《ꀉꂿꅩꌺ》(ꋍ)
ꄜꃑꄮꈉ:2011-11-30 | ꁰꄻꊿ:ꇓꆈꀋꃀ ꇁꀦ:ꆀꉙꊅ ꉜꃷꁨ:

 ꋍ
ꀉꂿꅩꌺꑌ!
ꌒꆏꉘꃅꌒ,
ꉘꃅꌒꂸꐯ,
ꉘꃅ꓂ꑳꀕ,
ꉘꃅꑌꐥꌒ;
ꌒꆏꅔꐎꌒ,
ꅔꐎꌒꂸꐯ,
ꅔꐎꁨꇉꀕ,
ꅔꐎꏰꃅꌒ。
ꎬꆏꐧꋦꎭ,
ꐧꋦꐛꁮꄅ,
ꐧꋦꅪꐥꎭ。
ꌩꎔꇉꇬꋦ,
ꄔꈌꂸꌸꁧꂸꐊ;
ꒉꎔꇉꇬꒉ,
ꇓꈬꂸꎟꂡꂸꐊ;
ꏜꎔꅔꇬꋦ,
ꑋꈌꂸꌸꋇꂸꐊ;
ꅪꎔꆀꃅꐥ,
ꂸꎭꅩꂷꇬꂸꐊ。jNy彝族人网

 ꑍ
ꀉꂿꅩꌺꑌ,
ꀊꆨꃅꈎꂄ꒔ꈓ,
ꃅꆪꂄ꒔ꆪ,
ꃅꉖꂄ꒔ꉔ,
ꅩꌺꄚꄉꒆ。
ꅩꒆꃄ꒔ꉔ,
ꑷꃀꏂꒃꐗ,
ꑷꉐꉧꑳꀕ,
ꑷꁱꇖꌋꋦ;
ꈿꏂꏁꒃꃴ,
ꈿꏂꂶꏋꀕ,
ꈾꊞꏂꁬꁯ。
ꊁꇁꋍꑍꆏ,
ꑷꃀꈁꒉꏁꐂꀕ,
ꈿꏂꈁꒉꏂꅈꅊ,
ꅩꌺꈁꒉꏁꊭꀕ。
ꃷꇑꀋ꒜ꏃꊰꏁꑼꐛ,
ꏃꊰꆺꀕꄷ,
ꏃꑹꀋꎥꎨ;
ꈓꁱꀄꌒꏃꊰꏁꏢꀖ,
ꏃꊰꆺꀕꄷ,
ꏃꏢꀋꎥꎨ;
ꄌꉙꐍꈬꁱ,
ꈬꁱꆺꀕꄷ,
ꌕꁱꀋꎥꎨ;
ꌃꒉꐍꈬꄣ,
ꈬꄣꆺꀕꄷ,
ꌕꄣꀋꎥꎨ。

ꀉꂿꅩꌺꑌ,
ꅩꒆꃄꌕꑍ,
ꐆꑻꐍꈬꁨ,
ꁮꅰꐂꁱꌺ,
ꈤꑋꀨꇬꐊ,
ꈻꑍꂫꇬꍅꂶꌠ,
ꌌꇁꅩꀑ꒔。
ꊁꇁꋍꑍꆏ,
ꁮꅰꈁꒉꊜꇴꀕ,
ꅩꌺꈁꒉꅧꈩꀕ。
ꃷꇑꀋ꒜ꈬꊯꈬꑻꐛ,
ꈬꊰꆺꀕꄷ,
ꈬꑻꀋꎥꎨ;
ꈓꁱꀄꌒꈬꊯꈬꏢꀖ,
ꈬꊰꆺꀕꄷ
ꈬꏢꀋꎥꎨ。
ꐷꈭꏂꊂꏭ,
ꑵꇤꏁꒃꈈ,
ꋚꑌꉘꁇꁉ,
ꃀꄓꅩꄌꑌ,
ꀿꄓꅩꀑꋍ,
ꅩꒆꂿꃋꀦ。

