,
ꑭꐓꊋꂸꑌ,
ꇇꆹꏯꄹꊰ,
ꋟꆏꌦꀜꈪ,
ꀊꇷꉙꄸꀕ,
ꅩꌺꉌꃀꎭꋒꊎꌠꄚꇬꅐ。
ꅩꌺꎮꑍꅉ!

ꀉꂿꅩꌺꑌ,
ꅩꌺꈍꃅꂯ!
ꀃꑍꋍꄮꆏ,
ꊈꇂꌐꌺꇁꑳꃹ,
ꃝꐨꃜꇤꇁꑳꑟ。
ꈎꅸꈎꌋꃅ,
ꌋꌠꌕꑻꑟ;
ꈎꇨꑌꂸꑌ,
ꆪꇨꑌꂸꑌ;
ꃪꄩꏦꂸꉅ,
ꒉꄩꏦꂸꉅ;
ꀀꁈꑌꈎꄐ,
ꀀꃀꑌꆪꄐ。
ꂸꂄꅍꐤꀕ?
ꂸꂄꅍꂸꐥꄷꃲ。
ꊈꇂꌐꌺꒈꌠꀕ,
ꆺꑳꀿꃅꒈꌠꀕ,
ꅩꌺꉌꃀꄏꄹꊰꇈꃲ。
ꊇꑌꃝꃅꋯ,
ꌐꑌꌱꋠꋯ;
ꃮꄧꋍꂷꌉ,
ꃮꏸꃮꆛꉜ;
ꆏꌊꉢꀦꃅ,
ꉢꌊꆏꀦꃅ;
ꃮꏸꏁꇅꀕ,
ꃮꆜꎃꑐꀕ。
ꂸꂄꅍꐤꀕ?
ꂸꂄꅍꂸꐥꄷꃲ。
ꊈꇂꌐꌺꒈꆭꀕ,
ꆺꑳꀿꃅꒈꆭꀕ,
ꅩꌺꑓꁴꑰꀕꇤꇈꃲ。
ꅩꁌꅩꄣꄚꄉꈼ,
ꐍꆹꂷꃅꁵ,
ꏁꆹꍀꃅꁵ。
ꋍꍔꅝꉨꀕꌠꑌ,
ꇤꇀꌕꁄꑌꄉꃲ;
ꋍꊈꋠꉨꀕꌠꉆ,
ꇤꐮꌕꁄꉆꇰꃲ;
ꑌꌠꑋꎆꉪꇰꃲ,
ꉆꌠꉆꋚꏽꑟꃲ。
ꊈꇂꌐꌺꉌꃅꌑꑟꃲ,
ꆺꑳꀿꃅꉌꃅꌑꑟꃲ,
ꅩꌺꀊꇷꉙꄸꀕꇈꃲ,
ꅩꌺꎮꑍꅉ!

ꀉꂿꅩꌺꑌ,
ꃝꅇꅩꉌꊰ,
ꑍꇁꉖꊰꏿꇈꃲ。
ꌩꃨꇓꃨꆹ,
ꌧꑳꀉꇰꅇꄤꑇ;
ꁬꃨꆰꃨꆹ,
ꒉꊩꀋꍽꅇꄤꑇ;
ꁮꂿꆰꂿꆹ,
ꆹꁘꊫꀕꅇꄤꑇ;
ꊿꐥꇫꐥꌠ,
ꉈꃅꌎꑷꅇꄤꑇ,
ꃝꃅꃜꇤꅇꄤꑇ。
ꃝꐨꃜꇤꑌ,
ꃜꇤꌐꊩꌺ,
ꃜꇤꌐꂱꀯ,
ꃜꇤꏃꅇꄜꇈꃲ。
ꃅꄜꃅꂸꄜ,
ꑓꋪꌊꏸꆫ,
ꑬꏸꌊꈜꀺ,
ꄯꁯꌊꈜꄙꃅꄓ;
ꎆꈤꎆꂸꈤ,
ꃜꇤꏃꏮꀕ,
ꏭꀕꌦꆹꅩꇴꀕ;
ꍪꋠꍪꂸꋠ,
ꃜꇤꏃꊱꉉ,
ꉉꀕꂱꏢꁧꑷꀕ;
ꍐꌠꌔꇬꐊ,
ꈱꌠꌔꇬꐊ;
ꌔꆹꏂꄉꎎꑌꂸꂿꎴ,
ꌔꇬꊫꄉꌍꑌꂸꈨꎴ;
ꀋꁧꋌꉉꒇꇴꀕ,
ꀋꃀꋌꉉꏽꇴꀕꇊꃲ。
ꅩꌺꃝꏣꅑꌠꎭ,
ꇌꉘꅲꒉꋉꌠꎭꇊꃲ,
ꅩꌺꎮꑍꅉ!

