ꀋꑍꊂ,ꆃꎭꍏꂿꈬꑤꀀꌠꀊꈽꏂꁬꅿꆀꉙꅋꏢꄆꒌ《ꆿꒌ》ꄷꂶꌠꍑꄻꌐꇈꌌꆃꎭꃅꄷꃑꇰꀐ。ꄆꒌ《ꆿꒌ》ꄷꋋꂷꌠꎼꈎꇖꆪꄑꌌꀒꎂꅚꍃꁧ、ꀒꎂꎿꃀ、ꉢꉳꍔꌋꆀꉢꆀꍔꃅꄷꋦꈭꐛꐪꋽꎔꑠꇬꄉꍑꄻꇈ,ꃅꐎꈍꑋꁮꆪꅑꅷꇁꌠꆏꌌꑏꄻ、ꊛꄻꌠꃅꄉ,ꀋꃉꄻꌐꄉꌌꆃꎭꃅꄷꄉꃑꇰꀐ。
《ꆿꒌ》ꐊꇐꊽꏯꉙꂘꐨꐥ
ꀊꈽꏂꁬꅿꆀꉙꄆꒌ《ꆿꒌ》ꄷꋋꂷꐊꇐꆏ,ꆀꃅꀊꉘꃅꇢꄷꑠꂷꋍꀿꃀꅋꇐꐛꅹꃅꀑꇬꁮꈭꐨ,ꋋꆏꊾꍸꀉꑳꎮꑍꈧꊰꀕꑠꂷꐛ,ꋍꀿꃀꑋꂴꊂꃅꐮꊂꈹꁧꈭꐨ,ꊿꆿꏓꆿꁘꅋꃷꅋꅝꈧꌠꋍꉌꂵꀂꏽꌂꑘꐘꐛꄉ,17ꈓꄹꈎꆏꋌꎼꂽꄻꁧꇈ,ꂽꄻꅉꇬꄉꅥꇤꁈꌋꆀꌧꇐꂿꇐꀉꑌꈨꋌꌷꐙ。ꊁꂽꄻꅷꇁꈭꐨꆏ,ꋌꎭꇬꉢꇬꌤꃅꁧ,ꄚꋋꆏꇬꉢꂷꄷꀋꄹꃅꋌꂁꆿꏓꆿꁘꈨꐊꄉꌠꌞꊿꑶꑳꌌꐯꃵꌠꌋꆀꌤꆿꀋꉾꀋꃪꌠꃅꈧꌠꋌꉜꋍꑓꋪꀂꏽꊐꄉ,ꌤꆿꐪꊂꇿꁮꇿꑟꌠꋌꋌꎖꇇꈐꇬꊐ,ꀉꁁꆿꏓꋀꊇꌋꆀꐮꃼꇇꆴꇁꑠꂷꌋꆀꐮꏯꁏꇈ,ꆿꏓꂶꌠꋌꌉꌦꇧꎭꄮꇬꆏ,ꁦꋠꃅꇢꂶꌠꇬꉢꂷꉬꌠꋌꇫꐊꌠꆿꏓꈧꌠꌋꅜꄉ,ꋋꇅꃅꋀꊇꀱꄚꄉꐯꅣꐮꇤꇈ,ꊁꄽꂫꆏꆿꏓꑍꁥꐯꇯꋌꈔꋏꇧꎭ。ꈬꉘꃅꄷꀉꑳꌧꅍꂿꅍꀋꐥꑠꍈꑌꆿꏓꈧꌠꇱꊏꌊꅋꄐꄉ,ꀋꇊꌦꃅꎍꄮꑲꆀꃅꇢꇱꀨꎹꌊꅋꊱꄉꁬꋌꄐꇈ,ꅋꇐꈬꇬꄉꋌꇱꈭꋏꅐꇁꀐ。
