ꀨꏾꌠ > ꋊꃆꌧꇐ

《ꅺꊈꄯꒉ》—ꏃꃅꒉꊝꂋ
ꄜꃑꄮꈉ: 2011-09-05  | ꁰꄻꊿ:ꇓꆈꀋꃀ


ꏃꃅꒉꊝꂋ

ꐈꀮꐧꃅꑌ,
ꌀꄝꏬꉻꏀ,
ꆞꑭꊖꇱꄔ,
ꏂꆈꊯꄅꃢ,
ꁕꇊꆹꋒꌊ,
ꋭꌠꒃꂿꄷ,
ꊉꍹꅪꎔꒃ,
ꑮꒃꑍꊏꋋꈓꐛꇬꆏ,
ꌺꉬꌕꑻꒆ。
ꐧꃅꌺꌕꑌ,
ꈿꅪꌩꈪꄻ,
ꎯꂚꇁꄉꃅ,
ꀋꐱꑱꌧꃅ,
꒜ꑍꇌꈻꏡ,
ꂷꏂꇌꅸꏦ,
ꇌꆈꀋꍏꄀ,
ꀊꈲꅔꄧꂿ,
ꀒꑍꂿꄉꇈ,
ꊂꑋꀱꄉꇈ,
꒨ꃅꄷꐚꐚ?
ꐧꃅꌺꌕꑌ,
ꃅꐏꆹꂿꄷ,
ꃅꁇꆹꂿꄷ,
ꄯꁯꇇꑐꌊ,
ꌺꒉꃅꀑꐏ,
ꌺꇢꃅꐧꐏ,
ꌻ꒧ꃅꂪꐏ。

ꉬꄚꇴꌅꄰ,
ꀋꈨꑴꈓꊪ,
ꎺꃼ꒨ꒃꀳ,
ꈑꆪꃰꒃꅑ,
ꄚꑌꃢꒃꌊ,
ꑋꄂꁨꏂꅸ,
ꀊꈲꅔꄧꆏ,
ꃄꁏꇁꅊꇈ。
ꐧꃅꌺꒉꒃꅜꇈ,
ꐧꃅꌺꒉꆏ,
ꌺꒉꅇꒉꉉ,
ꒃꇁꌉꂿꄷ;
ꐧꃅꌺꇢꆏ,
ꌺꇢꅇꇢꉉ,
ꒃꇁꏶꂿꄷ,
ꐧꃅꌻꑘꆏ,
ꌻꑘꅇꑘꉉ,
ꒃꇁꅲꂿꄷ.
ꀋꈨꑴꈓꄹꇬꆏ:
ꒃꂿꊿꀋꉬ,
ꏃꃅꉬꉎꆏ,
ꉬꄚꇴꌅꄰ,
ꇮꌺꀋꁵꅔ,
ꎿꉻꈬꂷꀺ,
ꏃꃅꉬꐮꎭꂿꄷ,
ꏃꃅꒊꊝꂋ,
ꃄꇖꄹꊂꎭꂿꄷ.
ꉬꄚꇴꌅꄰ,
ꌅꃀꆏꋍꑻ,
ꀋꈑꆏꑍꑹ,
ꀋꈨꆏꌕꑻ,
ꐚꌋꐯꐊꄉ,
ꌅꉙꇓꑎꁧꄉꉜꂿꄷ.
ꐧꃅꌺꌕꑌ,
ꈂꃅꀕꂯꄷ?
ꀋꈨꑴꈓꆏ:
ꐧꃅꌺꒉꆹ,
ꌺꉩꂷ、ꌺꑣꂷ,
ꐎꈤꏂꈤꊨꄉꀀ,
ꏃꂷꈁꂷꆹꉇꄉ,
ꃢꑴꑷꑴꆹꉇꄉ,
ꍶꁮꑻꇁꆹꈏꊐ,
ꊨꅍꎸꉘꆹꈏꊐ.
ꐧꃅꌺꇢꆹ,
ꌺꎔꂷ、ꌺꃨꂷ,
ꐯꈤꉽꈤꊨꄉꀀ,
ꏃꂷꈁꂷꆹꉇꄉ,
ꃢꑴꑷꑴꆹꉇꄉ,
ꍶꁮꑻꇁꆹꈏꊐ,
ꊨꅍꎸꉘꆹꈏꊐ.
ꐧꃅꌻꑘꆹ,
ꌺꇰꂷ、ꌺꄸꂷ,
ꊌꀋꄐꃲꆏ,
ꇮꏸꋍꂷꊨꄉꀀ,
ꏃꂷꈁꂷꆹꈏꊐ,
ꃢꑴꑷꑴꆹꈏꊐ,
ꍶꁮꑻꇁꆹꉇꄉ,
ꊨꅍꎸꉘꆹꉇꄉ。
ꑷ꒜ꃝꄷꃝ,
ꏷꈌꎤꄷꎤ;
ꑷꌺꊪꄷꊪ,
ꏷꈌꁉꄷꁉ。
ꀋꈨꑴꈐꑌ,
ꅇꉉꌐꊂꆏ,
ꑆꆹꂿꃋꃹ。

