ꉒꈌꈬꇬꉂꏣ(ꊛꄀ)
ꄜꃑꄮꈉ:2013-01-29 | ꁰꄻꊿ:ꀉꈌꏬꌋ ꇁꀦ:《ꉒꈌꈬꇬꉂꏣ》 ꉜꃷꁨ:

        kOd彝族人网

《ꉒꈌꈬꇬꉂꏣ》ꀑꐱꄜꇐkOd彝族人网

《ꉒꈌꈬꇬꉂꏣ》ꄯꒉꋋꋐꆹꁰꄟꀉꏀ、ꀺꇐꇣꋲ、ꐋꀋꌡꉺꃅꐙꌠꆈꌠꌧꈿꁱꇐꀉꎴꋐꉬ。kOd彝族人网
  ꀊꄙꊰꉐꈎ、ꊰꉐꃘꊰꈎꃅꐙꁧꌋꐧꋦꇬꄉꆄꇖꌠꆃꎭꆈꌠꃅꄷꆹ,ꇰꀋꃀꌠꄈꅿꋯꁦꐥꃅꄺꀱꌠꇗꅉꇂꃴꄉ,ꀉꁌꁮꅉꌧꌠꀋꏮꀀꐚꐝꍠꀕꃲ!ꋍꅿꎔꇂꃨꇈꁯꇐ ꅑꌠꆹꈍꄮꑌꊽꉌꑟꈺꄲꀕꃅꎍꇬꎷ。ꑠꅹ,ꆃꎭꆈꌠꃅꄷꃥꌋ――ꁌꄝꄩꅐꀐꌠꆈꌠꁏꐚꈧꌠꆹ,ꉌꐡꑓꇗꃅꎹꉼꍗꑴꄇꈜꁤꇅꀕꌠꇬꍬꈴꈭꐨꆏ,ꀊꄶꋀꊇꅿꈭ ꋏꊿꍏꇩꇭꍣꄈꇬꉂꅼꇈꁌꒉꐯꁌꒉꃅꐥꅷꇁ。kOd彝族人网
  ꄚ,ꃣꈌꉌꉪꐛꀋꉆ,ꀋꇴꀋꏢꃅꊭꌸꌠꆏ,ꈀꄸꑌꋍꎴꉘꀋꇉꃅ“ꁰꀕꀉꒉꃅꇝꂱꉻꄑ”ꌤꅐꀐ。ꆈꌠꁏꐚꈧꌠꇱꉜꌊ“ꈭꋏꊿ”ꃅꄉꌠꂱꑱꊐꌠꄈꊈꎼꏹꈧꌠꉬ ꇮꃅꐮꊂꈹꄉꊾꇱꅥꀂꋌꊰꌐꀐ。ꉌꂵꀖꆏꇭꀧꌦꌠꆈꌠꁏꐚꈧꌠꆹꈍꃅꑌꇬꉪꀋꀽꌐ,ꑠꅹꋀꊇꑌꉈꄓꄉꋀꊇꅿ“ꈭꋏꊿ”ꇑꌊꄉ,“ꎹꉼꍗꑴꆈꌠꁏꐚꁡꇤ”ꋈ ꄻꂾꄸꉬꇮꃅꆽꁏꇁꌐꀐ!kOd彝族人网
  ꁰꇐꆹꏟꈯꀕꃅꉪꐪꋋꏢꇬꆼꒆꄉ,ꊋꇨꃅꇭꀧꏦꑳꇬꃹꑴꇬ、ꄚꉌꂵꆹꋍꏅꁧꎁꉪꇬꎷ、ꈍꄮꑌꄈꅿꈲꐪꌊꀑꇬꃅꉜꄉꇬꎷꌠꑤꊈꎼꏹꂷꅿꐛꒌꀋꐯꀉꒆꅉꃅꋌꇱ ꎵꄻꎼꇁ;ꄷꀋꁧꇈꆏ,ꁌꄝꄩꅐꀐꌠꆈꌠꁏꐚꈧꌠꐛꊇꐋꀋꌡꐨꆹꀋꐯꀉꇙꀕꃅꒃꁱꌊꊽꑓꐛꈌꐛꃅꄉ,ꋭꋽꃅꇣꋲꌠꐩꋊꐛꐈꄮꇬꆈꌠꐛꐨꋌꄛꑣꎼꇁ,ꋀꊇꅿ ꉪꇐꈴꐪꌋꆀꃅꐪꑽꑌꐯꀋꌡꌠꇬꈴꄉ,ꆸꉈꃅꀉꆹꌠꐏꁇꌠꅿꎭꏣꋌꇱꄜꋊꎼꇁ,ꋀꊇꆹꐩꋊꀻꎆꈝꃀꇬꄉꎮꑑꅉꃅꄙꑣꌠꉌꊈꃆꂮꉉꄜ,ꋀꊇꆹꐩꋊꀻꎆꈝꃀꇬ ꄉꀋꆏꃅꑇꆜ、ꀋꆏꃅꉪꐙ、ꀋꆏꃅꉘꇉꐨꀉꏀꌠꊌ,ꉂꏣꌋꆀꌂꑘ、ꎭꌠꌋꆀꌒꌠ、ꐥꌠꌋꆀꌦꌠ……ꎔꇂꃨꌠꆃꎭꃆꂮꁱꌠꉬꄿꂿ,ꄚꈐꏭꊥꃀꊿꈧꌠꅿꉂꏣꐝ ꍚꀕꌠꃆꂮꁱꌠꑠꉬꇮꃅꊖꋒꌟꃅꅿꉗꌑꐩꀕꇈꎺꇊꐝꄧꀕꇬꎷ。kOd彝族人网
