ꇩꏤꑭꊂꆈꌠꁱꂷꌤꃅꃀꈿꇬꃛꏤꄉꌠ
ꇩꏤꑭꊂꆈꌠꁱꂷꌤꃅꃀꈿꇬꃛꏤꄉꌠ
(1980ꈎ1ꆪ16ꑍ)
ꇩꏤꑭꊂꊿꋅꌤꃅꊈꑼꉼꇬꊥꇬ，ꋍꄘꈬꉐꉆꊰꈎꋍꆪꊰꇖꑍꄹꉇꅑꊰꃘꑍꄹꉇꑟꌠꀙꏢꇓꈓꄉꇩꏤꑭꊂꆈꌠꁱꂷꌤꃅꃆꂮꃀꂷꈿꀐ。
ꃀꋋꂷꈿꇁꌠꆹ，ꇩꏤꑭꊂꌕꃢꀁꑌꊿꋅꅇꂷꁱꂷꌭꑪꇕꄟꌠꒀꇂ、ꇭꍏ、ꌧꍧ、ꇨꑭꆈꌠꁧꎁꈧꌠ、ꀙꏢꐥꄉꆈꌠꅇꂷꁱꂷꌤꃅꈧꌠ、ꌜ、ꐎ(ꐎꆹꇨꑭꄜ)ꋋꇖꂷꊿꋅꌤꃅꊈꑼꉼꇬꌟꒉꈧꌠꐯꇯꌕꊰꑋꑼꐛ。ꃀꈿꇬ，ꑠꈍꑋꏢꌌꋒꐯꋒꃅꇕꄟꇈ，ꐯꇯꇖꐛꄉꀐ。
ꋍ、ꆈꌠꁱꂷꂴꆽꐥꇈꌠꃆꂮ。ꇩꏤꑭꊂꆈꌠꉬꉐꃪꎖꐥ，ꀉꑌꌠꆏ:ꒀꇂ、ꌧꍧ、ꇭꍏ、ꇨꑭꋋꇖꈚꇬꀀ。ꀃꌋꀊꆨꅉꆐꆈꌠꊨꏦꁱꂷꐥꇈꌠ。ꀋꉊꃀꌎꆽꁏꊿꆼꍅꏠꌠ，ꆈꌠꁱꂷꏭꄔꈻꀜꐆꇬꎷ，ꑠꃅꑴꇬ，ꆈꌠꉹꁌꈧꌠꄡꇗꆈꌠꁱꂷꌷꅷꌬꅷꇁꌠꉬ。ꌜꋋꈨꇬꆈꌠꈧꌠ，ꆈꌠꁱꂷꌌꐩꋊꄯꒉꏂꀨꑠꈍꑋꃅꁱꇬꐓꄉꇈꌠꆹ，ꍏꉸꊿꋅꁱꂷꑴꂷꁨꇈꁌꇐꇬꌠꇬꀋꉬꀋꉆꈨꉬꌠ。ꋋꈨꉜꎼꇁꇬ，ꆈꌠꊨꏦꁱꂷꀋꐥ，ꐤꑌ“ꀘꂾꁱꂷ”ꉬꄷꉜꌠꉉꌠꆹꆽꑽꌠꉬ。ꀋꃋꋌꃢꃀꈿꇁꌠꉬꇮꃅꉉꇬ，ꆈꌠꑌꌌꇩꏤꑭꊂꊿꋅꂱꑱꁱꂷꐥꌠꃅꄉꄡꑟ。ꇩꏤꏦꃀꌋꆀꄈꅿꊿꋅꇗꅉꏦꃤꇬꍬꄉ，ꆈꌠꉹꁌꆈꌠꁱꂷꌬ，ꆈꌠꁱꂷꌌꀻꎆꌅꈌꋋꏢꁌꒉꌶꄷ。
ꑍ、ꌧꍧꆃꎭꆈꌠꁱꂷꋊꍬꌠꃆꂮ。ꀋꉊꌧꍧꆃꎭꃅꈋꀺꑳꁱꂷꀊꏀꑵꄻꌊꌬꇈ，ꃅꐪꑽꑌꇬꀋꊒ，ꉹꁌꃅꋌꑵꉌꀋꃹꄉ，ꀋꉊꅉꆐꀋꈁꃅꇤꇧꎭꀐ。ꌧꍧꆃꎭꆈꌠꃅꄷꋍꄘꈬꉐꏃꊰꃘꈓꋍꆪꇬꆏ，ꆈꌠꁱꂷꂴꐥꇈꈧꌠꌌꋊꍬꄉꌬꇈ，ꆈꌠꇥꀯꌋꆀꉹꁌꃅꋋꈨꉌꃹ。ꀋꃋꋌꃢꃀꈿꇁꌠꑌ，ꉬꇮꃅꋋꈨꉌꃹꈴꀐ。ꋍꈭꐨ，ꌧꍧꌜꇬꁳꄯꒉꁱꌊꇩꃷꑼꇬꄜꄉꈌꁧꎼꇁꂿꄷ。
