ꋋꆹꆀꉙꄆꒌꁎꄻꊿꆀꉙꄆꒌꁎꄻꌤꃅꇰꌠ
ꄈꅿꊿꋅꍔꊱꁨꐞꌠꇂꃴꄉ,ꆃꎭꍏꆀꉙꄆꒌꁎꄻꌠꆹ,ꃅꌊꊌꐨꄇꇖꀕ,ꆃꎭꍏꋉꐛꈭꐨꂴꅑꌠꊿꋅꁱꀕꈐꏭꋍꐘꐛꀐ。
ꃅꋊꂴꋊꌠ50ꈎꊬꌠꀨꇬ,ꆃꎭꍏꋈꄻꐛꂴꊂꋋꊭꇬ,ꌧꍧ、ꒊꆈ、ꑭꈁꌜꌕꂷꌠꆏꁭꅐ、ꒈꂪ、ꁮꐚꌕꁆꏯꈴꄉꆃꎭꆈꌠꃅꈋꉙꂘꄜꉺꌤꃅ,ꌜꋍꂷꋑꀋꋒꄆꒌꃑꄐꋍꂷꅑꑍꂷꁆꌠꄆꒌꃑꄉꄜꉺꌠꃅ,ꆈꌠꉹꁌꁳꄆꒌꉜꐝꉅꂿꄷꄉꆀꉙꎰꉙꑍꑵꐯꇯꌧꌠꊿꎹꌊꄆꒌꃑꄉ,ꄆꒌꁏꌊꆀꉙꃅꄉꉉꆈꌠꉹꁌꇰ,ꄷꀋꁧꆀꉙꌌꄉꊿꋅꍔꊱꄜꉺꑠꃅꄉ,ꆈꌠꉹꁌꆏꋋꈨꉌꃹꐯꉌꃹ。ꆀꉙꄆꒌꁎꆦꄜꉺꊌꐨꈲꐪꐥ,ꅑꅸꀋꃋꑟꌠ,ꃀꌠꀉꑌꃅꉉꇬ,ꋋꄮꇬꆹꄆꒌꄐꌋꆀꆅꉃꆄꄻꄐ“ꄐꑍꂷ”ꌠꉘꇉꄉꆈꌠꌧꅍꂿꅍꐥꌠꋯꑌ,ꉹꁌꑌꑲꄉꆈꌠꃅꈋꌤꃅꐛꐪꏀꀺꌠꉬ。1956ꈎꂱꍗꇠꇝꊂ,ꂴꊂꃅꍏ、ꑤꄆꒌꄐ、ꄆꒌꍉꌋꆀꄆꒌꇬꌦꄻꐛꄉ,ꐛꏦꀊꏀꌠꄆꒌꌤꑘꀋꐥꌠꇬꄉꐥ、ꐥꇬꄉꀻꎆꌊꀉꒉꀉꇨ,ꃅꋊꂴꋊꌠ60ꈎꊬꌠꑞꄮꆏ,ꆃꎭꍏꄆꒌꃑꌤꃅꅉ60ꎔꂷꐥ,ꄆꒌꃑꌤꃅꊿ200ꎖꑹꐥ(ꀒꎂꃤꀋꇱꃅꄉꌠ),ꄜꉺꁱꀕꀉꇨꐯꀉꇨꑵꌠꐛꇫꎍꀐ。ꁌꄝꄮꅑꅸ1963ꈎꑟꌠꃅꐎꋋꊰꈎꌠꆏꀋꎪꃅꆀꉙꌌꄉꄆꒌꃑꂾ、ꄆꒌꃑꄆꒌꁎꆦꆈꌠꉹꁌꇰꄉ,ꋀꊇꁳꄆꒌꉜꐝꉅꎻ,ꋋꆹꆃꎭꄆꒌꁎꄻꂴꇫꀕꊬꌠꉬ。
