《ꀉꂿꅩꌺ》(ꌕ)-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀉꂿꅩꌺ》(ꌕ)

ꄜꃑꄮꈉ： 2011-11-30 　|　ꁰꄻꊿ：ꇓꆈꀋꃀ

ꀉꂿꅩꌺꑌ,
ꈩꐛꃅꌒꅞꉆꑟ,
ꉪꐪꇇꇐꐊꉆꑟ,
ꃣꈌꉌꉪꐛꉆꑟ,
ꅩꃝꑴꑳꌅꉆꑟ。
ꅩꌺꉌꃀꉪꅉꐛꉆꆏ,
ꌧꏾꃢꃅꈜꑌꂸꇝꃲ,
ꂤꏂꋚꃅꋟꑌꂸꇝꃲ。
ꀉꂿꅩꌺꑠꍈꑌ,
ꉌꃀꈬꂷꆹꂸꑌ,
ꈬꏯꉪꑴꇆ,
ꉪꑌꀈꈥꉪꑟꃲ,
ꅩꌺꎇꎆꑱꇉꂪ,
ꎻꀕꈵꃴꑟꇈꃲ,
ꅩꌺꎮꑍꅉ!

ꌕ
ꀉꂿꅩꌺꑌ,
ꊁꇁꏃꑍꊰꌕꆏ,
ꑱꇺꃅꏸꋦ,
ꑱꉻꌋꀕꏡ,
ꑱꅪꃢꎐꏍ,
ꑱꀱꐛꑿꈴ,
ꑱꌧꅥꀕꐂ,
ꑱꃀꏬꅐꆗ,
ꑱꍹꈵꃴꑌꇬꆏ,
ꑳꐮꈌꆈꑍꍈꋓꃮꏿ,
ꋌꃮꋍꃅꃮꎻꈁ,
ꋋꑌꊈꇂꌐꌺꃮꅊꇈ。
ꊈꇂꌐꌺꑌ,
ꋌꇁꋍꃅꇁꎻꈁ,
ꋋꑌꅩꋩꅩꏦꇁꅊꇈ。
ꅩꌺꄸꌋꊪꇖꀕ,
ꉌꊰꋍꇬꈿ,
ꑓꊰꑭꇬꅞ,
ꑓꁴꌥꍻꀕ,
ꅩꌺꈍꃅꂯ!
ꀃꑍꋍꄮꆏ,
ꂴꆽꈻꌠꑟ,
ꊈꇂꌐꌺꑟ;
ꊁꆹꄹꌠꐥ,
ꀋꁧꂸꊨꐥ。
ꀋꁧꀉꂿꅸꇁꎬꇰꃲ,
ꂛꊨꃇꌺꊨꇁꀖꇰꃲ,
ꃺꃀꑌꂵꂘꇁꑴꇰꃲ,
ꃷꇑꀋꃀꍐꇁꃪꇰꃲ。
ꀒꇁꁭꂥꑌ,
ꃅꈯꄀꌺꑄꃅꑄꇰꃲ;
ꊁꇁꀿꃅꑌ,
ꈜꅪꆲꏂꇙꃅꇘꇰꃲ,
ꅩꌺꈍꃅꂯ!

ꀉꂿꅩꌺꑠꍈꑌ,
ꅩꌺꌦꁌꎧꀠꅝꄉꃲ,
ꆊꁌꉾꀠꋠꄉꃲ,
ꊈꁌꎆꀠꌬꄉꃲ。
ꐙꀋꁧꂸꊨꊈ,
ꉌꇨꋍꎳꎵ,
ꅩꁌꋠꏾꅩꃨꄀꂸꏾ,
ꅩꁌꅩꄣꋠꃲꆏ,
ꅩꌦꅪꈔꑌꂸꇝꑟꃲ。
ꀋꁧꂸꊨꐙꉘꉩ,
ꇢꆏꈌꎸꋠ,
ꈌꎸꇢꂸꋌ;
ꂮꆏꇌꈍꋠ,
ꇌꈍꋚꂸꐛ;
ꎬꆏꅪꃵꋠ,
ꅩꁌꎆꂸꌗꑵꄸ。

