ꀋꂓ(ꂴ)
ꄜꃑꄮꈉ:2011-08-27 | ꁰꄻꊿ:ꀈꆺ ꇁꀦ:ꆀꉙꊅ ꉜꃷꁨ:

  ꁰꊿ
  ꁰꊿꃆꂮꀑꐱꐥꐨ:
  ꀈꆺ,ꅪꃯ,ꆈꌠ,1953ꈎꀒꎂꏃꄊꏿꑣꒆꌠ。1975ꈎꅑ1981ꄸꈎꐭꌶꅉꇬꂘꃀꄻ;1982ꈓꅑꀋꃋꑟꌠꆏ《ꆃꎭꉜꇐꁱꀕ》ꆈꌠꁱꂷꌋꆀꉌꈲꁱꂷꇬꏓꄻꌤꃅ。
  ꋋꆹꃆꃀꁱꇐꁌꒉ,ꄷꀋꁧꆀꃅꊿꀹꃅꀹꌋꆀꎭꐪꌒꐨꁱꉹꁌꀨꅷꇀꂷ。ꆀ、ꉷꁱꂷꑍꑵꌊꃆꃀꁱꇐ/ꁮꅉꏓꏡꌠꌋꆀꁎꆦꌠꉐꁬꎖꁱꋺ。《ꐴꌋꆀꃨ》ꁬꌠꇩꏤꑭꊂꀁꑌꊿꋅꄟꅐꃆꃀꁱꇐꈁꁠꌋꆀꌧꍧꌜꇭꃀꏐꃆꃀꁱꇐꂒꉻꊌꋺ,ꄷꀋꁧꍧꈈꑪꃚꁏꌊꏝꀪꁱꂷꃅꄉ《ꀙꃓꊉꑴ》ꇬꄀꋺ。ꊨꏦꁱꌠꌋꆀꌟꇷꄉꁱꌠꄯꒉꀉꑌꋐꅐꋺ。
 
  ꀋꂓ
  ꑍꊎꇕꉬꈎꐛꀐ,ꀋꃋꆸꈐꉠꀋꂓꌋꆀꉠꃺꃀꀉꃨꌐꃶꎭꂵꃅꇢꆿꌺꑋꁰꒌꉢꌌꐺꑴꌦ。ꃅꈎꃅꆪꀊꉗꇨꒉꄸꐤꁮ,ꊼꇅꌧꀋꉆꀐ。
  ꁰꒌꇬꀋꂓꌋꆀꎭꂵꆿꌺꑋꑌꀋꃋꏦꎭꁰꒌꍑꅉꇬꅑꌞꊿꑮꑟꎺꄅꁰꒌꈨꌠꀋꏮ,ꌋꅪꑳꏯꑌ,ꌺꃰꃼꏯꑌꇈ,ꆼꁠꄻꐮꉈꑌꄉꍑꄉ。ꁰꒌꇬꀋꂓꆹꑊꏦꇴꃅꐙ,ꎭꂵꆿꌺꆹꑊꆹꐓꉩꅍꎍ。ꉢꉪꇬ,ꀋꂓꆹꑊꁧꅑꂷꉬꄉ,ꌞꁰꒌꍑꂶꌠꋍꑎꏭꋍꃅꑌꄷꌦꀋꋪꃅꑌꄷꌦꃅꇬꆏꑊꏦꌊꇬꍑꀋꅲꇈ,ꎭꂵꆿꉘꑊꑍꐛꁏꇬꑲꆀꀋꍑꀋꉆꃅꍑꌠꉬꋭ。
  ꉢꎺꇬꀋꂓꂶꌠꀂꄁ“ꑘꃅꂪꌦ”ꀊꋩꑵꉬꑲꆀꇇꈌꇬꀉꄂꑍꊐꌕꊐꌧꄉꑠꈬꈚ。ꂂꆏꉠꃀꑘꍸꇐꎭꁁꀉꆈꂪꌦꎽꃴꌠꌌꑬꄅꄉ,ꇭꀧꑌꀉꆈꂷꊙꄉꀋꃀꊈꈚꑵꌠꑠꈬꈚ,ꀂꏾꇬꆏꑊꋌꁁꑐꇖꀐꑠꂷꅑ。ꐯꑱꑳꏁꌬꅍꑠꏢꀵꇬꎷ,ꑱꑳꑍꁁꏯꆏꆫꌦꆫꂷꀉꋲꀊꑞꋽꐯꋽꑠꈨꑌꌦꇬꄀꄉ,ꈁꉜꈀꋽꀕ,ꋌꁙꆏꀑꇱꏣꌊꄻꄉꅩꇉꅍꑠꀮꄀꄉ,ꇵꆹꇀꃼꏭꄉꆼꒆꎼꇁꇀꑳꏯꉦꃀꇬꀁꋌꄀꄉꑟꃅ。ꋌꄹꇬꀀꀉꂿꌦꏜꄉꂪꇐꂪꈜꎹꀂꁳꇊꀋꂪꃅ,ꍸꇐꄷꌠꆏꑱꑳꋋꏢꀉꄂꍸꀂꁳꇈꄷꉉꉪꇰꋺ。
  ꁰꒌꁬꌠꀊꏀꑴꌦꇬꆹꀂꄁꀊꋨꈬꁰꒌꍑꌠꇱꑴꌊꎽꃴꃅꄉꇈ,ꑊꋌꁀꑌꑴꌊꑐꇖꀐꌠꉜꅐꇁꀋꉆ,ꑱꑳꑍꁁꏯꆫꂷꈧꌠꑌꑴꌊꋽꐯꋽ,ꋌꁙꅩꇉꅍꀭꌠꄈꇇꋒꈋꉎꀉꄂꍑꄉꀕꉜꅐꇁꀋꉆ。ꊿꑍꂷꌠꁧꃚꇬꌋꆀꂱꀯꇬꑌꀊꅪꌠꌌꉙꄉ,ꀊꅰꃅꎔꌟꃅꐛ。
