ꆗ ꀊ ꑘ ꀕ
ꄜꃑꄮꈉ:2013-08-18 | ꁰꄻꊿ:ꂽꌋꃺꌺ ꎴꁱ ꇁꀦ:《ꆃꎭꉜꇐꁱꀕ》 ꉜꃷꁨ:

(ꉉꀽ:ꉇꇷꁰꒌꆹ ꀐꄸꇖꑳ ꍑꌠ)Ksf彝族人网


ꉠꆗꀊꑘꀕꇆ,
ꀊꄶꌿꉘꈬꁍꏭ,
ꌿꋦꌿꄅꄖꑴꇬ,
ꌿꋦꌿꆹꎴꌠꋍꁧꀉꄂꐊꑵꄸ;
ꀊꄶꎺꋦꁧꑎꏭ,
ꎺꋦꎺꄅꄖꑴꇬ,
ꇬꇉꎺꁯꑌꌠꋍꁧꀉꄂꐊꑵꄸ;
ꀊꄶꇉꅶꈬꊂꏭ,
ꌩꋦꌨꄅꑴꇬ,
ꌩꋦꒅꏦꎃꌠꋍꁧꀉꄂꐊꑵꄸ;
ꀊꄶꂶꍲꁧꑎꏭ,
ꂷꋦꂶꄅꄖꑴꇬ,
ꂷꋦꂶꀑꎇꌠꋍꄿꀉꄂꐊꑵꄸ;
ꀊꄶꌺꃘꀑꐯꏭ,
ꑿꐥꄘꇖꉐꑴꇬ,
ꑿꐥꊈꏁꇁꌠꋍꂷꀉꄂꐊꑵꄸ;
ꀊꄶꆿꐎꐦꇬꏭ,
ꃆꇭꏩꐷꏿꑴꇬ,
ꏮꂿꃨꋍꀕꌠꋍꂷꀉꄂꐊꑵꄷ;
ꀊꄶꊫꉺꈬꊂꏭ,
ꃮꐥꊫꉻꆈꑴꇬ,
ꃮꐛꅳꃃꑳꌠꋍꂷꀉꄂꐊꑵꄸ;
ꀊꄶꏝꁌꅪꑴꇬ,
ꇌꉘꂆꃚꌒꌠꋍꏢꀉꄂꐊꑵꄸ;
ꀊꄶꁴꇑꌿꆊꏭ,
ꈌꃅꉆꊂꁠꑴꇬ
ꁯꋒꉆꉻꐔꌠꋍꂷꀉꄂꐊꑵꄸ;
ꀊꄶꀈꊫꒉꐤꏭ,
ꃬꐥꉻꑭꐎꑴꇬ,
ꃬꇗꂆꃚꌒꌠꋍꂷꀉꄂꐊꑵꄸ;
ꀊꄶꐧꋦꆗꐥꄖꑴꇬ,
ꊿꐙꊾꄮꇁꌠꋍꂷꀉꄂꐊꑵꄸ。

ꉠꆗꀊꑘꀕꑠꂷꑌ,
ꀑꌩꀑꎳꆹ,
ꀑꎔꂷꋴꆇꂷꄸ;
ꐧꌩꐧꎵꆹ,
ꐧꎔꊫꇵꏁꂷꄸ;
ꑬꌩꑭꎳꆹ,
ꑭꎔꈭꑭꏁꂷꄸ。
ꆗꀊꑘꀕꑌ,
ꊰꁧꉜꑌꇪꉾꀕꂷꄸ,
ꊯꀮꉜꑌꁵꇗꃫꂷꄸ,
ꑓꊏꉜꅿꆗꁍꀕꂷꄸ,
ꑓꂡꉜꑌꆈꏍꏐꂷꄸ,
ꑓꂷꉜꑌꀯꆫꍄꂷꄸ,
ꆹꄱꉜꑌꏁꈨꀕꂷꄸ,
ꁧꐮꁧꉎꇂꁮꏃꏢꂾꂷꄸ。
ꆗꀊꑘꀕꑠꂷꑌ,
ꑆꐙꎸꐛꆹ,
ꅪꌠꐍꃨꅑꂷꄸ,
ꐎꌠꅪꐴꑋꂷꄸ;
ꆗꃚꆗꉐꆹ,
ꇉꄩꇪꀮꂾꂷꄸ;
ꆗꀒꆗꑊꆹ,
ꀒꎂꁱꌺꌡꂷꄷ;
ꂴꄉꉈꑴꉜꇬꆹ,
ꆧꌺꌟꃅꁤꇅꀕꂶꄸ,
ꊁꄉꀒꁨꉜꇬꆹ,
ꎺꌺꌟꃅꎃꑐꀕꂶꄸ。
ꆗꀊꑘꀕꑠꂷꑌ,
ꌺꎔꐋꀨꃀꆏꀊꏂꆏꊐꈜꀕꋽ,
ꇴꎎꆼꇅꂷꑭꉑꀮꌡꂷꄸ;
ꃢꃅꈚꎔꆏꈚꇁꇬꈜꀕꋽ,
ꃢꌌꈚꌌꃢꀑꊱꆺꀭꂷꄸ;
ꏂꐎꏂꃴꆏꈚꇁꇬꈜꀕꋽ,
ꇉꅶꈹꀮꅔꅐꅏꇤꂪꇤꇀꂷꌡ;
ꆫꁯꂷꉻꆏꅑꇁꇬꈜꀕꋽ,
ꆸꄖꆹꎅꅙꑭꎽꀮꌡꂷꄸ;
ꄚꑆꇴꆈꆏꈚꇁꇬꈜꀕꋽ,
ꉚꇌꀉꆈꅔꅐꏜꎹꏜꋠꇀꂷꌡ;
ꏸꑮꍓꃯꆏꅑꇁꇬꈜꀕꋽ,
ꋋꑌꁧꐧꃱꌏꐎꌠꌡꂷꄸ;
ꇤꇉꐎꄣꆏꅑꇁꇬꈜꀕꋽ,
ꌊꆏꄹꇭꃅꏸꋦꌠꌡꂷꄸ。
ꆗꀊꑘꀕꑠꂷꑌ,
ꈁꒉꈁꇁꅧꈩꀕꂷꄸ,
ꈁꑌꈁꉆꊝꈭꀕꂷꄸ,
ꌉꈿꁻꏤꎽꀮꋪꂷꄸ,
ꌳꈄꀁꇬꑌꑴꇬ,
ꆧꁨꐚꅍꄡꂷꄸ。