ꀉꂿꅩꌺꑌ,
ꏾꈌꋠꎝꁭ,
ꁦꀑꆲꊭꌸ;
ꌩꃀꄔꎝꁭ,
ꇉꅶꉐꇓꁠ;
ꑷꃀꏬꎝꁭ,
ꉻꑭꁿꂸꈬ;
ꈌꐎꍀꎝꁭ,
ꈵꃴꁿꂸꈬ;
ꑌꑿꆿꎝꁭ,
ꅔꐎꁿꂸꈬ;
ꉜꏂꎴꎝꁭ,
ꒉꃴꁿꂸꈬ;
ꀉꐔꌐꎝꁭ,
ꀿꃅꁿꂸꈬꇈꃲ。
ꀉꂿꅩꌺꑌ,
ꀃꀿꀃꃀꆹ,
ꁯꃅꁭꇐꈤ,
ꃅꃴꂸꎝꁯ,
ꅩꌺꏬꌌꃅꈬꃰꆹꃲ;
ꇉꈫꆿꎝꁯ,
ꅩꌺꆿꌌꇉꊂꏹꁧꃲ。
ꅩꌺꎮꑍꅉ!

ꀉꂿꅩꌺꑌ,
ꇤꌋꅿꂯꆹ,
ꑱꇉꌧꂸꇿ;
ꃆꇖꅿꂯꆹ,
ꇤꋯꃪꂸꇿ;
ꀉꐔꑮꂯꆹ,
ꉱꈐꂁꂸꇿꇈꃲ。
ꀉꐔꊰꏁꈓ,
ꀀꁍꄚꂸꁍ,
ꀀꑗꄚꂸꑗꇈꃲ。
ꀃꑍꋍꄮꆏ,
ꑳꉎꑌꐥꑋꈬꊈ,
ꅩꌺꑾꂷꇬꂸꐊ;
ꑳꐮꁍꐛꁍꈬꊐ,
ꅩꌺꃅꏬꇬꂸꐊ;
ꉱꈐꋚꄉꋙꈬꎍ,
ꅩꌺꋙꎍꇬꂸꐊ,
ꅩꌺꂸꁧꂸꉆꃲ。

ꀉꂿꅩꌺꑌ,
ꉐꆈꅈꀕꏸꂷꅉ,
ꏸꂷꅈꀕꌕꑍꅉ,
ꌕꑍꇈꉈꆏ,
ꃶꅉꉆꂸꅉꇈꃲ;
ꃄꎭꅈꀕꈿꐔꅉ,
ꈿꐔꅈꀕꌕꈎꅉ,
ꌕꈎꇈꉈꆏ,
ꁧꅉꂷꂸꅉꇈꃲ;
ꅩꎭꅈꀕꁁꃅꅉ,
ꀿꃅꅈꀕꌕꈎꅉ,
ꌕꈎꇈꉈꆏ,
ꈌꅉꉌꂸꅉꇈꃲ。
ꅩꌺꂸꁧꂸꉆꃲ,
ꅩꌺꎮꑍꅉ!

ꀉꂿꅩꌺꑌ,
ꏰꍸꅈꀕꅔꇬꅉ,
ꏰꁈꏜꃴꁿ,
ꆪꍝꋌꂸꄿ;
ꊴꐷꅈꀕꌿꊂꅉ,
ꊴꁈꌿꃴꁿ,
ꈹꌠꋌꂸꄿ;
ꐛꑿꅈꀕꃪꅪꅉ,
ꐚꁈꃪꊂꁿ,
ꊇꌺꋌꂸꄿ;
ꉌꌺꅈꀕꇓꐬꅉ,
ꉌꁈꇓꐬꁿ,
ꀉꍸꋌꂸꄿ;
ꅩꌺꅈꀕꀿꃅꅉ,
ꀋꃋꅪꁈꀿꃅꁿ,
ꀿꃅꅪꂸꈜꇈꃲ。
ꅩꌺꂸꁧꂸꉆꃲ,
ꅩꌺꎮꑍꅉ!

