ꐛꃭꁁꐷꌧꈿꁱꇐꑍꁬ
ꄜꃑꄮꈉ:2011-09-24 | ꁰꄻꊿ:ꐛꃭꁁꐷ ꁱ ꇁꀦ:《ꆀꃅꃨꁍꀕ》ꈐꇬꌊꄀ ꉜꃷꁨ:


              ꇉꅶꃰꊿꉂꏣꅶOPN彝族人网

ꃅꄷꋌꈚ,ꁦꄅꇈꄅꄖ,ꃪꅪꉧꑳꀕ,ꀊꑙꋋꂿꇬꂯꋍꁘꎞꌠꉬ。ꄚꇬꊿꀊꅰꇫꑟꇁꀋꄐ,ꑠꅹ,ꌩꁧꇓꁧꋍꉎꀋꐥꌠꆈꊉꀕ。ꁦꀑꋋꈨꇬꆏ,ꌩꇽꌩꎞꍮꊪꈝꃀꏢꇫꁮ,ꀋꇊꆏꊿꇭꀧꇬꈤꑳꏢꀋꏯ,ꇂꈪꇀꈪꃅꁦꄅꇈꄅꇬꐛ。ꍯꊪꈝꂾꋋꏢꁮꅷꌩꏪꆈꊉꀕ、ꇉꅶꇴꋧꀕꅉꇬꑟ。
 ꁦꄅꇈꄅꄖꋌꈚ,ꌩꇽꌩꎞꈝꂾꋋꏢꀋꄻ、ꌩꇽꌩꎞꁥꌠꇫꀋꇁꌦꇬꆹ,ꈬꌩꈬꇓꒅꅉꒆ,ꈬꉙꈬꃪꑵꅉꑵ,ꍀꆿꐥꅉꐥ,ꉌꊭꉌꇓꈩꅉꈩꌠ。ꌩꇽꌩꎞꈝꂾꋋꏢꄺꄮꇬꆏ,ꌩꇓꈁꐥꌠ,ꇘꇙꈁꐥꌠꃅꈝꂾꄻꌠꋋꃀꇱꂨꀀꑌꇁꌐ,ꈜꀕꇈꊿꌩꇽꁥꌠꇁꇫꑟꈭꐨꆏ,ꃄꅉꋋꂷꑌꄙꇁꃪꈎꃅꀀꌞꇈ,ꄚꇬꑲꆀꀀꑌꇁꌠꌡ。
 ꁦꇉꈬꄔꇊꈬꄔꇬ,ꐦꀞꃅꐙꑠꍈꇬꆏ,ꌩꇽꁥꌠꀀꑳꈨꇫꋦ。ꑳꆸꈈꍇꌠꇬꆏꁦꋠꑠꂷꑲꇤꄀꌌꅜꅉꃅꁖꇁ。
 ꀃꈈꁭꉆꄉꈍꑋꁠꆧꏶꇈ,ꋌꎼꄇꈜꏡꌠꉜꄉꒉ。ꋍꂾꇉꅶꇬꍀꆿꂾꃚꇁꇊꊽꅳꀧꇬꈨꇁ,ꄚꋌꑞꑌꀋꅲꃅꇁꌊꋍꂾꌩꏦꋍꉎꀋꐥꑠꏢꋮꑟ,ꌩꏡꌠꊿꒇꈍꑋꐦꃅꄉꀐ。ꋌꇁꌊꌩꐦꀕꌠꄩꑌꄉꑲꇤꄀꅝꌦ,ꁦꋠꋋꂷꆏꉌꈲꌺꂷ,ꃴꐂꂓ。ꋋꆹꀋꉊꌠꏀꌧꇐꐥꌠꑘꃅꁡꇤꒉꄷꇈꌠꇁꌊꆈꌠꃅꈋꑟꌠ。
 ꉪꇊꎺꅉꃅꋌꉪꌊꋍꂾꌤꏡꌠꇬꄀ。
 ꇉꅶꇁꄿꒉꊼꇅꀊꂥꅉꇬ,ꇐꑘꀊꄶꄉꃢꈜꋋꇰ。ꇐꑘꋓꉪꀋꁨꃅꄉꇬꆏ,ꃴꐂꇁꌊꇐꑘꋌꃬꋍꂣꈐꊐ。“ꍠ”ꄷꃴꐂꇐꑘꇱꎼꁧꇉꇬꋍꇇꋉ。“ꀊꁣ,ꋋꈨꄉꀊꅰꃅꍑꀐ,ꊿꅣꌠꆹꊾꉂꌠ。”ꃴꐂꆏꆅꌠꀋꅲꃅꒉꄉꋌꄷ。ꇐꑘꆏꃴꐂꂣꈐꄉꋌꑇꅐꇁꇈ,ꇓꂵꂷꋌꉅꌊꃴꐂꐏꉆ。ꄚꆏꃴꐂꑞꑌꀋꑴꃅꋌꌦꇐꑘꀵꌦꇬꆏ,ꇐꑘꋌꇷꌊꃚꐕꄉꀒꏅꑟ。
 ꇐꑘꇳꃚꆏꇁꄿꇬꀆꐒꇸꇰꌠꆿꄿꈨꅜꀐ。ꆿꄿꀥꇫꑟꇁ,ꋌꇫꉂꌠꇐꑘꊿꌌꑠꃅꐺꌠꂿꇬꆏ,ꍀꂷꉨꆀꃃꇁꌠꀋꏯ:“ꊿꎲꀋꑌ”ꄷꇈ,ꃴꐂꏭꉜꄉꇁ。ꃴꐂꑌꇐꑘꋌꄝꇧꎭꇈꋌꏮꆿꄿꉜꇬꉆ。
 ꑓꋪꌦꅐꇁꄉꏽꇖꁆꌠꍻꐯꀳꄉ,ꃴꐂꌋꆀꆿꄿꑋꐯꇯꎐꏂꃴꆀꄹꐯꐍꉆ。ꍀꌋꆀꎷꈌꐮꊝꇁꇬꀋꏯ,ꐯꄛꇧꀋꎭꀐꌠꇐꑘꅉꐚ。ꑠꅹ,ꋌꀅꌳꀅꌳꃅꀍꃓꂶꌠꌌꉈꑴꄻꅑꄉꇈ,ꏛꏢꋌꑣꈂꀸꇬꑝꄉꏮꋍꑊꐮꇤꂯꌠꉜ。
 “ꁨꈔ,ꊿꁗ”ꆿꄿꑓꏮꇐꑘꀋꉜꃅꋌꄷ,ꄚ,ꇐꑘꆏꇫꁧꀋꅲ。
 “ꁦꋠꉬꑲꆏ,ꌋꅪꀋꐥꅉꇬꄉꇤꁧꂿ”,ꆿꄿꑠꃅꉉ, “ꁦꋠꉬꑲꆏꑮꆜꂾꄉꄡꇤ”ꃴꐂꑌꋌꄷ。
 ꇐꑘꋍꑊꇤꇧꎭꇈ,ꋍꑊꎼꇉꅶꇴꋧꀕꅉꉜꄉꁧꀐ。
 ꃴꐂꌋꆀꆿꄿꑋꇁꌊꁬꏫꑠꈚꇬꑟ,ꋍꑊꈀꄸꑌꁰꇬꀋꐭꃅꌦꇁꐮꀒꀵꑟ,ꀋꇊꆏꈌꑍꂷꐯꍀꌠꌡ。