ꀉꂿꅩꌺꑌ,
ꅩꌺꂸꇷꂸꇱꋠ。
ꀊꆨꃆꌺꇂꇤꋓꄉꉘ,
ꃆꌺꁨꎆꉬꇈꃲ,
ꇂꇤꈩꎆꐛꇈꃲ;
ꀊꆨꍶꇁꑾꌺꋓꄉꉘ,
ꑾꌺꁨꎆꉬꇈꃲ,
ꍶꌺꈩꎆꐛꇈꃲ;
ꀊꆨꃈꇁꅩꌺꋓꄉꒆ,
ꃈꇁꅪꃢꋍꈬꉬꎻꈁ,
ꃈꇁꅩꋚꋍꐚꉬꎻꈁ,
ꃈꇁꅩꌺꄅꀕꒊꎻꈁ。
ꀃꑍꋍꄮꆏ,
ꃇꆹꊿꇬꉬꅊꇈ,
ꅩꆹꊿꁠꉬꅊꇈ;
ꃇꆹꁨꎆꉬꅊꇈ,
ꅩꆹꈩꎆꉬꅊꇈ,
ꀿꃀꌺꈐꌺꉈꐥꅊꇈ。
ꅩꌺꁉꆪꋧꃅꅏꂷꆹꂸꉬ,
ꏷꏾꅙꃅꅾꂷꆹꂸꉬ。
ꐧꋦꀋꃋꐭꎼꅀ!?
ꐧꑠꀋꃋꄸꎼꅀ!?

ꀉꂿꅩꌺꑌ,
ꉘꅝꂱꀯꌩꂸꇮ,
ꃚꋠꈑꆠꇤꂸꇮ;
ꆒꀕꅡꀯꍂꂸꋻ;
ꏜꉘꐻꉻꒃꂸꐕ,
ꅘꉘꉈꐎꎟꂸꐕ。
ꃀꄷꋚꈈꋠ,
ꋙꋠꇭꀧꒅꍈꄸ;
ꀿꄹꃢꊪꈚ,
ꃢꈚꅩꃚꄀꍈꄸ。
ꀋꁧꌺꋒꌥ,
ꀋꃀꅩꋒꌥ,
ꅩꉌꀉꂿꐚ。
ꅩꌺꉈꁈꀉꂿꄉ,
ꆺꑳꀉꂿꁈꐤꀕ?
ꁈꐥꁈꇖꅩꌺꁵꎼꑟ。
ꆺꑳꀉꂿꑌ:
“ꅩꉘꀉꂿꌅ,
ꅩꃝꀋꁧꌅ,
ꎆꋠꃇꌺꌅ,
ꀉꂿꁈꂸꐥ”ꄷꃲ。
ꀉꂿꅇꇫꈘ,
ꅩꉩꃀꂣꑌ,
ꃀꇇꅩꀑꌎ,
ꃀꁴꅩꀑꋌ,
ꃀꑌꇬꇉꂶꅿꇷ,
ꅩꌺꃀꇗꅅꂸꊌ。
ꅩꏮꀿꑓꉜ,
ꀋꁧꀊꇫꑌ:
“ꁍꁈꏦꄻꇈ,
ꌺꇖꏦꍬꇈ。
ꌞꃀꀀꅍꐛ,
ꀀꃀꌞꅍꐛ。
ꇗꐾꃅꅍꎭ,
ꇣꋦꋍꉻꏂ;
ꅪꏷꌐꅍꎭ,
ꌐꎔꋍꉻꐙ。
ꀿꅇꎸꇺꋯ,
ꃀꅇꂷꋶꒉ;
ꀿꅇꀋꃅꊰꇉꏷ,
ꃀꅇꀋꃅꉬꇉꈴ”ꄷꃲ。
ꅩꌺꉌꊰꃶꋧꂄ,
ꉈꁈꄈꅉꎷꂸꊌꇈꃲ。
ꅩꌺꀊꇷꉙꄸꀕ,
ꀊꆨꅪꃢꀉꂿꇢꄸꂼ!
ꀊꆨꅩꋚꀉꂿꍈꄸꂼ!
ꀊꆨꅩꉘꀉꂿꎭꄸꂼ!
ꀋꃋꌅꄡꀉꂿꑟꄸꂼ!
ꀋꇮꄹꄻꌺ,
ꄹꄻꐙꉘꉩ!
ꀋꑳꏦꄻꌺ,
ꏦꄻꐙꊋꒉ!
ꅩꌺꎮꑍꅉ!

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꀉꂿꅩꌺ》(ꌕ) ꊁꁬꌠ：《ꀉꂿꅩꌺ》(ꋍ)

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