ꀋꈨꑴꈐꁧꊂꆏ,
ꑛꑍꋰꀕꃴꀕꇁ,
ꆿꑍꄑꃅꇴ,
ꄯꆪꑍꉐꐙ,
ꇐꑍꇖꃱꉐꌦꌪ,
ꏂꑋꏁꒉꄹꒉꂃ,
ꃅꑍꏃꃅꒊꊝꂋ,
ꆂꒉꃅꃴꂥ,
ꑿꑋꎳꉌꄮꊰꋠ,
ꑷꑍꑷꃹꑍꊏꋋꑍꐛ,
ꑷꌺꊪꄷꊪ,
ꏷꈌꁉꄷꁉ.
ꏷꈌꁉꊂꆏ,
ꁧꋒꇉꋒꆹ:
ꀋꋩꅙꇪꁧ,
ꅙꁧꋦꅉꋒ;
ꉷꃅꄁꊰꁧ,
ꉷꂷꉆꅉꋒ;
ꃱꅔꆫꐎꁧ,
ꆫꂷꒊꂷꋒ;
ꏸꇕꏸꍀꁧ,
ꏸꍀꒊꂷꋒ;
ꊉꍹꃅꀑꁧ,
ꃅꀑꒊꂷꋒ;
ꀀꃆꋒꂪꁧ,
ꋒꂪꒊꂷꋒ;
ꑣꈌꃅꐎꁧ,
ꑣꋇꅑꅉꋒ;
ꃅꏾꇌꉆꁧ,
ꇍꀭꍫꐎꒊꂷꋒ;
ꀑꇈꋓꃱꁧ,
ꋒꂷꒊꂷꋒ;
ꀄꑸꉢꉳꁧ,
ꀆꂷꒊꂷꋒ;
ꃱꇰꍶꈐꁧ,
ꍶꂷꒊꂷꋒ;
ꎭꂵꂽꉘꁧ,
ꂷꋇꋦꅉꋒ;
ꃅꌪꎰꉘꁧ,
ꃅꂷꉆꅉꋒ;
ꎰꆈꀉꐩꁧ,
ꀉꐩꒊꂷꋒ;
ꎺꋦꃪꇰꁧ,
ꎺꁧꋦꅉꋒ;
ꆀꃄꉔꌒꁧ,
ꆀꂷꉆꅉꋒ;
ꑟꋯꄣꈪꁧ,
ꄣꂷꒊꂷꋒ;
꒜ꀕꆿꅪꁧ,
ꆿꂷꉆꅉꋒ;
ꍳꐎꎔꎗꁧ,
ꍱꁧꋦꅉꋒ;
ꀋꁮꊴꇉꁧ,
ꊴꂷꉆꅉꋒ;
ꄯꇔꄯꊪꁧ,
ꄮꁧꋦꅉꋒ。