  ꉪꇐꉂꏣꐋꀋꌡ,ꅇꌬꉐꌬꐨꇣꋲ,ꋋꈨꉬꇮꐈꇁꆃꎭꃄꄸ、ꆈꌠꐛꊈꐋꀋꌡꌠꌋꆀꃅꋊꀻꎆꈳꄟꐛꌐ,ꊋꅼꃅꇭꍣꄈꃪ、ꎹꉼꍗꑴꃪ、ꇰꀋꃀꌠꁍꇩꃪ、ꊿꋅꋯꑌꌠꃪꃅꌠꃅꋊꐛꊈꋌꌌꀨꇬꄉꍖꀴꀮꄑꀐ。kOd彝族人网

ꁱꊿꃆꂮꑍꇬkOd彝族人网

ꀉꈌꏬꌋ (ꀉꈌꒉꁬꂓꌠ),1979ꈎ12ꆪꏪꐦꑤꄉꒆ,ꀩꈆꌶꅐꌠ,1995ꈎ5ꆪꄑꆈꌠꁱꇐꁰꅷꀋꃋꑟꇁ,ꂴꊂꃅꆈꌠ、ꉌꈲꋍꑟꋍꑵꁱꇐ、ꁰꒌ3900ꎖꁬꁱꍑꌊꋍꑟꋍꑵꉜꇐꁱꀕꌋꆀꑍꄜꄯꒉꇬꄀꎼꇁꋺ;ꇩꏤ、ꌜ、ꍏꁱꇐꈁꁠ180ꎖꃢꊌꋻ。ꂴꊂꃅꉌꈲꆈꌠꌧꈿꁱꇐ、ꉌꐡꁱꇐ、ꉙꇐꁱꇐ、ꈋꍣꁱꇐ《ꀉꈌꀉꁌ》、《ꉢꒊꐘꋂꇬꌕꈎꐥ》、《ꂻꉪꏿꌠꆈꌠꂷ》、《ꆈꌠꁱꀕꃆꂮꌧꈿ》ꃅꑠ60ꎖꁬꈨꌋꌊ《ꀋꃋꋋꄮꆈꌠꁱꃀꁱꇐꌋ》、《ꆃꎭꀋꃋꋋꄮꁱꇐꌋ》、《ꆀꉙꁨꐞꄒ》、《ꆃꎭꀋꃋꋌꄮꁱꇐꌋꄉꌠꌧꈿꁱꇐ ꉌꐡꁱꇐ ꉙꇐꁱꇐ》、《ꎧꑱꃅꇢ—21ꋌꋏꆈꌠꉌꐡꁱꇐꌋꄉꌠ》ꑠꇬꇱꄉꌌꄯꒉꅐꅉꄉꄇꄜꋊꃅꅐꋺ。ꀋꃋꆹꍏꇩꀁꑌꊿꋅꁱꇐꑪꉼꀕꑼ、ꆃꎭꍏꁱꃀꑠꉼ、ꆈꌠꌧꇐꑠꉼ、ꁱꒌꍑꑠꉼꀕꑼ,ꏪꐦꑤꊈꄜꉺꀯꃛꀯꍈ、ꏪꐦꑤꏹꍓꍉꍉꍈꄻ。kOd彝族人网

《ꉒꈌꈬꇬꉂꏣ》ꉜꐨꑍꇬkOd彝族人网
ꐛꃭꁁꐷkOd彝族人网

ꁱꐋꀉꈌꏬꌋꃤ《ꉒꈌꈬꇬꉂꏣ》ꆹꌌꉪ《ꆃꎭꉜꇐꁱꀕ》ꇬꊛꄉꄀꋻ,ꀋꃋꉢꄚꇬꄉꋍꌧꈿꁱꇐꀊꎴꋌꋐꁱꌊꃪꀋꃪꃆꂮꉉꂿꄷꌠꆹꀋꉬ,ꁱꌊꈍꃅꐙꌠꆹꉜꌠꊈꊨꏦꇬꉚꑲꆀꍑ,ꉡꆹꄡꇱꄯꒉꋌꁬꅑꄉꉪꆈꌠꁱꂷꁱꇐꀂꏽꑍꇬꌧꂿꄷꌠ。kOd彝族人网