  ꀊꋩꄹꈎꃅꋆꄮꐰꈎꏅꇁꂯꄉꑠꑍ,ꂴꆏꃅꑆꃴꇉꅍꃅꊸꄂꀋꅑ,ꄚꁯꋒꐯꉐꀉꄂꃅꐛꐈꌊꂿꃅꌈꆈꏸꀕ,ꉽꐯꁌꉱꀋꏮꐡꇁꊿꂂꄉꏽ。ꂴꆏꃘꇔꏃꇗꈩꋒꌦꉐꂷꈨꐛꇈ,ꊂꊿꀀꌞꄮꇬꆏꂱꃅꂱꇬꀕ,ꊁꄹꉇꃅꄜꇬꑲꆀꃰꁧꈍꄕꑠꁧꈉꇬꐓꄉꀐꅊꇈ。
  ꂴꑍꀕꌕꑍꇬꆏꄿꏀꈧꌠꏦꎫꇓꈓꇤꍤꁧꂯꄷ,ꐮꐊꁧꌐꇈ,ꎭꂵꆿꌺꇁꌊ“ꇐꇭꆎꆹꁦꁧꀒ”ꄷꇈ,ꀋꂓꆏ“ꍤꅍꑌꀋꊌ,ꀞꐕꀐꀞ”ꄷꇬꆏ,ꎭꂵꆿꌺꂶꌠꄡꇗ“ꑷ!”ꄷꑠꀉꄂꄹꄉꁧꇈ,ꀋꂓꑌꑍꇬꀋꀱꃅꄚꊂꈹꁧ。
  ꀋꂓꀁꇬꀋꐥꄮꇬꆏ,ꀊꑖꄰꀊꑱꀉꇤꀈꑘꌕꑻꌠꅐꆠꌊꀁꇬꀀꀋꀬꃅꉪꅍꀀꄜꇁꇬꎷꑟꃅ。
  ꃅꄜꇬꆏꀊꑱꂶꌠꑌꂵꑍꍈꌠꏭ,ꆐꑊꊁꇁꀂꂴꆽꃆꄔꏦꁧꂿꄷꄓꁧ。ꉡꑌꄓꅊꁧꒉꇈꈻꌊꀋꎺꃅꉢꀜꆸꄜꀀꈉꊷꆣꅍꈚꌠꇬꊐꇈ,ꀉꃨꄓꃆꄔꏥꄉꄮꇬꑲꆀꄓꄉꂪꈜꇬꈚꂾꉂ,ꍕꑕꇬꀀꄉꑓꋪꍻꑳꍅꀻꃰꇱꍅꆈꋧꋪꈧꌠꀵꄉ,ꃅꑆꆞꇱꈪꑡꀕꉌꂵꇬꃹꇁꀋꐚꇬꆏ,ꀊꑱꂶꃅꇧꍠꇧꆽꃅ“ꀉꂿꊿꈔ”ꆏ“ꀉꂿꊿꈔ”ꄹꒌꈯꆟꈯꄉꏽꃅꁥꇁꉪꀁꇬꊐ。
  “ꑡꃅ?ꀊꑱꑡꃅ”ꄷꉠꀉꂿꀂꏾꐕꆸꄜꈌꆷꄉꀊꑱꅲꇬꆏ,ꀊꑱꂶꌠꉛꅍꉈꀱꈜꀋꐛꇬꉆꇈ,ꉠꀉꄉꑌꂾꅉꏯꀀꈤꇬꀀꂶꌠꑌꄚꆏꀋꎺꃅꑣꄑꏿꇫꑌꇈ,“ꌦꀐꅀ”ꄷꅲ。ꈀꄸꌦꀐꄷꌠꉢꋌꉨꀋꀽꇬꀀꇬꆏ,ꀊꑱꂶꌠ:“ꌦꀐ,ꀋꂓꌋꆀꃅꇢꑋꐯꇯꌦꉪꅍꅑꀐ”ꄷꇈꉩꁖꄚꅞ,ꆸꄜꀉꇤꀈꑘꑋꑌꋋꇬꈨꇬꆏꀷꇙꌨꎓꄹꄚꇱꉩ;ꉠꃺꃀꀉꃨꂶꌠꀂꄁꇇꈌꌥꑌꃅꋌꇷꈌꀧꉛ,ꃅꊭꎹꃅꎹ;ꉡꑌꋌꇷꑑꃹꏾꁵꀕ,ꇖꌋꐯꑖꀋꒃꇬꀀ。ꀉꄉꂶꌠꆹꐥꍂꑠꃅꃃꑠꃢꉢꋋꂿꀋꋻ:“ꈌꀋꂓꃮꀋꂓ,ꈌꃅꇢꃮꃅꇢ!ꎭꂵꆿꌺꀋꇷꋠ!ꐙꃅꃀꇐꇭꀋꇷꋠ”ꄹꃶꀐꌠꀋꏮꇤꐮꄉꋍꃢꋪꇈꃃꌊꎑꅉꀋꊌꇬꆏ,“ꈍꌺꂶꌠꑿꉻꆸꄜꎍꁧꌦꀐꅊꌦꇿꎍꁧꐙꀕ?ꀋꇷ!ꃌꌋꃌꀋꍅ”ꄷ,ꆼꅉꃅꅐꇫꈴꁧꀐ。ꄚꄉꀉꂿꑌꀂꏾꅑꀋꂪꃅꐞꎰꂶꎰꅂꊐꇬꀁꋍꎰꇫꊂꈹꁧ。