꒔ꊂꂾꈭꐨ,
ꐧꃅꌺꒉꑌ,
ꐎꇁꏁꈤꀀ,
ꒉꇙꒉꉱꊐ;
ꐧꃅꌺꇢꑌ,
ꐯꇁꉾꈤꀀ,
ꒉ꒧ꒉꃴꃹ;
ꐧꃅꌻ꒧ꑌ,
ꌩꇁꎺꏸꀀ,
ꒉꅸꒉꄩꁮ,
ꅸꇁꌅ꒿ꇓꑎꁧꇬꅞ。
ꐧꃅꃵꃶꑌ,
ꀍꀠꒉꌌꇁ,
ꋌꀕꐋꃅꄉ;
ꀉꉌꒉꌌꇁ,
ꋌꀕꐋꃅꄉ,
ꀉꐚꒉꌌꇁ,
ꋌꀕꐋꃅꄉ,
ꐛꑿꒉꌌꇁ,
ꋌꀕꐋꃅꄉ,
ꁮꏂꒉꌌꇁ,
ꋌꀕꐋꃅꄉ。
ꉹꏣꋌꋖꀉꐚꄐ,
ꀋꃋꀉꐚꃶꉱꑌꑴꌦ。
ꏝꅍꃆꄔꋌ,
ꀊꍈꌩꇵꉅ,
ꉇꃶꋲꇁꏦ,
ꃅꇴꉈꃶꃛꏢꆹ,
ꏃꃅꉬꉎꒆ。
ꏃꃅꉬꉎꆏ,
ꉬꄚꇴꌅꄰ,
ꎽꀮꌺꋒꊪ,
ꉬꐮꉜꒉꎻ,
ꏮꆹꉬꑎꄜ;
ꌅ꒿ꇓꑎꁧꇬꆏ,
ꃅꇴꉈꃶꃛꏢꅐꑴꌦꄷ。

ꉬꄚꇴꌅꆏ,
ꐧꃅꌺꌕꑌ,
ꈔꂿꊿꀋꉬ,
ꊩꌺꌕꑻꊪ,
ꉬꐮꃵꃶꒃꒉꎻ。
ꐧꃅꃵꃶꑌ,
ꍶꋒꍶꁮꆈꂷꋒ,
ꃢꋒꃢ꒜ꀊꏂꋒ,
ꃢ꒜ꀊꏂꌉ,
ꊩꌺꌕꑻꍈ,
ꍶꁮꆈꂷꒃ,
ꊩꌺꌕꑻꁵ,
ꉬꑎꌅꀋꃋ,
ꉬꐮꇓꅍꐛꇁꄷ。
ꉬꄚꇴꌅꑌ,
ꉬꐮꇓꅍꃝꂸꅲ。