ꀉꂿꅩꌺꑌ,
ꅩꒆꃄꏃꑍ,
ꃷꇑꋛꂷꏓ,
ꏓꏒꋍꇅꁄ,
ꏓꆏꏂꇬꐛ,
ꏓꆏꂻꇬꐛ,
ꏓꆏꑳꇬꐛ。
ꎧꇱꎧꏀꃅ,
ꏀꇊꃄꋍꉔ,
ꀋꅿꀋꁁꎧ;
ꏀꇊꃄꑍꉔ,
ꊸꀕꆰꀕꎧ;
ꏀꇊꃄꌕꉖ,
ꉓꏂꉓꁁꎧ。
ꏃꑍꊰꌕꆏ,
ꎧꀱꎧꃹꃅ,
ꀱꇊꃄꋍꉔ,
ꐛꅍꐚꒉꅿ;
ꀱꇊꃄꉬꉖ,
ꌈꌠꉻꌠꐊ。
ꊁꇁꏃꑍꊰꌕꆏ,
ꎧꂸꎧꑌꃅ,
ꎧꊰꒊꊝꐂ;
ꎧꏸꀱꃀꃴ,
ꉱꈐꏂꊂꊐ。
ꎧꏸꃷꇑꆦ,
ꃷꇑꅪꅈꅊ;
ꎧꏸꀿꃀꆦ,
ꀿꃀꒊꌋꀕ。
ꅪꏁꅩꀮꃅ,
ꅪꏁꂿꃋꀮꂿꑌ,
ꄡꀧꆫꐩꊜꑌꀋꐚꃲ,
ꌋꄙꌋꂷꊜꑌꀋꐚꃲ,
ꀨꀮꇁꈲꊜꑌꀋꐚꃲ;
ꅪꏁꃄꅉꀮꂿꑌ,
ꁬꇁꆰꌺꉫꑌꀋꐚꃲ,
ꌧꏾꆭꅪꉫꑌꀋꐚꃲ;
ꅪꏁꀉꁌꀊꂵꀮꇬꆏ,
ꈌꃅꆿꌕꄮ,
ꄯꆪꃢꑿꐊ,
ꑙꇐꉌꏿꊝ,
ꑛꏂꑷꐰꇑ,
ꃅꑍꈜꀕꂄꇈꃲ,
ꃅꉖꈜꀕꂄꇈꃲ。

ꀉꂿꅩꌺꑌ,
ꒆꊃꋍꈓꑍꈓꇈꉈꆏ,
꒜ꆹꄌꈪꑌ,
꒜ꈌ꒜ꑓꆫ,
ꑍꐎꋙꊰꍈ,
ꉏꀑꐓꂿꀕ,
ꂃꐎꈬꁱꅪꑃꎓ;
ꀿꆹꄌꈪꑌ,
ꀿꈌꀿꑓꆫ,
ꉾꃤꋙꊰꍈ,
ꉏꀑꉥꏵꀕ,
ꏃꏾꈬꁱꅪꑃꎓ。
ꀉꂿꅩꌺꑌ,
ꀀꂸꄐꌦꂾ,
ꀀꃅꀀꐋꄏ,
ꑴꑆꎰꃀꀀꐋꄏ;
ꑌꂸꄐꌦꂾ,
ꑌꃅꑌꐉꄏ,
ꇢꇑꀉꍸꑌꐉꄏ;
ꑀꂸꄐꌦꂾ,
ꑀꃅꑀꐉꄏ,
ꃀꄳꈵꁱꑀꐉꄏ;
ꉆꂸꄐꌦꂾ,
ꉆꃅꉆꐋꎹ,
ꑷꈯꌬꁧꉆꐋꄏ;
ꁘꂸꄐꌦꂾ,
ꁘꃅꁘꐉꄏ,
ꀉꂿꂃꂪꁘꐉꄏ;
ꇤꈫꇤꇋꏮ,
ꈩꃅꈩꐉꄏ,
ꈑꋍꈑꆠꈩꐉꄏ。
ꀉꂿꅩꌺꑌ,
ꏃꆪꅪꑌꄸ,
ꈬꆪꅪꁗꏾ。
ꑍꆏꀿꈩꐋ,
ꌊꆏꃀꀀꐋ。
ꄹꇭꄹꆹꏮ,
ꁬꈬꋃꆦꑍꃅꄐ,
ꌩꃴꌩꑭꏡ,
ꇉꊃꌧꁐꎙꃅꍈ。

ꀉꂿꅩꌺꑌ,
ꒆꊂꌕꈎꇖꈎꇈꉈꆏ,
ꃀꈭꃀꇍꏮ,
ꑱꍹꑱꁁꉌ,
ꐞꄜꐞꁁꉌ,
ꃀꑌꊨꐋꄏ。
ꀿꈭꀿꇍꏮ,
ꌩꃅꌩꁁꉌ,
ꂷꃅꂷꁁꉌ,
ꀿꆹꅥꐉꄏ,
ꃀꆹꅰꐋꄏ,
ꅩꌺꉩꐉꄏ。
ꃺꈭꃺꇍꏮ,
ꁮꐭꉐꎳꏰꌺꋶ,
ꉫꑌꋍꇬꋶ,
ꂸꉬꋍꇬꋶ;
ꑬꎼꑭꈧꎽꀮꋪ,
ꉫꑌꋍꇅꋪ,
ꂸꉬꋍꇅꋪ;
ꇇꆹꃅꂸꄉ,
ꉫꑌꋍꇅꐛ,
ꂸꉬꋍꇅꐛ;
ꂷꏦꇇꁉꊭ,
ꃢꃅꑷꁌꀘ,
ꂸꊨꃇꌺꎎꐋꄏ。

ꀉꂿꅩꌺꑌ,
ꒆꊂꉬꈎꃘꈓꇈꉈꆏ,
ꉱꈐꅪꀀꅉ,
ꈵꃴꅪꑋꅉ,
ꐷꈭꅪꐁꅉ,
ꃷꇑꅪꈩꅉ。
ꐭꌠꐭꐋꎹ,
ꀊꉘꐋꊈꏑ,
ꇓꏪꉽꐯꃅ,
ꌧꏾꀀꍹꃅ,
ꂷꅍꌩꃅꏦ,
ꇢꇑꋛꀕꄂ,
ꑳꈫꑳꇋꏮꆹꃲ。

