ꌕꏾꐎꁬ
ꄜꃑꄮꈉ:2011-09-07 | ꁰꄻꊿ: ꂷꆿꈴ ꁱ ꇁꀦ:未知 ꉜꃷꁨ:

ꆈꌠꈍꎞꁧꐙꆏꑿꉘ,ꐦꐛꆏꍯꊪ,ꇉꐙꆏꈌꇔ,ꌐꇁꅔꁈꏰꋶꆏꑋꅐꄷꑠꈨꐥ。ꀃꑍꋋꄮꆿꁮꀒꎂꆏ:ꄩꆹꃅꑆꃴꇉꀕ,ꀏꆹꁬꇁꐎꃨꁯꆮꃰ。ꉪꑞꑠꈨꑌ,ꈩꁧꈩꁧꂯ,ꌐꇁꅔꁈꈩꁧꂯ,ꃅꈋꃄꏦꆫꁧꂯꄷꄉ,ꍮꊪꈾꏬꁯꄸꀋꇈꌡꑠꂷꑌꄉꅔꁈꈌꇔꁧꇬꄉꃅꈋꃄꏦꆫꁧꀐ。ELc彝族人网

ꉪꍮꊪꆏꏪꐦꏭꉜꄉꀥ,ꈜꈫꈜꇋꉙꏂꌩꁧ,ꀠꆿꌩꁧꌋꆀꊿꈛꁧꇬꉆꑠꆏ,ꉪꊇꑲꄹꀥꌠꀋꌡꃅ,ꊿꊇꑲꄹꀥꌠꌡꄉꀥꉪꊂꈴꁧꇬꎷ。ꉪꐋꀨꈧꌠꅇꈢꏸꌌꆈꌠꁀꁻ,ꉸꉷ,ꑵꉙꑠꃑꄉꇬꆏ,ꆈꌠꀕꆗꑮꆜꑠꈛꁧꇬꉆꄉꉪꏭꇇꃬꇈ,“ꈧꊰꀕꊼꇅꆏꇫꑌꄉ,ꃑꉪꇰꇁꄷ”ꇴ。ELc彝族人网

ꉪꍮꊪꆹꌊꅔꁈꑟꆹꂯꄉꄮꇬꆏ,ꆏꄚꐕꄉ,ꉪꐋꀨꋍꈨꆏꈌꇔꆹ,ꈌꇔꅉꑟꇬ,ꆏꈉꌕꂷꈴꑴꌦ,ꉪꊇꁈꀋꐥꃅꀕꈛꎼ。ꍮꊪꆏꁯꄸꐯꉐꑲꆀꄩꄉꉪꋩꇁꐮ。ELc彝族人网

ꉪꅂꇓꀜꑊꅪꁧꄩꑟꇈ,ꏮꇁꃄꇖꄹꊂꊼꇅꆫꇬꆏ,ꎹꄓꈧꌺꁧꇂꇉꌶꐽ,ꁦꀑꂚꃨꐍꇖꀕ,ꅔꊂꏰꋶꍅꇙꀕ,ꇉꄩꇪꀮꂾꃚꌒ,ꈬꉘꃅꄷꈁꉜꈀꋽꀕ,ꃅꌗꁦꉘꀕ,ꊽꉌꐡꑓꐡ。ꆈꌠꎹꑼꀉꑌꈨꊨꍣꆼꁠꈢꄉꋍꊈꋍꊈꃅꐮꐊꄚꈴꐺ。ꊿꋋꈨꑞꉬꀋꐚ,ꑮꆜ/ꌠꆗꐮꐊ,ꃀꌠꃀꌠꐮꐊꃅꐯꀋꋲꃅꁸꄉꋍꊈꋍꊈꃅꐺ,ꉢꉪꇬꈎꄜꐯꒈꌠꐮꋽꐤꁮ。ꀃꑍꋋꄮꇬꂿꑘꀧꋍꁯꋍꑷꁳꃅꄉꌐꀐ,ꋀꊇꑞꐛꅹꋍꑋꑍꐮꐊꑘꃅꐺꐙꀕ?ꄚꄉꉢꎼꑮꆜꀂꄁꀉꁱꈚꑠꂷꏭꅲ:|“ꀉꑳ,ꆍꊇꑞꃅꊿꋍꑋꑍꐮꐊꄉꑘꃅꁧ?”ꋌꑊꏦꇴꃅꉠꏯ:“ꀃꑍꐯꇯꑿꏜꊪ”ꄷ。ELc彝族人网