ꆗꀊꑘꀕꑠꂷꑌ,
ꑸꁆꑸꐂꆏꌌꌿꆊꈬꁍ
ꏭꑌꀂꈜꀕꋽ,
ꈌꃅꈌꃨꆏꌌꌿꆊꈬꁍ
ꇔꑌꈜꀕꋽ,
ꃅꐘꉧꌺꆏꌌꆀꃅꈬꁍ
ꏭꑌꈜꀕꋽ,
ꇌꎶꃘꑴꆏꌌꁍꑗꈬꇬ
ꏭꀂꈜꀕꋽ。
ꆗꀊꑘꀕꑠꂷꑌ,
ꋍꈭꊯꌕꈎ,
ꌺꃅꇖꃅꀿꇁꃀꐮꐥ;
ꑍꈭꑍꊎꉬ,
ꍂꃅꈾꃅꃺꇁꑌꐊꐺ;
ꌕꈭꌕꊰꏁ,
ꏂꇁꇭꃅꋥꑟꁈ。
ꆗꀊꑘꀕꑠꂷꑌ,
ꑘꃅꉐꊨꇁꋍꑍ,
ꊖꇂꑗꋴꏮ,
ꈁꃅꑻꈭꀕꂷꄸ;
ꃥꋩꃥꏦꇁꋍꑍ,
ꅊꁧꀁꇬꅞ,
ꊰꋯꆗꁍꀕꂷꄸ;
ꅇꉉꉐꁱꇁꋍꑍ,
ꉏꀑꏰꌺꋶ,
ꈁꉉꅇꐛꇀꂷꄸ,
ꈁꀠꇐꑌꇀꂷꄸ;
ꐋꇁꊈꐊꇁꋍꑍ,
ꈁꇁꒈꌠꀕꂶꄸ;
ꋊꇁꃣꐊꇁꋍꑍ,
ꈁꇁꈭꇑꀕꂷꄸ;
ꊈꇁꌐꐊꇁꋍꑍ,
ꈁꇁꒊꌋꌊꂷꄸ;
ꏣꇁꑞꐊꇁꋍꑍ,
ꈁꇁꑖꈄꀕꂷꄸ;
ꁮꏝꐙꎭꇁꋍꑍ,
ꌉꈿꊤꀕꑋꂷꄸ,
ꁻꈿꄂꀕꉆꂷꄸ,
ꁮꇨꋋꂿꏾꌌꀕꂷꄸ,
ꐙꇨꋋꂿꆺꀕꂂꂷꄸ。
ꆗꀊꑘꀕꑠꂷꑌ,
ꎭꁻꎭꏿꇁꋍꑍ,
ꎭꋰꉒꐎꄓꂷꄸ;
ꌩꏓꒉꇸꇁꋍꑍ,
ꃤꃀꀑꆗꌬꇬꆹ,
ꐡꇤꁯꆮꃯꂷꄸ;
ꋚꒇꒈꋩꇁꋌꑍ,
ꆧꈈꀑꆗꋩꇬꆹ,
ꏥꌺꐪꆮꂢꂷꄸ,
ꄸꉺꊿꑌꁇꂷꄸ;
ꉊꈯꀑꆗꌬꇬꆹ,
ꃅꋮꏬꐎꃯꂷꄸ;
ꒇꎿꀑꆗꌬꇬꆹ,
ꌩꃀꉒꐎꄓꂷꄸ;
ꑌꑿꀑꆗꆫꌠꆹ,
ꁖꇤꋋꈬꄄꂷꄸ;
ꃆꐳꀑꆗꌌꌠꆹ;
ꁌꁭꒉꋓꄈꂷꄸ;
ꑭꈧꇇꈩꆹ,
ꌩꑭꑙꌺꌡꂷꄸ,
ꏦꏪꇓꂃꄓꂷꄸ。
ꆗꀊꑘꀕꑠꂷꑌ,
ꃅꇏꂶꄟꆹ,
ꅔꁈꒊꃀꌡꂷꄸ,
ꆺꑳꁁꎭꑣꀋꅐ,
ꃅꇏꐋꄩꎅꂷꄸ。
ꇗꌌꁆꌌꆹ,
ꏃꊰꋋꂿꉐꆂꎇꂷꄸ,
ꉆꊰꋋꂿꉙꀕꐙꂷꄸ。
ꆗꀊꑘꀕꑠꂷꑌ,
ꅫꇁꋃꉂꆹ,
ꈜꅪꆲꏂꃧꂷꄸ,
ꀿꇁꃀꉂꆹ,
ꇬꇉꒊꊝꊯꂷꄸ;
ꐋꇁꊈꉂꆹ,
ꃪꄧꏢꂃꄓꂷꄸ,
ꋊꇁꃤꉂꆹ,
ꐟꈯꉒꇅꅞꂷꄸ;
ꏣꉂꑞꉂꆹ,
ꃄꇖꄹꊂꉁꂷꄸ。
ꆗꀊꑘꀕꑠꂷꑌ,
ꇌꂿꉻꇬꀀꑴꇬ,
ꇇꊂꁍꅍꎍ;
ꈌꃅꈵꃴꀀꑴꇬ,
ꉌꃀꌿꅍꎍ;
ꃆꇭꉻꇬꀀꑴꇬ,
ꇇꑭꏮꅍꎍ;
ꆗꀊꑘꀕꆺꑳꑌꑴꇬ,
ꆧꁨꐚꅍꎌꂷꄸ,
ꃅꇏꃝꅍꎌꂷꄷ。
ꆗꀊꑘꀕꑠꂷꑌ,
ꁧꎐꅐꇬꑱꃀꏬꅐꆗꂷꄸ,
ꇇꆹꁻꀱꃅꏸꋥꂷꄸ,
ꅔꊂꈴꇬꃅꋩꆲꏂꄓꂷꄸ,
ꅡꈭꁨꁧꐺꇬꆫꁯꄂꐎꃯꂷꄸ
ꆫꇁꃨꑍꏃꏾꁬꈬꄄꂷꄸ
ꎼꇁꈴꑍꆞꑭꊖꇱꄔꂷꄸ

ꆗꀊꑘꀕꑠꂷꑌ,
ꆗꀊꑘꀕꉣꑊꆹ,
ꑌꇁꑾꌺꌟꃅꋓꀜꏽꌠꄸ
ꎺꇁꌿꌺꌟꃅꋓꒆꏽꌠꄸ
ꃱꉻꁯꆮꌟꃅꋓꃰꏽꌠꄸ
ꅙꑭꎽꀮꌟꃅꋓꊝꏽꌠꄸ
ꂷꑭꉑꀮꌟꃅꋓꍶꏽꌠꄸ
ꒊꃴꉜꏂꌟꃅꋓꆗꏿꌠꄸ
ꆗꀊꑘꀕꉣꑊꆹ,
ꈭꇀꃹꌺꌟꃅꃅꈋꏭꃰꏿ
ꁰꒌꋍꈚꀉꄂꌸꌠꄸ;
ꇅꈯꆿꅪꌟꃅꌊꎼꌋꈴꏽ
ꑭꅑꋍꈚꀉꄂꄔꌠꄸ;
ꃪꊂꐛꑿꌟꃅꁬꈬꑭꊂꇗ。   
ꋌꐮꌕꁄꏭ,
ꇖꉬꐛꄃꄰ,
ꀊꉘꆗꂷ,
ꀁꆹꉡꉂꄷ,
ꋋꑌꌧꑳꀉꇰꌡ,
ꃅꆪꑌꇫꃨ,
ꑿꆨꑌꇫꃨ,
ꋋꑌꉢꄷꋌꂸꉂ。
ꁰꅐꌕꇉꏭ,
ꀋꉺꀑꋤꄰ,
ꀊꉘꆗꌺꂷ,
ꀁꆹꉡꉂꄷ,
ꎷꈌꐪꀋꐚ,
ꂸꈹꌠꊂꁠ,
ꋋꑌꉢꄷꋌꂸꉂ。
ꇖꁮꇖꆗꌺ,
ꉢꀉꑳꑕꑘꇬꂸꉂ。