1964ꈎ,ꆃꎭꆹꊿꋅꀉꁁꃅꄷꎖꋪꉾꃪꌠꌷꄉꄆꒌꇬꊿꈂꀸꃅꁉꑠꐛꐪꉜꄉꆀꉙꄆꒌꄻꌠꃅ。ꋋꆹ,ꊿꆀꉙꉉꌠꆏꋍꂷꀉꄂꄆꒌꈐꏭꊿꈍꑋꑹꁧꎁꃅꉉꄉ,ꉉꌊꇬꀋꌡꌠꐊ。ꑠꃅꑴꇬꉹꁌꄡꇗꇫꉌꃹꐯꉌꃹ。ꄆꒌꇬꊿꈂꀸꐛꐪꉜꄉꆀꉙꄆꒌꁎꄻꌠꆹꃅꐎ10ꎖꈎꃅ,ꋋꄮꇬꉾꃪꌠꆀꉙꄆꒌꁎꄻꊿꈨꅐꇁ,ꄚꈐꏭꐞꇁꃴꑐꏤꑠꊯꎖꑻꆏꌜꑭꊂꍏꑭꊂꊿꋅꅇꂷꁱꂷꌤꃅꂴꅑꄞꅐꊿꃅꄉ。
ꃅꋊꂴꋊꌠ70ꈎꊬꌠꐧꀠꇬ,ꇩꏤꑭꊂꀁꑌꊿꋅꄆꒌꃚꈢꌠꃅ。1976ꈎ6ꆪ,ꆃꎭꍏꄆꒌꇬꌦꇬꆏꇩꏤꑭꊂꀉꄂꂶꌠꆀꉙꄆꒌꁎꄻꐛꉻ—ꁎꄻꌭꄻꐛ,ꐞꇁꃴꑐꆏꌭꍈꄻ,ꁎꄻꊿꐮꇰ18ꑼꐥ,ꑠꃅꄉꆈꌠꏓꂱꆏꊨꏦꉙꉉꌠꄆꒌꊌꂿꀐ。ꅑꅸ1990ꈎꑟꌠ,ꄆꒌ800ꎖꂷꁎꄻꌊꆀꉙꄆꒌꃅꃑꇈ,ꆃꎭꌋꆀꆃꎭꈭꇍꆈꌠꉹꁌꆏꄆꒌꋋꈨꉜꐝꉅꄎꄉ,ꆈꌠꉹꁌꃅꇫꉌꃹꀐ。ꄚꈐꏭꆀꉙꄆꒌ《ꄊꆃꎭꁮꅉ》、《ꉪꊇꃤꑘꀙꎵ》ꆏ“ꐚꇐꈁꁠ”ꊌ。1996ꈎ11ꆪ,ꆃꎭꍏꏓꂱꍔꃚꈌꁧꄉ”ꆃꎭꊿꋅꄆꁱꄆꒌꁎꄻꈯꄜꄻꐛꄉꉪꍏꌋꆀꇩꏤꑭꊂꆈꌠꃅꄷꄉꆀꉙꄆꒌꄆꁱꁎꄻꌠꃅ。ꄈꌋꆀꍔꃚꇫꉜꂄꊋꄏꄉ,ꆀꉙꄆꒌꁏꌤꃅꊿꆏꊋꇤꄉꌤꃅꇈ,ꋍꁮꆪꌠꆀꉙꄆꒌꄆꁱ3ꂷꅑ4ꂷꁎꄻꅐꇁ。1997ꈎꀕꀨ,ꆀꉙꄆꁱ《ꄓꑦꀻ》ꂶꌠꁎꄻꅐꇁ,ꌌꄓꑦꀻꎺꄅꈨꄀꄮꃑꇈ,ꐧꋦꈀꐥꊐꌠꃅꇫꊂꀮ。ꍏꊈ、ꍏꍔꆏꈣꒉꃅꆀꉙꄆꁱ《ꄓꑦꀻ》ꂶꌠꃑꌐꁌꃀꈿ,ꈨꏀꌤꃅꅉꈧꌠꑌꇨꃅꆀꉙꄆꁱ《ꄓꑦꀻ》ꂶꌠꄜꉺ。ꊁꆀꉙꄆꁱ《ꄓꑦꀻ》ꂶꌠꆏꌞꄈꋈꄻ76ꈓꐛꌠꌋꆀꑣꇤꀱꈪꅔꈐꈿꇁꌠꄆꁱꅐꇐꐛ。