  ꆈꌠꁱꂷꌤꑘꃆꂮꃅꌠꈀꄸꑌꇫꅉꐚ,ꉪꀋꃋꌌꇫꄉꌬꌠꆈꌠꁱꂷꋋꈨꆹ,ꃶꐚꀕꃅꇬꆏ1980ꈎꑲꆀꆈꌠꉹꁌꋍꏅꊈꈀꄸꑌꇫꌬꈴꌠ,ꈜꀕꇈꆈꌠꁱꂷꌊꁱꇐꁱꌠꑌꋋꄮꅑꅷꁧꑲꆀꐥꌠ,ꑠꅹꉪꆈꌠꁱꂷꌊꁱꇐꁱꌠꐩꋊꆹꀁꎴꐯꀁꎴꑴꌦ,ꃅꈎꃅꌗꇬꌕꊰꈎꐛꄉ。ꉪꆈꌠꁱꂷꁱꇐꃅꇬꆹ,ꀒꋏꇐꀳꇐꏢꑠꇨꇈꌠ,ꌧꈿꁱꇐ、ꉌꐡꁱꇐꃅꑠꆹꉪꄯꒉꄀꅉ《ꆃꎭꉜꇐꁱꀕ》、《ꆃꎭꑍꄜ》ꋯꑌꋋꑍꈚꐥꈭꐨꑲꆀꁱꌠꊈꌞꁰꁈꌷꄉꁱꅐꇁꌠ,ꑠꅹ,ꀋꇎꀋꂪꅈꀉꒉꃅꐤꎂꀕ!ꉉꄻꀋꅐ,ꋋꐛꅹꃅꉪꆈꌠꁱꂷꁱꇐꑠꑌꌞꀉꁁꊿꋆꀉꏯꏃꁌꆞꇤꒉꃅꀋꐛꌠ,ꑠꅹꀉꈌꏬꌋꐋꀨꌧꈿꁱꇐꀊꎴꋌꁬꁱꅐꇁꇬꆈꌠꏭꑆꊋꀉꒉꐯꀉꒉꃅꐥꌠꉬ,ꆈꌠꁱꂷꉜꇐꁱꇐꇣꋲꐨꌋꆀꃷꁨꃅꋌꌋꋍꐕꄩꅐꀐꌠꉬ!kOd彝族人网
  ꋌꃀꉪꆈꌠꁱꂷꌧꈿꁱꇐꀊꎴꌠꉢ《ꊒꇭꇈꊂꁨꄮꇬ》ꃅꑠꋐꁱꅐꋺ,ꀋꃋꏬꌋꃤꋌꋐꆏꑍꋐꌠꀉꄂꉬꑲꌦ,ꑠꅺꂿꄐꀋꂿꑘꃅꐥ!ꉘꇈꌠꆏꉪꆈꌠꁱꂷꌧꈿꁱꇐꀊꎴꌠꑋꊂꂸꃃꀉꏯꀱꋒꀕꃅꇫꅐꇁꑟ!kOd彝族人网
  ꉡꆹꆈꌠꁱꇐꀂꏽꌤꃅꊾꂷ,ꑠꅹꏬꌋꃤ《ꉒꈌꈬꇬꉂꏣ》ꄷꌧꈿꁱꇐꀊꎴꋌꁬꌌꄯꒉꅏꅉꇬꄉꍑꅐꇁꂿꄷꀐꃅꈨꇬꆏꈯꇿꏿ!ꉘꇉꌠꆏꉜꌠꊈꇫꂿꈬ,ꇬꉚꏾꅊꇈ!kOd彝族人网

ꇗꄃꀕꌠꐩꋊꒊꃀꏣꅉꎴkOd彝族人网
——ꀉꈌꏬꌋ《ꉒꈌꈬꇬꉂꏣ》ꌐꀺꅇꇬꄜkOd彝族人网
ꀉꑗꃇꎓkOd彝族人网

ꀋꃅꋋꑍ,ꃰꊿꆹꁰꁱꈁꈉꌠꀉꑌꑵꃅꐙꇄꌠꇬ,ꂱꑱꉌꃀꂱꑱꑌꄉ,ꂱꑱꊿꋅꅇꂷꁱꂷꌌꄉꁱꇐꁱꌠꆹ,ꁌꇐꈤꐨꑞꑌꇫꎃꊐꀋꉆꐛꅹ,ꉪꊇꈀꄸꑌꇫꂿꈬ﹑ꇫꌶꄻ﹑ꇫꄜꉺꄡꑟꌠ。ꑠꃅꄉ,ꂱꑱꊿꋅꅇꂷꁱꂷꁱꇐꌌꐳꃅꃪꃅꀻꎆꆹꎻꌠꆹꁱꊿꈧꌠꂿꃆꀉꄂꀋꉬ,ꉈꑴꊿꋅꁯꀋꉬꀐꇬꇩꏤꂷꅿꂿꃆꑌꀒꉬꑟꀐꌠ。kOd彝族人网