 ꃴꐂꈮꑆ,ꁏꇮꋒꇮ,ꍀꀋꏯꊋꑌꌠꆿꄿꋌꎼꇫꊋꄿꃅꀋꐛ,ꄷꀋꁧꃴꐂꄉꊼꇅꄩꀖꉻꃅꐙ。ꋍꇅꌺꐛꇬꆏ,ꋍꑊꑍꂷꐯꇯꇵꊫꋏꌊꁀꎿꑍꏢꀋꏯ“ꉻ”ꄷꐚꇬꅜ。
 ꆿꄿꆏꊫꃴꌦꐊꁙꀞꇈ:“ꈍꃅꐙ”ꄷ。
 ꃴꐂꑌꀂꄁꇇꈌꌊꅳꁖꋌꌩꋍꁁꏯꄀꇈ:“ꈌꊰꀐꀞ”ꄷ。
 ꆿꄿ:“ꉢꂴꆎꅲꌠꉨ,ꆏꂴꉉ”ꄷ,ꃴꐂꑌ:“ꑠꀋꍣ,ꆏꂴꉉ。”ꊿꑍꂷꌠꇵꊫꋏꌊꉉꆹꉇꆹꃅꇬꉆꌦ,ꑓꋪꑍꋒꌠꄡꇗꇌꐮꁻꑍꏢꀋꏯꄝꐮꀋꏆ。
 ꃴꐂꅳꁖꆿꐂꅥꅲꐡꀐ,ꆿꄿꑓꋪꃴꐂꅥꊉꀐ。ꄚꀱꉈꑴꇤꇬ,ꆈꌠꌺꊽꐰꊰꀋꅲꋋꂷꈌꊰꀋꇁꌠꃴꐂꅉꐚ。ꃶꐚꃅꁦꋠꉬ,ꃴꐂꑌꆿꄿꌳꈄꈌꀋꊰꌠꂿꇬꆏ,ꀱꆿꄿꉜꒉꇁ。
 ꋌꊂꀊꉗꀋꐛꇬꆏꇐꑘꆿꄿꄷꐛꀐ。
 ꆧꁨꂶꌠꄄꆈꂷꋌꇤꇧꎭꇈ,ꁨꇉꃅꇁꇉꅶꋌꈚꇬꁨꎍ。ꈊꆳꆲꌙꀕꃅꁏ,ꆿꄿꊾꇰꂷꀋꏯꏮꁦꄖꇈꉬꐞꈧꌠꉜꐺ。ꃪꅪꋌꈚꇓꂵꃅꇓꂵꀉꄂꄉ,ꍮꊪꈝꂾꅷꄚꑟꇬꆏ,ꄻꈳꅐꀋꄐꀐ。ꆿꄿꆏꋍꋧꁧꃅꑠꃅꉉ:“ꉠꇇꀨꄎꌠꆹꃴꐂꀉꄂꐥꏭꐛ。”
 ꃴꐂꋍꌍꑓꇬꉈꉆꄉꉼꉹꂢꇰ。ꂢꃚꇬꈴꄉꅲꎼꇁꇬ,ꊼꇅꉌꂵꎭꏭꃅꐛ。
 ꃴꐂꏮꊁꉜꇬꆏ,ꆿꄿꌋꆀꇐꑘꑋꋍꂾꉆꎍꅊꇈ。ꋌꊼꇅꉪꀋꐛꏭꃅꑓꂡꀋꋏꃅꏮꋍꑊꉜꉆ。ꃴꐂꇐꑘꀑꎔꑊꎔꇈꀬꅑꑓꋪꋑꌠꂿꇬꆏ,ꋋꑌꇐꑘꉂꌠꋌꌧꇁꀐ,ꄷꀋꁧꋌꀱꆿꄿꇯꌂꇁꏭꃅꐙ。
 ꆿꄿꆏꁱꀋꐭꃅꃴꐂꋌꈻꌊꉈꏭꄉꇇꏸꌌꄐꄉꋌꄷ:“ꆏꂿꀐꀞ,ꃪꋋꂷꈜꋋꏢꄺꄮꇬ,ꃅꇢꄚꎖꉚꆹꇈ,ꄚꄉꃪꐛꌦ。ꃪꋋꂷꋍꊁꏯꍯꊪꄻꌐꀐ,ꊝꀕꃅꋌꈚꀉꄂꄻꎼꇁꀋꄐ。ꀋꄹꉇ,ꉪꌩꇽꁥꌠꇬꏲꌋꉠꏯꋌꈚꎼꈴꆹꄎꄏꄷ,ꉢꀋꃋꍉꒀꌌꇓꂵꂨꉔꂷꈉ”ꄷ。ꅇꂷꋋꇬꉉꌐꇬꆏꋌꏮꃴꐂꉜ。
 ꌩꇽꋌꁥꇬꍉꒀꌌꇓꂵꂨꉔꌠꃴꐂꆹ,ꆿꄿꅇꂷꋋꇬꑡꄜꌠꋌꉪꐛ,ꋌꁱꂷꊰꈎꌷꌠꀈꈥꃅꀋꌷ。ꃪꋋꁕꊬꆹꀄꊭꑴꇬ,ꇓꂵꃅꇓꂵꀉꄂꈚ,ꄩꑅꇷꇬꀉꄂꊗꑗꉬꑲꆏ,ꋍꇂꃴꆏꇓꂵꀉꄂꌠ。ꑠꅹ,ꋌꃀꊿꈍꑋꁥꇫꄻꆹꋺꀐꑴꇬ,ꉬꇮꊋꀋꐛꃅꈌꊰꌐ。ꋌꏮꆿꄿꉜꇬ,ꆿꄿꋍꏭꉘꇉꅍꐥꃅꍻꋌꀳꇈ,ꋋꑌꇬꇉꀊꊸꇁꀐ。ꆈꌠꆹꌳꈄꈌꊰꀋꇁ。ꋌꉌꐡꏭꃅꆿꄿꇇꋌꌭꄉ:“ꁦꋠꉬ”ꄷ,ꆿꄿꑌꇬꏭ“ꁦꋠꉬ”ꄷꀱ。
 ꇐꑘꋋꈨꂿꇬꆏꒉꄉ:“ꀃꑊꀋꃉꆏꈍꃅꑌꐮꀋꇤꀐꌠ”ꄷꉉ。
 ꃴꐂꆹꀱꇁꀐ,ꆿꄿꆹꌦꀐ。
 ꃴꐂꇁꌊꇐꑘꄷꑟ:“ꆏꉠꄹꐛ。”
 ꇐꑘꆏ:“ꆏꉠꏯꑠꃅꉉꌠꆹꉢꉪꐛ。”
 ꆲꁏꇁꀐ,ꌩꏪꆲꁏꌊꒊꊝꂇꃅꂇ。ꌩꏾꀊꏂꈧꌠꆲꁏꌊꊰꌩꐦꄩꑌꎍ,ꊰꃴꐂꇭꀧꇬꑌꅞ。ꋋꇅꇬꆹ,ꋌꉪꅷꒆꂯꄉꌠꆿꄿꃤꌺꍇꌠꀂꏽꄀ。ꋍꉌꂵꉪꇬ:“ꀋꎪꌠ,ꇐꑘꆹꈍꃅꑌꌹꍈꒆꌠ,ꄷꀋꁧꆿꄿꌡꂷꒆꌠ。”
 ꀊꉗꀋꐛꇬꆏ,ꇐꑘꇯꍝꃅꌹꍈꒆꀐ。ꃴꐂꅇꈨꇬꆏ,ꋋꇅꃅꋌꀥꇬꉚꆹ。ꋌꎼꇫꑟꆹꇬꆏꇐꑘꇬꏭꋌꄷ:“ꆏꉜꉏ,ꈀꄸꌡ。”