  ꀁꉘꍈꐛꇬꆏ,ꑷꊂꑿꉻꇬ“ꈍꌺ,ꄓ——,ꈍꌺ,ꄓ——”ꃅꊛꄉꇴꇬꊿꇬꀋꉐꇈ,ꉈꊼꇅꌺꐛꌦꇬꆏ“ꍠ——”ꃅꂿꏒꀕꑠꇅꂿꇈ,”ꀋꇷꅽꑠꂷ,ꁍꌠꃮꃶꂷꀋꏮꉪꃅꉪꅍꐥꀋꇮ,ꅽꃌꅿꂶꌠꌋꆀꎭꂵꆿꌺꑋꆼꏻꅽꀁꇬꎑꎍꀐꑸ。ꀋꇶ!ꁦꋠꋍꏁꈓꌠꑠꈩꇀꄟꉜ,ꈨꑌꉘꁮꆏꊊꀋꂿ,ꅽꌟꃅꑠꑮꃀꊿꀋꍯꇿꒉꂯ”ꄷꀒꏈꀒꊨꑟ。ꉈ“ꈯ——”ꆏ“ꈯ——”ꃅꌩꇓꆸꐔꌟꑌꌡ,ꀨꆐꍹꃅꋍꑵꂷꇁꊖꁋꐷꌠꑌꌡ。ꈍꌺ“ꍮꊪ”ꃱꂷꄵꌩꐞꇬꄀꄉꌌꎆꊂꈹꂃꈧꇷꌠꀉꄉꇱꐓꐷꃀꆺꉙꌐꇈ,ꃱꎄꈧꌠꐍꎰꅍꀜꊖꁋꇬꎑꎍꌐꌠꄇꇖꀕꀐ。
  ꉪꋋꈚꇬꀊꆺꄷꌠꆏꀊꑖꉪꑍꁯꀉꄂ。ꉪꋊꉪꃤꆹꀊꇬꇪꀮꐜꆽꄷꑠꈚꀀꌐ。ꉪꑍꁯꆹꀉꁌꌦꈭꐨꀊꆺꄰꀊꂵꏃꌠꀋꊌꑲꆀꀉꑳꑍꍈꌠꋌꏃꋍꎭꂵꀋꁧꂛꊨꈿꇁꌠ,ꉠꀉꂿꆏꉠꀊꂵꅤꑬ,ꉈꑴꎭꂵꆿꌺꆏꉠꀉꂿꑮꀞꉫꌦ,ꃆꅉꐯꅑꐮꁠꅳꁖꋍꐕꍓꆸꅝꀋꉆꌠ。
  ꉪꑍꁯꌺꃰꄷꌠꆏꉠꀉꄉꌋꆀꈍꌺꑋꐥ。ꈍꌺꆹꊵꑵꀋꌧꌦ,ꉠꀉꄉꑌꇊꆀꎹꇬꎹꍈꄻꑴꇬ,ꈧꊰꀕꌩꁧꆿꃹꈴꇬꌩꏾꊰꇁꏦꑠꂷꉬꄉ,ꎭꂵꆿꌺꑌꋋꈨꋌꎖꋍꇇꈐꊐꄉꑲꆀꉠꃺꃀꊐꇈꉠꂛꊨꑮꃀꍯꀬꌠꉬꋭ。
  ꎮꑑꅉꉠꀉꄉꑠꂷꑌꇖꊩꄟꊫꅉꀋꊌꈍꃅꇮꀋꐚꃅꋪꅷꐺ。ꉠꀉꂿꄈꆏꀑꈥꐬꇓꁮꑴꌦ,ꋌꒉꌊꁡꇤꊾꋲꊿꑞꈨꌠꇴꇈ,ꊾꋲꊿꑞꈨꌠꁳꎭꂵꄰꇴꌊꊿꑍꂷꌠꆼꏻꏣꇽꎻ。
  ꉪꀉꑳꈧꌠꆹꂯꁴꍂꊾꇤꄷꀐꇬ,ꉠꀉꄉꀉꂿꑋꑌꑫꀕꊿꌥꅉꇬꑓꐋꀋꅐ。ꊁꉪꋊꉪꃤꈧꌠꑌꊿꌦꅉꇬꀋꆹꃅ,ꇁꋧꌦꆏꇁꌊꉪꅍꄉꈍꃅꐙꃅꄰꌊꆀꎭꂵꄰꏯꄉꋌꐘꌌꐮꄟꅷꊁꄹꉇꑟ。
  ꉡꆹꀋꎺꃅꃦꈜꉢꄹꈚꇈ,ꀂꄁꃀꉼꀕꅉꃅ“ꈭꀕꈯ”ꄹꑬꅮꑌꀋꅑꃅꉢꀥꀋꂓꄰꅍꊐ——ꀋꂓꇁꈭꐨꆏ“ꀊꑖꄰ”ꀋꄹꃅ”ꀋꂓꄰ”ꄷꇬꎷꌠ——ꀃꈈꃀꄳꐂꇬꆏ,ꀋꂓꂶꌠꏾꆹꀧꅍꐚꇤꐮꎍꅊꇈ,ꆽꄿꇬꂪꌦꀊꐎꏢꇬꆽꉊꎍ,ꅳꁖꐬꇓꇬ、ꈂꀸꇬꌦꆈꈧꌠꌊꀂꄁꆼꁠꇬꉖꎍꌐ,ꂪꌦꀊꐎꏡꌠꇬꉖꎍꈧꌠꆹꃧꀕꀊꅪꈨꑌꌡ,ꈁꑓꑆꅩꃚꃅꐙꂶꌠꆈꃅꆈꂄꀕ,ꂥꌗꈧꌠꇤꊰꇁꋍꈁꑓꑠꇬ、ꀍꏶꑠꇬ、ꇭꀧꑠꇬꃅꐛꌐ。