ꈈꃔꌜꌶꄻꄮ,ꆀꉙꄆꒌꄆꁱꁎꄻꅉꆏꆀꉙꄆꒌ《ꈈꃔꌜ》ꂶꌠꁎꄻꅐꇁ,”ꌦꌺꌷ”、”ꃔꇍꇬ”ꑠꃛꃅꎌꄮ,ꆀꉙꈆꑪꇮꇐꉙꂘꄆꁱ《ꌦꅇꌋꅅꑇꇬꉮꐪꆈꒉꀕ》ꑠꁎꄻꌊꃑꉹꁌꀨꄉ,ꊌꐨꉾꃪꃅꐥ。1997ꈎꑋꈌ、ꃅꑌꄮꐰꆀꉙꄆꒌ《ꑶꑳꅔꄉꌉꈿ》ꌋꆀ《ꅋꇐꉮꐪ》ꑍꂷꌠꁎꄻꅐꇁꇈꌌꑤꏃꆈꌠꃅꄷꈧꌠꇬꏮꄉꃑꇈꊌꐨꃪꃅꐥ,ꍏꑭꊂꅋꅝꊿ8000ꎖꑹꄉꒊꅷ5000ꎖꑹꇬꑟ。ꆀꉙꄆꒌꁎꄻꈯꄜꆏꌋꌊꌜꍏꅋꏢꌤꃅꂴꄀꋍꉻꂒꉻꊌ。ꆀꉙꄆꒌꁎꄻꃷꁨꌋꆀꊇꁧꃅꀋꆏꃅꐕꌊꀊꏀꊐꇬꑟ。1998ꈎꀕꂫ,ꆀꉙꄆꒌꁎꄻꈯꄜꁏꄻꅐꇁꌠꄆꒌꄆꁱ《ꈈꃔꌜ》、《ꑶꑳꅔꄉꌉꈿ》、《ꅋꇐꉮꐪ》、《ꄓꑦꀻ》ꇖꂷꌠꆏꇩꏤꑭꊂꀁꑌꊿꋅꄆꒌꄆꁱꈁꁠꀊꂥꐯꀊꂥꌠ”ꃆꇭ”ꈁꁠꊌ,ꆀꉙꄆꒌꄆꁱꁎꄻꈯꄜꆏꇩꏤꑭꊂꀁꑌꊿꋅꅇꂷꁱꂷꄆꒌꁎꄻꌤꃅꂴꅑꋍꉻꂒꉻꊌ,ꏦꂱꐇ、ꀈꆺꇢꇤꏤ3ꑻꆏꇩꏤꑭꊂꀁꑌꊿꋅꅇꂷꁱꂷꄆꒌꄆꁱꁎꄻꌤꃅꂴꇢꊭꇬꀨꇬꎍ。1999ꈎ4ꆪꌋꆀ2000ꈎ5ꆪ,ꍏꑷꄆꁱꄠꋍꄠ、ꑍꄠꌋꆀꇩꏹꀻꄊꆏꂴꊂꃅꆃꎭꆀꉙꄆꒌꄆꁱꁎꌊꃑꌤꃅꃆꂮꄛꑣꌠ《ꑣꈌꉐ》ꑠꑍꂷꃑꇈ,ꇩꈐꇩꉈꃅꁧꏖꐨꐥ。2002ꈎꁎꄻꌠꄆꒌ《ꃀꊱꄏꌋꆀꌤꇊ》、《ꃅꈯꌋꆀꊿ》“ꃆꇭ”ꈁꁠꊌꌦꀐ,2003ꈎꁎꄻꌠ《ꐥꄿꌦꌠꌊꄻ》ꆏꍏꍔꃚ“ꏨꆉ”ꈁꁠꊌ。ꆀꉙꄆꒌꁎꄻꌠꆏꂴꊂꃅ20ꎖꈎꐥ,ꂴꊂꃅꄆꒌ1300ꎖꂷꁎꄻ。2008ꈎ11ꆪ,ꍏꅇꂷꁱꂷꊈꑼꉼꆏꏤꄻꄉꇬꍏꄆꒌꇬꌦꂶꌠꂓꆦꌊ“ꆃꎭꍏꊿꋅꄆꒌꁎꄻꈯꄜ”ꃅꄉ,ꉈꑴꆏ“ꆃꎭꍏꂿꑘꁡꇤꄆꒌꃑꁧꃤꃅꈯꄜ”ꂓꀻꑌꄀ。