 “ꆿꄿꌡ。”ꃴꐂꆏꀉꑳꋋꍈꌠꋌꄌꌊꋍꃢꁬꏶ,ꋌꉪꇬꈍꃅꑌꀉꑳꋋꍈꀨꎹꑲꆀꍑꀐꉂ,ꑠꀋꃅꇬꆹꆿꄿꂾꈴꀋꄿꀐ,ꋋꆹꆿꄿꐴꉬ。OPN彝族人网


               ꉂ   ꐪOPN彝族人网

ꒉꆹꏤꁡꇤꇬꑮꆜꅪꎔꃴꇤꂓꑠꂷꐥ。ꋌꈍꃅꎔꌠꆹꉠꏯꉉꎼꇁꄷꇬ,ꉢꋌꉇꐝꉅꆎꇰꀋꄐ。ꄚ,ꋌꇿꒉꇿꇁꅈꇬꆏ,ꌋꅪꉬꄿꂿ,ꃀꌠꉬꄿꂿ,ꌠꆗꉬꄿꂿ,ꀉꑳꊈꉬꄿꂿ,ꏮꋌꀋꉜꑠꂷꀋꐥ,ꏮꇬꉚꈭꐨꆏꑓꋪꉇꈻꀋꏾ。
 ꋍꊨꏦꑌꋌꎔꋌꅉꐚꏭꁮ,ꀊꅰꑓꏮꊿꉚꑟꀋꃅ。ꌞꌠꆗꌺꏦꈍꃅꎃꌠꇬꏭꌧꈿꅇꄜꂯꇬ,ꋌꌞꏯꊼꇅꀉꄂꒈꑟꃅ,ꌞꏯꁰꇬꐭ、ꅇꇬꄜꀋꋻ。ꄚ,ꃅꇗꃅꄏꀕ,ꀱꊿꃅꇬꉚꀋꒉꌠꃇꏦꏭꆏꉾꐯꉽꌦ。ꑍꃀꑍꌞꊿꃇꏦꏮꆏ“ꊾꇰꃇꏦ”ꃅꇴ。ꃇꏦꑴꅉꑌ“ꇰꐯꇰ”ꌞꊿꃼꇇꃅꄉꎆꈍꑋꃅꃬꇬ,ꋌꃼꇇꃅꏭꀋꄐ,ꈝꃀꇬꄉꎆꃀꋌꉅꅜꇬ,ꋌꀱꌊꎆꌌꁈꁵꇬꎷ。ꋍꑴꅉꋌꉜꒉꌠꆏ,ꇂꁱꏃꏢꌌꈻꇬꂯ,ꏮꉇꀋꉜꃅꌧꇐꌷꇬꎷꋋꏢꀉꄂꐥ。ꋌꑠꃅꌦꇁꄯꒉꀵꇬ,ꊾꂷꋌꉚꒉꄷꀋꁧ,ꋍꀉꄉꀉꂿꑋꑌꋍꏭ:“ꌞꌺꄸꄷꀋꅲ,ꀀꌺꉔꄷꉔꀋꅲ”ꃅꊨ。ꅪꎔꃴꇤꀉꄂꏭꑖꈈꌺꃅ:“ꃇꏦꀋ,ꀋꑍꊂꅽꌧꇐꍈꁦꎆꌦꀐꀞ,ꀃꑍꋍꄮꆏꌧꇐꀋꐥꇬ,ꐩꋊꀻꎆꌠꇬꊂꈹꀋꄐꌠ”ꄷꇬꎷ。ꋍꊨꏦꑌꃴꇤꅇꂷꋋꈨꀕꇬꆏ,ꊼꇅꉌꂵꇿ,ꃴꇤꋋꂷꀉꄂꃶꐚꃅꉠꉌꂵꉪꐨꋌꅉꐚ,ꉣꑊꆹꇯꍝꃅꉪꐨꋍꏢꑌꀐꉂ。ꄚ,ꃇꏦꆹꉜꀉꄂꇬꉚꒉꄸ,ꉁꆹꇫꉂꀋꀬ,ꌞꅪꎔꑠꈍꃅꀁꉂꂯꃅꉪ,ꈌꋊꄉ“ꉢꆏꉚꒉ”ꄷꑠꇬꇫꏯꀋꀬꌠ。
 ꃇꏦꌋꆀꃴꇤꏤꀀꅉꆹ,ꀈꈥꋂꋍꂷꉬꄷ,ꇢꊭꇬꒈꏢꇢꄉ,ꑶꇽꑍꈚꇬꐛ。ꑠꅹ,ꃴꇤꄰꀀꇼꌠꌤꍈꃅ、ꌤꍈꅐꇬ,ꊁꄹꉇꑲꆀꃇꏦꄰꀀꇼꌠꈨꇁꄎ。
 ꋍꑍꆏ,ꀁꇬꌠꃇꏦꏭꎆꆫꁧꄷꇈ,ꎆꁥꌠꋌꈎꅸꇉꈪꏜꋦꃴꆧꁏꑠꈚꏪꄉ,ꋌꎼꄯꒉ《ꈍꃅꃮꉘ》ꄷꋌꋐꌌꉜꌐꒉꇂꃴꑌ。ꈱꌠꀋꉬ,ꃇꏦꆹꄯꒉꉜꀐꄷꆏ,ꃅꇴꃅꏢꑌ,ꋌꇴꋍꃅꇴ,ꋍꍈꑋꋍꉌꂵꇬꃸꑟꀋꃅ。ꀃꑍꑌꋋꈨ,ꎆꉜꌠꋌꋋꀋꎺꃅꊾꇰꂷꀋꏯꄯꒉꇬꌧꇐꈧꌠꀉꄂꉪꇬꑌ。
 ꋍꇅꌺꐛꇬꆏ,ꊾꂷꋋꇴꌟꃅꐛꇈ,ꋍꉂꆏꎆꌞꋚꁧꒉꁧꐔꏼꀐꎼꈀꄉ,ꋋꇅꃅꋌꄓꇬꉆꄉꋙꏪꇬꆫꐺ,ꄚ,ꋌꈍꃅꉜꇬꑌ,ꎅꂷꋚꁧꇬꐥꊊꀋꂿ。ꊁꆏꋌꎼꎆꃷꉚꇈ,ꎆꈧꌠꑌꋍꂷꋑꀋꋒꇫꐥꌐꇬꆏ,ꋍꉂꆏꋌꅲꑽꀐꎼꈀꄉ,ꋌꅞꇫꑌꌦ。
 ꑋꀋꑌꃅꇬꆏ,“ꃇꏦ、ꃇꏦ”ꃅꌗꃀꌗꌺꐮꑘꀋꒃꃅꑠꂷꇫꈌꐚꇁ。ꋌꄓꇬꉆꄉꉜꇬꆏ,ꃴꇤꂶꌠꑓꁴꀋꇊꊰꃅꌗꁮꌗꏂꃅꇬꉆꅊꇈ。“ꃴꇤꀋ,ꆏꉢꎷꌌꑞꃅꂿꄷ,ꌤꐥꅀ?”ꄷꋌꎼꇬꏭꁮ。
 ꃴꇤꂶꌠꆏꈌꉛꃅꁱꐭꅐꇁꀋꄐꃅ,ꑓꁴꀉꄂꊰꇬꉆ,ꈍꉗꏢꐛꑲꆀ:“ꃇꏦꀋ,ꉢꅽꄹꏡꁈꏢꎹꇁ”ꄷꉉ。
 “ꑞꌤꏢꅐ?”