  ꉪꊇꈀꄸꑌꅉꐚ,ꆈꌠꁱꂷꌌꄉꌧꈿꁱꇐꁱꌠꆹꃅꐎꌕꊰꈎꎖꀉꄂꐛꑴꌦꇬ,ꊌꐨꆹꊼꇅꀉꒉꃅꐥꀐ,ꄷꀋꁧꋍꈨꋋꈨꆹꁎꆦꌊꀉꁁꊿꋅꈧꌠꀨꄉꉈꏭꑌꊼꇅꁧꏖꐨꐥꀐꌠ。ꄚꈍꃅꉉꄿꂿ,ꁱꊿꆹꆈꌠꁱꂷꌧꈿꁱꇐꌌꄉꏓꌊꋍꋐꃅꅐꇁꌠꆏꀁꑌꇨꄉ,ꉪꊇꉹꁌꋍꏅꌠꉌꊈꈁꈉꐨꌋꆀꐮꄐꊒꇁꀋꉆꑴꌦ。ꑠꅹ,ꆈꌠꀕꏀꁱꃀꀉꈌꏬꌋꆹꆈꌠꁱꂷꌌꄉꌧꈿꁱꇐꀊꎴꌠ《ꉒꈌꈬꇬꉂꏣ》ꄷꑠꋐꁱꅐꇁꌠꆹꉪꊇꉘꇉꐨꑌꉬ,ꉈꑴꆈꌠꀕꏀꁱꊿꋍꋏꉀꒆꆸꇰꌠꑌꑓꀠꀕꄚꄉꉜꅐꇁꉆꀐꌠ。kOd彝族人网
  ꀑꐱꃅ《ꉒꈌꈬꇬꉂꏣ》ꉜꑲꆏ,ꆃꎭꃅꄷꀀꃅꑋꈌ﹑ꃅꀹꈨꑴ﹑ꃰꊿꐥꐨꈍꃅꐙꌠꄆꒌꃑꌠꌟꃅꒌꄹꉪꂾꐛꇁꌐ。ꄚꇬꁱꇐꈀꁱꌠꄮꈉꀊꎴ﹑ꈥꇬꀉꑌꑴꇬ,ꈍꃅꄉꄈꏃꂠꌠꇂꃴ,ꆈꌠꎭꌺꅧꌺꋍꏅꄩꅐꌠꆼꒆꄉ,ꃰꊿꐰꇑꈋꁈꈍꃅꐙꌠꋌꍔꄜꅐꇁꇈ,ꃰꊿꌋꆀꃰꊿ,ꃰꊿꌋꆀꐧꋦꐮꑌꑲꐨꌼꇪꌠꑌꋌꇱꑋꁮꈻꎼꇁꌐꀐ。ꄚꈐꏭꐧꋦꐛꐪꑞꊭꁱꄿꂿ,ꁱꊿꆹꈍꃅꑌꋍꉜꏣ:“ꇭꍣꄈꃪ﹑ꎹꉼꍗꑴꃪ﹑ꇰꀋꃀꌠꁍꇩꃪ﹑ꊿꋅꋯꑌꌠꃪ”ꋋꏢꉉꀽꄎꇬꎷ,ꋋꆹꁱꊿꐩꋊꈴꈜꇬꄉ,ꏓꊭꎼꇁꌠꁱꇐꋌꋐꅿꉉꀽꐨꉬ。kOd彝族人网
  ꌧꈿꁱꇐꆹꉪꄐꏿꐨꐥꑴꇬ,ꁱꇐꋌꋐꊿꇳꉻꐛꒌꒂꄻꌊꌦꑌꐳꑌꇈꀋꐯꀉꇙꀕꃅꐙꄉꊿꇬꉚꇫꀘꏾꃅꐙ。ꁱꊿꆹꄚꈐꏭꄉꊾꅿꇴꉻꐛꄟ﹑ꃅꐨꃄꄟ﹑ꅇꂷꉉꄟꌋꆀꉌꂵꉪꐨꋋꈨꈴꄉ,ꁱꇐꇬꊿꀋꉬꀋꉆꌠꂚꄏ﹑ꑸꆀ﹑ꀈꏦ﹑ꃴꄿꏁꍅꏤꇴꉻꐛꒌꄞꅐꃅꐙꑠꈨꀋꐯꀉꒆꅉꃅꋌꒂꄻꉪꂾꐕꄉꀐ。ꋀꊇꆹꐩꋊꀻꎆꈝꃀꇬꄉꀋꆏꃅꑇꆽ﹑ꀋꆏꃅꉪꐙ﹑ꀋꆏꃅꏀꀺ,ꋀꊇꉂꏣꌋꆀꌂꏣ﹑ꎭꌠꌋꆀꌒꌠ﹑ꐥꌠꌋꆀꌦꌠꑠꉜꇊꎺꇊꑟꇫꎍ。ꋋꈨꇬꄉꋀꊇꅿꑌꇐꑲꇐꌋꆀꉪꇐꏡꇐꉜꅐꇁꉆ,ꋋꈨꇬꄉꋀꊇꅿꊫꂫꎹꈹꌋꆀꊿꋅꉌꊈꉜꅐꇁꉆ,ꋋꈨꇬꄉꋀꊇꅿꊇꅉꐛꄟꌋꆀꐥꐨꈻꇐꉜꅐꇁꉆ。ꋋꆹꌧꈿꁱꇐꋌꋐꁱꌊꐛꒆꅉꌋꆀꊋꐛꅉꉬ。kOd彝族人网