ꆗꀊꑘꀕꇆ,
ꌩꁐꈬꉘꏭ,
ꑋꇁꑿꏣꈘꉆꑌ,
ꆗꑘꉣꑊꉂꏣꈘꂷꉆ;
ꑿꇗꆗꊂꀐ,
ꈾꊞꑾꄵꈘꉆꑌ,
ꆗꑘꉣꑊꉂꏣꈘꂷꉆ;
ꀈꉙꑗꒉꏭ,
ꆿꇁꍯꏣꈘꉆꑌ,
ꆗꑘꉣꑊꉂꏣꈘꂸꉆ;
ꃴꍹꆼꏦꏭ,
ꋂꏣꆿꏣꈘꉆꑌ,
ꆗꑘꉣꑊꉂꏣꈘꂸꉆꇊꃲ。
ꈢꈐꈢꉈꏭ,
ꏣꇁꑟꏣꈘꉆꑌ,
ꆗꑘꉣꑊꉂꏣꂸꉆ;
ꈍꐯꈋꉐꏭ,
ꃺꇁꑌꏣꈘꉆꑌ,
ꆗꑘꉣꑊꉂꏣꈘꂸꉆ;
ꆺꑳꏂꃴꏭ,
ꀿꇁꃀꏣꈘꉆꑌ,
ꆗꑘꉣꑊꉂꏣꈘꂸꉆ;
ꀿꇁꃀꐮꏭ,
ꃈꇁꅪꏣꈘꉆꑌ,
ꆗꑘꉣꑊꉂꏣꈘꂸꉆꇊꃲ。

ꆗꀊꑘꀕꇆ,
ꅽꇁꉣꑊꆹ,
ꌧꈿꁉꈿꑳꈫꑳꊂꑋꄮꇬ,
ꈌꅑꑍꍈꆏꉇꉡꇰꃄꑌꌒ,
ꉢꉉꆏꅲꃄꑌꈜꀕꌒ,
ꑭꅑꑍꍈꆎꐂꉠꃀꅞꑌꌒ,
ꉢꐂꅽꃀꅞꑌꈜꀕꌒ。
ꆗꀊꑘꀕꇆ,
ꅽꇁꉣꑊꆹ,
ꃅꑆꑳꁭꁉꑌꌒ,
ꉒꏂꑴꑭꇫꑌꌒ,
ꏃꏾꈈꇉꃄꑌꈜꀕꌒ。
ꑘꃅꉐꊨꁍꑗꈬꇬꐹꄮꇬ,
ꈻꑋꀋꀨꆏꇔꉢꇢꃄꑌꈜꀕꌒ。
ꌩꏓꒉꇸꌩꑭꈬꊂꐹꄮꇬ,
ꃮꀠꌧꑀꆏꈹꉢꄎꃄꑌꌒ,
ꉢꈹꆏꄎꃄꑌꈜꀕꌒ,
ꃨꏂꃨꆧꆎꑣꉢꁳꃄꑌꌒ,
ꉡꑣꆏꁳꃄꑌꈜꀕꌒ。

ꆗꀊꑘꀕꇆ,
ꈫꅐꏦꈿꊈꇁꌐꅍꐹꄮꇬ,
ꏂꃴꏂꆈꆏꇔꉢꇢꃄꑌꌒ,
ꉢꇔꆏꇢꃄꑌꈜꀕꌒ,
ꈫꅐꇌꎸꆏꊏꉡꍈꃄꑌꌒ,
ꉢꊏꆎꍈꃄꑌꈜꀕꌒ。
ꆗꀊꑘꀕꇆ,
ꑌꇁꑿꆫꁦꀑꇉꄩꏩꄮꇬ,
ꌧꉙꈴꂷꆏꈹꉢꄎꃄꑌꌒ,
ꉢꈹꆏꄎꃄꑌꈜꀕꌒ。
ꌧꁐꂷꅪꆏꑣꉡꍈꃄꑌꌒ,
ꉢꑣꆎꍈꃄꑌꈜꀕꌒ。
ꇤꍤꇤꄻꉷꃅꏦꎫꐹꄮꇬ,
ꇇꈯꇇꀘꆏꃼꉢꄀꃄꑌꌒ,
ꉢꃼꆏꄀꃄꑌꈜꀕꌒ,
ꉷꃅꎧꏸꆏꃼꉢꄎꃄꑌꌒ,
ꎽꁁꀍꄟꉢꃼꆏꄀꃄꑌꌒ。
ꆗꀊꑘꀕꇆ,
ꐎꇁꏁꎍꇗꄃꀕ,
ꁌꐪꐎꏂꈻꑴꇬ,
ꐎꏂꊌꂸꉆꇊꃲ,
ꑘꀕꈁꇁꇗꄃꀕ,
ꆗꐥꀋꃷꎵꑴꇬ,
ꉂꐪꑘꀕꐥꇈꃲ。

ꆗꀊꑘꀕꇆ,
ꉡꆹꉠꆗꑘꀉꄂꉂꄸꇆ!
ꎰꆈꆻꃹꏭ,
ꆗꀊꑘꀕꇆ,
ꑋꀑꌕꆪꆏ,
ꁦꀑꌋꈤꊪꈜꁮ,
ꁧꈪꆳꅣꃹꈜꁮ,
ꉣꑊꈬꇁꈈꌠꎹꈜꁮ,
ꃢꎔꈈꌠꎹꈜꁮ,
ꎹꇈꉷꃅꁊꊫꑟꃲꆏ,
ꃢꎔꈈꌠꊌꎂꀕ。
ꎷꀑꌕꆪꆏ,
ꒈꅐꃪꂥꇀꈜꁮ,
ꉣꑊꈬꇁꈈꌠꎹꈜꁮ,
ꀋꐱꄯꁯꎹꈜꁮ,
ꎹꇈꀋꐱꇉꂾꑟꃲꆏ,
ꀋꐱꄯꁯꊌꎂꀕ。
ꍴꀑꌕꆪꆏ,
ꉒꇁꉐꒉꁦꈜꁮ,
ꉣꑊꈬꇀꈈꌠꎹꈜꁮ,
ꒌꂷꆫꁯꎹꈜꁮ,
ꎹꇊꂶꋦꁧꑎꑟꃲꆏ,
ꒌꂷꆫꁯꊌꎂꀕ。
ꋅꀑꌕꆪꆏ,
ꃱꆉꃰꉈꄕꈜꁮ,
ꉣꑊꈬꇀꈈꌠꎹꈜꁮ,
ꏸꑮꍓꃯꎹꈜꁮ,
ꎹꇊꌺꃘꀑꐯꑟꃲꆏ,
ꏸꑮꍓꃯꊌꎂꀕ。