  ꇣꁁꏯꆏꊿꈧꌠꎭꂵꆿꌺꑓꋏꌠꑓꋏ,ꃦꈜꇢꌠꇢꃅꀨꇖꀦꇗꄹꄚꊐꄉꃛ。ꎭꂵꆿꌺꀉꂿꀑꇢꑌꀕꂶꌠꀒꁙꑮꊙꊾꃶꂷꀉꏮ”ꀉꂿ,ꀉꂿ,ꉘꁮꈨꑌ,ꉘꁮꈨꑌꇬꉚꇁ……”ꄹꄸꅣꇇꑣꄚꊐꄉ。ꏸꑭꈻꌠꑌꀋꌋꃅꉢꋌꇰꈌꀧꉛꄚꉆꄉꇬꆏ,ꎭꂵꀑꇢꑌꀕꂶꌠꉜꇁꂾꆏꅸꇁꉠꀋꂓꋌꌌꄚꄉꆼꑣ,ꉠꀋꂓꌀꏶꋌꎼꇇꆹꒅꄉꀂꏾꋌꌌ“ꄏ——”ꆏ“ꄏ——”ꃅꃄꅉꇬꀒꋖꑟ,ꄷꀋꁧꃃꌊꀋꎺꐤꁮ,ꈀꄸꇿꑌꀕꀋꎲꃅ:“ꀊꇷ,ꐙꃅꃀꇐꇭꀋꇷꋠ!ꉢꆎꄻꉠꀋꃋꄈꅉꇬꄉꇬꆏ,ꆏꂾꉠꐴꒇ!ꃮꃀꃤꃅꃤꌊꉠꌺꇗꄉꉠꌺꐴꒇ!ꀋꇷ,ꑡꃅꋐꒉꋍꈓꋦꃅꅽꂶꌠꇬꀋꊐꐚꀕ……”ꄷꊫꃺꑌꋌꁐꀋꂓꈁꑓꐛ。
  ꁦꋠꈧꌠꀑꇢꑌꀕꅇꋌꈨꀕꇬꆏ,ꑊꃝꑊꌎꃅꀂꏾꌌꂁꅉꎹꌠꎹ,ꁌꇓꌕꈈꃅꐯꅳꀧꊎ“ꃃꌊꀋꎺꀐꌠ”ꃅꌕꌠꑌꐥ。ꎭꂵꃅꇫꂶꌠ“ꀉꂿꆏꉩꏾꀐꇬꉥꑣꀕꃅꉩ”ꄷꋍꀉꂿꋌꌌꏈ。ꐙꃅꃀꇭꂶꌠꑌꄸꀋꈴꌊ:“ꀊꀒ,ꎭꂵꀋꃀꆏꌞꇨꊨꂷꄚꀋꑌꇬꆏꑠꃅꊿꂿꂷꏭꂾꈠꀨꑵꅀ,ꅑꌠꆹꋍꑊꋍꂷꀉꄂꀋꅑꌠ,ꄷꀋꁧꅑꑘꀉꒉꌠꆍꏯꎍꇁꑌꌬꀋꄿꌠ,ꌞꀊꆺꐙꃅꑍꁯꇵꊫꋏꎼꇁꇬꆍꀂꏾꒊꀋꋌꇀꑌꇚ”ꄷꇬꑲꆀ,ꎭꂵꀑꇢꑌꀕ“ꐙꃅꁧꇭꀋ,ꈍꃀꎐꀋꌦꆏꈍꀞꉐꀋꑳꀐꌠꆽ”ꄷꀋꂓꋌꄝꇫꎭꇈꋌꅸꒉ“ꍠ——”ꆏ“ꍠ——”ꃅꋌꉠꋍꆿꌺꁧꇉꋈꌦ。“ꀉꂿꌻꑘꃈꅿꎼꃏꑠꏢꅇꑇꌊꌦꑵꅀ……”ꄷꐚꇁꋍꌺꂣꄉꉩ。
  ꎭꂵꃅꇫꂶꌠꋍꀁꑳꐣꁙꇫꄉꄯꒉꄞꇙꄉꑠꂷꋌꀧꊊꇈ,ꁉꌊꉜꇬꆏ,ꀋꂓꌋꆀꎭꂵꆿꌺꑋꁰꒌꉬꅊꇈ,ꄚꄉ“ꊾꎼꊾꃏ”ꄷꋌꏅꄉꋌꇵꇤꈏꊐꇈ,ꀋꎺꃅꉢꅸꆹꇤꈏꇬꄉꁰꒌꈧꌠꉢꃬꇤꁦꑭꅞꄉꏅꀋꀙꑠꁬꉢꌋꉠꐣꁙꇬꊐ。
  ꎭꂵꆿꌺꆹꃴꇁꆧꈨꒉꃅꄻꎭꑷꇬꊐꄉꐔꌊꋍꀁꇬꄉꁧꀐ。
  ꂴꆹꉢꋌꇷꌊꑓꁴꄩꑌꊌꀋꅐꃅꇰꇬꉆ,ꀋꃉꉠꀋꂓꀉꄂꏁꀧꅍꊾꂷꇫꀨꎹꌠꀋꊌꃅꄚꎍꇬꆏ,ꉢꋋꎭꃅꉈꌊꉠꑓꁴꑵꌠꇿꀕꇁꀋꐚ。ꉢꀋꂓꇵꆹꇬꆼꏻꏣꀨꏡꌠꈌꆹꂯꇬꆏ,“ꀉꑳꆏꄚꑡꎹꇁꀒ,ꁴꍂꊾꇤꌠꆏꐙꀕ”ꄷꐙꃅꃀꇭꂶꌠꉢꋌꄳꋍꊂꅞꇈ,“ꁦꋠꈨꌠꌦꌐꀐꅀꑞꃅ?ꈀꋩꄰꅫꃀꌱꃀꑌꋋꈨ,ꆍꌞꊿꋋꂷꄻꑠꃅꇫꄉꋍꀋꁧꂛꊨꇁꉚꏢꉪꅀ”ꄷꋌꎼꆼꅉꃅꀋꂓꇭꀧꇬꌩꎳꍦꇙꐺ。