 ꀋꅞꉖ,ꃅꐛꇁꄿꀀꌠꁦꋠꑍꂷꇁꉪꏤꊐ。ꋍꂷꆏꉬꊰꎖꈎꌠꐥ,ꋍꂷꆏꌕꊰꎖꈎꌠꐤꂷ。ꉡꆹꊿꋋꑍꂷꃅꈊꄉꉪꏤꅍꈿꇁꌠꉬꎼꈀ,ꊁꉢꎼꉠꀉꄉꌋꆀꋀꊇꌧꈿꅉꅲꇬꆏ,ꊿꋋꑍꂷꆹꉡꒃꇁꌠꉬꅊꇈ。ꁦꋠꉡꒃꇁꂶꌠꎆꃀꀉꑌꃅꅐꄎꄉ,ꉠꀉꄉꂶꌠꁦꋠꂶꌠꈎꄜꈍꒈꌠꀋꅲ,ꉢꇫꉌꃹꉌꀋꃹꑌꀋꅲꃅ,ꃶꌱꃅꄉꀐ。ꄷꀋꁧꀋꃋꋌꊂꊯꉬꑍꄮꇬꆏꑮꂿꄷꉉ。ꉡꆹꈍꄮꇯꆐꉪꃅꄷꊿꉠꉌꃹꑠꂷꐥꄉ,ꌞꊿꀉꁁꄷꐛꂿꀋꉂꀐꌠ。ꄚ,ꀋꃋꆏꉠꊋꉢꀋꑌꃅꄚꅞꀐ,ꆏꉜꇬꈍꃅꄉꇫꊝꑲꆀꍑꏭꐛ?
 “ꁦꋠꆎꒃꂿꄷꂶꌠ,ꊿꑫꑞꉬ?”
 “ꐙꈌꃮꐔꂒꂷꉬꄷꀋꂸ。”
 “ꐙꈌꃮꐔꉬꄷꄿ。”
 “ꊿꋋꂷꆏꌧꑴꅀ?”
 ꌧꐯꌧꌠ,ꀋꉊꄻꈎꉢꀒꎂꈩꆹꇈ,ꈝꃀꇬꄉꎆꊐꐣꁙꂷꉢꊌ,ꀖꄉꉜꇬꆏꎆꃀꋍꄙꂷꇬꀀ。ꌞꎆꌌꁈꂶꌠꎆꃀꆘꅝꇬ,ꉌꂵꐒꀐꉂꄉ,ꉢꎼꐣꁙꋋꂷꐏꄚꑌꄉꎆꌌꁈꇁꉚ,ꄮꈉꑍꂷꐛꈭꐨꆏ,ꁦꋠꂷꇵꂷꅧꇗꄹꀥꇫꅐꇁꇈ,ꐣꁙꂷꆏꊌꂾꂿꄷꉠꏯꅲ,ꉢꄷꌠꊌꆹꋌꂷꊌꀐ,ꄚꅽꐣꁙꇬꑞꀀꌠꆏꉉꇫꊒꑲꆏ,ꉢꇤꆏꁳꂿꄷ。ꋌꉉꌠꌋꆀꐣꁙꇬꀀꌠꐮꊒꇈ,ꐣꁙꌋꆀꎆꃀꈧꌠꉬꇮꉢꄻꇬꁳ。ꋌꉠꏯꈀꎭꀕꀐꄷꄉ,ꎆꃀꊰꂷꅑꁬꋌꈻꉢꁳꇈ,ꉢꎼꇫꈁꀋꅲ。
 ꉢꇬꏭ:“ꅽꐣꁙꎆꃀꋍꑋꑍꀀ,ꑞꃅꀨꎹꆽꃴꋒꃅꀋꄉꌠꉬ”ꄷꇬꆏ,ꋋꆏꉠꏯ:“ꀃꑍꀊꄶꅶꌞꁡꇤꂷꇬꈴꇁꇬꆏ,ꑮꆜꅪꎔꑠꂷꇬꉆꇈ,ꉢꎼꈍꃅꇬꄡꀋꄿ,ꉠꏯꁰꇬꑋꐭꀋꅲ,ꅇꂷꅲꀋꌒꌠꉢꎼꇬꏭꉉꇬꆏ,ꇨꇅꃃꄉꊾꈨꋌꇴꎼꇁꇈ,ꉢꎼꑞꑌꀋꅲꃅꀒꃨꑟ,ꐣꁙꆹꉢꉇꀋꉜꃅꀥꄮꇬꊰꁧꌠꉬꏭꁮ”ꄷꉉ。ꋍꈭꐨꆏ,ꉣꑊꊾꂓꊿꑰꄜꐮꇰꄉꐯꌥꌠ。
 “ꋋꈨꉜꇈꇬ,ꊿꋋꏢꉽꏢꀋꉬ!”
 “ꉢꉜꇬꑌꉽꂷꀋꉬ。”
 ꃇꏦꆏꃴꇤꏭ:“ꀋꎺ,ꐙꈌꃮꐔꎆꃀꈍꑋꅐꅽꀉꄉꁵꄷ。”
 “ꎆꇭꋍꄘꉬꉐꂷꃅꄉ。”
 “ꐯꀐꌠ,ꐙꈌꃮꐔꆏꎆꅐꄎ,ꅽꀉꄉꆏꎆꇢ。ꉢꉜꇬꆹ,ꃴꇤꀋ,ꆏꇫꉂꀊꋨꂷꎆꐥꂷꀋꉬꑲꆏ,ꆏꈍꃅꑌꇫꁏꀋꄐꌠ。ꆏꇫꉂꂶꌠꆏꑞꂷꉬꄜ?”
