ꆈꌠꀎꋏꇐꀳꇬ:“ꇤꇉꊿꀋꈪ,ꒊꄝꇓꀋꈪ”ꄷ。ꆃꎭꃅꈋꒈꀑꏭꐛꌠꐟꈯꇤꇉꆹ，ꃅꈋꃅꏦꋽꎔ，ꁦꒉꇉꉬ，ꁧꐙꁧꄅꄖ；ꁧꌦꁧꌋꇤꇉꏸꍀꁧꂷꐛ，ꁧꎔꁧꃨꇤꇉꃅꑌꉘꂷꐛ，ꉎꆹꁧꐙꀑꉞꀕꌠꈾꁌꀊꂾꁧꂷꐛ，ꁦꐙꉌꋲꂵꇖꀕꌠ，ꑊꋌꉱꃀꄚꈻꇁꌠꅡꀯꇉꂾꁧꂷꐛ。ꄹꀧꉘꒉꑍꇁꌊꒉꏿꃅꄚꈴꐺ，ꀎꋏꋂꈴꆿꈴꍤꂷꇴꄐꄚꇬꐛ。ꉎꆹꁧꐙꑿꉘꅉꑌꐛ，ꐰꆹꐦꐛꍯꊪꅉꑌꐛꄉ，ꋙꅐꒉꅐꄉꉹꁌꃰꊿꇁꌊꇤꇉꑟꆏꉇꀱꁧꀋꏾꃅ，ꇤꇉꊿꀋꈪꌠꆏꋋꒉꄸꌠꉬꄷ。
插秧进行时
ꈜꀕꇈꁧꌦꁧꌋꇤꇉꏸꍀꁧꑟꅑꅸꀉꇙꑢꈴ、ꁌꍡꍔꈴꎼꑝꏃꀡꉬꏝꐦꀞꑟꌠꆏꍯꃅꃪꂿꄄꍅꀕꃅꄚꇬꐛ。ꀋꇊꆏꎭꇁꅧꀋꐒꌠꐛꑿꅿꐚꁓꌡ，ꇇꃅꇇꅑꌠꆀꃅꀈꐔꅿꈪꑟꈪꂷꌡ，ꈜꀕꇈꑴꁱꌧꃀꅿꋽꇐꁬꒌꉾꁬꑌꌡ。ꃅꈎꇖꄮꐰꐯꇯꆫꇁꃨꅍꐥ，ꋽꇐꀋꃷꎵ，ꋌꆹꁍꑘꋙꅐꄉ，ꉹꁌꃰꊿꋚꋠꂊꊪꀕꄉꑲꋦꌣꈚꏂꌠꀊꄂꀋꉬꃅ，ꎔꇁꃨꌠꃅꈋꃅꏦꉾꌠꐛꄉ，ꈩꆫꊿ、ꒌꈻꒌꈹꒌꍑꊿ、ꑴꁱꌧꃀꑠꅉꀕꂒꉻꈨꄉꆀꃅꇕꈌꃅꇁꌊꄚꇬꌵꇬꎷ。
插秧进行时
“ꃅꈎꋍꈓꑋꈌꀨ,ꃅꑍꋍꑍꎹꄑꀨ”。ꋍꈎꇁꅉꀕ，ꌕꆪꃨꎔꑋꈌꐊꄉꃨ，ꐦꇬꍯꆧꑋꉐꐊꄉꅿ，ꍯꃅꄹꇬꒉꊐꐝꇅꀕꄉ，ꈨꑭꇂꃴꑊꈷꇓꂷꌡꄉꏹꌬꏷꌬꅍ，ꄹꇬꃅꆹꂡꀊꃴꌠꌟꃅꄚꇬꋍꌅ，ꀊꅑꇬꋍꌅꃅꋽꎔꇰꇈꌠꇬꆏ，ꍯꊪꆨꉬꌦꀑ。ꎭꇁꅧꀋꐒꌠꇤꇉꉹꁌꉬꇮꎹꄓꃫꀮꐊꄉꄓꂃꑭꍣꇈꆞꑭꎵꄉꍯꃅꇬꉜꄉꒉ，ꐭꄐꌠꐭꃅ，ꒉꄐꌠꒉꃅ，ꃀꌠꀉꑳꉬꇮꑭꄑꄉꃅ。