  ꂿꃅꁬꌠꑌꋋꄹꉇꃅꃰꌦꀮꑑꀕꑐꃅꐛꅷꃅꈊ,ꂵꆧꉬꄉꐛꅉꐮꅉꃅꄚꑟꉬ,ꈊꃀꉬꇮꇬꆹꃰꁧꈍꄕꀋꐚꀐꌠ。ꎆꅸꉻꊎꇅꌠꇬꆏꐙꃅꄰꑟꇁꀐ。ꀋꂓꀊꂵꌦꃢꌦꈚꈧꌠꋇꀵꌊꀋꂓꇱꇁꇈ,ꄖꍮꌊꃦꈜꇢꇬꆏ,ꊿꂿꂶꌠꁁꆈꃹꌐ,ꑊꇤꇫꑌꑅꇖ,ꀁꄂꑌꌦꃅꌦꀉꄂꇉꑡꐛꅹꄷꅲꇬꆏ,ꆼꏻꏣꀨꈧꌠꑌꊿꌕꄚꇰꇈ,ꐙꃅꄰꌺꃰꌋꅪꃅꄯꁯꌩꐳꄑꀒꎭꂵꀑꇢꑌꀕꊂꆹꂯꄷꀑꑇꑟꄉ,ꌞꊾꋲꊿꑞꈨꌠꇫꇬꌋꆀꇬꑲꆀꆏ。
 
  ꀋꂓꀉꁧꀄꊭꂶꌠ(ꈍꌺꃀꑌꀄꊭꂶꌠ)ꄚꄉꈨꄹ:“ꀉꁏꀋ,ꅽꌟꃅꃦꈜꉥꑣꀕꋬꈭꊃꈚꑠꑌꆠꑵꅀ?ꆏꃛꁙꆺꊨꀋꅑꌠꊏꌞꅇꑇ,ꎭꂵꆿꌺꑠꂷꅇꑇꌊꌦ。ꀊꇷ,ꉠꀉꑳꎭꂵꆿꌺꌉꌦꌠ……”ꄷꉩꇬꆏ,ꌠꆗꌓꋗꈧꌠꅲꌊꌋꐙꄉ:“ꀃꇆ,ꎭꂵꆿꌺꌉꌦꌠꀋꉬꆏꑞꉬ”ꄷꈎꀕꐒꀕꃅꐮꅳꀧꊎꌕꇫꑌꌐ。
  ꇯꍝ,ꌞꊿꀉꑌꄹꁆꆹꀋꂓꉌꂵꀉꎂꌊꎭꂵꆿꌺꇱꊏꈔꌠꄷꉉꌐ。ꄚꋍꈨꋋꈨꆏ:“ꊏ?!ꀙꀋꐥꃅꊾꂷꆏꊏꌊꌦꄎꑴꅀ?ꌞꊿꉂꅼꄉꈔꀋꑴꀐꌠꀋꂸ”ꄷꉉ,ꄷꀋꁧꋍꋏꋒꈧꌠꆹ“ꉢꊼꇅꆎꊏꉏ,ꆏꉬꅲꀕꉏ”ꄷꐮꒉꐯꈧ。ꀊꋩꇅꇬꊿꑍꂷꋍꈚꑌꄷꆏꀋꂓꌋꆀꎭꂵꆿꌺꑋꈍꃅꉂꋭꋋꈨꌌꀉꌦꀕꇠꃅꇠꇬꎷ。
  ꀋꂓꌋꆀꎭꂵꆿꌺꑋꈍꃅꉂꌠꆹꐙꃅꃀꇭꀉꄂꊯꉬꅂꐛꆿꃹꐥꌠꀉꏮꇝꀨꇝꄩꋌꅉꐚꌐꌠ。ꄚꊿꑍꂷꌠꀋꌦꀕꂾꆹꋌꄻꍹꏿꇬꇉꊐꄉꇇꌋꁰꇷꒊꍈꑌꆶꀋꀬ。
  ꊁꑲꆀꋌꉉꎼꇁꇬ,ꋋꄹꈎ“ꉬꆪꋍꑍ”ꑘꃅꎺꄅꄹꉇꑬꆏꇈ,ꎹꇬꃮꀠꑍꂷꌉꌊꁸꎹꑼꍈꂿꄷꁦꋠꈧꌠꃅꄜꋙꋠꈭꐨꆏꐮꇴꌊꃮꌉꁧꌐ,ꀋꃋꀋꃀꈧꌠꆹꃅꄜꀕꌨꃤꏓꌊꇁꇈꋙꋠꃮꋚꄐꈭꐨꆏꐯꏑꌊꄸꉺꇬꑌꄉꇇꃅꇇꑘꃅ。ꀋꂓꀉꄂꃅꄜꋍꃤꏓꌊꇁꇈꋙꋠꈭꐨꀱꉈꏓꁧꌦ。ꐙꃅꌦꇭꎭꁱꎭꃹꉅꌊꄸꉺꇬꑟꇫꆏ,ꀋꂓꀱꑳꅶꁉꇱꋓꈴꁧꋌꊌꂿꇈ,ꐋꀨꐥꀐꉂꋍꎭꁱꎭꃹꋌꀱꌊꀁꇬꄉꏣꀨꉊꈯꋌꉅꌊꊂꈹꁧ。
  ꂿꃅꑌꊸꎔꐯꊸꎔꑠꑍ。ꄩꆹꃅꑆꃴꂿꅍ,ꄂꐎꀒꆺꌺꍈꁧꊂꉆ;ꀏꆹꌩꍡꇓꍡꉘꁇꁉ,ꌩꃨꁬꃨꅿꉘꌑꐩꅍ;ꅔꄩꏰꌺꋶ,ꁬꈬꐛꑿꇖ,ꍈꀮꋓꀜꏽ,ꇉꊂꌩꄩꇪꀮꂿꃚꐝꄧꀕ,ꇉꈫꇁꄿꆹꁘꊫꀕꆎꇴꉡꍝꉂꅇꐝꂿꀕ。ꋋꈨꂿꇬꆏꐙꃅꃀꇭꋌꎼꉌꐡꑓꇗꌊꃚꋊꋍꎴꑵꂯꑌꅶꁉꍤꁆꌩꏓꎆꆫꌠꈧꏦꄉ,ꆺꄝꐬꇓꊎ:
  “……
  ꇉꄩꇪꀮꀿꇁꃀꉂꋌ,
  ꁬꈬꐛꑿꃺꇁꑋꉂꋌ,
  ꄂꐎꀒꆺꌺ,
  ꉠꃺꃀꑌꂵꃮꆫꊫꊂꑌꂾꂿ?