 ꋍꄮꆏꃴꇤꂶꌠꈁꑓꅪꄉ:“ꊾꇰꅽꑠꂷ,ꃀꅉꊿꅽꏯ’ꊾꇰꃇꏦ’ꄷꌠꅑꀋꀵ,ꉢꇫꉂꂶꌠꆏꀋꉬꈀꄸꉬꄜ!”
 ꃇꏦꆏꃴꇤꅇꂷꋋꇬꈨꇬꆏ,ꑞꉬꀋꐚꋌꇷꏭꃅ:“ꉏ,ꆏꃄꈌꄐ”ꄷꇈ,ꋍꎆꁥꌠꉜꄉꀒꀥꑟ。ꃇꏦꀥꇫꈴꁧꇬꆏ,ꃴꇤꑌꋌꇰꏭꃅꋍꃢꄗꇬꉆ。ꊁꆏꑞꃆꂮꉬꌠꋌꉪꐛꇁꄉ,ꋌꀥꃇꏦꊂꀒꈹꑟ。
 ꊿꋌꑵꉌꂵꇬꊾꂷꉂꇈ,ꊿꀊꋨꂷꋋꀋꉂꌠꏦꄉ,ꉉꀋꀬꃅꉂꐪꂁꉌꂵꇬꊐꄉꇬꎷꑵ。ꀊꋨꂷꑌꋋꇅꄷꀂꆎꉂꄷꉉꇬꆏ,ꊿꋌꎼꇿꌌꃶꇌꂿꇌꃅꐙꑵ,ꃇꏦꑌꀋꃋꉂꏣꉜꀕꑓꏣꈘꌠꉘꀋꇉꃅꇁꋍꄷꑟꇬꆏ,ꋌꎼꃶꇌꂿꇌꈍꃅꐙꀋꐚꄉꋌꀥꇫꈴꁧꌠ。
 ꃇꏦꀥꅸꋍꎆꁥꌠꑭꄉ“ꄏ”ꃅꋍꀂꏾꁶꇫꑌꄮꇬꆏ,ꃴꇤꑌꇁꇫꑟꀐ。
 “ꃇꏦ,ꆏꑞꂷꀥꄷꌠꉬ?ꃀꅉꊾꇰꏭꀋꇰ。”ꃴꇤꑠꃅꉉꌠꃇꏦꈨꇬꆏ,ꀋꇊꆏꋋꇅꑲꆀꀀꂼꂻꐛꇁꌠꀋꏯ,ꑓꂷꑍꂷꌠꋌꏮꃴꇤꉜꄉ:“ꃴꇤꀋ,ꉢꀀꂼꂻꌠꀋꉬꀞ?”
 ꈍꃅꀀꂼꂻ,ꂵꆪꑍꁥꁨ。ꑠꑋꈓꐮꐊꅷꇁꀐꇬ,ꉠꉌꂵꅽꏯꈍꃅꐙꌠ,ꋍꍈꑋꆏꋋꀋꌋꅀ?ꃀꅉꆐꊿꅽꏯꊾꇰꄷꌠꅑꀋꀵꅊꇈ,ꉢꑞꑍꃶꐚꃅꌞꌠꆗꂷꏭꅇꂷꑍꇬꉉꋺ?ꅽꏯꆹ,ꉢꋍꃢꋑꀋꋒꌤꌧꉱꉴꃅꌧꁇ,ꆎꀠꏲꇬ,ꆏꇯꍝꃅꋍꍈꑌꋌꉚꅐꀋꇁꅀ?ꆏꅽꄯꒉꀉꄂꉜꑲꌧ,ꀉꁁꆏꑞꑌꋋꀋꌧꌠꉬꅊꇈ,ꉠꉌꂵꀈꈥꅽꊂꄉꌠꉬꀐ。ꃴꇤꉉꅉꉉꅉꋌꀕꌄꀋꄐꃅꑓꁴꑓꇬꇉꇁ。
 ꃴꇤꀋ,ꉢꆎꉂꌠꀋꉬ。ꆏꉡꉂꌠꉢꋋꀋꌧꍇꌟꆏꉢꅑꃅꄉ,ꃶꐚꃅꇬꆹ,ꌞꊿꇐꀳꉉꅇꃅꉢꆎꉂꌠꆹ“ꑍꉂꑬꃶꈛꂿꍬꃅꉂ,ꉖꉂꑓꁴꀑꈑꇉꄉꉂ”ꌠꉬ。ꄚ,ꉢꈌꋊꄉꅽꏯꉉꀋꀬ,ꉢꉂꅇꆹꂁꉌꂵꇬꊐꄉꂿꉂ。ꆏꀃꑍꉠꏯ“ꉢꇫꉂꂶꌠꆹꆏꉬ”ꄷꉉꇬꆏ,ꉢꋌꎼꀋꇊꆏꃶꀐꌠꀋꏯꐛꄉꀥꁧꌠ。ꃴꇤꀋ,ꆏꃶꐚꃅꉉꉡꇰ,ꑞꍈꇬꈴꄉꆏꉡꉂꌠꉬꀋ?
 “ꅽꃅꇏ、ꅽꌧꇐ、ꅽꎻꄟꈳꄟ,ꅽꃅꇁꑽꄟꐯꇯꉢꋋꉂ!”