插秧进行时
“ꀊꁠ,ꋋꈍꑋꑍꊮꊫꃭꇤꒇꌐꇬꆏꀀꃌꊪ,ꌗꍈꂯꊏꄸꉚꀋꂪꌦꇬꆏ,ꍯꊪꌦꀐꐙꄏꌦꒉꂯꀐ。”ꇬꊎꍯꊪꇰꌠ,ꇤꇉꑤꉛꂫꐤꀀꌠꆈꌠꌋꅪꀉꈬꂾꂶꌠꈁꑓꇬꇵꂷꌩꅉꃅꏹꍓꏭꌧ。
扯秧苗
ꑋꈌꂷꉐꏂꅪꈬꒀꁌ，ꉐꂂꈉꄮꐛ。ꀋꑍꊂꊛꄉꂷꉐꈍꑋꑍꐛꈭꐨꆏ，ꀊꉗꏢꆗꃶꇬꎍꀐꌠꇤꇉꃅꅉꈧꌠꆏꒉꑙꃅꐙꄉ，ꉹꁌꃰꊿꈧꌠꆏꇬꊎꋙꊪꒉꏽꀋꆷꃛꃅꎍ。
田间插秧忙
4ꆪ13ꑍꄹꉇ，ꏹꍓꇁꌊꐟꈯꇤꇉꍯꅐꂓꅑꌠꁌꍡꃀꐦꀞꇬꑟꇁ。ꑓꏮꈁꉜꇁꅉꇬ，ꍯꃅꄄꍅꀕꌠꇬ，ꎭꇁꅧꀋꐒꌠꑘꃅꃰꊿꈧꌠꆏꒉꉢꇁꃅꇬꊎꀋꆷꃛꃅꍯꊪꐺ。ꍯꆧꃴꆧꁌꌠꄄꎓꀕꃅꎆꇌꀕꃅꊿꊪꃅꅉꋉꎼꒉꇬꂽꑼꑠꁥꐮꉻꏓꌠꌟꃅꉜꌒꐯꉜꌒ。ꃴꇁꆧꈨꒉꌠꉘꇉꇗꄃꀕꌠꀄꂻꋋꈁꑋꈌꐊꄉꊪꇊꊖꃴꊐꎼꒉ，ꃅꍵꄮꐰꈍꃅꑌꋚꄉꃪꅪꎆꎂꀕ，ꃅꈎꀉꏀꍯꊪꀋꆷꃛ，ꑘꃅꃰꊿꋍꂷꐈꑍꂷꐛꄡꏽꌠꃛꊸꄮꈉꊨꌠꑌꑭꄑꀐ……
管理秧苗
ꍯꃅꂴꋵꐕꍯꈝꃀꇬ，ꍯꃅꈯꄔꑘꃅꊖꑽꈝꈧꌠꇬꐕꍯꀄꊭꌠꂱꀦꍮ、ꊉꑠꍮꌋꆀꂽꄬꍮꑠꎍꒆꌐ。ꐕꍯꈐꏭꆏꀻꏮ、ꀆꐒꈅꐊꎴ、ꅝꇐꑴꆀꀀ。ꉇꑴꋚꒉꍣꋚꃮꎸꉻꇪꏖ、ꊰꅍꆂꀡꊵꑠꄻꇬꊎꄉ。ꂿꑘꇱꑭꊐꐛꂨꀕꄉꌠꄧꇁꏷꈧꌠꑭꈻꌊꆏꒉꉢꇁꏍ，ꈀꄸꑌꆏꃅꉢꀋꅲ，ꂱꑱꑞꃅꋭꌠꑞꃅ。
施肥