ꀉꂿꅩꌺꑌ,
ꒆꊃꏃꈓꉆꈓꇈꉈꆏ,
ꎮꆞꀊꅪꈬ,
ꄛꂿꄛꐡꍈ,
ꆫꁯꀉꐡꂷ,
ꎴꁧꁦꐡꈬ,
ꎆꈤꎆꃀꐊ,
ꋚꒇꋚꃀꉆꆹꃲ。
ꅩꌺꎭꋒꃢꊂꋦ,
ꎹꄓꐯꑎꆏ,
ꃢꈤꊫꊂꎭ,
ꅩꎭꃢꊂꈹ。
ꃢꑌꅩꂿꈬ,
ꅪꂿꇖꈭꀕ,
ꅩꑌꃢꂿꈬ,
ꃢꂿꃨꁍꀕ;
ꂸꆧꐯꑐꆏ,
ꃢꅸꇉꊂꃹ,
ꃢꐥꑓꂸꂿ,
ꄸꅣꃢꊂꑌ。
ꁯꋒꐯꑎꆏ,
ꊫꇬꃢꈻꇁ,
ꃢꈻꊫꉻꆈꇁꃲ,
ꅩꈻ꒜ꅇꄜꇁꃲ,
꒜ꄓꅩꋚꍈꇁꃲ,
ꅩꑌꀿꌗꃀꌗꊸꆣꀕ,
꒜ꑌꏢꁮꇗꄃꀕꑟꃲ。

ꀉꂿꅩꌺꑌ,
ꒆꊃꈬꈎꊰꈎꇈꉈꆏ,
ꈌꎐꀱꇗꀕ,
ꎮꆞꅪꐞꀕ,
ꃢꌌꈚꌌꍣꈫꈭ,
ꇴꌌꆹꌊꅧꈩꀕ,
ꑳꌌꇤꌊꑻꈭꀕ。

ꀉꂿꅩꌺꑌ,
ꒆꊃꊯꊪꊰꑋꈓꊂꆏ,
ꎭꋩꂿꇁꋩ,
ꃢꈪꂿꇁꈪ,
ꑱꍹꂿꇁꍹ,
ꈁꉜꀃꌷꇐ,
ꈁꃅꑺꀽꀕ。
ꀿꅐꀿꊪꑭ,
ꃀꅐꃀꇇꆴ;
ꃺꅐꃺꊂꁠ;
ꐋꅐꐋꊂꐊ,
ꐋꂿꑖꈈꀕ;
ꃥꇁꃥꊂꊪ,
ꅇꄜꌣꇓꀕ,
ꀿꇁꃀꅇꃅꂸꅲ。

ꀉꂿꅩꌺꑌ,
ꒆꊃꊯꌕꊯꇖꈎꇬꆏ,
ꃪꀮꄓꐉꃅ,
ꏃꃅꂸꄜꄑ,
ꃰꐛꆈꁌꀕꑌꌩꌔꃤ,
ꉐꐙꆈꍚꀕꑌꒉꌔꀮ,
ꐻꎵꊪꏮꀕꑌꊨꌔꄲ。
ꁍꅐꁍꊂꈤ,
ꑖꅐꑖꊂꁧ,
ꊨꍣꆼꁠꈢ,
ꁍꇁꑖꉻꐔ;
ꈪꍣꇇꁉꊭ,
ꃢꇁꈚꉻꐔ。

ꀉꂿꅩꌺꑌ,
ꒆꊂꊰꏁꈓ,
ꃢꌩꈚꎵꎔ,
ꈁꇁꒈꌠꀕ,
ꈀꐺꇗꄃꀕ,
ꈁꉉꈀꋽꀕ,
ꈁꉜꈁꃅꎔ。
ꊈꅐꊈꐊꀺ,
ꌐꅐꌐꐊꎔ,
ꅩꒆ꒔ꄮꆏ,
ꀋꁧꀉꂿꑌ,
ꂸꇖꀕꃅꐙ;
ꂛꊨꃇꌺꑌ,
ꂸꇖꀕꃅꐙ,
ꅩꌺꉌ꒜ꑌ,
ꂸꇖꀕꃅꐙ。
ꃅꇗꋋꈓꆏ,
ꀿꑌꅩꃝꋯ,
ꃇꑌꎆꋠꋯ;
ꊇꑌꅪꏷꋯ,
ꌐꑌꑮꒃꋯ;
ꒃꌠꀋꊉꎵ,
ꍯꌠꈬꁯꑟ,
ꅩꌺꉌꃀꂅꑣꀕꇈꃲ。
 jNy彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:《ꀉꂿꅩꌺ》(ꑍ)
ꊁꁬꌠ:《ꉱꑴꄺꈯ》