 ꃇꏦꆏꃴꇤꅇꂷꋋꈨꀕꇬꆏ,ꀋꎺꃅꇇꎇꌊꃴꇤꄌꆹꀋꇊ。ꄚ,ꋌꑍꃀꑍꃴꇤꏭꉂꅼꇨꄉ,ꃴꇤꀂꄁꂱꋌꍈꑋꋌꀕꐙꇬꄀꀋꀬ。
 ꃴꇤꂶꌠꃇꏦꁨꀋꇊꉇꀋꇊꃅꐙꌠꋌꌋꇬꆏ,ꋍꒊꒈꏭꃅꑌꐛ,ꇫꎭꃅꉈꏭꃅꑌꐛ。ꉌꂵꈐꆏ,ꃇꏦꊼꇅꉌꂵꀉꒉꃅꋍꑌꑲꇁꑟꉂ。
 “ꃴꇤꀋ,ꄚꎆꃀꋍꄘꉬꉐꂷꉢꇿꇬꎹꁧꂯ?ꉪꏤꌟꎭꌟꁧꌠꆹꆏꅉꐚꀐ,ꈍꃅꂯꀋꇂ?”ꃇꏦꉪꅷꎆꃀꈧꌠꄀꇬꆏ,ꋌꋋꉪꌊꀽꅉꎷꀋꊌ。ꋍꀂꏾꂶꌠꀉꄂꃝꇫꑌ。
 ꀋꏦ,ꃇꏦꀋ,ꉠꀉꄉꏤꀈꈥꐙꈌꄰꎆꃀꋍꄘꉬꉐꂷꌠꊪꑴꇬ,ꊿꊇꋍꂷꑌꌌꀋꌬꌦ。ꉢꀋꅞꉖꇯꆐ,ꉢꇫꉌꀋꃹꄷꊿꊇꏯꉉꀐ。ꐙꈌꄰꆹꋍꎆꃀꈧꌠꈪꇬꁳꇈ,ꋍꂷꎼꇬꌵꑲꆏꍑꄸ,ꐙꈌꏤꏯꃝꇔꇬ,ꉠꀉꄉꇫꉬꀋꅲꑲꑌ,ꉢꊿꊇꏯ,ꀋꏦ,ꉢꊁꉠꉌꃹꂶꌠꄷꐛꁧꇬ,ꄡꇗꎆꃀꋍꄘꉬꉐꂷꎹꆍꁳꑲꆏꍑꄷꇬꆹ,ꈍꃅꑌꉬꅲꌠ。ꆏꐒꄻꀋꅐ,ꉢꀃꂰꇯꆐꇬꏭꉉꁧꂿ,ꉉꐛꉉꀋꐛꄿꂿ,ꃆꏂꑍꀋꃋꋋꄮꇬꆏꄚꄉꐮꂿꌦꂿ。
 ꃴꇤꉉꅷꄚꑟꇬꆏ,ꃇꏦꋌꑣꋍꇅꁵꇈ,ꒈꌦꃅꋌꀥꇫꈴꁧꀐ。
 ꃇꏦꃴꇤꁧꈭꐨꆏ,ꇇꌌꃴꇤꑣꋍꇇꁵꂶꌠꇬꌎꐺ。ꋍꄮꆏꋍꑅꎸꇬꌎꌟꃅꐛ。ꋌꏮꃴꇤꇭꀧꇬꉜꄉꑓꋪꉇꀋꈻꃅꄗꇬꉆꇊ。ꉌꂵꇬꆏ,ꈍꃅꑲꆀꃆꏂꑍꋍꄮꇬꑟꇁꂯꃅꉪ。
 ꊁꄹꉇꎆꋊꄮꇬꆏ,ꃇꏦꋍꃀꌠꏭꀂꀃꑍꑌꎆꆫꁧꂿꄷꄉ,ꎆꈧꌠꋌꋊꅸꇬꐱꁧ。ꋍꃀꌠꆏꀉꑳꋋꂷꀃꑍꆏꈍꃅꉉꄻꀋꅐꃅꎆꆫꁧꀋꐚꀐꉂꉪ。
 ꃇꏦꆏꎆꁥꌠꋌꅸꀋꄹꉇꏪꅉꈚꌠꇬꏪꄉꃴꇤꇁꉚ。ꃇꏦꑋꑌꀕꀋꉬ,ꉆꑌꉆꀋꉬꃅꈍꃅꐙꀋꐚ,ꋍꉆꅉꑋꅉꇬꁬꈧꌠꋍꄔꃀꐛꌐ。ꀃꑍꆏꃅꑍꑞꋍꎳꎵꀋꐚꉂ,ꃅꑍꀕꃀꑍꎵꀋꋌꌟꃅꐙ。ꊾꂷꆈꄂꄷꑲꆏꃴꇤꉬꎼꈀ。ꈍꉗꏢꇁꉚꑲꆀ,ꃴꇤꂶꌠꑓꂷꅼꉈꑴꀀꌊꑓꇵꉖꅍꑠꂷꐛꄉ,ꇂꉈꇀꉈꃅꇁꌊꇫꑟ。
 ꃇꏦꀥꋍꂾꑟꇬꆏ,ꃴꇤꐚꇁꃇꏦꂣꈐꀒꊐꑟ,ꃇꏦꋌꇷꋍꇅꁵ。ꋌꏮꃴꇤꉜꇬꆏ,ꑞꉬꌠꋌꉪꐛ。ꃴꇤꉨꉩꌋꆀꑓꇵꉖꅍ,ꋍꉔꀉꄂꃅꐈꌌꊿꑍꂷꌡꀐ。ꋋꍈꇬꈴꄉꉜꇬ,ꃴꇤꀉꄉꃴꇤꅇꃅꀋꅲꌠꃇꏦꉪꐛ。
 ꃴꇤꐚꇁꃇꏦꂣꈐꀀꈭꐨꆏ,ꑓꁴꑵꌠꑠꒉꐑꒉꃅꒉ。ꃇꏦꑊꌩꁁꂷꋌꀖꌌꃴꇤꑓꁴꌩ,ꈍꃅꌩꅷꀋꉬ,ꌩꌐꇁꀋꉆꇬꎷ。ꃇꏦꀋꄿꃅꇬꏭ:“ꃴꇤꀋ,ꄡꉩꀐ,ꑞꐥꌠꉉꎼꇁ,ꉉꎼꇁꑲꆏ,ꉌꂵꊼꇅꌒ,ꈍꃅꋭꌠꉣꑊꐮꇖꉏꂿ”ꄷꉉ。
 “ꃇꏦꀋ,ꀋꐯꀐ。ꉠꀉꄉꉠꅇꃅꀋꅲ,ꈍꃅꑌꋍꑵꐛꇁꏭꀋꐛ,ꉠꈜꌦꈜꏢꀉꄂꁮꏭꐛꀐ。”
 “ꃴꇤ,ꑠꃅꄡꉉ!ꆏꑠꃅꉌꊰꑓꊰꑵꅀ,ꆏꌦꑲꆏꉡꑌꈍꃅꇫꐥꂯ?ꅽꉣꑊꌦꈜꋍꏢ,ꐥꈜꑌꋍꏢꀋꆆ。”
 ꀋꄹꉇꃴꇤꀱꀁꇬꄉꋍꉪꐨꋌꉉꋍꀉꄉꌋꆀꂛꊨꑋꇰꈭꐨꆏ,ꋍꀉꄉꋍꅇꃅꀋꅲ。ꋍꑊꄹꇬ“ꅩꉘꀉꂿꌅ,ꅩꃝꀉꄉꌅ,ꎆꋠꃇꌺꌅ”ꌋꅪꂷꊨꏦꉌꂵꈁꏾꃅꇿꐛꁧꏾꑲꆏꇿꐛꁧꅀ?ꉈꑴꌞꇐꀳꇬ“ꆀꐪꈍꈩꉆ,ꃝꐨꈍꈩꀋꉆ”ꄷ,ꆏꇯꍝꃅꉌꀋꃹꑲꆏ,ꉪꄑꌟꁏꌠꉨ,ꌞꐙꈌꄰꎆꈧꌠꋍꀱꑋꃅꇬꁳꑲꆀꍑ。ꃴꇤꀉꄉꌋꆀꃴꇤꂛꊨꑋꉪꇬ,ꐚꅪꃇꏦꄰꆹꄃꌤꇵꉱꈐꊐꇬꇤꇁꏦꄷꀋꄹꌠ,ꃴꇤꀋꑮꌦꈐꃅꎆꃀꌕꄙꂷꇿꇬꎹꁧꂯ。ꑠꅹ,ꋍꑊꃴꇤꏭ:“ꐚꅪꃇꏦꄰꆹꌟꎭꌟꁧ,ꉈꑴꊾꇰꑠꂷ,ꆏꇬꐙꂯꄷꌠꆹꉪꑟꀋꌸ,ꆏꀋꃉꆏꈍꃅꑌꐙꈌꄰꊿꉬꀐ”ꄷꉉꌠ。