ꄆꒌꋋꂷꆏꀃꑍꋋꄮꆀꃅꁡꇤꐥꐨꐥꄸꇬꃅꇏꉪꇐꀋꉾꌠꌋꆀꆈꌠꊿꋅꋋꁯꉌꊨꉂꇱꄉꊨꏦꈯꊨꏦꄿꃅꐥꐨꐥꄸꇬꊾꋒꇁꌠꐛꐪꀋꉾꀋꃪꑠꏭꆼꁏꄉ,ꐥꐨꋍꑟꋍꑵꇫꁧꏖꄉꐥꐨꊋꋠꏢꅝꈧꌠꀋꐥꃅꐥꌒꇁꌠꃆꂮꉉꁱꌠ。ꄆꒌꈐꏭꑫꋒꃅꊿꈧꌠꋍꂷꋑꀋꋒꅥꇐꇮꁈꀉꇨ,ꌧꇐꌧꐨꀊꅼꇈꅥꇐꇮꇐꀉꇨꄉꄆꁱꉜꌒ,ꄷꀋꁧꊽꏯꉙꂘꐨꀉꒉꃅꐥꑠꐘꉬ。
ꊥꇺꊿꀊꈽꏂꁬ:ꄆꒌꑵꌊꐥꐨꎺꁱ
ꎼꈎ29ꈎꀐꌠꀊꈽꏂꁬꆹꅥꇐꇤꁈꉌꃹꌠꆈꌠꀕꏀꂷꉬ,ꋋꆏꉪꍏꂿꈬꑤꇬꀀꌠ,ꋍꀉꄉꆏꋀꏤꁡꇤꇬꄆꑵꃑꊿꂷ。ꋌꀄꊭꃅꋍꑍꇯꆐꋍꀉꄉꄆꒌꃑꅉꄉꄆꒌꐮꇤꌠꀉꑌꃅꉜꋺꄉꋋꑌꄆꒌꉌꃹꆸꅝ。ꋌ12ꈓꄹꈎꆏꋍꀉꄉꇱꏃꌊꉼꇂꌜꇬꄉꃶꌡꌷꁧꇈ,2008ꈓꆏꎮꉰꄉꀱꀁꇬꇁꇈ,ꀒꎂꄉꌠꏀꃶꌡꌷꌠꂘꅉꂷꀞꄉꀕ,ꌶꌺ6ꈓꅑ16ꈓꑟꌠꎹꌊꃶꌡꌷꄉ,ꆃꎭꃶꌡꅥꇐꄜꉺꅷꁧꂿꄷꀐ。
ꃅꐎ5ꈎꅑꅷꇁꌠꆏ,ꀊꈽꏂꁬꅿꌶꌺꅥꇐꀂꏽꌧꐨꀉꇨꃅꐥꌠ100ꑹꌶꅐꁧꀐ。ꋌꃀꍏꇩꌧꍧꋧꃅꀒꂱꃶꌡꅥꋓꅉꌋꆀꑣꇤꋧꃅꃶꌡꅥꋓꅈꇬꏁꏪꈁꁠ24ꂷ、ꐍꏪꈁꁠ15ꂷꌋꆀꐯꏪꈁꁠ28ꂷꊌꋺ。“ꊌꐨꆹꀉꑳꋍꍂꃅꐥꐨꊌꃤꉬ,ꉪꊇꆏꁱꂷꌋꆀꁰꒌꌌꄉꌶꌺꀉꑳꐥꐨꊌꐨꎺꄅꎻꂿ。”ꃶꌡꌌꀨꇬꄉ/ꃶꌡꌌꀑꑊꁤꇅꀕꌠꀊꈽꏂꁬꆏ,ꅥꇤꃆꂮꌌꀉꑳꂘꈭꐨ,ꄆꒌꍑꃑꏡꌠꄡꇗꋌꎺꋌꉪꉌꂵꀂꏽꊐꄉꇬꎷ,“ꊨꏦꊿꋅꃆꂮꄆꒌꍑꄻꌠꆹꉠꉌꂵꈐꉪꐨꀋꉬꀋꉆꏢꉬ!”2009ꈎ,ꆃꎭꍏꆈꌠꅥꇤꃆꂮꄆꒌꉘꃀꂶꌠ—《ꆃꎭꌳꈄꀋꃀ》ꄷꂶꌠꋌꑵꎼꇁꈭꐨꆏ,ꊛꄉ《ꆃꎭꍸꇐꎹ》、《ꆈꌠꀉꑳꎱꆀꌧꇬꆹ》、《ꆃꎭꆈꌠꀉꑳ》ꌋꆀ《ꆿꒌ》ꄷꑠꉬꂷꑵꄻꅐꇁꋺ。