ꉪꊇꊋꐚꃅꇁꌊꈌꇔꐦꀞꇬꑟꀐ,ꈌꇔꐦꀞꀃꑍꑠꄮꆏ,ꃅꃴꀕꇉꀕ,ꃅꈋꁤꇅꀕ,ꄂꐎꀒꆺꌺꑠꆏꄑꉠꊂꈹꃅꒈꀑꀉꁁꏭꉜꄉꆸꇰ。ꈌꇔꁦꌺ,ꁧꐥꆹꈈꁧ,ꒉꊩꀋꃀꁧꋋꌕꂷꆏꇢꇑꌕꂷꌟꃅꈌꇔꐦꀞꈭꇍꄂꎍ。ꁧꀂꏾꌕꂷꌠꀒꅡꀮꅐ,ꋍꄩꌩꁧꀕꑌꇬꀋꋦ。ꁧꐧꇬꆏꌩꏪꆈꊉꀕ,ꁮꆗꏭꆏꂚꃨꐍꇖꀕꌐ。ꁮꌋꏭꆏꂚꃨꅩꇉꀕꑠꃨꌐ。ꁧꑭꏭꆏꂚꃨꀉꌙꑠꃨ。ꈁꌒꉆꄉꉜꇬꆏ,ꁧꋋꑍꂷꃢꏂꈚꅪꈚꄉꋍꈚꁧꂯꄐꏤꐺꌠꌡ。ELc彝族人网

ꅔꊂꏰꌺꈧꌠꆹ,ꀏꄉꄓꄩꃅꄂꀒꆺꈧꌠꇂꃴꄉꈭꇗ!ꈭꇗ!ꃅꏮꄉꋶꐺ。ꋍꅇꉙꑞꈨꋶꌠꆹꉪꋋꅉꀋꐚ,ꄚꏰꌺꋵꃚꋵꉐꀋꆏꃅꆏꋶꉢꋶꂅ,ꅐꈩꅐꆗꏽꄉꋶꃅꋶꇬꎷ。ꉢꉪꇬꉪꊇꋍꉙꀋꌧꒉꄸꀕ,ꋌꋶꌠꅇꀨꀉꇨꑠꐊꏭꐛ。ꆏꎔꃅꊼꇅꅲꉚꉏ?“ꐥꌒ!ꑋꌒ!ꑋꈌꁏ!ꑋꈌꁏ!ꏮꆹ!ꏯꇊ!ꑋꈌꁏ!”ꃅꈌꀋꐚꅀ?ELc彝族人网