ꆗꀊꑘꀕꇆ,
ꑍꆏꈨꏮꈞꆈꃹꒉꃲ,
ꌊꆏꆪꏮꁧꎐꅐꇁꃲ,
ꉣꑊꄓꌠꄓꄿꃲ,
ꏃꃅꂸꄜꌦꇬꄑ,
ꇁꇈꇁꇊꃅ,
ꇁꇈꐷꈭꏂꊂꑟꇬꆏ,
ꈌꀞꄇꑴꄓꇁꇬꌠꑟ,
ꇬꅇꄷꂸꅲ。
ꇁꇈꇁꇊꃅ,
ꉻꈫꉶꇤꑟꇬꆏ,
ꃷꇎꇽꐋꄓꇁꇬꌠꑟ,
ꇬꅇꄷꂸꅲ。
ꇁꇈꇁꇊꃅ,
ꇁꇈꈭꇂꈛꁧꑟꇬꆏ,
ꐋꇁꊇꌺꄓꇁꇬꌠꑟ,
ꇬꅇꄷꂸꅲ。
ꇁꇈꇁꇊꃅ,
ꂷꑭꈬꊂꑟꇬꆏ,
ꄩꆹꌿꋦꆈꊉꀕ,
ꀏꆹꂶꋦꄄꃨꀕ,
ꉑꀮꌹꋒꇬꌠꑟ,
ꇬꅇꄷꂸꅲ。
ꆗꀊꑘꀕꇆ,
ꇁꇈꇁꇊꃅ,
ꑳꉎꁧꐙꌕꂷꈴꇬꆏ,
ꃈꈯꉒꐎꁦꀑꏡ,
ꁧꐧꉒꈌꊱꆺꀮ,
ꈛꎂꌩꏾꑍꏾꆳꌌꏾꀕꁏ,
ꉣꑊꉌꃀꄚꈿꐎꀕꁏꇈꃲ。
ꇁꇈꇁꇊꃅ,
ꇁꇈꇉꅶꌔꏢꐂꇬꆏ,
ꇉꅶꒊꊝꎮꀕꊰ,
ꉣꑊꉌꃀꄚꈿꊰꇈꃲ。
ꇁꇈꇁꇊꃅ,
ꇁꇈꃪꅪꈬꊂꑟꇬꆏ,
ꃪꊂꐚꋥꅉ,
ꉪꆹꐚꅍꈿ,
ꃪꊂꐚꅍꈿ,
ꃪꊂꐛꑿꑌ,
ꀅꌳꀅꌳꁧꄷꃲ。
ꇁꇈꇁꇊꃅ,
ꇁꇈꌿꉘꈬꊂꑟꇬꆏ,
ꌿꉘꐓꇁꇌꋥꅉ,
ꉪꆹꐓꇁꇌꅍꈿ,
ꐓꇁꇍꌺꑌ,
ꀅꌳꀅꌳꁧꄷꃲ。
ꇁꇈꇁꇊꃅ,
ꇁꇈꏃꃅꈬꇬꑟꇬꆏ,
ꀊꉘꃮꆫꉉꄟꄸ,
ꇌꆈꁍꎼꉇꄟꄸ,
ꉐꆈꌹꋒꋓꃮꏿ,
ꋋꑌꐥꇁꉹꁌꃮꎻꈁ,
ꃰꇁꏃꎖꃮꎻꈁ,
ꁮꇁꐙꌺꃮꎻꈁ,
ꀋꏣꋍꂷꃮꎻꈁ,
ꋋꑌꈹꇁꎹꌠꑟꅊꇈ,
ꀋꁧꂛꊨꑟꅊꇈ,
ꒃꇁꉇꌠꑟꅊꇈ,
ꋊꇁꃣꌺꑟꅊꇈ,
ꀋꁧꂛꊨꑌ,
ꍩꇓꉐꌦꌵ,
ꇓꅥꍈꀮꀜ,
ꐳꂷꃅꏸꋦ,
ꑓꏂꋘꉬꀕ,
ꇶꇁꇍꅉꃅ,
ꌉꇁꆳꂿꄷ,
ꅥꋒꅰꋒꊪ,
ꉫꑌꀱꈜꁮ,
ꂸꉬꀱꈜꁮꄷꃲ。
ꆗꀊꑘꀕꆹ,
ꀀꊋꀂꂷꑌ,
ꌡꊋꀂꊎꇁꂸꅲ,
ꀀꌗꀂꂸꑌ,
ꌡꌗꀂꊎꇁꂸꅲ,
ꋍꏣꌌꏣꈘ,
ꑬꃶꈛꂿꍬꆹꃲ。
ꆗꀊꑘꀕꉫꑌꀱꈜꁮ,
ꂸꉬꀱꈜꁮ,
ꀉꑳꑕꑘꉫꑌꌐꐊꀱꈜꁮ,
ꂸꉬꀱꈜꁮꄷꃲ。

ꆗꀊꑘꀕꇆ,
ꏂꅪꇢꇓꒊꂷꊌꑌꀈꈥꊌ,
ꆗꀊꑘꀕꊌꂸꉆꇊꃲ,
ꈌꃅꅳꁖꈬꐬꁭꂷꊌꑌꀈꈥꊌ,
ꆗꀊꑘꀕꊌꂸꉆꇊꃲ,
ꃆꇭꇇꑭꈬꁄꅑꂷꊌꑌꀈꈥꊌ,
ꆗꀊꑘꀕꊌꂸꉆꇊꃲ,
ꅡꈭꉌꃀꈬꂷꑋꂷꊌꑌꌐꈥꊌ,
ꆗꀊꑘꀕꊌꂸꉆꇊꃲ,
ꌳꈄꆧꁨꈬꁄꅑꂷꊌꑌꀈꈥꊌ,
ꆗꀊꑘꀕꊌꂸꉆꇊꃲ。
ꆗꀊꑘꀕꇆ,
ꋍꐞꌊꐞꆹ,
ꇬꇉꅪꁦꁨꇈꃲ,
ꈭꐞꈛꐞꆹ,
ꈜꄱꊪꇖꀕꁧꃲ,
ꁧꐞꇈꐞꆹ,
ꁧꑭꅡꊪꀕꇈꃳ。
ꁦꌋꇈꌋꐞ,
ꇍꀭꍫꐎꐞꇈꃲ,
ꒈꌋꃪꌋꐞ,
ꎯꆈꂷꈚꐞꇈꃲ,
ꉒꌋꉏꌋꐞ,
ꎳꌺꆾꈜꐞꇈꃲ,
ꁖꅑꌌꁈꐞ,
ꉼꃀꆈꇗꐞꇈꃲ,
ꅐꅑꌌꁈꐞ,
ꃈꈯꄀꅪꐞꇈꃲ。
ꆗꀊꑘꀕꑠꂷꑌ,
ꊸꑋꄂꐊꐺꎼꅀ,
ꄂꐊꃈꈯꏡꎼꅀ,
ꉩꑍꉒꐊꐺꎼꅀ,
ꉒꐊꁦꈌꏣꎼꅀ,
ꀉꑳꑕꑘꆹ,
ꑍꇁꌊꉂꏿꇈꃲ。

ꆗꀊꑘꀕꇆ,
ꑍꆏꁬꈬꃺꄉꀋꇁꇂ,
ꌊꆏꂷꇭꄔꄉꀋꇁꇂ,
ꌩꇽꅔꊂꎭꎼꅀ,
ꂸꀱꇁꎜꄉꎼꅀ,
ꒉꄤꇉꊂꎭꎼꅀ,
ꂸꀱꇁꎜꄉꎼꅀ。
ꆗꀊꑘꀕꇆ,
ꅽꇁꉣꑊꆹ,
ꈍꐯꈋꉐꆹꀋꇢ,
ꅇꂷꏥꅉꎴꆹꃲ,
ꈢꈐꈢꉈꆹꀋꇢ,
ꃱꇌꄀꅉꎴꆹꃲ,
ꅶꁉꍤꁆꆹꀋꇢ,
ꇓꅥꏥꅉꎴꆹꃲ,
ꋧꃅꂿꃋꆹꀋꇢ,
ꏃꃅꈬꁕꆹꀋꇢ,
ꈐꇁꉈꇢꆹ,
ꉼꑴꈬꄅꀕꆹꃲ,
ꃱꇌꈬꊐꇢꆹꃲ。
ꐏꌠꑓꍝꀕ,
ꈌꀞꄇꑴꑓꍝꀕꇈꃲ;
ꁇꌠꑓꄧꀕ,
ꃀꌠꀊꂵꑓꄧꀕꇈꃲ;
ꊾꇬꃅꇬꐏꃅꐏ,
ꏁꍿꆿꃀꐏꃅꐏꇈꃲ。
ꆗꀊꑘꀕꇆ,
ꆎꑌꇬꇉꒊꊝꊰꃅꇈꃲ,
ꉡꑌꇬꇉꂶꅿꇷꃅꑌꇈꃲ。