ꁌꍡꃀꈬꐦꋁꇬꀀꌠꋁꂱꃀꀉꃈꂶꌠ，ꇇꇬꍯꊪꇰꌠꆏꄉꏹꍓꏭꒊꅍꀖꄉꉉꇬ：“ꆏꉜꉏ！ꀋꃋꋋꇅꇬꆏ，ꂿꑘꊿꈧꌠꂯꐕꍯꑌꄉ‘ꎮꀞ’ꇁ，ꑭꀖꌋꆀꂿꑘꌬꈬꌬꈾꈧꌠꆏꄦꇁꏸꌌꈻ，ꊿꌋꆀꂵꆪꋠꌠꍫꆏꐕꍯꌌꈻ，ꑭꅑꈜꀋꎼ，ꇱꄓꃤꀋꀵ。ꀋꃋꋋꇅꇬꂿꑘꊿꂷꄻꇬꑌꄡꇗꐥꌒꐯꐥꌒꌠꉬꀐꃅꄉ。”ꋍꅾꁱꐭꌗꅐꅉꇬꌋꆀꑊꑍꒊꆭꀕꌠꇬꄉꀃꑍꋋꄮꂿꑘꁡꇤꉹꁌꃰꊿꐤꃅꌒꌠꏹꍓꉜꅐꇁ。
成昆复线穿越美丽田间
ꋋꈍꑋꈎꅑꅸꇁꌠꆏ，ꃰꊿꎆꊂꈹ,ꎇꃀꏜꊂꈹꄉ，ꂿꑘꁡꇤꀊꉘꌠꏀꀉꑌꌠꉷꃅꇓꈓꊋꃅꄈꇪꎆꎹꁧꌐ。ꆀꃅꁡꇤꆫꄓꂿꄑꀋꆷꃛꋋꇅꇬꆏꊾꊋꇬꀋꇎ，ꑘꃅꊖꑽꑠꐰꒃꉏꁵꌠꀋꊌꃅꊋꋠꐯꊋꋠꃅꎍ。ꃀꀉꃈꉉꏹꍓꇰꇬ：“ꋍꁯꋍꁯꀊꄁꂱꑱꊨꏦꃅꇬꆏꊾꊋꇬꀋꇎꄉ，ꑘꃤꑠꆏꃅꌊꌐꄮꀋꐥ，ꉪꆏꐮꊂꎭꊋꋪꌠꃅꄉ，ꆏꄑꉠꇇꀨ，ꐯꇯꏓꋧꄉꋋꁯꏤꃅꌐꇬꆏꀉꁆꋍꁯꏤꃤꃅꄉ，ꑠꃅꇬꆏꃅꌊꐳꑌꐳ，ꊼꇅꊾꀋꃚꀋꄜ。ꆏꉜꉏ！ꀃꑍꆹꉬꇮꉪꏤꃤꃅ，ꉠꂽꑼꋋꁥꀉꇨꁥꉬꑴꀞ！”ꄷ。ꏹꍓꋍꅾꇇꏸꄐꅉꈜꄉꉜꇬꆏ，ꍯꃅꇬꊿꊯꎖꑻꐥꑠꁥꀂꏾꈎꄉꀋꆷꃛꃅꇬꊎꍯꊪꇰ。ꋀꊈꌋꆀꌧꈿꅉꄉꅉꐚꇬ，ꃀꀉꃈꏤꌟꃅꐮꊂꎭꄉꃅꌠꊋꒉ，ꑍꂷꌕꑻꀊꄂꇬꉆꄉꍯꊪꌠꀁꑌ，ꄚꇬꊯꑻꉆ，ꀊꄶꇬꈬꑻꉆꃅ，ꍯꃅꄅꍅꀕꌠꇬ，ꒉꇁꉐꃚꎓꁨꀕꄉꍯꊪꀋꆷꃛ。
圣山吉日坡脚下的美丽梯田