ꅔꇬꁬꃨꆏ:ꐍꊭꀕꌠ,ꐎꆧꃨꌠ,ꐎꅪꌠ,ꐎꏂꌠ,ꏁꇅꌠ,ꏁꃨꌠ,ꏂꆧꌠ,ꀊꅪꌠ,ꅪꂾꃶꌠ,ꅩꇅꀕꌠ,ꀊꃴꌠ,ꀈꆧꌠꑠꌐꃅꌐꀋꉆꃅꇬꊎꃨꇰ,ꈀꄸꋌꃵꈤ。ꉪꇁꌊꄚꈩꇬꆏ,ꐋꀨꋍꂷꆏꑠꃅꉉ:“ꍰ!”ꌗꄲꀒꁨꊼꇅꀞꉈꑴꊼꇅꈻꇈ:“ꀃꑍꆏꉠꋍꃀꇬꌗꁦꀊꎴꇤꀋꌃꈧꌠꉬꇮꉢꆦꄚꎭꌐꀐ,ꉈꑴꃅꌗꐞꃀꀕꑠꉢꆦꉠꇬꇉꇬꃹꀐ”ꄷ。ꉈꑴꐋꀨꀉꁁꋍꂷꆏꋍꉌꐡꅀꑞꉬꀋꐚ,ꋌꎼꄚꄉꋍꊱꑵ,ꋍꑵꅇꆏ:“ꃅꃴꇂꃴꄂꐎꈴ,ꄂꐎꇂꃴꃆꇭꄝ,ꃆꇭꐚꄑꏿ,ꆀꃅꃆꇭꌟꃅꐚꄑꏿ,ꉌꊭꅐꅑꐚ,ꆀꃅꅐꅑꐚ,ꌠꉜꌞꃅꎔ,ꉢꉜꉠꃅꎔ,ꉜꇊꎔꇊꃅ,ꉠꃅꉢꋋꉂ,ꉪꇊꉁꇊꑟ。ꁧꐙꇉꐙꑌꉂ,ꆫꃅꑌꑿꑌꉂ,ꌩꑭꂶꏪꉜꑌꉂ,ꅔꉆꏰꌺꋵꅉꉜꑌꉂ。ꄚꇬꈀꋽꀕ,ꉠꃅꄷꉡꒆꅉ,ꉢꈍꃅꇬꀋꉂꂯ”。ꑴ……ꀊ……ꊽꉌꐡꍰ。ELc彝族人网

ꉢꆹꀋꉊꀉꑳꌺꃅꄮꇬꄚꐥꅗ,ꀋꃋꊝꃅꊝꇉꀕ,35ꈎꎖꐛꑲꆀꀱꉈꑴꄚꑟꇁ。ꊿꋍꂷꑌꉢꋋꀋꌧꀐ,ꀋꉊꀉꑳꌺꉢꌋꆀꐮꐊꄉꁯꆮꈹ,ꉌꊭꄵ,ꉛꈹꈧꌠꆹꇿꁧꌐꀋꐚ?ꌩꁧꇓꁧ,ꁬꆰꈧꌠꀋꉊꃀꆹꑞꂓꌠꆈꌠꉙꃅꇬꉢꌧꌐ,ꀋꃉꆏꁆꌩꌋꆀꄯꁍꌺꀊꋨꈨꀉꄂꉢꌧꀐ,ꄯꁍꋋꈨꑞꉬꀋꐚ,ꇭꀧꋍꍈꑌꀋꒆ,ꅉꁙꀕꃅꄡꇗꀋꉊꌋꆀꐯꒈ。ꅔꇬꁬꆰꈧꌠꆹꑞꂓꌠꉢꋋꀋꎺꌐꀐ。ꑠꅹꉢꀋꇐꍣꍈꂶꌠꏭ:“ꋋꈨꑞꂓ?ꀊꋨꈨꑞꂓ?”ꃅꅲꇬꎷ。ELc彝族人网