ꀉꂿꅩꌺꑌ,
ꁧꎔꉪꃅꐛꑴꇬ,
ꁦꒌꈨꐊꌡꃅꏮꁧꃲ;
ꒉꎔꉪꃅꒉꑴꇬ,
ꒈꂪꐞꇊꌡꃅꁘꁧꃲ;
ꌩꎔꉪꃅꋦꑴꇬ,
ꌧꏾꆳꅸꌡꃅꊰꁧꃲ;
ꏬꆉꉪꃅꃰꑴꇬ,
ꅏꀑꌡꃅꉜꄉꈎꁧꃲ;
ꊨꊭꎔꀕꉪꃅꅐꑴꇬ,
ꈌꏑꌡꃅꄉꁧꃲ;
ꅪꎔꉪꃅꐥꑴꇬ,
ꑱꉻꌡꃅꏂꁧꃲ,
ꅩꌺꂸꁧꂸꉆꃲ。
ꅩꌺꎮꑍꅉ!

ꀉꂿꅩꌺꑌ,
ꆲꏂꃅꃴꋥꑌꁧꈜꁮ,
ꆲꋒꉐꆈꄚꑌꁧꈜꁮ;
ꉐꌦꍤꀕꃢꑌꁧꈜꁮ,
ꑘꄃꑭꁭꂦꑌꁧꈜꁮ;
ꏃꃅꍘꆈꒈꑌꁧꈜꁮ,
ꒈꅐꅪꇽꀕꑌꁧꈜꁮ;
ꉈꐎꆈꈤꀕꑌꁧꈜꁮ,
ꃰꐛꆈꁌꀕꑌꁧꈜꁮ;
ꐻꎵꊪꏮꀕꑌꁧꈜꁮ,
ꑓꊏꃰꁦꎵꑌꁧꈜꁮ;
ꃅꋩꈬꑍꈛꑌꁧꈜꁮ,
ꈌꁈꋍꆶꉫꑌꁧꈜꁮ,
ꐚꈴꋍꏀꉫꑌꁧꈜꁮ,
ꅩꌺꂸꁧꂸꉆꃲ。
ꑳꉎꂸꅂꃪꌕꊐ,
ꉫꑌꅁꅉꈫ,
ꂸꉬꅁꅉꈫ;
ꑳꐮꂸꈭꒉꌔꂡ,
ꉫꑌꈭꅉꈫ,
ꂸꉬꈭꅉꈫ,
ꅩꌺꎮꑍꅉ!

ꀉꂿꅩꌺꑌ,
ꏃꑍꋚꂸꒃ,
ꏃꉔꒉꂸꅝ。
ꅩꌺꃴꈤꀕ,
ꉹꁌꀠꐦꀕ,
ꅩꌺꎮꑍꅉ!