ꎹꄓꏛꃅꄓꑘꃅꇁꈧꌠꆹꇬꊎꑬꆏꄉꂵꆪꍬꈥꋠꇰꀐ。ꋁꂱꌋꅪꀋꃀꑠꂷꉪꏭꐮꇷꄉꍫꈥꋠꇁꄷꉪꇴ，ꉪꆹꈀꎭꀕꀐ，ꋠꄉꀐꄷ。ꋌꒈꌦꀕꃅꉉꇬ：“ꆍꊈꉪꍍꄻꀋꅐ，ꋋꈨꆹꀋꉊꂴꌟꃅꆿꈜꃅꄉꀁꇬꄉꃅꌊꇁꌠꀋꉬ，ꋋꆹꉬꇮꑤꍰꇓꈓꇨꌈꇬꄉꃼꌊꇁꌠꉬ，ꑍꃀꑍꆍꊇꋠꌠꌋꆀꐯꌟꌠ，ꆏꉜꉏꎿꏬꋚꊐꅍꁦꎴꌠꌌꊐꄉ，ꊰꅍꆹꃮꎸꉻꇫꏖꃪꄉꌠ、ꀉꁆꊰꇐꅝꒉ，ꉇꑴꆂꀡꊵꑠꑌꐊ。ꉪꊇꑠꃅꀕꌠꆹꈁꇢꉐꑐꋠꏾꅝꂿꌠꀋꉬ，ꋋꈍꑋꑍꀋꆷꐯꀋꆷ，ꋚꃅꋠꀋꆷꐛꅹꌠ，ꉇꆏ，ꀋꃋꋋꈍꑋꈎꂿꑘꊿꈧꌠꑌꎆꎹꋚꈹꑲꌦꄉ，ꎆꃀꋋꈍꑌꂷꅐꌠꆹꈀꄸꑌꅐꄎꀐ。”ꇬꄉꅉꐚꇬ，ꋀꊈꆹꂱꑱꊰꅍꑞꃼꌠꁱꄯꒉꇬꄀꄉꈭꐨꆏꎆꃀꏓꐕꍮꌥꃛꁵꄉꋀꊈꎁꃅꊰꅍ、ꋚꒉꌋꆀꎧꑳꑠꃼꌊꇁꎼ。ꊿꊇꆏꄉꀋꇤꃅꍯꊪ，ꊪꌊꐚꄏ、ꀀꂮ、ꈁꃶꒉꌤꄮꇬꆏꋚꑌꉘꁇꀕꌠꌋꆀꎧꑳꈧꌠꑌꃼꌊꇬꑟꇁꀐ。ꋀꊇꆏꌐꐩꀕꃅꍫꈥꋠꇈꀃꃀꂊꊪꀕꄉꈎꑌꊋꑌꃅꄉꑘꃅꊖꑽ、ꍯꊪ。
人在田间忙，梯田美如画
ꆈꌠꇐꀳꀋꐯꐤꀋꁨ：“ꋍꑍꀋꃅꆏꊰꑋꀋꋠꄮ，ꊰꑋꀋꃅꆏꋍꈎꀋꋠꄮ。”ꎭꇁꅧꀋꐒꌠꐟꈯꇤꇉꆈꌠꉹꁌꃰꊿꋍꏅꌠꆹꂱꑱꈎꊋꌋꆀꀑꁮꅺꐳꐨꌌꄉꑘꃅꊖꑽꌣꈚꈝꃀꏂ，ꄄꍅꀕꌠꍯꃅꇫꊎꍯꊪꇰꌠꑘꃅꃰꊿꈧꌠꆹꇙꑐꐺꀕꑵꃚꌐꂷꈧꌡ，ꆀꃅꑋꈌꉙꏦꀕꌠꋀꊇꌌꄉꉌꐡꇗꈭꀕꌠꑵꉙꑠꎴꐛ，ꍯꅿꃴꆧꁏꌠꂿꇬꆏ，ꀋꇊꆏꍴꊂꄮꐰꍯꅪꃱꀜꉧꄉꍯꂔꅾꉘꌐꐩꀕꌠꊿꅿꇁꌠꌡ。
