ꀨꏾꌠ > ꆈꌠꃆꂮ

ꀁꑌꊿꋅꅇꂷꁱꂷꌋꆀꃅꀹꋻꅑꌠꁌꐥꄣꐥꃅꉜ

ꉪꇩꏤꀁꑌꊿꋅꈧꌠꇬ,ꊿꋅꀉꑌꌠꆹ,ꂱꑱꊨꏦꅇꂷꁱꂷꌋꆀꃅꀺꋻꅑꐋꀋꌡꌠꐥꌠꉬ。ꋋꆹꐩꋊꀊꉗꃅꀻꎆꅷꇁꅉꇬꄉꑠꃅꐙꌠ。ꀁꑌꊿꋅꏓꂱꐥꐨꌋꆀꐮꀋꐞꌠ。ꄚ,ꁌꀋꄝꌦꂾꆏ,ꀃꌋꀊꆨꃰꃅꏱꄮꇬꅑꅸꇩꂱꄈꌍꆽꁏꁥꌠꏱꄮꇬꑟꌠꐯꇯ,ꀁꑌꊿꋅꅇꂷꁱꂷꏭꁒꐀ、ꈼꋧꇬꎷ。ꋀꊇꀁꑌꊿꋅꅇꂷꁱꂷꏭꏿꀘꇬ:“ꁱꂷꉜꀋꌒ,ꅇꂷꑋꁮꉆꁮꃚꋒꌡ”ꄷ。“ꆀꀜꌋꆀꇖꑻꁥ”ꌠꑌꃄꈌꄐꃅ,ꀁꑌꊿꋅꅇꂷꁱꂷꏭꁒꐀꇬ“ꉋꄅꇩꏤꅇꂷꌡ、ꉋꄅꇩꏤꁱꂷꌡ”ꄷ。“ꇤꇧꎭ”ꄷꑠꃅꉉ。

ꉪꄈꌋꆀꍔꃚꆹ,ꂷꆺꍗꑴꌋꆀꃀꊱꄏꉪꇐꇬꊿꋅꐥꐯꒈ,ꊿꋅꐮꋯꑌꄷꌠꏥꏦꇬꈴꄉ,ꀁꑌꊿꋅꃤꅇꂷꁱꂷꌋꆀꂱꑱꅇꂷꁱꂷꌬꉆꌠꌅꈌꐥꋌꐘ,ꁌꐥꄣꐥꃅꉜꅷꇁꌠꉬ。ꁌꄝꇫꇬꄮꇬ,ꄈꌋꆀꍔꃚꆏ,ꐋꏤꑭꊂꀁꑌꊿꋅꅇꂷꁱꂷꀉꒉꃅꍰꆗꇈ,ꈆꑪꇬꈴꄉꀁꑌꊿꋅꉌꃹꑓꐛ,ꂱꑱꊿꋅꈲꏣꐥꌠꇬꉜꄉ,ꊿꋅꁱꂷꀋꐥꈧꌠꇇꀨꄉꁱꂷꈨꄻꄉꇈ,ꁱꂷꐥꇈꐛꀋꒆꈧꌠꃤꑌ,ꇇꀨꄻꂡꌋꐛꒆꃅꌬꎻꀐ。

ꉪꊇꆃꎭꍏꇬ,ꆈꌠꅇꂷꁱꂷꌤꃅꋌꐘꑌ,ꄈꌋꆀꍔꃚꉈꇬꑓꇬꌠꇂꃴꄉ,ꋍꁘꋍꁘꃅꀻꎆꅷꇁꌠꉬ。ꀋꃋꃑꌌꇩꏤꑭꊂꃅꁵꁧꉆꌠꆃꎭꑍꄜꄯꒉꁬꐥꀐ。ꆈꌠꏓꂱꋍꏅꌠꊨꏦꁱꂷꌌꁱꄉꌠꑍꄜꄯꒉꋌꁬꂿꇈ,ꉌꂵꇿꄉꉉꇬ:“ꆈꌠꑍꄜꄯꒉꃪꐯꃪ,ꌟꒉꀉꑳꃅꋋꉚꏾ”、“ꁱꂷꌷꄉꌌꀋꃋꋋꄮꇖꑵꐛꏀꈴꌠꋈꄻꅉꇬꌬ,ꆈꌠꌺꇖꃅꃨꋩꄉꆹꇰꀐ”ꄷ。

ꀁꑌꊿꋅꃅꀹꋻꅑꋍꑠꆹ,ꀁꑌꊿꋅꃤꐩꋊꀊꉗꃅꀻꎆꅷꇁꄮꇬ,ꐧꋦꐥꐨꐤꄟꐯꀋꌡꄉꑠꃅꐙꌠꉬ。ꁌꀋꄝꌦꂾꆹ,ꉪꇩꏤꀁꑌꊿꋅꃅꀹꋻꅑꋌꑵ,ꐩꋊꇬꊿꏠꌍꆽꁏꑵꌠ,ꊿꋅꐮꆼꍅꌠꍔꊱꌬꄉ,ꊿꇱꌌꁒꐀꈼꋧ。ꑠꐛꅺ,ꎃꊒꃅꀁꑌꊿꋅꃅꀹꋻꅑꏭꉜꇨꆹ,ꉪꄈꃤꊿꋅꍔꊱꃆꂮꀉꒉꏢꉬ。ꀋꎪꃅꊿꋅꐥꐯꒈ、ꊿꋅꀊꅰꃅꐮꋯꑌ,ꑘꒃꋯꑌꋌꐘꃅꌊꀊꅰꃪꇁꄉ,ꇤꐳꃅꀋꃋꋋꄮꎹꉼꍗꑴꐛꏀꈴꌠꇬꃆꂮꀉꒉꏢꉬ。

ꀁꑌꊿꋅꃅꀺꋻꅑꋌꑵꆹ,ꊿꋅꈁꐥꌠꎆꏣꌋꆀꌧꇐꁱꀕꀻꎆꌠꇬꂿꄐꑌꐥ,ꁧꏖꐨꑌꐥꌠꉬ。ꑠꉬꐛꅹ,ꊿꋅꐮꋯꑌꌠꇬꈲꏣꀋꐥ,ꊿꋅꀻꎆꌠꏭꑌꈲꏣꀋꐥ。ꀋꃋꋋꄮꎹꉼꍗꑴꐛꏀꈴꌠꇬ,ꈲꏣꀋꐥꌠꃅꀺꋻꅑꑠꆏ,ꉪꉌꂵꉪꋬꏡꋬꃅ,ꋍꁘꋍꁘꃅ、ꏣꀋꑌꃅꄺꀱꄡꑟ,ꄺꀱꌠꃄꄟꑽꄟꆏ,ꉪꇐꀂꏽꉙꂘꌤꃅꄉ,ꋀꊇꂘꑴꌊꉉꄻꀋꅐꃅꄺꀱꎻ。ꈍꃅꑌꄀꇗꇱꌠꃅꀋꉆ,ꆹꇏꄉꃅꀋꉆ,ꂄꃅꂿꄷꇈꄷꐙ,ꋌꄀꂿꄷꇈꆊꎿꋍꑠꅐꇁꂵ,ꉪꊇꈀꄸꑌꋋꏢꃆꂮꇬꋓꉪꁨꄉꄡꑟ。

(ꉉꀽ:ꑾꌋꈤꊿꋅꌷꅉꇬꌬꌠꄯꒉꇬꄉꌊꄻꄉꌠ)