  ꑱꍹꐞꄜꈵꃴꑌꂾꂿ?
  ꉠꂛꊨꃇꌺꁮꆫꁦꀑꁧꄩꑌꂾꂿ?
  ꂷꃅꂷꑱꄸꉺꑭꊂꑌꂾꂿ?
  ꌦꌠꉩꑋꉒꐊꇁ,
  ꊸꑋꄂꐊꁧꑴꄷ,
  ꄂꐎꀒꆺꌺ,
  ꉠꀉꄉꀉꂿꆎꐊꐹꐺꇆ。
  ꉠꉂꇀꅉꌠꆎꐊꐹꐺꇆ……”
  ꄹꑵꅉꑵꅉꆏꆺꄝꑓꁴꊪꌊ,ꏹꃰꏷꃰꃅꑓꋪꈜꀋꂿꇈ,ꋌꅞꇫꑌꄉꀂꄁꂱꏾꁏꌊꑓꁴꌩꂯꇬꆏ,ꊾꈨꊉꆺꊉꆺꃅꋍꐮꌩꏪꇬꈌꐚ。ꑡꈨꉬꂯꉂꅳꀧꋒꄉꅲꇬꆏ,ꌺꃰꌋꅪꑍꂷꋍꇬꀉꂥꆸꌦꌺꋍꇬꀁꂥꒈꌦꃅꐮꏈꌠꌡ:
  “……ꄝ!ꀉꇰ,ꆏꃶꆏꎛꌊꉢꇕꇁꀐꀞ?ꆎꆹꀊꆺꄰꀋꃋꌐꃶꂷ,ꉡꆹꀊꆺꄰꑮꃀꂷ,ꂛꊨꅫꃀꄷꌠꀋꇆ。ꄷꀋꁨꉢꂛꊨꀋꁨꆎꄻꉠꂛꊨꇯꍝꀕꂷꃅꉜꄉꌠ,ꆏꀃꑍꆏꉢꉚꄸ,ꈍꏯꌊꉢꉇꇁꂷꉬ?ꑠꃅꑲꆏꎲꄏꑐꇖꈂꃅꇫꐥꑴꌦꂯ?ꈧꊰꀕ,ꉢꄛꇫꎭ……”ꌋꅪꂶꌠꌗꁮꌗꆐꏂꄉꉉ。
  “ꆎꆹꐙꃅꃀꂷ,ꉡꆹꎭꂵꌹꂷ,ꀊꆺꄰꏯꉜꇬꀉꄂꄡꇝꆿꑍꂛꊨꅫꃀꋒꀋꆅ,ꄚꀊꆺꄰꑠꋍꈁꌒꈀꄸꋋꅲꀒ。ꇯꍝꂛꊨꅫꃀꈨꆹꀋꉬ,ꑽꀋꐥ。ꉣꑊꆎꑌꀊꆺꈍꌺꄷꄡꐛ,ꉡꑌꀊꆺꄰꀋꃋꊿꏑꋋꏢꇤꇫꎭꄉꋍꈚꐛꂿ。ꉣꑊꑲꆀꐯꋭꌠꆏꌧꀕ?ꀊꆺꄰꌺꀋꃋꋋꋒꉪꑊꀋꋭꆏꐚꀕ……”ꌺꃰꂶꌠꋌꄷ。
  ꄚꆏꀋꂓꌋꆀꎭꂵꆿꌺꑋꉬꌠꄇꇖꀕꇈ,ꀋꎺꃅꐙꃀꇭꇱꍃꈾꃷꑠꋇꇢꆣꑌ。
  “ꌞꀋꃋꊐꇈꌞꌺꑮꃀꍯꂯꄷꑠꉪꇬꇯꆽꏀꉌꂵꀂꏽꄀꄡꑟ,ꀋꑗꀋꈨꑠꃅꑲꆏꃈꊭꊾꋲꇁꌠꉬ。ꆏꄝꅀꀋꄝ?ꀋꄝꀐꇬꉢꊾꇴꀐꆺ……”ꀋꂓꀌꈓꁎꏅꃅꑇꇫꈌꐚ。
  ꎭꂵꆿꌺ:“ꆏꄡꏈꃅꄉ,ꉢꉉꆎꇰꂿ,ꉢꎭꂵꆿꌺꁦꋠꉪꄉꈽꄉꃅꌠ,ꀋꉪꀋꏣꈜꀋꎼ,ꀋꍣꀋꁻꒉꀋꈭꌠ。ꉢꆎꂷꌠꄻꉌꂵꈐꇓꊎꈍꑍꈓꉂꅷꇁꌠꀃꑍꑲꆀꈌꋊꅽꏯꉉ,ꉠꅇꃅꄉꉠꄹꐛ!”ꄷꌦ。
  ꀋꂓꀱ:“ꆏꈍꑍꈓꉂꄿꂿ,ꉠꃹꀋꅐ,ꉠꉈꀋꁒ,ꆏꉡꉂꑴꇬꉢꆏꀋꉂꃅꄉ……”ꄷꌦ。
  “ꅽꀊꆺꈍꌺꂶꌠꑡꈨꉢꏭꀋꋌꀒ,ꆏꉢꀋꉂꑲꆏꅽꀊꆺꈍꌺꉂꀕꂸ……”ꎭꂵꆿꌺꂶꌠꒊꅍꀖꏭꃅꈌꐚ。