ꆗꀊꑘꀕꇆ,
ꀊꄶꎹꄓꅏꈌꇬ,
ꐥꇁꉹꁌꃅꇫꅐ,
ꆗꀊꑘꀕꀋꅐꃲ;
ꁯꋒꈺꄮꇬ,
ꐥꇁꉹꁌꃅꇫꈻ,
ꆗꀊꑘꀕꀋꈻꃲ,
ꀊꄶꉷꃅꏦꈜꇬ,
ꀞꀑꐍꇬꀕ,
ꃀꀑꆈꅊꀕ,
ꆗꀊꑘꀕꀋꐊꃲ;
ꅡꈫꏂꊂꏭ,
ꌡꌺꅇꉉꏰꌺꋶ,
ꆗꀊꑘꀕꀋꐊꃲ;
ꏪꈜꁨꁧꇬ,
ꌡꌺꃆꇭꆲꏁꉔꁏ,
ꆗꀊꑘꀕꀋꐊꃲ。
ꐛꑿꈳꅉꇬ,
ꁖꐪꊁꆹꁮꇈꃲ,
ꈭꏂꈳꅉꇬ,
ꇕꃚꊁꆹꌒꇈꃲ。

ꆗꀊꑘꀕꇆ,
ꉣꑊꈩꇁꀛꅉꆹ,
ꐻꇁꉈꉻꐷꇈꃲ,
ꉣꑊꑌꇁꉆꅉꆹ,
ꃮꑌꌃꈉꐛꇈꃲ;
ꉣꑊꎼꇁꈳꏦꆹ,
ꀉꐩꀊꆈꀜꇈꃲ;
ꉣꑊꐰꏤꅉꇬ,
ꆗꀊꑘꀕꀋꇁꃲ。

ꆗꀊꑘꀕꇆ,
ꀋꇷꀋꇷꋠ,
ꀑꆗꇷꇁꇍꌠꀋꇷꋠ,
ꊁꇁꀿꂷꀋꇷꋠ;
ꏢꇁꇋꌠꀋꇷꋠ,
ꋊꇁꃣꌺꀋꇷꋠ;
ꉢꀉꑳꑕꑘꑌ,
ꀒꇁꁭꂥꀋꇷꋠ,
ꊁꇁꀿꃅꀋꇷꋠ,
ꑕꑘꏢꇁꇋꌠꀋꇷꋠ,
ꈼꇁꋧꌠꀋꇷꋠ,
ꏃꊰꈌꋓꀕꌠꀋꇷꋠꇈꃲ。

ꆗꀊꑘꀕꇆ,
ꉣꑊꏢꇁꇍꌠꆹ,
ꏃꃅꉬꉎꅥꌩꅥꇓꊰꎻꑟ,
ꋍꏢꊰꇁꋍꄩꌸꎻꑟ,
ꀈꈬꇌꎸꀠꎻꑟ。
ꉣꑊꇷꇁꇍꌠꆹ,
ꏃꃅꉬꉎꐱꒀꌕꇷꊰꎻꑟ,
ꋍꇷꊰꇁꋍꄩꌸꎻꑟ,
ꒉꃹꀋꌦꃪꅞꌥꎻꑟ,
ꌕꈎꂿꒃꌠꂸꊌꎻꑟ。
ꉣꑊꈼꇁꋧꌠꆹ,
ꃺꒌꆞꇱꑏꎂꀕ,
ꑌꇁꉆꌠꇵꎂꀕ,
ꏃꊰꋋꂿꁇꎂꀕ。
ꉣꑊꐏꇁꁇꌠꆹ,
ꁳꍂꇇꁅꊬꎂꀕ,
ꎼꇁꈴꌠꇵꎂꀕ,
ꉆꊰꋋꂿꁇꎂꀕ。
ꉣꑊꅥꇁꄁꌠꆹ,
ꇇꆹꁮꏂꄴꎂꀕ,
ꌕꈎꉖꂸꌑꎂꀕ,
ꏁꄵꁬꋌꆹ,
ꐱꑴꎰꆈꀉꄂꋦꎻꑟ,
ꎹꑌꊌꂸꄿꎻꑟ。
ꆗꀊꑘꀕꇆ,
ꁧꌠꈪꇁꆹ,
ꇉꄩꇪꀮꐥꇈꃲ。
ꆗꀊꑘꀕꆎꂷꇆ,
ꒉꇁꉏꅉꃅꇀꑟ,
ꄾꆏꇭꀧꂿꇁꑟ,
ꀋꄿꃛꁙꈨꇁꑟ,
ꋋꑌꀋꇁꃲ,
ꆗꀊꑘꀕꀋꇁꃲ。
ꆗꀊꑘꀕꇆ,
ꑋꀑꌕꂷꆏ,
ꈥꀒꌋꈤꊪꇁꃲ,
ꌿꊂꌦꋦꆧꆊꁏꇁꃲ,
ꆗꀊꑘꀕꇆ,
ꄹꇭꏜꅿꃴꇰꃲ,
ꆗꑘꀋꇁꃲ;
ꆗꀊꑘꀕꇆ,
ꎷꀑꌕꆪꆏ,
ꉒꈻꁦꈌꏣꇁꃲ,
ꁯꋒꉐꌦꄲꇁꃲ,
ꈜꅪꒈꏾꄓꇁꃲ,
ꆗꑘꀋꇁꃲ。
ꍴꀑꌕꆪꆏ,
ꑌꏮꁧꐯꐥꇁꃲ,
ꆿꍯꉻꃹꆨꉬꃲ,
ꑌꑿꉺꈻꆨꉬꃲ。
ꏁꐚꆻꄧꏭ,
ꁮꏂꀊꃴꐑꃹꃲ,
ꉂꋢꀊꐞꏭ,
ꀌꀠꏾꅪꐑꃹꃲ,
ꈭꍪꍫꉘꏭ,
ꈭꃀꀉꍽꉙꐛꃲ。
ꊨꊭꀊꃴꄊꎬꉘꁌꐥꌠꏮꇁꃲ,
ꇉꄩꇪꀮꀋꁮꇅꉱꐥꌠꏭꇁꃲ,
ꍆꀕꅐꋑꒊꆈꇉꀝꐥꌠꏮꇁꃲ,
ꃪꏂꄯꆪꃪꀮꇌꉘꐥꌠꏮꇁꃲ,
ꃮꃀꐛꊪꀉꐩꒈꇤꐥꌠꏮꇁꃲ,
ꆗꀊꑘꀕꀋꇁꃲ。
ꈵꃴꈵꍽꈌꃅꉆꊂꁠꀕꏮꇁꃲ,
ꆧꌊꈬꊂꃆꇭꏮꊂꁠꌠꏮꇁꃲ,
ꆺꑳꏂꃴꌳꈄꐚꂿꏛꌠꏮꇁꃲ,
ꆗꀊꑘꀕꀋꇁꃲ,ꀋꇁꀋꇁꃲ。
ꋅꀑꌕꆪꆏ,
ꌿꌺꐍꈤꈚꇁꃲ,
ꎺꌺꊪꇖꀵꇁꃲ,
ꄹꇭꀍꃨꅑꇁꃲ,
ꉇꈌꂴꍵꀵꇁꃲ,
ꊨꊭꉻꏑꆨꉬꃲ,
ꆗꑘꀋꇁꃲ。