ꌕ、ꒀꇂ、ꇭꍏ、ꇨꑭꆈꌠꁱꂷꃆꂮ。ꃀꈿꌠꐯꇯꉜꇬ，ꒀꇂ、ꇭꍏ、ꇨꑭꆈꌠꉹꁌꈧꌠꁳꆈꌠꁱꂷꌷꌠꌬꌠꌅꈌꏡꌠꁌꒉꌶ、ꀧꌋꃅꌶ。ꋍꈭꐨ，ꎔꃅꄐꏤꄉꐯꇯꆈꌠꁱꂷꂴꆽꐥꇈꌠꋊꍬꄉꌬꄡꑟ。ꇩꏤꊿꋅꌤꃅꊈꑼꉼꏃꌠꇂꃴꄉ，ꒀꇂ、ꇭꍏ、ꇨꑭꋋꌕꈚꇬꊿꋅꅇꂷꁱꂷꌤꃅꌠ、ꆈꌠꇥꀯ、ꆈꌠꅇꂷꁱꂷꌧꈴꌠꆈꌠꐋꀨꑠꈨꏓꐯꇯꄉ，ꒀꇂ、ꇭꍏ、ꇨꑭꆈꌠꅇꂷꁱꂷꍰꆗꈭꐨꆏ，ꆈꌠꁱꂷꋊꍬꄉꄜꌊꋌꐘꃆꂮꏲꂠꅉꇬꁳꈌꁧꎻ。
ꇖ、ꆈꌠꅇꂷꁱꂷꌤꃅꌠꉙꂘꃆꂮ。ꃀꈿꇁꌠꉬꇮꃅꉜꇬ:ꍏꑷꊿꋅꌶꅉꇬꉈꑴꆈꌠꅇꂷꁱꂷꌤꃅꌠꂘꄡꑟ。ꑾꌋꈤꊿꋅꌶꅉꇬꆈꌠꅇꂷꁱꂷꌤꃅꌠꂘꇬ。ꆈꌠꌶꌺꋌꃀꑍꀋꋌꃅꎹꄡꑟ。ꋍꈓꋑꀋꋒꃅꌶꌺꀊꏀꌠꎹꄮꇬꆏ，ꄾꌦꋩꃅꒀꇂ、ꇭꍏ、ꇨꑭꆈꌠꌶꌺꈨꎹꇬꇯꄡꑟ。ꌧꍧꆃꎭꆈꌠꊨꏦꏱꅉꍏꇬ，ꆃꎭꆈꌠꁱꂷꋊꍬꄉꏡꌠꌌꆈꌠꁱꂷꌤꃅꌠꉙꂘꄮꇬꆏ，ꒀꇂ、ꇭꍏ、ꇨꑭꆈꌠꌶꌺꈨꎹꇬꇯꄉꂘꅊꇈ。ꋀꊇꎁꃅꊾꈨꂘꅐꇁꇬꆏ，ꆃꎭꆈꌠꁱꂷꋊꍬꄉꏡꌠꌌꍔꆙꄉꌬꇬꌋꆀꋋꏢꌬꐪꌬꈜꎖꋪꌷꇬ，ꐯꇯꈲꏣꐥꑴ。
ꉬ、ꆈꌠꄯꒉꏂꀨꑠꉆꐥꃅꎹꈹꐯꇯꌠꃆꂮ。ꃀꈿꇁꌠꉬꇮꃅꉜꇬ，ꆈꌠꄯꒉꁱꀕꀊꆨꐥꇈꌠꁎꄻꌊꍑꅐꇁ，ꇩꏤꊿꋅꌤꃅꊈꑼꉼꇬꇖꂟꄉꌤꃅꋌꐘꇬꏟꈯꃅꏲꂡ。ꒀꇂ、ꇭꍏ、ꇨꑭꌜ、ꐎꋋꌕꂷꇬꆏ，ꂱꑱꃅꄷꆈꌠꁱꂷꀰꏢꅉꑠꂷꄻꄉ，ꌌꇩꏤꌤꃅꅉꑌꐚꂷꄉꇈ，ꋍꈓꋑꀋꋒꃅꎆꃀꄻꇬꁳꄉ，ꌌꌤꋌꐘꃅꎻ。ꍏꇩꎹꉼꈆꑪꑼꊿꋅꅇꂷꁱꂷꎥꃪꅉꇭꆏ，ꊋꀥꇱꄉꆈꌠꐩꋊꄯꒉꏂꀨꎥꃪꌠꌤꃅꄡꑟ。
ꃘ、ꆈꌠꆏꌜꈍꑋꂷꇬꃅꀀ，ꊿꊼꇅꀉꑌ，ꑠꅹ，ꂱꑱꌜꇬ、ꐎꇬꎔꃅꆈꌠꁱꂷꅏꄻꌠꌋꆀꆈꉙꌌꃅꃴꅇꁊꌠꃅꄡꑟ;ꋍꈭꐨꃀꈿꇁꌠꄹꇬ，ꍏꑷꃅꃴꅇꁊꅉꇬꑌꆈꌠꉙꁊꌠꐥꄡꑟ，ꍏꑷꊿꋅꁱꂷꅏꄻꇬꑌ，ꄡꇗꆈꌠꁱꂷꅏꄻꅉꂷꐛꄡꑟꄷ。