  ꉇꃅꄉꇬ,ꁱꇐꋌꋐꌧꐨꌧꈜꑌꀉꑌꑵꃅꌬꄉ,ꄇꄜꋊꄉꁱꌠꂿ,ꋯꁧꏮꄉꂁꐪꐥꃅꁱꌠꂿ,ꑭꋧꄡꑟꑟꋧ,ꐱꏓꄡꑟꐱꏓ,ꉉꋭꅉꉉ,ꇱꋭꅉꇱ,ꄷꀋꁧꎂꄉꌧꌠ﹑ꇢꎙꄉꌧꌠ﹑ꏵꀠꄉꌧꌠꑠꐯꏍꐮꄅꃅꁱꎼꇁꄉ,ꌤꆿꐛꐪꐛꊀꌋꆀꁮꅉꅐꀦꅐꄩꀑꂪꃅꐝꉅꌊꉾꇈ,ꉜꐋꉪꐨꑌꄚꈿꏭꅉꐯꇁꄎ。kOd彝族人网
  ꋌꀋꆆ,ꉬꃅꉬꌠꑌ,ꉪꊇꌧꈿꁱꇐꋌꋐꌌꄉꑭꀕꋧꀕꃅꉉꍣꂿꄷꇬꆹ,ꋍꂷꉜꐨꋍꉙꃅꐙꏭꐛ,ꋍꂷꊌꐨꋍꑵꃅꐙꏭꐛ。ꋋꆹꌌꌐꀺꅇꇬꃅꄉꄜ。kOd彝族人网

 ꉂ ꏣ ꎵ ꑳ ꀕkOd彝族人网
——ꉠꆀꉙꁱꇐꁱꃆꂮꑍꇬꌧkOd彝族人网

ꁍꁇꋦꁍꆀꃅꇣꄧꋋꂷꆹ,ꉢꏮꈍꏯꄉꉜ、ꈍꏯꄉꁱꄿꂿ,ꐥꍂꃅꉂꑟꅑꇈꁱꌐꇁꀋꉆꌠꌺꇖꊂꋊ,ꋍꋏꇈꋍꋏꃅꄚꇬꄉꑲꅉꇤꂷꆊꅑꑠꏬꎹꊌꇬꎷꐛꅹ,ꉡꆹꉠꈯꉢꋋꀋꌅꃅꄚꄉꄓꆀꉙꁱꇐꁱꌠꉬ。ꇯꍝꃅꉉꄹ,ꉢꆀꉙꁱꇐꁱꌠꆹꉠꐥꐨꐥꄷ、ꉪꇐꏡꇐ、ꀑꇬꉂꏣꌋꆀꐮꐞꀋꉆꌠꉬ。ꆀꉙꁱꇐꆹꌌꉠꉪꏣꈴꐨꋊꄏ、ꌌꉠꋧꃅꐥꐨꄜꋊꄛꑣꌠꉬ。kOd彝族人网
  ꆈꌠꁱꂷꆹꆀꃅꆈꌠꅿꁱꀕꍸꇐꑵꉬꇈꆈꌠꐮꏯꑋꑳꇬꌫꉂꌫꈾꑵꉬ。ꄚꆀꉙꁱꇐꆹꌌꉠꏯꄉꉉꇁꇬꆹ,ꋋꆹꉠꉪꇐꈝꃀꉬꐛꅹ,ꉠꉪꇐꋋꇱꏃꌊꀑꇬꁦꀑꐂꄉꉌꃀꒊꌋꀕꇬꎷ;ꆀꉙꁱꇐꆹꌌꉠꏯꄉꉉꇁꇬꆹ,ꋋꆹꋧꃅꀉꁁꂷꑌꉬ,ꋋꆹꀋꃅꋋꄮꐛꐪꌋꆀꐯꌼꐮꐊꐺꌠꋧꃅꂷꑌꉬ。ꉡꆹꋧꃅꋋꂷꇬꄉꑴꅍꏦꅍꀋꐥꃅ,ꆀꉙꁱꇐꌌꉠꉌꂵꈁꉪꀕꌠꀑꇬꈻꇐꑵꃅꄉꅽꏯꅇꃅꉌꌤꀺꇬꎷꌠꉬ。ꑠꅹꉡꆹꀊꅰꃅꆀꉙꁱꇐꏭꈁꎭꀕꇈꇫꂿꈬ,ꄚꄉꉡꆹꁍꁇꃤꑡꑌꒌꆠꐥꌐꌠꉪꇐꌌꄉꋧꃅꉜꄉꁱ,ꆀꉙꁱꇐꌋꆀꁦꀑꇓꂵ、ꒊꃀꒉꌺ、ꃅꉒꃅꄂ……ꑠꑌꉬꇮꊨꏦꒌꆠꐥ、ꊨꏦꋧꃅꐥꇈꊨꏦꐰꇑꈌꁈꁨꌐ。kOd彝族人网