ꐧꃅꃶꃵꑌ,
ꀱꇁꐋꄹꄏ,
ꃪꆉꊪꎼꆹ,
ꁮꏂꃪꆉꇵꆹꈯ,
ꀉꉌꃪꆉꅏꊧꑐ,
ꐛꑿꃪꆉꁍꎼꎑ,
“ꉻ”ꄹꉬꐮꄓ,
“ꀮ”ꄹꉬꑎꌪ。
ꀉꉌꉱꁧꊐ,
ꆀꐪꀉꉌꌃꌌꇁ;
ꁮꏂꇤꂾꌵ,
ꉬꄚꇴꌅꏸꑭꁮꏂꄵ;
ꐛꑿꉱꈐꊐ,
ꌅꀋꃋꅪꄧꐛꑿꋊ。
ꉬꄚꇴꌅꆏ,
ꌧꇐꊰꑋꑟ,
ꉬꐮꃵꃶꐥ,
ꉢꉁꌒꃯꑳꆏ,
ꌅꃱꅪꄧꁵꑴꄷ。
ꐧꃅꃵꃶꑌ,
ꌺꒉꀉꃈꊪ,
ꂴꆽ꒔ꑍꆹ,
ꆹꑍꇿꋌꉖ,
ꀱꑋꌡꋌꉖ;
ꊁꇁ꒔ꑍꆹ,
ꆹꑋꌡꋌꉖ,
ꀱꑋꇿꋌꉖ.
ꁮꏂꄵꌠꆹ,
ꇌꎸꌌꇁꉖ;
ꐛꑿꋊꌠꆹ,
ꆳꃰꌌꇁꉖ;
ꆀꐪꀉꉌꌃꌠꆹ,
ꉌꁈꇓꃴꃹ,
ꇓꁨꀖꄉꎹ,
ꉌꐔ꒔ꂷꊌ,
ꌌꇁꀗꈌꌸ,
ꇮꇇꈴꊂꆏ,
ꉌꐔꌌꇁꆀꐪꊐ。
꒔ꊂꂾꈭꐨ,
ꉬꄚꇴꌅꆏ:
ꀋꃋꒉꂶꌠ,
ꁵꑌꏂꁵꇁ,
ꈚꑌꏂꈚꇁ,
ꀋꃋꆜꂶꌠ,
ꁵꑌꐎꁵꇁ,
ꈚꑌꐎꈚꇁꑴꄷ。
ꐧꃅꃵꃶꄹꇫꆏ:
ꐎꏂꊌꂸꄿ,
ꁵꑌꀋꃋ꒧ꁵꇁ,
ꈚꑌꀋꀨꈚꄹꌶꑴꄷ。
ꉬꄚꇴꌅꄰ,
ꀋꁵꀋꉆꃅ,
ꐯꑟꉾꑟꈻ,
ꏃꃅꉬꐮꏣ;
ꐧꃅꃵꃶꑌ,
ꐯꌬꉽꌬꄙ,
ꏃꃅꉬꑎꏣ,
ꉬꐮꉬꑎꄚꄉꃝ,
ꌅꃱꅩꄧꒃ,
ꐧꃅꃵꃶꁵ。