  “ꄝ,ꃅꇢꈧꊰꀕꉢꄛꇫꎭ,ꆏꉢꄛꇫꎭꑲꆏꑞꌤꑌꀋꐥꎴꀕꃅꉠꇬꇈꊎꍹꏿꇫꎭꂿ。”ꀋꂓꂶꌠꀅꌳꃅꇬꏭꅰ。
  “ꆏꀉꑳꌕꈎꂷꉬꑲꆀꅇꅲꈜꀋꐛꂷꅀꑡꉬꀒ?ꉢꉪꄉꈽꄉꃅꌠꄷꆏꈨꀐꀞꄜ?ꄝꇫꎭꉆꈨꉬꑲꆏꅇꂷꁌꀋꐥꈨꉥꑠꌌꆏꉇꇁꅀ?ꈅ,ꉥꑣꀕꃅꉠꅇꃅ……”ꆹꀠꆹꉈꃅꐯꏀꐺꐤꁮ,ꎭꂵꆿꌺꂶꌠꑌꌗꁮꌗꆐꏂꃅꄉ。
  “ꉢꑡꐛꅹꅽꅇꃅꀒ?ꄝꄜꀒ?ꀋꄝꀐꇬꉢꇯꍝꃅꊾꇴꀐꆺ……”ꀋꂓꃃꋤꀕꃅꋌꄷ。“ꑡꐛꅹ?ꉢꅽꁦꋠꉬꐛꅹ!ꆏꁨꇴꂸ,ꀃꌐꊾꂷꆏꇴꄚꅐꇁꇬꆹ,ꅅꃅꌊꉢꈴꇫꎭꌠꉬ!”ꎭꂵꆿꌺꑌꃃꐯꃃꀐ。
  “ꑡꁦꋠꀑꑊꀋꈁꉌꁏꑓꆽꑠꂷꉬꀒ”ꄷꇈꀋꂓꎼꎭꂵꆿꌺꁧꇉꇬꋉꐤꁮ“ꍠ——”ꃅꂿ。
  ꎭꂵꆿꌺꑌ“ꉢꎭꂵꆿꌺꁦꋠꀑꑊꄷꀋꁧꀑꇬꑌꀋꈁꌠ,ꉢꆎꂷꄝꀊꆺꈍꌺꁵꑲꆏꑡꃅꇮꀋꐚ“ꄷꇈ“ꀧ——”ꄹꀋꂓꋌꄌꇬꄚꀐꐤꁮ。ꀋꂓꂶꌠꀌꈓꁎꏅꃅꋍꃢꑇꇈ,ꑇꑆꑇꀋꄿꇬꆏꌨꈓꃅꑳꉨꇫꈌꐚ。
  ꐙꃅꃀꌠꂴꆏꀋꂓꇫꉬꀋꅲꑲꆏꄝꇧꎭꇧꎭꇚꑴꉂꉘꇉꄉ,ꀋꃉꆏꋌꎼꇫꁌꒉꄷꀋꁧꑭꃺꇇꃿꇙꋏꑌꄹꀋꀬꃅꉌꂵꂶꌠꀉꄂ“ꄐꀕꄏ”ꄹꐂꌊꄷꈐꊎ“ꐗꌩꄃꌩ,ꌩꀋꏓꀋꏓꌌꁈꇨ,ꀃꌋꇯꆐꄡꀋꇁꃅꌊ,ꋍꑵꇯꆐꊿꊣꊾꃹꅍꐥꀐꌠ”ꉂꉌꆐꅑꀱꍠꃅꇫꑌ,ꉈꑴ“ꎭꈓꄷꄉꆐꃅꇬꇉꊎꇮꇬꈍꃅꂯꀋꆾ”ꉂꀋꂓꎁꃅꐒꌦꄉꏽ。
  ꈍꉗꏢꐛꇬꑲꆀꎭꂵꆿꌺꂶꌠ:“ꀈꉐ,ꉠꀉꑳꐥ,ꄡꉩꀐ。ꄡꉩꑲꆏꉢꎬꐚꃼꌊꆎꍈꇁꂿ。ꍰ,ꀈꍂꆏꑴꅉꁏꇰ,ꉠꆼꁠꆏꌃꑅꈘꀐ”ꄷꒊꅍꀖꇫꈌꐚ。
  ꀋꂓꆹꄡꇗꌨꈓꄹꉩꇫꈌꐚ。
  “ꆏꇬꃴꀙꀐꀞꂼ,ꈅ,ꉢꇬꉚꉏ。”ꎭꂵꆿꌺꈌꍚꉏꑐꈩꄚꊐꅰ。
  ꀋꂓꄡꇗꌨꈓꄹꉩꇬꎷ。
  “ꄓꀕꀕ,ꀈꍂꐯꀐꐯꀐꄷ,ꑡꂷꉩꅍꐥꀒ。ꍰ,ꅽꏯꄡꑇꄡꑇꄷꀋꄿ,ꅽꀂꏾꁉꍰꀖꑘꇗꋒꀋꇬꀐ。ꈅ,ꄓꀍꈪꑌꄉꉢꍧꇫꎭꂿ,ꀃꌐꑠꃅꀁꇬꁧꇬꆹꊿꌧꅐꇁꉆꌠꉬ”ꎭꂵꆿꌺꇬꅰꇰ。
  ꀋꂓꄡꇗꌨꈓꄹꉩꇬꎷ。
  “ꉢꅽꌩꐒꄉꂿ,ꉆꐥꃅꀂꏾꄻꅑꄉꌩꀵꀁꇬꁧꄿꀐ。”ꎭꂵꆿꌺꁁꎰꁁꎰꃅꌩꐒꇫꈌꐚ。