  ꀋꋓꀋꉪ,ꃅꑍꃅꉖꆹꌩꏾꊰꃅꊰ,ꊯꅉꄕꅉꑟꇬꎷ。ꋍꈓꋍꃢꃅꀕꋆꂶꌠꈳꅐꄷꑲꆏ,ꑋꈌꂶꌠꑌꄚꄉꊽꏯꇇꃭꇬꎷꑟꃅꑵꉬꅊꇈ。ꃅꑍꋚꀋꍈ、ꃅꉖꒉꀋꄐꃅꉢꒆ30ꎖꈎꐛꀑꅊꇈ,ꉢꄓꆀꉙꁱꇐꁱꌠꑌꊰꎖꈎꐛꀐ。ꃄꐎꊰꎖꈎꅑꅷꇁꌠꆏ,ꉠꉂꏣꉂꑟ、ꇵꂷꑓꁴꈍꑋꆀꉙꁱꇐꐊꄉꅾꁮꇙꇈꂶꅑꀭꇗꀕꑌꀋꐚ……kOd彝族人网
  ꇯꍝꃅꀋꎺꄮꀋꐥ,ꀋꎺꇁꀋꉆ。1993ꄹꈎꃅꍵꆿꇂꏮꁦꏂꄮꇬꆏ,ꉡꆹꉠꃅꄷꒊꃀꒈꌺ、ꁧꀐꂚꃨꐞꄉꇁ,ꀉꁌꀉꂵ、ꀉꄉꀉꂿꅿꉙꅇꂘꅇꉅꇊꉌꂵꊐꃅꐞꄉꇁꌊꏪꐦꐧꌶꅉꇬꄉꌧꇐꂿꇐꊙꈹꇁ。ꇁꌊꌶꅉꋋꂷꇬꑟꇁꄷꆏ,ꆀꉙꁱꇐꇆꅽꉣꑊꆹ,ꀋꌧꆗꑍꍈ,ꄛꆏꏣꑟꐛ,ꄷꀋꁧꐮꉂꐮꑟꅷꀃꑍꀋꃋꋋꄮꇬꑟꇁ,ꄷꀋꁧꉡꑌꆎꐊꅽꊂꈹꄉꋍꑍꋍꉙꃅꒆꀉꒉꅉꐚ,ꃰꊿꈝꃀꇬꄉꊌꐨꏃꁌꆿꇤꒉꃅꆏꄖꆏꌞꊷꇅꀕꃅꉠꇇꈐꊐꀐ。kOd彝族人网
  ꇯꍝꃅꀋꎺꄮꀋꐥ,ꀋꎺꇁꀋꉆ。1995ꈎ12ꆪꇬꃅꑍꂄꑠꄹꉇ,ꉠꁱꇐꉘꃀꁬꌠ《ꏬꑋꅉꈩꆹ》ꄷꁬꌠꆹ,ꎭꈐꂄꎔꄉꀋꋽꌠꇇꄻ,ꇂꈪꌠꃙꍬꃅꁰꄻꊿꐋꀨꈧꌠꇱꄻ《ꆃꎭꉜꇐꁱꀕ》ꋐꌠꇬꄀꎼꇁ,ꄚꄉꉠꂓꉠꌗꆎꄜꆀꃅꇖꈋꆀꃅꌺꇖꇰ,ꋋꆹꉢꁱꇐꁰꄻꈝꃀꇬꑭꁘꂴꁗꌠꉬ,ꋋꆹꉢꆀꉙꁱꇐꁰꄻꈝꃀꇬꄉꉢꊴꊊꌠꉘꃀꂚꃨꀭꌠꇆ!ꄚꄉꁱꇐꋌꁬꉠꏣꀋꑌꐨꋌꄖꄑꌊꑭꁘꊋꑌꃅꁱꇐꁰꄻꈝꃀꋋꏢꇬꍬꆹꀐ。kOd彝族人网
  ꁱꇐꐈꇁꉌꊋꐛ,ꉌꊋꐈꇁꃅꇏꐛ。ꋍꑟꋍꑵꁱꇐꑠꆹꀋꆏꃅꉢꇱꁱꇩꏤꑭꊂꑍꄜꄯꒉ、ꉜꇐꁱꀕꑠꇬꄀꎼꇁꋺꇬꎷ。ꀊꅰꃅ1998ꈎ7ꆪꄮꐰꆏ,ꉠꁱꇐꁬꇩꏤꑭꊂꃅꈁꁠꋍꉎꀋꐥꏠꌠꊌꋺ。