ꌅꃱꅩꄧꑌ,
ꐧꃅꌻ꒧ꏃ,
ꏃꃅꉬꐮꋦ,
ꑶꋦꌕꈎꐛꇬꆏ,
ꌺꇰꌕꑻꒆ,
ꃅꑞꐛꅹꄷ,
ꂸꊪꇏꆹꊪ,
ꁮꌋꁮꊂꊪ,
ꁮꑍ꒜ꊂꊪ,
ꁮꑍ꒜ꁮꑟꏡ,
ꉬꑎꅲꆹꎻ.
ꉬꄚꇴꌅꑌ,
ꇰꌠꄜꂸꅲ,
ꁮꎼꁮꃏꄷ,
ꀑꋊꌿꊂꎭ,
ꂪꋊꒉꊂꎭ,
ꐧꋊꈲꊂꎭ,
꒔ꊂꂾꈭꐨ,
ꉬꄚꇴꌅꑌ,
ꁁꀕ꒜ꀕꆅ,
ꀘꅸꀘꇴꆹ,
ꈎꇊꈎꌋꆹ,
ꉬꐮꊩꌺꆅꀋꁵꃲꄸ。
ꐓꇌꌹꋒꊪ,
ꌿꊂꀑꎹꑌꀑꊌ,
ꐛꑿꌹꋒꊪ,
ꃪꊂꐧꎹꑌꐧꊌ;
ꎴꌺꌹꋒꊪ,
ꒉꊂꂪꎹꑌꂪꊌ。
ꐧꒃꂪꃅꄉ,
ꁮꑟꈻꇁꊛ,
ꅸꇁꏃꃅꉬꐮꎭ,
ꁮꑍ꒜ꐧꀋꑌꌠꆹ,
ꋋꈨꒉꄸꉬ。
ꊁꆏꑷꌦꑷꌋꊪ,
ꎽꀮꌹꋒꊪ,
ꉬꄚꇴꌅꆏ,
ꑷꎼꑷꃏꆏ꒔ꆹ,
ꉬꑎꉬꁧꍍ,
ꀛꐂꇁꆺꑳ,
ꑣꄓꄚꅥꇁ,
ꎽꀮꅥꁨꅪ,
ꀉꆩꁨꅪꌠ,
ꀋꃋꑌꁨꅪ。
ꏂꌋꏂꊂꊪ,
ꄯꆪꏂꊂꊪ,
ꉬꄚꇴꌅꑌ,
ꁮꎼꁮꃏꆏ꒔ꆹ,
ꉬꑎꉬꁧꍍ,
ꀛꐂꇁꆺꑳ,
ꄓꇁꄯꆪꅥ,
ꀋꆪꅥꅲꁘ,
ꀊꆨꅲꁘꌠ,
ꀋꃋꑌꅲꁘ。
ꉒꌋꉒꊂꊪ,
ꉒꏂꉬꊂꊪ,
ꉬꄚꇴꌅꑌ,
ꉒꎼꉒꃏꆏ꒔ꆹ,
ꉬꑎꉬꁧꍍ,
ꀛꐂꇁꆺꑳ,
ꄔꑄꄚꄉꇉ,
ꁈꇁꆸꄜꅞ,
ꉘꇁꁨꆹꀀꄉꅲ。
ꀉꁌꑿꐊꑌ,
ꀀꃅꀀꇬꎷ,
ꃪꀮꎓꄹꇴꇬꆏ,
ꉬꄚꇴꌅꑮ꒜ꄚꄉꐭ:
ꆏꐙꆹꐚꃲꆏ,
ꈂꃅꄜꇫꀋꇰꄷ?
ꉬꄚꇴꌅꄹꇬꆏ:
ꅩꎭꁭꂥꐥ,
ꇇꌌꃱꈥꍻ,
ꉢꋋꌂꒉꄸ,
ꋋꆹꀋꉬꆏ,
ꇉꅶ꒜ꑍꌕꄿꋐ,
ꀧꇁꌺꇰꌕꑻꇉ,
ꒉꈾꑍꁍꈾꇁꇈꃲꆏ,
꒔ꅇꋌꄜꇁꑴꄷ。
ꀉꁌꑿꐊꑌ,
ꅇꐚꀂꈨꃲꑴꄷ,
ꁖꇁꇤꐯꅞ,
ꅸꇊꄚꄉꒃ,
ꁍꎼꊿꈻꏻ,
ꅸꇁꉽꐯꇂꃴꑉ。
ꀉꁌꑿꐊꑌ,
ꀊꆨꀊꐎꌠ,
꒔ꊂꀉꆈꇈ,
ꀊꆨꁓꀋꋩ,
꒔ꊂꁓꋩꇈ,
ꀉꌌꑿꁌꐊꉬꐮꄜ。
ꐧꃅꃵꃶꑌ,
ꈨꆷꃅꀋꆷ,
ꇉꅶ꒜ꑍꌕꄿꋐꇁꀧ,
ꒉꈾꌕꁍꈾꇁꇈ。
ꂴꆽꌺꒉꇉ,
ꊈꄶꊉꅆꄷ,
ꋋꂷꀒꋤꁍꁈꐛ,
ꁡꊭꃅꇴꄂꄉꑌ;
ꊁꇁꌺꇢꇉ,
ꀉꊪꇜꑴꄷ,
ꋋꂷꆈꌠꁍꁈꐛ,
ꐂꇁꂶꏪꀂꏽꑌ;
ꋌꊂꌻ꒧ꇉ,
ꀗꊪꆹꇜꄷ,
ꋋꂷꉌꈲꁍꁈꐛ,
ꐂꇁ꒜ꄳꀁꏾꑌ。

