《ꅺꊈꄯꒉ》—ꍜꇰꀉꇐ-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꅺꊈꄯꒉ》—ꍜꇰꀉꇐ

ꄜꃑꄮꈉ： 2011-09-05 　|　ꁰꄻꊿ：ꇓꆈꀋꃀ

ꍜꇰꀉꇐ

ꀃꌋꂾꀊꆨ，
ꃅꃴꇐꌺꒆ，
ꃄꈌꇐꌺꄃ，
ꃄꈌꇐꌺꒆ，
ꆂꒉꇐꌺꄁ，
ꉜꏂꇐꎔꀠ，
ꉜꁮꇐꈩꐋ，
ꉜꌺꇐꑢꄮ；
ꆂꒉꇐꌺꒆ，
ꃪꅪꇐꌺꄃ，
ꇓ꒜ꇐꎔꀣ，
ꐛꑿꇐꈩꐋ，
ꐛꑿꇐꑢꄮ；
ꃪꅪꇐꌺꒆ，
ꌿꉘꇐꌺꄁ，
ꊴꌺꇐꎔꀠ，
ꐓꌺꇐꈩꐋ，
ꇍꌺꇐꑢꄮ；
ꌿꉘꇐꌺꒆ，
ꈭꍪꍫꉘꐛ。

ꈭꍪꍫꉘꆏ，
ꈭ꒜ꀉꎓꒆ，
ꃱꅔꆫꐎꐛ；
ꆫꐎꅪꎔꒆ，
ꄂꏂꎰꆈꐛ，
ꄂꏂꂶꏦꒆ，
ꀑꇈꋓꃱꐛ；
ꋓꃱꅩꃀꒆ，
ꀒꎂꅚꍃꐛ；
ꊨꊭꀋꃋꒆ，
ꊨꀋꃋꇚꅍꐛ，
ꇚꀋꃋꁍꅍꐛ，
ꁍ꒜ꅩꌕꒆ；
ꁍ꒜ꏸꂷꏸꅍꐛ，
ꁍ꒜ꅙꇪꅙꅍꐛ，
ꁍ꒜ꅩꒌꋒ。

ꁍ꒜ꅩꒌꑌ，
ꌕꈎꑱꉻꏂ，
ꌕꆪꑱꐞꄖ，
ꑱꇺꃅꏸꋦ，
ꑱ꒜ꏬꅐꆗ，
ꑱꀱꐛꑿꈴ，
ꑱꅪꌋꀕꏡ，
ꑱꍹꈝꃴꑌ，
ꍆꍈꐜꆽꆏ，
ꃅꃴꄀ꒔ꋒ，
ꄀꉘꇉꊂꇁ；
ꃄꈌꄀ꒔ꋒ，
ꍞꉫꁧꊂꇁ；
ꌕꁕꄀ꒔ꋒ，
ꅙꆈꁧꊂꇁ；
ꉬꐮꄀ꒔ꋒ，
ꑛꇐꃢꊂꇁ；
ꄀꇐꇖꂷꆏ，
ꎺꋦꁧꑐꇁ。

ꁍ꒜ꅩꒌꑌ，
ꄀꉜꆹꂿꄷ，
ꄀꈩꆹꂿꄷ，
ꄀꌦꌕꄧꊰ，
ꁍ꒜ꅩꒌꌸ。
ꂸꌸꇐꆹꌸ；
꒔ꄧꀑꊂꌸ，
ꀍꏶꈬꄅꈴ；
꒔ꄧꐧꊂꌸ，
ꏃꏾꈬꄅꈴ；
꒔ꄧꂪꊂꌸ，
ꂃꂪꈬꄅꈴ。

ꁍ꒜ꅩꒌꑌ，
ꎼꇁꃏꉬꄷ，
ꂸꊪꇐꆹꊪ，
ꃪꅐꃪꊂꊪ，
ꊪꅷꀗꇴꆹ，
ꇽꀑꌘꏮꀕ，
ꇽꀑꀗꀋꀀ，
ꇽꂪꌘꏮꀕ，
ꇽꂪꀗꀋꀀ，
ꇽꐧꀘꀀꇊ。
ꀙ꒜ꀉꁌꑳꀋꐥ，
ꀗꌺꇢꀕꑳꐤꇈ。
ꀗꌺꇢꀕꑌ，
ꀏꊃꁻꇤꁻꄇꈈ，
ꐧꊃꊉꂄꋕꆭꈈ，
ꄩꊃꐓꇁꇌꑐꈈ。
ꃽꇇꏷꈌꁉ，
ꑴꇇꏸꉱꉩ，
ꄯꒉꏁꇙꀖ，
ꂴꆽ꒔ꋒꑍꏾꁏ，
ꄯꒉꅇꂸꅑ，
ꂷꋶꅇꂸꄜ。