ꅑꅷ1999ꈎꌶꅐꄮꇬꑟꄉ,ꉪꀒꎂꂘꃀꌶꅉꌶꅐꌠꌶꌺꌧꇐꂿꇐꋊꇤꊿꀦꌠꃅꄮꇬꆏ,ꉡꆹꉠꂘꃀꌷꐋꈧꌠꅿꉌꇬꌠꇂꃴꄉ,ꉠꅿꁱꇐ250ꁬꌌꌶꅉꁱꀻꀉꒉꐮꀉꒉꂶꌠꇬꄀꄉꄻꌶꅉꑭꊂꋍꏅꌷꐋꂘꃀꊈꀨꌠꃅꑠꃢꀞꊋꐛꋺ,ꄷꀋꁧꉠꅿꁱꇐꌶꅉꇬꇱꎴꌌꎺꄅꃅꁨꇈ,ꀊꅰꃅꁱꇐꄻꊿꀦꋌꃢꀞꄮꇬꆏ,ꌶꅉꇬꏲꌋꎭꂵꄇꇬꂘꃀꂶꌠꆹ,ꉇꃅꉠꅿꁱꇐꄻꊿꀦꋋꃢꇬꅇꁰꄜꋺꄉꉠꇬꈐꊟꊋꊡꐨꀉꒉꐮꀉꒉꃅꐥ,ꄚꄉꉠꂓꋋꍈꌶꅉꇬꂘꃀꌷꐋꃅꇬꀋꌧꌠꀋꐥꀐ,ꋋꑌꇯꍝꃅꅽꑆꊋꉬꑴꇆ!kOd彝族人网
  ꌶꅐꄉꆀꃅꁡꇤꐥꄉꆀꃅꊂꋊꉙꂘꈭꐨꆏ,ꆀꉙꁱꇐꅽꉣꑊꉂꏣꆹꀊꅰꃅꈜꀕꎵꑳꀕꌦꀐ。ꀊꋨꄮꇬ,ꀊꄶꉠꐤꅉꈬꊯꈬꉘꑣꀊꋨꂷꇬꄉ,ꆀꉙꁱꇐꅽꉣꑊꉂꏣꆹꋋꃀꏮꀋꋌꇫꎍ。ꑠꅹ,ꉡꆹꌤꃅꌐꊂꉌꌤꑓꀖꄮꇬꆏ,ꅉꀕꃅꅽꏯꉂꑟꄜꇬꎷ,ꅉꀕꃅꉂꏣꄯꒉꆹꋍꁬꆏꋍꁬꃅꉢꁱꌊꅽꏯꅇꃅꉌꌤꀺꇬꎷꅷꇁ,ꉘꀋꇈꌠꃅꊾꇿꌠꆏ,ꅉꀕꃅꉂꏣꄯꒉꁱꌊꅽꏯꅇꃅꉌꌤꀺꇬꎷꇬꆏ,ꉠꊨꏦꀃꅉꁱꇐꄐꐨꑋꋍꑍꋍꉙꃅꁧꎆꆹꇬꎷꅊꇈꄉ,ꁱꇐꁱꇬꊌꐨꐚꒉꌟꃅꐓꂿꀕꌠꃷꌐꑘꀋꉬꃅꆎꌞꉢꁳꀐ。kOd彝族人网
  ꀋꂿꉌꑟꈻ、ꂿꆏꑓꁴꅐ,ꎺꇊꐝꄧꀕ、ꎺꀱꇊꉠꉌꐡꇬꎷ。ꇯꍝꃅꆀꉙꁱꇐꅽꉣꑊꉂꏣꆊꅑꐛꅹ,2004ꈎ7ꆪꇬꆏ,ꉡꆹꏪꐦꑤꊈꇱꑬꉛꌊꑤꊈꄜꉺꀯꇬꄉꉠꐥꍂꃅꇬꉌꃹ、ꇬꉂꆊꌠꆀꉙꁱꇐꌋꆀꈨꏀꌤꃅꁧꀐ,ꄚꄉꅽꉣꑊꈜꀕꃅꉂꏣꄜꃅꌒ;ꀊꅰꃅ2005ꈎ11ꆪꇬꆏ,ꉡꆹꉘꀋꇈꃅꎆꃀꆿꂷꋍꂷꑌꀋꃹ,ꀊꅰꃅꊽꀑꑊꂷꑌꀋꉜꃅꅇꂷꋍꇬꀉꄂꃅꑤꊈꇱꄀꌊꑤꊈꄜꉺꀯꏹꍓꍉꇬꄉꇯꍝꃅꆀꃅꈨꏀꌤꃅꊿꂶꄻꁧꀐ。ꀊꋨꇈꉈꆏ,ꉡꑌꐞꄚꐞꀋꄚꃅꉠꈬꉘꀉꑳꅳꁖꏅꀋꇮꈧꌠꌋꆀꐮꐞꌊꑤꍰꇓꈓꇫꐥꊿꂷꐛꀐ。ꇯꍝꃅꇬꀖꅇꉉ,ꉡꆹꀋꄷꄸꆀꉙꁱꇐꑠꑵꆹꇬꀋꐥꑵꉬꇮꇬꆹ,ꀃꑍꀋꃋꆹꈐꈍꃅꑌꀊꄶꉢꌷꐋꀊꋨꈨꀋꏭꂘꃀꄻꆀꃅꈬꉘꇿꇫꐥꐺꀋꐚꌠꉬ。kOd彝族人网