ꀉꂿꅩꌺꑌ,
ꅩꌺꂸꁧꂸꉆꃲ。
ꅩꌺꀿꁨꅪꉫꀕ?
ꀿꁨꅪꉬꆏ,
ꀿꄓꅩꎭꀋꇁꇂ。
ꂸꏃꂸꎭꑌ,
ꀿꄹꉌꂸꋬ,
ꅩꑌꐝꂿꀕ。
ꋋꑌꀿꄓꅩꎭꆹ,
ꃀꄳꈐꉈꑟꇈꃲ。
ꅩꌺꃀꁨꅪꉫꀕ?
ꃀꁨꅪꉬꆏ,
ꃀꄓꅩꎭꀋꇁꇂ。
ꂸꏃꂸꎭꑌ,
ꃀꄷꉌꂸꋬ,
ꅩꑌꐝꂿꀕ。
ꋋꑌꃀꄓꅩꎭꆹ,
ꃱꆹꈐꉈꊰꇈꃲ;
ꃀꑌꑓꁴꑰꀕꇤ,
ꉌꃀꊖꋒꑕꇊꃲ;
ꅩꑌꑓꁴꇇꁉꊭ,
ꑬꃶꈛꂿꍬꁧꃲ。
ꅩꌺꃺꁨꅪꉫꀕ?
ꃺꁨꅪꉬꆏ,
ꃺꄓꅩꎭꀋꇁꇂ。
ꂸꏃꂸꎭꑌ,
ꃺꑌꉌꂸꋬ,
ꅩꑌꐝꂿꀕ。
ꋋꑌꃺꄓꅩꎭꆹ,
ꂸꆪꈐꉈꎭꇈꃲ;
ꃺꑌꑓꁴꑰꀕꇤꃅꑌꇈꃲ,
ꅩꑌꏁꁏꀑꊥꎰꈜꊪꁧꃲ。
ꈋꑌꊂꈘꅔꇬꉆꇊꃲ,
ꉆꑌꊂꈘꇉꇬꃹꁧꃲ。
ꅩꌺꃈꁨꅪꉫꀕ?
ꃈꁨꅪꉬꆏ,
ꃈꄓꅩꎭꀋꇁꇂ。
ꂸꏃꂸꎭꑌ,
ꃇꑌꉌꂸꋬ,
ꅩꑌꂸꇷꂸꇱꋠ。
ꋋꑌꃈꄓꅩꎭꆹ,
ꊈꇁꌐꐰꑞꎂꀕ。

ꀉꂿꅩꌺꑌ,
ꅩꌺꂸꁧꂸꉆꃲ。
ꋩꃅꋩꌋꐊ,
ꃇꌺꅩꌺꐊ,
ꂸꇷꂸꇱꋠꃅꄓ;
ꏾꋒꃄꈻꏽꃅꄓ,
ꇇꋒꐧꄙꏽꃅꄓ;
ꑓꁴꑰꀕꇤꃅꄓ,
ꇇꏸꁳꑓꁻꃅꄓ,
ꇇꃀꁳꑓꄡꃅꄓ,
ꑓꅑꈜꂸꂿꃅꄓ。

ꀉꂿꅩꌺꑌ,
ꄓꆹꉱꈐꏂꊂꄓ,
ꈷꑟꈷꑱꅪꐊꋯ,
ꅪꇬꊁꆹꅞꇈꃲ;
ꅪꄑꑌꂾꌕꁄꈴ,
ꎭꁱꎭꃹꅪꐊꋯ,
ꅪꇬꊁꆹꅞꇈꃲ;
ꅪꄑꇤꐮꌕꁄꈴ,
ꃢꁮꑷꊭꅪꐊꋯ,
ꅪꇬꊁꆹꅞꇈꃲ;
ꅪꄑꐷꈭꏂꊂꈴ,
ꃢꃅꑷꎶꅪꐊꋯ,
ꅪꇬꊁꆹꅞꇈꃲ;
ꅪꄑꉻꈫꉶꇤꈴ,
ꃆꌺꇂꇤꅪꐊꋯ,
ꅪꇬꊁꆹꅞꇈꃲ。

ꀉꂿꅩꌺꑌ,
ꅩꌺꁧꇈꁧꇈꃅ,
ꁧꇈꅙꑭꈬꊂꈴ,
ꅙꀑꇪꉾꀕ,
ꎽꀮꌕꉐꉌꃅꑓꌒꐥ,
ꅩꌺꑞꃅꑠꃅꎭꐙꀕ?
ꁧꇈꂷꑭꈬꊂꈴ,
ꂷꑭꄵꋓꀕ,
ꉑꀮꌕꉐꉌꃅꑓꌒꐥ,
ꅩꌺꑞꃅꑠꃅꎭꐙꀕ?
ꁧꇈꅔꐎꈬꊂꈴ,
ꅔꐎꏁꆙꀕ,
ꏰꍸꌕꉐꉌꃅꑓꌒꐥ,
ꅩꌺꑞꃅꑠꃅꎭꐙꀕ?
ꁧꇈꌿꋦꁧꑎꈴ,
ꌿꉘꆈꁌꀕ,
ꐓꇁꇍꌺꌕꉐꉌꃅꑓꌒꐥ,
ꅩꌺꑞꃅꑠꃅꎭꐙꀕ?
ꁧꇈꃪꅪꈬꊂꈴ,
ꃪꅪꁨꇉꀕ,
ꐛꑿꌕꉐꉌꃅꑓꌒꐥ,
ꅩꌺꑞꃅꑠꃅꎭꐙꀕ?
ꅩꌺꎮꑍꅉ!