ꉢꅲꅷꇁꇬꆏꁬꏜꋌꑵ,ꆈꌠꉙꃅꇬ,ꀋꇐꍣꍈꋌꋋꉉꅐꇁꀋꄐ,ꉢꉪꇬꋋꆹꅉꀕꃅꄚꐥꂷ,ꑞꐛꅹꆈꌠꉙꃅ,ꁬꂓꋌꑵꋌꀕꉇꀋꄐꀋꐚꃅꉪ,ꋌꇫꀋꌧꇬꆏ,ꉢꎼꆫꃀꀉꆹꈧꌠꅲꆹ,ꀋꇐꍣꍈꉠꏯ:“ꌟꒉ,ꄚꇬꆫꃀꀉꁌꈍꃅꇬꌥꂯ?ꋋꆹꉩꍏ/ꂰꍏꃅꄷꄉꃅꃴꅐꅑꃏꏸꑌꇁꌠꉬ,ꇗꂷꋍꏣꌠꎆꃀ70ꂷꃼꌊꇁꌠ,ꈛꎼꁧꇬꃅꐎꋍꈎꀉꁁꈴꑲꆀꇫꑟꄎ”ꄷ。ꋋꇅꇬꆏꉡꑌꊼꇅꑊꏦꄉꁱꀋꐭꃅꎼꀒꁨꒉꊩꆸꈈꃿꁧꅚꏯꑠꂷꇬꉜꄉꆹ,“ꄚꇬꒉꌦꑍꇯꅤꌊꋠꁧꇬꊫꌠꇿ”ꄷ。ꒉꌦꆹꀉꑌꃅꄚꇬꋦ,ꊨꍣꉢꇍꌊꀋꇊꅤꃅꇬꆏ,ꉠꉌꂵꇬꐛꀋꐛꇁ,ꉢꉪꇬꀃꌋꀊꆨꅑꅸꇁꇬꇯꆐꊿꄚꇬꒉꌦꅤꇬꎷ,ꁬꋌꁌꇐꈤꋌꑵꊿꇫꀨꎹꌠꀋꊌꃅ,ꊁꈔꁧꇚꑴꉂꄉꉢꇬꁁꅤ。ꋋꇅꇬꆏꀋꇐꍣꍈ“ꀁꇬꁧꄿꀐ”ꄷꇴ。ELc彝族人网

ꉢꉈꑴꀋꌧꉏꀕꃅꁬꏜꉩꍏ、ꂰꍏꄉꌌꇁꑵꌠꉜꒉꌦ,ꁬꏜꋌꑵꆹꌞꇩꏤꄹꇬꑞꂓꀋꐚ,ꉌꈲꉙꃅꇬꆹ“ꀙꌒꑷ”ꄷ,ꄚꑠꃅꑴꇬꆈꌠꉙꆏꀋꐚꀐ,ꉢꆈꌠꉙꇬꄻꇧꋉꂿꉂ,ꑞꇬꋉꂯ?“ꌕꏾꐎꁬ”ꄷꋋꇬꄻꇧꋉꇬꄈꍑꀞ,ꏜꋌꑵꂄꐯꂄ,ꑿꋠꇬꑌꑿꈲ,ꑾꑌꇫꋠꅲ,ꃅꐎ40ꈎꅑ50ꈎꋦꄎ,ꋍꁦꀕꆹ,ꑌꃀꌧꊈꁦꀕꀋꇊꌡ,ꁬꀉꁁꌋꆀꋍꈜꋦꇬ,ꋌꄈꊋꑌꁦꅤ,ꒆꅲꐋꀋꌡꃅꐙ,ꄷꀋꁧꃆꀞꇂꁮꎇꃀꎇꈅꄔꐕꈻꐓ,ꌦꀋꅲꈔꀋꅲꑵꉬ。ELc彝族人网

ꌕꏾꐎꁬꋌꑵꐴꄿꃄꅉꇬꀁꂥꃅꋦ,ꋍꁦꀕꇢꆣꇪꇇꌺꈧꌠꆏ,ꊋꑌꁦꅤꏾꎑꏾꅑꀻꎆꐯꀻꎆ,ꄿꀕꇬꊪꇖꀄꊭꌺꃅꑠꅑ,ꎳꑌꀉꎴ,ꑌꃀꌧꊈꄿꅣꌡ,ꅿꅐꇁꈭꐨꆏ,ꑭꎅꇇꎇ,ꈬꏣꑳꏡ,ꏮꃄꇖꄹꊂꉜꄉꀻꎆꁧ。ꋍꈬꏣꇿꇬꑞꆏꇿꇬꄉꐴꑌꇈ,ꏜꋌꑵꊨꇬꆏꏽꀕꈾꆧꏽꀕꀋꇊꌡꑠꌔꏾꇬꅑ。ꏽꀕꄩꏯꆏꁱꂷ“V”ꑠꂷꌡꀊꐎꑠꂷꅑ,ꑠꅹ“ꌕꏾꐎꁬ”ꄷꋋꇬꉢꄻꇫꋉꌠꉬ。ELc彝族人网