ꋋꈍꑋꈓ,ꉪꇩꏤꆏꁰꒌꐝꉅ、ꃚꋒꐝꉅ、ꄆꒌꃷꁨꀉꑌꃅꊐꉆꌠꃷꁨꁱꂷꄆꃑꉁꈾꌬꄉꂿꑘꁡꇤꉹꁌꄆꒌꉜꇎꏦꄻꉾꃪꀐ。2009ꈎꀕꀨꇬ,ꇩꏤꅇꁊꄆꁱꊝꏳ、ꀻꎆꄺꀱꊈꑼꉼꌋꆀꎆꐪꀯꆏꐯꇯꃷꁨꁱꂷꇬꈴꄉꄆꒌꃑꉁꈾ160ꋬꈭꄻꆃꎭꇇꀨ,ꉈꌜꄆꒌꇬꌦꌞ”ꎭꍔꑼꄆꒌꃑꄐ”ꁵꌠꌋꆀꌤꃅꅉꊨꏦꎆꅐꄉꃼꌠꐯꇯ188ꋬꈭꐥ,ꐽꏡꃅꄉꋂ20ꂷꀑꂪꆏꃷꁨꁱꂷꈴꄉꄆꒌꃑꉁꈾꋍꋬꈭꐥꀐ。ꋋꄹꈎꃅꍵꄮꇬ,ꇩꏤꅇꁊꄆꁱꊝꏳꆏꋋꄮꇬꑲꆀꎥꃪꄻꅐꇁꌠꎆꃀ60ꎖꃪꂷꁌꌠꃷꁨꁱꂷꇬꈴꄉꄆꒌꁎꄻꉁꈾꂴꁆꄻꆃꎭꁵ,ꋋꄹꈎꀕꂫꆏꃷꁨꁱꂷꇬꈴꄉꆀꉙꄆꒌꄆꁱꁎꄻꌊꃑꆈꌠꉹꁌꀨꀐ。ꑍꈓꎖꅑꅸꇁꌠ,ꃷꁨꁱꂷꇬꈴꄉꆀꉙꄆꒌꄆꁱꁎꄻꌠ,《ꇩꏤꋈꄻꌤꑘꀉꒉ》、《ꍫꃖꍔ》、《ꑭꉘꐞꌗꊐꅉꄺꀱꌠꌋꆀꀧꌋꃅ》、《ꃄꇙꉮꐪꐨꄴꏮ》ꑠꐯꇯꆀꉙꄆꁱꄆꒌ72ꂷꁎꄻꅐꇁ,ꌌ21388ꃢꃑꀐ,ꊿꇬꉚꌠ300ꎖꃪꑹꃢꐥ,ꄚꈐꏭꆃꎭꍏꆏ60%ꀑꂪꍆ。ꑠꃅꄉꆀꉙꄆꒌꄆꁱꁎꄻꌠꆏꐂꇮꇐꀊꂥꌠꇬꃹꆹꄉ,ꆃꎭꍏꊿꋅꄆꁱꄆꒌꁎꄻꈯꄜꆏꇩꏤꑭꊂꆈꌠꃅꄷꆀꉙꄆꒌꁎꄻꁆꏯꂴꅑꌠꏦꀧꀐ。
ꆃꎭꆈꌠꊨꏤꏱꅉꍏꄻꐛꊂ,ꆀꉙꄆꒌꁎꄻꌠꆏꀋꐥꄮꄉꐥ、ꀋꆏꃅꀻꎆꇈꊌꐨꄇꇖꀕ,ꆈꌠꉹꁌꇇꀨꄉꄆꒌꐝ、ꈆꑪꇮꇐꄜꁊ,ꉪꍏꌋꆀꇩꏤꑭꊂꆈꌠꃅꄷꎆꏣꐧꋦꀻꎆꉀꎆꌋꀂꏽꂿꄐꀉꒉꃅꐥꀐ。
(《ꆃꎭꑍꄜ》2012ꈎ6ꆪ7ꑍꄩꎑꁬ )