ꃵꃶꌺꌕꑻ,
ꌕꑻꌕꅇꄜ,
ꄜꑌꐮꂸꌧ。
ꃵꃶꌺꌕꑌ,
ꌕꁯꌕꄷꈤ:
ꃵꃶꆿꑴꆹꉌꈲ,
ꌧꇁꂿꅍꐥ,
ꇓꁨꃅꌐꊤ,
ꐦꐛꈁꉬꋌꊌꇈ,
ꎰꆈꎿꋯꋦ;
ꃵꃶꇜꊫꆹꆈꌠ,
ꏜꌀꃅꌐꊤ,
ꈬꊰꈬꉘꏮ,
ꉇꆹꀋꁮꀋꇖꐙ,
ꈏꆹꈬꉻꐈꆃꐛ,
ꃵꃶꌦꎭꆹꀒꋤ,
ꌩꇺꂰꌐꊤ,
ꉘꃅꌕꊛꋦ,
ꈏꆹꀒꋤꄷ,
ꉇꆹꇁꂷꄷ。
ꀒꋤꊿꑞꆹ:
ꃱꇉꀕ,
ꃱꌋꏂ,
ꃱꇁꂷ,
ꃱꏸꋩ,
ꃱꅔꄧ,
ꃱꊪꇬ,
ꃱꐯꀕ,
ꃱꁧꅐ,
ꃱꁈꀺ。
ꀒꋤꈬꃱꃅ,
ꃅꈬꄅꇬꋦ;
ꉌꈲꌕꃱꃅ,
ꃄꌕꄅꇬꋦ,
ꎰꐎꎰꆈꇈ,
ꎰꈤꊰꑋꑟ,
ꎰꋦꃄꇖꄹꊂꁊ;
ꆈꌠ꒔ꃱꃅ,
ꃅ꒔ꄀꇬꋦ。
ꐧꃅꃵꃶꑌ,
ꑮꒃꑍꊏꋋꈓꐛꇬꆏ,
ꅩꄧꆅꄷꅇꈨꇁ。
ꐧꃅꃵꃶꑌ,
ꊪꌺꌕꑻꐊ,
ꍶꁮꆈꂷꌊ,
ꅩꄧꉃꆹꇈ,
ꍶꁮꇌ꒿ꂾꆏꐂ,
ꀋꃋꌐꃶꂿꆏꒉ,
ꒉꋊꉬꑴꄷ。
ꃵꃵꉬꐮꀱ,
ꉒ꒜ꄓꑟꇁ,
ꉒꇁꉾꀉꂿ,
ꉘꂾꄓꅸꇁ,
ꃱꇁꃝꀉꂿ;
ꀻꑳꐎꁠꇁ,
ꁮꇁꂥꀉꂿ.
ꉒꉾꑋꌺꒉ,
ꃱꃝꑋꌺꇢ,
ꁭꂥꑋꌻ꒧,
ꃝꎆꁵꇬꆹ,
ꁮꌉꎆꂸꁵ,
ꃝꋚꁴꇬꆹ,
ꁬꃷꋚꀋꍈ。
ꁮꌉꀋꇷꋠ,
ꄼꁱꄹꊂꄵ,
ꉻꐚꇖꃱꅝ;
ꁬꃷꄹꊂꈴ,
ꇁꌊꉒꑭꄵ,
ꉒꊰꃅꊂꊎ,
ꉬꑎꌺꋒꄚꄉꁮ,
ꁮꌉꁬꃷꀋꉬꆏ,
ꉬꐮꉬꑎꃝꑴꌦ。

ꉬꄚꇴꌅꑌ,
ꏃꃅꉬꐮꏭ,
ꁮꌺꁮꃅꇨ,
ꆰꌺꆰꃅꇨ,
ꋋꑌꀋꇷꋠꃲꄷ,
꒔ꑍꇰꒉꁉ,
꒔ꑍꑳꒉꁉ,
ꌧꇁꂿꒉꉬꑴꄷ,
ꌌꇁꄵꇓꁧꀐꆏ,
ꉎꆹꏂꍔꄉ,
ꐧꆹꐎꍔꄉ,
ꑬꂪꌩꍔꂷꂦꄉ,
ꈬꌩꈬꇓꋌꅝꇰ,
ꈬ꒿ꈬꃪꋌꅝꇰ,
ꐧꇁꃰꊿꋒ.
 

ꇁꀦ: 未知 ꁰꄻꌠ:  |  ꄜꃑꌠ: beley ꌤꃅꅉ