ꋌꈍꑋꂷꐯꇯꑵꊿꈧꌠꃶꌡꀉꇨꑠꈨꀉꄂꉬꄉꉜꌒꐯꉜꌒ。ꀋꑍꊂꑲꆀꍑꄻꅐꇁꌠ《ꆿꒌ》ꂶꌠꄈꂴꈧꌠꏭꀋꋌꃅꉜꌒꌠꆏ,ꄆꒌꋋꂷꍑꄻꄮꇬꑭꇇꇅꈀꀜꈁꄩꅉꃅꃶꐚꌠꀊꌃꉬꄉ,ꌌꏦꈜꄉꃷꄷꆏꋋꇅꃅꊿꃼꌊꁧꌐ。“ꂴꆽꆈꌠꉙꃅꄉꂶꌠꌌꆃꎭꈬꉘꃅꄷꏪꐦꌋꆀꂿꈬꑠꇬꄉꃑꉚ,ꊂꑲꆀꉌꈲꉙꃅꄉꂶꌠꍑꅐꇁꂿ。”ꀊꈽꏂꁬꄹꇬ,ꆀꉙꂶꌠꀋꃉꌌꑭꄑꄉꆃꎭꃅꄷꄉꃑꇰꀐ,ꉌꈲꉙꃅꄉꂶꌠꑌꋋꇅꃅꌌꊁꊛꄉꃑꂯꄉꀐꄷ。
ꄐꁆꊿꃏꇊ:ꄆꒌꋋꂷꅋꏢꂿꄐꀋꂿꑘꃅꐥ
ꄐꁆꊿꃏꇊꆏꎭꄏꌜꀀꌠ,ꀋꃋꋌꃀ《ꄏꇗꈴꆹ》、《ꎹꄣꄃꏓꏧꌕ》、《ꄏꃑꉼ1949》ꌋꆀꍰꇊꁱꇐ《ꅥꇐꀉꇨꂷ》ꑠꈍꑍꂷꄐꇺꋺ。
ꃏꇊꌋꆀꀊꈽꏂꁬꑋꆏꅥꇐꇤꁈꃆꂮꃅꄉꐯꌥꑍꂷꉬ,ꋌꃀꀊꈽꏂꁬꅿꆀꉙꄆꒌꇖꂷꐯꇯꋌꄐꁆꄉꑵꈩꌠ,2009ꈎꃏꇊꇁꌊꆃꎭꄉꀊꈽꏂꁬꅿꄆꒇ《ꆃꎭꌳꈄꀋꃀ》ꄷꂶꌠꄐꁆꇈ,ꋋꂷꑵꄮꇬꆃꎭꃅꀹꌋꆀꆃꎭꀊꉘꐥꐨꉌꃀꉂꑟꅑꇈꌳꈄꉌꑟꑌꌠꋍꉌꂵꀂꏽꌸꄉ,ꋌꉈꑴꆏꀊꈽꏂꁬꌋꆀꐯꇯꄉꆃꎭꊿꋅꃅꀹꐥꐨꃆꂮꌌꄆꒌꃅꍑꄻꇈ,ꀊꈽꏂꁬꅿꄆꒌꇖꂷꌠꐯꇯꋌꇫꄐꁆꀐ。ꃏꇊꄹꇬ,ꀊꈽꏂꁬꅿꄆꒌꋌꈨꏭꀋꃋ《ꆿꒌ》ꋋꂷꄉꂴꆽꈧꌠꏭꀋꋌꃅꍑꄻꌊꉾ,ꅇꀨꏡꌠꉾꌠꀉꄂꀋꉬꃅ,ꑵꊿꈧꌠꐯꇯꅥꇐꇤꁈꌧꄉꅥꇮꇤꉔꑠꈨꉬꄉ,ꄆꑵꁬꌠꉜꐨꀉꒉꃅꐥꀐꄷ。
(ꆃꎭꑍꄜꏹꍓ ꂵꉌꍶꏣ ꁱꍑꌠ)