ꀉꂿꅩꌺꑌ,
ꅩꌺꁧꇈꁧꇈꃅ,
ꁧꇈꉘꃅꌕꊐꈴ,
ꀐꆹꐻꒃꂸꇊꈤ,
ꅩꌺꇳꍠꀕ。
ꁧꇈꅔꃅꌕꊐꈴ,
ꐧꆹꆳꅥꂸꇊꐔ,
ꅩꌺꇇꁮꇣꍠꀕ。
ꁧꇈꐦꃅꌕꊐꈴ,
ꑬꆹꊖꑽꂸꇊꀽ,
ꅩꌺꉙꄸꀕ。
ꅩꌺꎮꑍꅉ!

ꀉꂿꅩꌺꑌ,
ꅩꌺꁧꇈꁧꇈꃅ,
ꁧꇈꇉꅶꈬꊂꈴ,
ꇉꅶꌕꈈꀕ,
ꅩꌺꄚꈿꌕꈈꀕ。
ꁧꇈꁦꀑꁧꄩꈴ,
ꃰꌗꉈꌗꈺꄂꀕ,
ꅩꌺꄚꈿꈺꄂꀕ。
ꁧꇈꌩꋦꁧꑎꈴ,
ꌧꏾꑍꏾꆳꅸꐂꀕꁏ,
ꅩꌺꉌꃀꄚꈿꐂꀕꁏ。
ꁧꇈꂶꋦꁧꑎꈴ,
ꂶꏾꑍꏾꆳꌌꐂꀕꁏ,
ꅩꌺꉌꃀꄚꈿꐂꀕꁏ。
ꁧꇈꁬꋦꁧꑎꈴ,
ꁬꏾꑍꏾꆳꐊꐂꀕꁏ,
ꅩꌺꉌꃀꄚꈿꐂꀕꁏ。
ꁧꇈꆂꒉꁧꑎꈴ,
ꒊꁮꒊꆱꂃ,
ꅩꌺꉌꃀꄚꈿꂃꆹꃲ,
ꅩꌺꎮꑍꅉ!

ꀉꂿꅩꌺꑌ,
ꇪꀮꈍꐯꏭ,
ꁮꇀꂥꅍꑟꇬꆏ,
ꌡꀿꒊꌋꀕ,
ꀃꀿꋍꂷꇬꂸꐊ;
ꌡꃀꅩꐷꀕ,
ꀃꃀꋍꂷꇬꂸꐊ;
ꌞꐋꆈꅊꀕ,
ꀀꐋꋍꂷꇬꂸꐊ。
ꌡꀿꈁꎔꀕ,
ꀃꀿꉂꂸꋌ;
ꌡꃀꈁꎔꀕ,
ꀃꃀꉂꂸꋌ;
ꌞꐋꈁꎔꀕ,
ꀀꐋꉂꂸꋌꇈꃲ。
ꀉꂿꅩꌺꑌ,
ꌡꀿꂾꆏꀃꀿꉂꇁꃲ,
ꌡꃀꂾꆏꀃꃀꉂꇁꃲ,
ꌞꐋꂾꆏꀀꐋꉂꇁꃲ。
ꅩꌺꉈꁈꃇꌺꄉ,
ꃇꌺꀿꉂꋌ,
ꃇꌺꃀꉂꋌ,
ꃇꌺꃺꉂꋌ,
ꃇꌺꐋꉂꋌꇈꃲ。

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꀉꂿꅩꌺ》(ꇖ) ꊁꁬꌠ：《ꀉꂿꅩꌺ》(ꑍ)

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