ꆗꀊꑘꀕꇆ,
ꉢꀉꑳꑕꑘꑠꍈꑌ,
ꑳꉎꌔꏮꀕꄉꆗꇁꉚ,
ꉜꉛꑓꏣꈗꑌꀋꇁꃲ,
ꁦꀑꉆꄉꏃꏾꃬ,
ꃫꀕꍈꆹꐝꑌꀋꇁꃲ;
ꑳꐮꌔꏮꀕꄉꆗꇁꉚ,
ꉜꉛꑓꏣꈗꑌꀋꇁꃲ,
ꇉꅶꉆꄉꇇꌋꂢ,
ꂢꂡꈁꐞꈢꑌꀋꇁꃲ。
ꆗꀊꑘꀕꇆ,
ꑍꇁꉖꈤꆹ,
ꈎꇁꆪꈤꆸꇰꃲ,
ꆗꀊꑘꀕꈍꃅꂯ!

ꆗꀊꑘꀕꇆ,
ꀋꏦꀋꏦꀞ,
ꅽꇁꉣꑊꆹ,
ꌩꎔꑍꄷꋦꑴꇬ,
ꌧꏾꆳꅸꋍꈜꏓꑌꌬꀋꄿ,
ꒉꎔꑍꄷꒉꑴꇬ,
ꒈꂪꋍꈜꏓꑌꌬꀋꄿ,
ꁧꎔꑍꄷꋦꑴꇬ,
ꁦꒌꋍꈜꆚꑌꌬꀋꄿ,
ꏬꆉꃅꋮꃰꑴꇬ,
ꁰꒌꋍꈜꌸꑌꌬꀋꄿ,
ꇥꉢꑲꅉꇇꏸꂩꑌꌬꀋꄿ,
ꀋꐔꀋꐷꈀꎍꀕ,
ꀋꌦꀋꆅꈀꐥꀕ。
ꅽꇁꉣꑊꆹ,
ꇭꀧꑍꄷꐥꑴꇬ,
ꉌꃀꋍꈜꎌꋌꐥ,
ꂿꃊꌕꐥꁎꑌꌬꀋꄿ,
ꃣꈌꌕꐥꇗꑌꌬꀋꄿ,
ꆗꀊꑘꀕꇆ,
ꀋꏦꀋꏦꀞ,
ꀋꏦꄸꇬꀋꏦꀞ!

ꆗꀊꑘꀕꇆ,
ꉡꆹꉠꆗꑘꀉꄂꉂꄸꇆ!
ꎰꆈꆻꃹꏭ,
ꎰꄛꐞꇁꌹꋒꇁꒃꎭ,
ꏦꍠꑳꁭꁉꂿꄷ,
ꀝꀬꑴꑭꇭꂿꄷ,
ꋋꑌꉢꄷꋌꂸꐛ。
ꁉꉘꇁꄿꏭ,
ꀉꄜꀋꍰꌹꋒꇁꒃꎭ,
ꌑꇌꃬꈌꆏꂿꄷ,
ꃬꑐꏪꈜꁌꂿꄷ,
ꋋꑌꉢꄷꋌꂸꐛ。
ꋌꐮꌕꁄꏭ,
ꃅꈬꀋꑆꌹꋒꇁꒃꎭ,
ꐍꋩꇁꄉꃅꂿꄷ,
ꏁꋩꇌꍞꃢꂿꄷ,
ꋋꑌꉢꄷꋌꂸꐛ。
ꂚꈢꆻꃹꏭ,
ꌩꉐꇮꐙꌹꋒꇁꒃꎭ,
ꇁꏙꌩꃅꏦꂿꄷ,
ꎧꏸꇇꋌꒉꂿꄷ,
ꀋꆳꃬꃅꁨꂿꄷ,
ꆿꅪꃅꀕꋩꂿꄷ,
ꋋꑌꉢꄷꋌꂸꐛ。
ꁰꁱꆻꄧꏭ,
ꐝꍅꃤꏸꌹꋒꇁꒃꎭ,
ꑬꈄꉐꃅꅸꂿꄷ,
ꏁꆹꍔꃅꈤꂿꄷ,
ꐍꆹꂻꃅꈤꂿꄷ,
ꋋꑌꉢꄷꋌꂸꐛ。
ꆈꉼꉆꊰꉆꌠꇁꒃꎭ,
ꏁꆹꉐꃅꁵꂿꄷ,
ꐍꆹꑳꃅꈤꂿꄷ,
ꆿꇁꍯꈻꎴꂿꄷ,
ꋋꑌꉢꄷꋌꂸꐛ。
ꉡꆹꉠꆗꀊꑘꀕꀉꄂꉂꄸꇆ!
ꐎꉺꉐꑋꊏꌠꇁꒃꎭ,
ꐍꆹꃅꌌꏦꂿꄷ,
ꑌꑿꄙꃅꁵꂿꄷ,
ꑬꈄꉐꃅꐊꂿꄷ,
ꋋꑌꉢꄷꋌꂸꐛ。

ꆗꀊꑘꀕꇆ,
ꅽꇁꉣꑊꑞ,
ꃣꈌꉌꉪꐛꀋꉆꑟ,
ꈩꐛꃅꌒꅞꎻꑟ,
ꃣꈌꉌꉪꐛꃲꆏ,
ꐥꑋꀕꄙꑿꉐꑌꀋꁯ,
ꑿꁦꆏꋄꋒ,
ꉌꆐꊁꆹꅑꎼꂵ,
ꌦꑋꑌꇁꑿꌗꑌꀋꈉ。
ꅽꇁꉣꑊꆹ,
ꈩꐛꃅꌒꅝꃲꆏ,
ꐥꑋꐍꄙꏂꉐꑌꀋꁯ,
ꌦꑋꐍꇁꏂꌗꑌꀋꈉ,
ꐎꏂꌊꁈꐙꉘꉩ,
ꊿꂿꆹꀏꅞ,
ꎆꂿꆹꄩꅞ,
ꋍꋏꀋꈔꋍꋏꈔꎂꀕ。
ꅽꇁꉣꑊꆹ
ꏧꇁꇉꇬꎑꌠꋍꐚꍬꑌꌒ,
ꏁꃨꐦꇬꋦꌠꋍꐚꍬꑌꌒ,
ꆫꇁꂿꑋꆧꁨꎵꄉꀕꃲꆏ,
ꁨꇐꀀꈌꎍ;
ꀿꎆꈣꆹꇐ,
ꎆꃀꈣꆹꇐ,
ꆧꁨꄾꎆꄷꂸꈤꑵꄷ。
ꆗꀊꑘꀕꇆ,
ꃅꃴꏷꋦꄖ,
ꏷꋦꀋꃷꎵꑴꇬ,
ꌬꌠꋍꂷꀉꄂꐊꑵꄸ;
ꅉꃴꏜꋦꄖ,
ꏜꋦꀋꃷꎵꑴꇬ,
ꒌꈎꏜꉬꋍꋇꀉꄂꑵꄸ;
ꆀꃅꆗꎔꑌ,
ꆗꎔꀋꃷꎵꑴꇬ,
ꆗꀊꑘꀕꆎꂷꇑꈪꊰ。

