《ꅺꊈꄯꒉ》—ꈧꄂꆪꄂꇴ-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꅺꊈꄯꒉ》—ꈧꄂꆪꄂꇴ

ꄜꃑꄮꈉ： 2011-09-05 　|　ꁰꄻꊿ：ꇓꆈꀋꃀ

ꈧꄂꆪꄂꇴ

ꋍꊂꂾꈭꐨ,
ꈨꁈꈞꆈꃹ，
ꆪꁈꈨꊂꐊ，
ꈬꑍꈨꀋꅐ，
ꈬꉖꆪꀋꅐ，
ꏃꃅꆈꋧꋪ。
ꀉꂿꇍꈩꈵꃴꑌ,
ꐊꇌꉫꇌꑌ，
ꃬꎶꀊꈹꈵꃴꐺ，
ꐊꇌꉫꇌꐺ，
ꎺꄔꑛꉻꍈꄉꃄꂿꋠ。
ꀠꈌꀊꍽꑌ，
ꄁꏸꆪꊂꑌ，
ꄂꐎꄄꆈꐩ，
ꋠꁍꃈꊭꑌ，
ꈌꃶꅇꌕꇴ。
ꀠꈌꀊꍽꑌ，
ꀑꊃꌀꅪꋉ，
ꌀꅪꀕꃅꃢ;
ꐧꊃꌀꏂꋉ，
ꌀꏂꀕꃅꃢ;
ꑭꊃꌀꐧꐎ，
ꌀꐧꐎꃅꃢ。
ꃪꀮꐎꒃꊪ，
ꈧꇴꆪꄀꎽ，
ꈨꆪꅇꂸꅲ，
ꃪꀮꌀꈬꐞ，
ꈬꑵꈬꑟꄡ。
ꉾꑱ꒔ꊏꒃ，
ꈧꄂꑗꐚꁳ，
ꈧꌺꑓꃅꄉ。
ꌕꑍꇴꃅꈊ，
ꈧꌺꇴꅐꇁ，
ꈧꌺꐧꋉꄉ，
ꃅꈊꃅꄜꊨ。
ꃪꀮꇴꎜꄉ，
ꎹꄓꃪꀮꇴ，
ꈨꋩꈧꏦꇴ;
ꂵꆧꃪꀮꇴ，
ꈨꆫꈨꄏꇴ;
ꈩꋒꃪꀮꇴ，
ꈨꏁꈨꎭꇴ。
ꌕꉖꇴꃅꄜ，
ꆪꌺꇴꅐꇁ，
ꆪꌺꁁꁐꍣ，
ꆪꌺꐧꋉꄉ，
ꃅꒉꃅꅂꊨ，
ꈍꐎꃮꎜꄉ，
ꋌꊂꐧꋦꆹ。