  ꀋꂓꄡꇗꌨꈓꃅꉩ。
  “ꆏꉌꂵꐒꑟꀋꌸ,ꀃꑍꋋꁁꏯꃅꊾꂷꄷꀋꁧꎅꂷꑌꐜꀋꈨ,ꊿꋋꐚꌠꀋꐥ。ꊁꀅꌳꃅꑲꆏꉣꑊꋍꑷꋦꎂꀕ,ꃣꈌꃅꃴꆸꏢꀋꐥ,ꀊꆺꑠꑷꈀꋩꋋꏦꀒ,ꐒꑟꀋꌸ。ꈊꃀꃭꉱꄡꏮ。ꉢꁧꀐ,ꆎꑌꏛꃅꌩꀵꀁꇬꁧꄿꀐ”ꄷꇈꎭꂵꆿꌺꂶꌠꑮꏸꅉꃅꇁꄿꀁꏾꋖꁧꀐ。ꋌꎸꄑꉆꅥꁧꂯꄷꅐꇁꌠꉥ,ꀋꃅꑌꉆꅥꁧꇈꀱꇁꎴꀕꃅꀱꀁꇬꁧꌠ。
  ꎭꂵꆿꌺꈀꑟꅉꑟꇬꑲꆀ,ꀋꂓꂶꌠꌨꈓꄹꉨꅉꃅꑭꁘꍠꄚꍠꀋꄚꃅꌩꃣꌠꀵꌊꐙꃅꃀꇭꏢꁮꎰꒉ。
  ꀋꂓꂶꌠꇱꋓꁏꁧꑊꐛꇬꑲꆀ,ꐙꃅꃀꇭꍕꑕꄉꑋꀕꌋꆀꇵꆹꈢꀐꂶꌠꏮꅷꇱꋓꀉꁁꏢꇬꄉꈁꇁꉈꃅꀊꍆꌩꇵꑠꄍꋌꉅꇱꄓꐕꌊꀁꇬꁧ。
  ꌞꊿꈧꌠ:“ꄚꆏꀕꌩꇺꄻꋍꑊꀀꅉꇬꄩꀕꀐꇆ”ꃅꅲꇬꆏ,ꐙꃅꃀꇭꄹꇬꀂꇬꀋꄩꄷꉉ。ꉡꆹꌉꇫꄉꇬꑌꉢꋌꀋꑇ,ꀋꄩꑲꆏꑡꃅꊿꋋꑍꂷꈎꆪꇢꊭꀋꄀꃅꐯꈽꄚꈴꁧꀌ?ꄩꄷꀋꁧꏷꌩꀕꇺꀉꆈꀕꌠꄩꀑꋭ。
  ꈊꃀꆏꐙꃅꃀꇭꎼꑡꑌꀋꐚꎴꃅꀋꂓꄰꅍꈛꄜꒉꇬꆏ,ꀋꂓꂶꌠꀂꏾꈎꂣꈓꇱꄉꇫꑌꇈ,“ꇐꇭꀋꇿꃅꀋꐛꌑ”ꄷꇬꆏ,ꀋꂓꀂꏾꀍꉀꀋꐕꃅ“ꌩꏓꁧꇈ,ꌩꏶꑓꋪꇬꄀꇆ”ꄷ。ꀈꑘꁠꄻꉏꎴꂶꌠꑌ“ꉠꀋꂓꑓꋪꆅꌊꋙꑌꋠꊁꀋꉂꀐꍰ。ꃀꇭꀋ,ꈍꃅꂯ”ꄷ。
  “ꋋꆏꋂꑍꇯꃪꁁꋋꇬꄟꄉꃹꉚ。”ꐙꃅꃀꇭꑌꁨꍬꄉꉉ。
  “ꇿꈁꀋꐚꀐꆏ?”ꀋꂓꀂꏾꀍꉀꊼꇅꐕꇈꒈꌦꄷ。
  “ꇿꑴ,ꑓꋪꌩꏶꌠꆹꋋꈨꂾꑍꁘꀋꆹ”ꄷꃀꇭꂶꌠꋍꃢꑌꇈꀀꁧ。
  ꀋꂓꌋꆀꐙꃅꃀꇭꑍꁯꑳꈧꌠꆹ“ꋍꐽꑍꄀ”ꄮꇬꋈꄉꌠꉥ,ꑳꑊꋍꂷꃅꊖꁋꏮꀉꄂꇢꊭꄀ,ꐷꈭꑌꋍꂷꃅꑡꑌꐮꂿꐮꈨꉆ。ꀊꋩꄹꉇꈭꐨꎭꂵꆿꌺꀋꂓꄰꃱꉱꈍꑍꉔꋌꍠꇬꊎꌦꇈ,ꊁꆏꀋꂓꂶꌠꃱꉱꇬꀋꈜꄉꀋꏮꅊ,ꎭꂵꆿꌺꌗꋏꄷꆏꋌꁉꈐꏭꊐꃅꀋꐚ,ꃆꅉꎭꂵꆿꌺꂶꌠꋍꀁꇬꋌꎼꋌꈴꌠꌟꃅꐺꀐ。HcD彝族人网

 HcD彝族人网

ꁰꄻꌠ: 阿着地 ꄜꃑꌠ: beley ꌤꃅꅉ
ꂴꁬꌠ:ꏦꑳꆈꋧꋪ,ꉌꆐꀱꍠꀕ...
ꊁꁬꌠ:ꀋꂓ(ꑍ)