ꆗꀊꑘꀕꇆ,
ꉣꑊꉂꇁꑟꅇꆹ,
ꄩꆹꃅꃴꈭꏂꈨꆹꃲ,
ꂿꃋꌕꊐꈨꆹꃲ,
ꄂꐎꄄꆈꈨꆹꃲ,
ꄂꐎꌹꋒꋋꈨꄁꈘꄂꈽꏿꆹꃲ,
ꄄꆈꌹꋒꋋꈨꆺꀕꂃꆹꃲ;
ꌿꊂꉐꆈꌌꆹꃲ,
ꌿꉘꈬꁍꈨꆹꃲ,
ꐓꇁꇍꌺꌹꋒꋋꈨꀜꄑꏿꆹꃲ;
ꏰꌌꅔꐍꈬꊂꈨꆹꃲ,
ꍈꀮꌹꋒꋋꈨꏜꃴꁿꆹꃲ;
ꑙꌌꌩꑭꈬꊂꈨꆹꃲ,
ꇉꅶꊇꌺꋋꈨꌩꃴꍃꆹꃲ;
ꎴꌌꒊꃴꈨꒉꃲ,
ꒊꃴꉜꏂꌹꋒꋋꈨꋓꀜꏿꆹꃲ。
ꌊꆏꃅꈯꏷꌺꈨꆹꃲ,
ꏷꌺꑍꍈꋋꈨꑓꍝꀕꆹꃲ;
ꊖꑭꁬꃷꌹꋒꈨꆹꃲ,
ꁬꃷꑍꍈꋋꈨꈜꐩꏿꆹꃲ;
ꈜꐯꌩꋇꈨꒉꃲ,
ꌩꏾꑍꏾꋋꈨꀕꁏꆹꃲ。

ꆗꀊꑘꀕꇆ,
ꆗꑘꉣꑊꆹ,
ꍤꁆꇋꏢꌉꄉꌧꑟꉂ,
ꇌꋍꇌꌌꆎꈾꉡꍈꃅꄉꌧꑟꉂ;
ꅶꁉꑾꋒꅥꄉꌧꑟꉂ,
ꑿꋋꑿꌊꆎꈾꉡꍈꃅꄉꌧꑟꉂ;
ꃮꅪꈵꃀꎵꏢꐤꑟꉂ,
ꆗꑘꉣꑊꆎꊈꉡꍈꃅꄉꌧꑟꉂ;
ꎬꐚꃆꀞꒊꂷꐤꑟꉂ,
ꆗꑘꉣꑊꆏꏼꉡꍈꃅꄉꌧꑟꉂ。
ꆗꀊꑘꀕꇆ,
ꆗꀊꑘꀕꉣꑊꆹ,
ꋍꑍꈩꌒꊰꑋꃅꄤꈊꑟꉂ,
ꋋꑌꑍꆏꈧꌺꐙꉘꉩ,
ꈨꏮꈞꆈꃹꁧꃲ,
ꃅꃴꏷꋦꏁꍅꀕꇁꃲ,
ꉌꃀꄚꈿꄏꄹꊰꒉꃲ。
ꋍꉔꈩꌒꃅꄤꄛꑟꉂ,
ꋋꑌꌊꆏꆧꌺꐙꉘꉩ,
ꆧꆦꈨꐛꏃꃅꄜꆹꃲ,
ꉌꃀꄚꈿꁡꎓꁡꆹꃲ。
ꆺꑳꀿꃀꐙꉘꉩ,
ꀿꃀꉌꇨꌺꇖꈛꎭꊐꇈꃲ。

ꆗꀊꑘꀕꇆ,
ꀋꁧꀉꄉꆹ,
ꎆꏣꊿꂸꏣꇈꃲ;
ꆗꑘꉣꑊꆹ,
ꑲꅉꐦꇬꅑꇊꃲ,
ꑷꁱꐞꇬꂄꇈꃲ。
ꆗꀊꑘꀕꇆ,
ꃣꈌꉌꉪꐛꉆꑟ,
ꆗꑘꉣꑊꈁꒉꈁꌒꀕꎻꑟ,
ꉪꐪꇇꇐꐊꎻꑟ,
ꈁꉜꈁꃅꇎꎻꑟ,
ꆺꑳꀉꄉꁵꎻꑟ。
ꀋꁧꀉꄉꆹ,
ꊈꎷꌐꎹꆹ,
ꃆꇭꏁꉔꁐꌠꎹꏢꉨ;
ꆿꁨꍯꁦꆹ,
ꈾꁇꈾꎍꄅꌠꎹꏢꉨ;
ꐎꁦꏂꁨꆹ,
ꐎꏂꈬꎍꀕꌠꎹꏢꉨ;
ꑌꁨꑿꁦꆹ,
ꒀꇗꒀꊪꄅꌠꎹꏢꉨ。
ꉠꆗꀊꑘꀕꆹ,
ꑿꊜꂥꀠꇕꂷꁨꇈꃳ;
ꎆꁨꋚꁦꆹ,
ꃆꃀꑓꄜꉖꂷꁨꇈꃳ;
ꐎꁦꏂꁨꆹ,
ꈛꁧꇓꎓꁨꇈꃲ;
ꃢꇁꈚꁨꆹ,
ꍶꑆꇇꋩꁨꇈꃲ;
ꑳꇁꇤꁦꆹ,
ꄂꐎꑳꁭꁉ,
ꉐꌦꑴꑭꇭꇈꃲ;
ꁍꇂꑗꁦꆹ,
ꑭꉱꀋꃀꁨꇈꃳ,
ꇇꇐꀋꁨꆧꁨꏂꅪꅑꈴꉬꇈꃲ。