ꀂꏾꇬꆏꃧꀕꅩꂾꃶꃅꑠꀮꃨ,ꃧꀕꋍꀮꌠꁸꎄꌺ40ꍈꃅꐙ,ꇗꂷꂿꉆꂿꀋꉆꑠꌕꂷꇖꂷꑌ。ꋍꏡꏢꈧꌠꆏꇗꂷ70ꅑ100ꃪꂷꀀ,ꊿꉉꇬꀋꃋꉪꍏꑭꊂꌕꏾꐎꁬꏃꃪꎖꂿꊪꄉꀐꄷ。ELc彝族人网

ꋋꈨꉜꌐꈭꐨꉢꀁꋌꐦꀞꇬꉜꇬꆏꑿꐍꐷꀕꑠꈍꑋꊈꈜꎴꅉꇬꄉꏜꋠꐺ,ꄚꄉꉪꄓꁦꀮꌺꍈꀂꏽꑌꄉꉜꒉ,ꆤꀕꆣꃅꒀꃀꑾꌺꑠꊏꐮꐊꄚꑟꇁ,ꒀꃀꂶꌠꀃꃀꂊꋍꀕꏷꐥꅍ,ꌳꋦꂷꌡ,ꑿꁧꄙꇤꁨꆹꌟꃅꑠꂷꅑ。ꑾꌺꍇꌠꆹꉥꑣꅍꊿꋌꁭ,ꀊꅰꃅꑾꑐꈧꌠꃅꃴꉒꐎꀒꆺꌡ,ꇂꈯꆿꈪꃅꊱꀕꊰꃅꌕꏾꐎꁬꌃꋠꐺꋋꇅꇬꆏ,ꋍꀉꂿꂶꌠꏮꇊꊁꉜꃅ,ꋍꌺꍇꌠꏭꉜꇬꎷ,ꑾꌺꍇꌠꑌꋍꀉꂿꋋꇁꉚꌠꋌꌧꐤꁮꄉꋌꀥꑕꑣꌺꃅꀉꂿꏢꁮꇬꐊꐺꇬꎷ。ELc彝族人网

ꏃꃅꈊꇁꃲ,ꁦꀑꆫꌠꈻꇁꃲ,ꐦꇬꊨꌠꈻꇁꃲ,ꑌꈻꄂꐎꃰꇁꃲ。ꑼꅰ,ꑻꇅꇷꊨꇌꆽꃛ,ꀂꏾꈄꁨꒊ,ꇭꀧꇌꄹꒊꑠꋍꊈꃅꈻꉪꂾꈴꁧ。ꋋꆹꑌꑿꆫꅉꆫ,ꆿꍯꃄꅉꃅ,ꉪꆈꌠꋍꏅꇫꐥꌠ,ꀃꑍꋋꄮꆏ,ꃅꑆꉇꄅꀋꁮꀋꆳꋥꅉꇬ。ꏜꎔꏜꃨꑠꆹꉙꆺꃀꀋꌧꑠꉪꊙꆀꃅꊪ,ꆀꃅꏜꋲꏜꑞꋍꑵꁦꎆꌦꀐ,ꏜꋲꏜꑞꀕꋦꆏ,ꑌꑿꑞꋠ。ꆀꃅꑌꑿꀻꎆꇁꌠꑓꀠꀕꀐ。ELc彝族人网

       (ꉉꀽ:ꁰꒌꆹꉸꀻꎭꍑꌠ)ELc彝族人网
 ELc彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:ꐛꄃꂶꏦꉙꇐꁏꄉꌠꌋꄀ...
ꊁꁬꌠ:ꐛꃭꁁꐷꌧꈿꁱꇐꑍꁬ