 ꃇꏦꉪꅷꃴꇤꋍꑊꉂꐪꉂꂮꇬꄀꇬꆏ,ꈍꃅꑌꉂꏣꇽꀋꉆꀐꌠ,ꉂꏣꇽꂯꑌꊾꀑꊾꑭꈨꇫꅐꇁꏭꐛꉂ。
 “ꃴꇤꀋ,ꉢꃆꏂꑍꆏꏣꃀꏣꑟꅍꎆꉛꁧꂿ,ꉢꀋꇁꌦꈐꆏ,ꆏꉈꑴꄙꄉꇬꎷ,ꀋꄿꑲꆏ,ꁈꏣꃀꏣꑟꅍꊼꇅꐥꄉ,ꉢꀋꎪꃅꎆꃀꌕꄙꂷꉛꌊꇁꂿ。”
 ꋍꑊꐮꇇꌭꄉ,“ꐤꑌꐯꇯꐥ,ꌥꑌꐯꇯꌦ”ꄷꅇꏤꒃꄉꈭꐨꆏꀱꑍꄷꁧꀐ。
 ꃴꇤꃇꏦꄷꄉꀱꇁꈭꐨꆏ,ꉌꂵꊼꇅꇗꄃꃅꐙ。ꋌꉪꇬꃇꏦꆹꈍꃅꑌꎆꃀꋌꉛꌊꇁꄎꑴꉂ。ꉛꌊꇁꄉꑲꆏ,ꃇꏦꋍꑊꈍꃅꑌꎹꉈꑴꊒꄎꑴꉂ。ꋌꉪꅷꄚꑟꇬꆏ,ꉌꂵꁦꉘꃅꐙ。
 ꋌꀱꀁꇬꇁꈭꐨꆏꋌꎼꋍꀉꄉꏭ:“ꀉꄉꀋ,ꆏꇁꉚꄉꄹꌶ,ꉢꑮꂾꃅꎆꃀꌕꄙꂷꎹꆏꁳꀋꄐꑲꆏꊿꑋꀋꉬ”ꄷꉉ。
 ꃴꇤꀉꄉꃴꇤꅇꂷꋋꇬꈨꇬꆏ,ꋌꇷꋍꇅꁵ。ꋌꉪꇬ,ꀉꑳꋋꂷꀈꈥꃅꅇꂷꑠꂷꒈꌠꉉꀋꇁ,ꋌꈍꃅꑌꉘꇉꅌꍈꐥꀐꉂ。ꃶꐚꃅꎆꃀꋌꄌꌊꄚꅞꄹꉇꆏ,ꐙꈌꄰꏯꈴꀋꄿꀐꉂꄉ,ꌺꒉꃇꇤꂶꌠꋍꑊꐮꇖꇈ,ꊩꌺꂷꋍꑊꇤꅷꐙꈌꄰꅍꊐ。ꊩꌺꂶꌠꐙꈌꄰꏯ:“ꉪꀋꃋꉪꅇꃅꀋꅲꀐ,ꏃꑍꈐꃅꑮꇁ”ꄷꄜ。ꐙꈌꄰꆹꋌꎷꋌꀋꊌꀐꌠ。
 ꑮꂯꀒꄹꉖꑲꆀ,ꃴꇤꀉꄉꀱꃴꇤꏭ:“ꆏꃆꏂꑍꆏꑮꀐ”ꄷꉉ,ꃴꇤꋌꇷꈌꉛꀕ。ꂴꉪꄉꇬꆹ,ꈍꃅꑌꏃꑍꋒꑴꌦꉂ,ꃅꇗꃅꄏꀕꃆꏂꑍꆏꑮꇁꎻꀋꈁ,ꃇꏦꋍꑊꉌꂵꉪꅉꐛꀋꉆꀐ。ꃴꇤꃅꅍꎷꀋꊌꃅꋌꆈꌊꁈꋍꀿꃶꃺꃀꑷꅍꁧ。
 ꃴꇤꀉꄉꊩꌺꋌꇤꅷꐙꈌꄰꊐ:“ꆍꑌꁨꊿꎷꇁ,ꆍꎹꊊꑲꆏ,ꀋꑮꃅꆍꌌꑮꃀꃄꑌꄿ,ꉪꎹꊊꑲꆏ,ꀋꎪꃅꌌꆍꄷꑮꇁꂿ”ꄷ。ꐙꈌꄰꆏꅇꂷꋋꇬꈨꈭꐨ,ꊿꋀꊪꌊꀒꎹꑟ,ꃅꐎꌕꑍꌕꉖꎹꈭꐨꑲꆀ,ꃴꇤꁈꆽꃴꁡꇤꋍꀿꃶꃺꃀꑶꌠꅍꐥꌠꅉꐚꅜ。ꄚꄉꌠꆗꉬꑻꈨꋀꊂꎭꌊꇫꈻꒉ,ꄧꀕꃅꃴꇤꆏꋍꀿꃶꃺꃀꑶꌠꑳꊂꁬꏪꇬꈩꅊꇈꄉ,ꃴꇤꋀꈻꌊꄚꈴꁧ。
 ꃴꇤꋀꈻꌊꐙꈌꄰꑟꈭꐨꆏ,ꋀꈢꑲꌺꍈꇬꊐꄉ。ꈊꃀꌊꁁꄮꇬꆏ,ꐙꈌꃮꐔꂶꌠꇁꌊꑲꌺꍇꌠꇬꃹꇁ。ꐙꈌꃮꐔꇁꌊꑲꌺꍇꌠꇬꃹꇁꈭꐨ,ꐰꉎꑌꊼꇅꀋꉜꃅꋌꆹꃴꇤꀵ……ꃴꇤꊾꇴꂯꇬꑌ,ꈂꀸꊿꋍꄉꀐ,ꀋꇴꂯꇬꑌꋍꈯꋋꀋꌅꀐ。
 ꐙꈌꃮꐔꀂꊋꐛꀐꉂꄉꃴꇤꏢꁮꄉꄓꁧꈭꐨꆏ,ꃴꇤꋍꃢꉩꇈ,“ꉂꇁꅉꌠꃇꏦꀋ,ꉢꆎꂿꀋꉆꀐ。ꉢꁧꀐ,ꉣꑊꉂꏣꄚꄉꈘꀐ,ꆎꉘꇉꌠꆹ,ꉢꁧꇈꉈꆏ,ꄡꐒꄡꊀꃅꐥ,ꑮꎔꑮꃨꋍꂷꒃꅊꇈ,ꋌꉬꑲꆏꀉꑳꃴꇤꑌꉌꃀꌒ。ꀅꌳꀅꌳꇈꌦ,ꀉꑳꃴꇤꆹꁧꀐ”ꃅꄯꒉꁬꋌꁱꐣꁙꇬꊐꄉꇈ,ꃴꇤꁧꄚꁧꀋꄚꃅꏣꒃꆹꄀꀐ。
 ꊁꄹꉇ,ꃴꇤꌦꇬꅑꇊꇬꆏ,ꐙꈌꄰꋌꇷꏾꌌꀕ,ꐙꈌꄰꌋꆀꃴꇤꀉꄉꄰꃣꈌꋍꐘꄚꄉꄓꀐ。
 ꃴꇤꆹꌦꄚꈴꁧꀐ,ꃇꏦꆹꎆꎹꎆꈹꇿꇬꐺꀋꐚ?