ꆗꀊꑘꀕꑠꂷꑌ,
ꆗꀊꑘꀕꇆ,
ꃅꆺꎼꈎꆏ,
ꀋꁧꀉꄉꑌ,
ꎆꆹꋙꆹꁨꉆꑌ,
ꀋꃋꆸꂷꁨꂸꉆ,
ꌩꆹꒈꆹꁨꉆꑌ,
ꀋꃋꆸꂷꁨꂸꉆꄷꃲ;
ꆺꑳꀉꂿꑌ,
ꃢꆹꈚꆹꁨꉆꑌ,
ꀋꃋꆸꂷꁨꂸꉆ,
ꋚꆹꒈꆹꁨꉆꑌ,
ꀋꃋꆸꂷꁨꂸꉆꄷꃲ;
ꀋꁧꂛꊨꑌ,
ꀉꐔꊰꏁꈓ,
ꀀꁍꄚꂸꁍ,
ꅪꏷꌐꅍꎬꏦꐥ,
ꌐꎔꋍꉻꐙꏦꐥꄷꃲ;
ꂛꊨꃇꌺꑌ,
ꅪꎔꎆꎔꀠ,
ꃇꌺꎆꎔꋟꏦꐥꄸꃲ;
ꀎꋏꀉꁌꑌ,
ꆿꅪꈃꈄꇉꃹꁧ,
ꂸꈄꇉꃹꁧ,
ꉐꆈꐁꐂꇉꐙꁧ,
ꂸꐂꇉꐙꁧ,
ꀉꐔꎔꎖꌐꐛꁧ,
ꂸꎔꌐꐛꁧꄷꃲ。
ꑱꉻꌡꃅꏂꁧꃲ;
ꉂꌠꑍꂷꋍꁯꃅꂸꄿ,
ꀋꉂꑍꂷꋍꑷꋦꁧꃲ。
ꆗꀊꑘꀕꇆ,
ꊨꊭꎔꌠꃅꐚꁧꂯꃲ,
ꁮꅰꋆꌠꉶꐂꁧꂯꃲ,
ꐴꅑꐴꌩꅿꃅꄔꐞꁧꂯꃲ,
ꏾꅑꏾꅿꐻꇁꉈꈌꌸꂯꃲ,
ꈌꃅꏸꇬꀀꄉꉩꃮꏿꁧꃲ,
ꃆꇭꃅꃨꉻꀀꄉꀅꍠꀕꁧꃲ,
ꎽꀮꎔꎖꃬꐊꈄꇬꀀꁧꃲ,
ꉢꀉꑳꑕꑘꈍꃅꂯ!

ꆗꀊꑘꀕꇆ,
ꆗꀊꑘꀕꆎꂷꇆ,
ꑌꎹꑿꎷꌩꁐꈬꉘꀋꎹꇂ,
ꑌꄙꑿꉐꀋꁧꀉꄉꀋꁵꇂ;
ꅽꇁꉣꅽꉌꃀꉪꅉꀋꑟꇂ;
ꆿꎹꍯꎷꀈꉙꑗꒉꀋꎹꇂ,
ꆿꍯꂸꈘꏡꌠꆺꑳꀉꂿꀋꁵꇂ;
ꁍꎹꑗꎷꋪꀕꁍꃴꀋꎹꇂ,
ꁍꄙꑖꉐꀋꁧꀉꄉꀋꁵꇂ;
ꉣꑊꉌꃀꉪꅉꀋꑟꇂ。
ꃢꎹꈚꎹꉷꃅꁊꊫꀋꑟꇂ,
ꁮꑟꁁꆧꆺꑳꀉꂿꀋꁵꇂ;
ꐎꎹꏂꎷꇍꈩꀒꎂꀋꎹꇂ;
ꐍꏦꏁꏦꀋꁧꀉꄉꀋꁵꇂ;
ꅽꇁꉣꑊꉌꃀꉪꅉꀋꑟꇂ。
ꆗꀊꑘꀕꇆ,
ꅽꇁꉣꑊꆹ,
ꐰꃅꐰꇐꈤ,
ꏤꃅꏤꇐꈤ,
ꄩꆹꑍꆏꈧꌺꇱꏤꄉ,
ꈧꅐꄎꌬꌫꌦꋩ;
ꌊꆏꆧꌺꇱꏤꄉ,
ꆧꅐꁨꇉꇈꌦꋩ;
ꑳꉎꁧꐙꇱꏤꄉ,
ꁧꐙꀑꉭꀕꌦꋩ;
ꑳꂾꇓꆈꀋꃀꇱꏤꄉ,
ꇓꎍꏁꊤꊣꌦꋩ;
ꑳꊂꃪꅪꇱꏤꄉ,
ꃪꐛꅩꑳꑲꌦꋩ;
ꑳꐮꒉꀕꇱꏤꄉ,
ꒉꀕꋌꃳꒈꌦꋩ;
ꆺꑳꃪꀮꇱꏤꄉ,
ꀒꆹꂸꈬꐝꌦꋩ,
ꊁꆹꂩꈬꐝꌦꋩ;
ꆎꑌꑮꒃꋑꋉꐮꂸꄉ,
ꉡꑌꁮꇁꂥꐙꐮꂸꄉ。
ꆗꀊꑘꀕꇆ,
ꁦꀑꉆꄉꏃꏾꃬꐮꄉ,
ꇉꅶꉆꄉꇇꌋꂟꐮꄉ,
ꃮꇁꃬꈎꎴꃅꐺꐯꄉ,
ꈭꇂꈜꈢ,
ꏣꎼꑟꇤꎴꃅꐺꐮꄉ,
ꈛꎼꈜꈴ,
ꇤꍤꇤꄻꎴꃅꐺꐮꄉ,
ꁍꇂꑗꋮ,
ꑘꃅꉐꊨꎴꃅꐺꐮꄉ,
ꆗꇊꀑꐎꇬ,
ꃀꇊꎐꏂꉢ,
ꐥꑋꋍꁯꃅ,
ꌦꑋꋍꇤꃅ,
ꉼꑋꋍꈚꄀ,
ꀘꑋꋍꐬꃹꐮꄉ,
ꁍꈿꀿꈿꊈꀮꋍꏢꉬꐮꄉ。
ꆗꀊꑘꀕꇆ,
ꌂꇀꑷꌠꆹ,
ꌕꈎꋍꏮꂾꑌꌂ,
ꆀꃅꉷꃅꇢꑌꌂꑵꄸ;
ꉂꇀꅉꌠꆹ,
ꋍꑍꌔꏮꂾꑌꉂ,
ꃀꄳꈐꉈꇢꑌꉂꑵꄷ,
ꆗꀊꑘꀕꑠꂷꑌ,
ꒈꀮꃭꇇꐞꂸꉆ,
ꐛꑿꁬꃨꐞꂸꉆ,
ꁍꑗꆿꃨꐞꂸꉆ,
ꉜꏂꆂꒉꐞꂸꉆ,
ꃅꏸꆧꁨꐞꂸꉆ,
ꅽꇁꉣꑊꆹ,
ꄄꆈꈁꎰꋩꈜꁮ,
ꉐꌦꋚꂷꃅꈜꁮ,
ꄂꐎꆫꁯꃅꈜꁮ,
ꌊꀕꈜꃅꍬꈜꁮ,
ꆳꎵꃅꀕꋨꈜꁮ,
ꌧꏾꎆꃅꌫꈜꁮ,
ꃅꑆꈬꄅꐁꑌꍬꂿꈜꋍꏢ,
ꆼꏻꄃꆺꎺꑌꏣꋍꏢ。
ꀋꉂꑍꂷꉂꋒꀳꂸꅀ,
ꉂꇁꑍꂷꉂꏣꇽꂸꉆ。
ꆗꀊꑘꀕꇆ,
ꐋꇁꊈꊎꃄꇖꄹꊂꅞꈜꁮ,
ꃺꇁꑌꊎꋍꁯꋍꈚꅞꈜꁮ,
ꀿꇁꃀꊎꆺꑳꏂꃴꅞꈜꁮ,
ꅽꇁꉣꑊꁦꆹꁦꈜꁮ,
ꂸꁧꂸꉆꃲ。
ꆗꀊꑘꀕꇆ! Ksf彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬ:ꅽꃀꈴꀋꄿ ꌐꀐ
ꊁꁬꌠ:ꊨꊭꅪꎔ