ꊁꇁꑍꋒꇖꏾꁏꇬꆏ，
ꎼꇁꃏꉬꄷꄉꇠ；
ꊁꇁꌕꋒꃘꏾꁏꇬꆏ，
ꐧꇁꈲꉬꄷꄉꇠ；
ꊁꇁꇖꋒꉆꏾꁏꇬꆏ，
ꇱꇁꃏꉬꄷꄉꇠ；
ꉬꋒꊰꏾꁏꇬꆏ，
ꑷꂵꏂꂷꒃ，
ꋖꇪꉘꁧꌊ，
ꇱꇁꃏꒌꈎꃲꆏ，
ꌦꌺꌊꌺ꒔ꆺꒆꑴꄷ。
ꀘꄑꌋꑳꑟ，
ꇱꇁꃏꒌꈎ，
ꁍ꒜ꅩꒌꑌ，
ꉿꄓꉒꐎꄑ，
ꈩꋓꀉꇐꒆ。

ꍜꇰꀉꇐꑌ，
ꒆꇊꂾ꒔ꉔ，
꒜ꆂꅝꂸꅲ；
ꒆꇊꂾꑍꉔ，
꒜ꂣꀀꂸꅲ；
ꒆꇊꂾꌕꉖ，
꒜ꃢꈚꂸꅲ；
ꌺꎼꌺꃏꉬꄷ，
꒜ꃏꃪꃹꊐ。

ꃪꊂꇐꋦꅉ，
ꇐ꒿ꀉꇐꌧꅊꇈ，
ꀁꑌꇐꉬꄷ，
ꂮꑌꇐꋚꋠ，
ꌤꑌꇐꆂꅝ，
ꈠꑌꇐꃢꈚ。
ꍜꇰꀉꇐꑌ，
ꒆꑌꇐꑍꒆ，
ꈎꑌꇐꈎꌠ，
ꑞꑌꇐꄸꉻꑟ，
ꂓꑌꀉꇐꂓ。
ꀉꇐꒆꇊꂾ꒔ꈓ，
ꃢꆫꌠꊂꁠ；
ꂷꁐꉹꃅꌊ，
ꏝꅍꉈꃅꌊ；
ꒆꇊꂾꑍꈓ，
ꁮꆫꌠꊂꁠ，
ꂷꉹꉧꊂꌊ；
ꒆꇊꂾꌕꈎ，
ꉈꃅꌠꊂꁠ，
ꌩꉹꄵꊂꌊ，
ꌉꈿꊤꀕꑌ，
ꁻꈿꄂꀕꉆ，
ꒆꊂꇖꈎꉬꈎꇈꉈꆏ，
ꁍꎹꆹꃅꃴ，
ꑗꎷꆹꃄꈌ，
ꌦꉹꌋꉹꇖꀽꄵ，
ꌦꉈꌋꉈꇖꏢꈻ，
ꌦꑣꌊꑣꇖꋇꏃ，
ꌦꈌꌋꈌꇖꋇꏃ，
ꌦꃅꌊꃅꇖꂷꋩ，
ꁍꎖꆹꂿꄷ，
ꑖꎖꆹꂿꄷ，
ꈧꅐꈨꐚꏍꄉꁻ，
ꁻꇊꏬꄵꃅꈯꌸ，
ꒈꀑꒈꂪꏍꄉꁻ，
ꁻꇊꏬꄵꃅꈯꌸ，
ꀋꐯꄷꃱꆏ，
ꀋꃋꇓꌐꎍꑴꌦ。

ꇁꀦ： 彝族人网 ꁰꄻꌠ： beleys 　｜　 ꄜꃑꌠ：

ꂴꁬꌠ：《ꅺꊈꄯꒉ》—ꈧꁻꆪꁻ... ꊁꁬꌠ：《ꅺꊈꄯꒉ》—ꈧꇴꆪꄀ...

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