 ꋍꄮꇬꆹ,ꃇꏦꋍꏣꃀꏣꑟꅍꎆꉛꐺꑴꌦ。ꋍꃆꂮꋌꉉꋍꏣꃀꏣꑟꈧꌠꇰꇬꆏ,ꇫꎭꃅꉈꄉ,ꄾꌦꋩꃅꎹꇫꉛ,ꄷꀋꁧꄹꁆꆏꄻꇫꇖꎼꇁ。ꃅꐎꊰꑋꀉꄂꃅꎆꃀꌕꄙꎕꂷꋌꉛꅜ。
 ꃴꇤꌦꇈꀋꐗꌦꇯꆏ,ꃇꏦꑌꎆꃀꌕꄙꂷꀵꄉꇿꅉꃅꀁꇬꉜꄉꇁꀐ。ꋌꇁꌊꋀꃅꄷꑟꆹꂯꇬꆏ,ꑞꉬꀋꐚꉌꂵꄙꑣꄳꄷꑠꇅꄹ,ꄚꋌꋋꀋꅲꃅꄡꇗꀒꁨꉜꄉꆹꇬꎷ。ꋌꇁꌊꋀꏤꑲꇽꅶꁉꁦꀮꍇꌠꑟꇁꇬꆏ,ꑶꇽꇬꊿꆈꃅꆈꏸꀕꃅꌐꀋꉆꃅꇫꐥ,ꋌꉪꇬꈍꃅꑌꌤꏢꅐꀐꉂ。ꑭꁘꐕꐳꃅꋌꇁꌊꑳꐮꑟꇬꆏ,ꃴꇤꌦꀐꄷꈨꀐ,ꃇꏦꋌꇷꋍꃢꄗꇬꉆ。
 ꋍꇅꌺꐛꊂꆏ,ꃅꃨꂷꏣꈘꆹꌠꀋꏯ,ꐰꉎꑋꊼꇅꀋꉜꃅꋌꀥꆹꀐ。ꊿꄚꃴꇤꌦꅉꐥꈧꌠꋌꃺꑍꄷꎭꇈ,ꋌꐚꆹꃴꇤꂿꂶꌠꂴꆽꅞ。ꃇꏦꋌꇷꊾꇰꁱꐭꀋꇮꂷꀋꏯꈍꉗꏢꑌꈭꐨꑲꆀ,ꃴꇤꇇꈺꄂꅍꑍꁆꌠꋌꌭꄉ,ꉠꃴꇤ,ꉠꃴꇤ,ꉠꃴꇤꄹꃅꉩ。
 ꋌꎼꄚꄉꉩꇬꆏ,ꃴꇤꂛꊨꂶꌠꑌꋌꎼꉌꐡꇁꏭꁮꄉ,ꃴꇤꁱꄉꌠꄯꒉꁬꌠꋌꀖꃇꏦꁵ。ꃇꏦꌌꉜꈭꐨꆏ“ꄯꒉꋌꁬꇿꄉꁱꌠꉬ”ꄷꋌꎼꃴꇤꂛꊨꆏꇬꏭ:“ꄯꒉꆹꐙꈌꃮꐔꏤꄉꁱꌠ”ꄷꇬꆏ,ꃴꇤꑞꃅꌦꌠꋌꉪꐛꀐ。
 ꎆꃀꌕꄙꂷꌠꋌꃬꄚꁊꇈ,ꊾꃶꂷꀋꏯ:“ꃴꇤꀋ,ꉡꇁꉚꄉ,ꉡꑌꇁꀐ,ꉣꑊꐮꐊꁧꂿ”ꄷꋌꀥꇬꐱꁧꀐ。ꊿꄚꐥꈧꌠꆏꋌꇰꈌꉛꅍꐯꐍꄚꉆꌐ。ꊁꆏ,ꃴꇤꂛꊨꂶꌠꑞꉬꌠꋌꉪꐛꄉ:“ꁦꋠꊈ、ꈹ、ꉆꐥꃅꈹ”ꄷꉉ。
 ꃇꏦꀥꃪꊭꑠꂷꇬꑟꈭꐨꆏ,ꋌꏮꄩꃅꑆꃴꇉꀕꁬꌠꀉꄂꋍꃢꉜꇈ,ꋌꐂꃪꇬꊐꀐ。ꊿꇬꈹꇁꈧꌠꈹꅸꄚꑟꇬꆏ,ꃇꏦꂶꌠꆈꁙꃅꀁꋌꊰꒉꌠꀉꄂꊌꂿ。
 ꊁꄹꉇꆏ,ꊿꐮꉂꋍꉎꀋꐥꋋꋒꊿꌌꐗꇧꎭꀐ。ꌺꄿꅩꄿꑠꋒꃅꇴꑍꁙꀉꄂꐛꄚꐱꁧꀐ。ꋋꑌꋧꃅꐤꄮ,ꉌꃀꉪꅉꐛꀋꉆꑌ,ꏃꃅꉬꉎꐤꄮꆏ,ꉌꃀꉪꅉꐛꉆꀐꌠ。ꊾꐗꄮꇬ,ꊿꄚꊾꐗꅉꐥꈧꌠ,ꋍꂷꋑꀋꋒꂱꑱꄿꐨꃅꑞꉪꐺꀋꐚ。ꄚ,ꌺꁨꑮꒃꂯꄉꌠ,ꅪꏷꌐꅍꎭꂯꄉꌠꆹꉪꐨꀊꅰꃅꀉꑌꄡꑟ。
 ꄀꇗꑮꃀꑮꌠꐙꈌꃮꐔꑌ,ꎸꉗꇇꈯꅑ,ꏦꑳꆈꌠꃹꀐ,ꋋꑌꋌꎹꋌꊌꌠ,ꉌꆐꀈꈥꅑꀐ。ꅩꊈꎆꀠꋠ,ꅩꌦꎧꀠꅝꌠꃴꇤꀉꄉꑌ,ꃴꇤꌦꊂꆏ,ꐒꊀꄉꊾꂷꀋꌡꀐ。OPN彝族人网

 OPN彝族人网

 OPN彝族人网

 OPN彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:ꌕꏾꐎꁬ
ꊁꁬꌠ:ꇈꃶꆿꐂꉙꇐꁱꇐꃘꊱ