  ꉡꆹꑾꌺꑍꐎꐜꄉꅉꀕꃅꏹꇁꒀꃀꂣꈐꇬꊐꇬꎷꂶꀋꏮꆎꉂꅷꇁꇬꎷ。ꆎꆹꉠꂓꉠꌗꆎꄜꋧꃅꇰꌠꀉꄂꀋꉬꃅ,ꂓꉺꑌꀋꃷꎵꃅꆎꇤꉢꁳꋺ,ꃄꐎꈍꑋꈓꅑꅷꇁꌠꆏ,ꉡꆹꂴꊂꃅꋍꑟꋍꑵꁱꇐꌋꆀꁰꒌ3900ꎖꁬ(ꂷ)ꁱꍑꇩꏤꑬꊂꑍꄜꄯꒉꌋꆀꉜꇐꁱꀕꌬ(ꄀ)ꎼꇁꋺ,ꐯꇯꇩꏤ、ꌜ、ꍏ、ꑤꇬꁱꇐꈁꁠ100ꎖꃢ(ꈭ)ꊌꋺ。kOd彝族人网
  ꀋꄹꄷꊿꂷꉠꏯꆎꆀꉙꁱꇐꁱꇬꎖꋪꑟꍈꐥꄷꆹꅲꇮꇬ?ꇯꍝꃅꉢꉉꆎꇰꂿ,ꉢꉜꇬꆹꐛꊈꌋꆀꎖꋪꑠꆹꆀꉙꁱꇐꁱꊿꅿꑞꅉꌐꂷꀋꉬ,ꋋꆹꋌꆀꉙꁱꇐꇬꐞꁧꌠꑊꀡꉬ,ꐛꏦꆹꄡꇗꐛꏦꐛ,ꉈꑴꆀꉙꁱꇐꁱꊿꀒꁨꆹꌠꑭꈏꇓꂵꉬ。ꉪꇗꌧꃀꉪꇗꁳꑊꋌꉱꃀꈹꁧꎼ,ꋧꇗꌧꃀꋧꇗꁳꄵꎭꁧꊰꒃꁧꎼ。ꁍꁈꋦꁍꆀꃅꇤꄧꌺꇖꊂꋊꋍꋏꇈꋍꋏꃅꄚꄉꑲꅉꇤꂷꌆꅉꋋꏬꆹ,ꉠꐥꍂꀋꑍꀋꈤꌠꆀꉙꁱꇐꇁꀦꅿꁍꑗꉬ,ꉠꅿꆀꉙꁱꇐꋧꃅꏟꈯꀕꌠꅉꃀꉬ。kOd彝族人网
 《ꉒꈌꈬꇬꉂꏣ》ꄷꌧꈿꁱꇐꀊꎴꋌꁬꆹ2001ꈎꆏꑭꄑꄉꁱꁬ,2002ꈎꑋꈌꊷꆣꀕꊭꌠꇬꆏꁱꌐꁬ。ꄚꈐꏭꄹꁆꆏꌌꊛꄉ《ꆃꎭꉜꇐꁱꀕ》ꆈꌠꁱꂷꋐꌠꇬꄀꎼꇁꋺ。ꊂꆏꊌꊛꄉꌌꇬꄀꎼꀋꇁꃅꉢꆏꇫꎭ,ꀃꑍꄚꄉꋍꇬꉉꀽꌠꆏ,ꇯꍝꃅꁱꄻꊿꂘꃀꌋꆀꋍꏅꉜꐋꊈꏭꊼꇅꈴꀋꄿꀐ。ꑞꃅꊛꄉꌌꄻꉜꇐꁱꀕꇬꄀꎼꀋꇁꌠꉬꆏ?ꉡꆹꅉꀕꃅꉌꂵꈐꇬꄉꑠꃅꉪ,ꉠꄯꒉꋌꁬꆹꁱꌊꈍꃅꐙꌠꉠꉌꂵꇬꑋ,ꋍꍈꌠꆏꌌꈍꑋꃢꃅꌌꄻꀱꄻꅐ;ꑍꍈꌠꆏꉠꉌꂵꍈꌠꆹꅉꀕꃅꑠꃅꉪꅷꇁ,ꄾꌦꋩꆏꏓꐯꇯꄉꌌꄯꒉꅐꅉꇬꄉꅐꇫꎭꇬꎷꑟꉂꌠ。ꄚꉠꉌꂵꉪꅉꐛꀋꉆꌠꆏ,ꀋꃋꀃꑍꑞꑌꎆꏣꌌꀨꇬꄉ,ꎆꐥꆏꑊꋌꂯꊿꇱꃼꌊꐂꇓꏾꄎꌠꃅꋊꋋꊭꇬ,ꉡꆹꇯꍝꃅꄯꒉꅐꁌꍈꌠꂯꀋꊌꄉ,ꉆꐥꃅꌌꄯꒉꅐꅉꇬꄉꅐꀋꄐꃅꀉꑌꈎꄈꈻꀐ。kOd彝族人网
  ꀋꃋꀃꑍꉠꄯꒉ《ꉒꈌꈬꇬꉂꏣ》ꋌꋐꌌꄯꒉꅐꅉꇬꄉꅐꄏꇬ,ꉡꆹꇯꍝꃅꉠꆀꉙꁱꇐꀎꋏꋍꏅꂘꃀꌋꆀꐋꀨꈧꌠꑠꀋꎺꇁꀋꉆ,ꆍꊇꅿꉙꅇꂘꅇꑗꈈꀕꌠꀋꎺꇁꀋꉆ,ꆍꊇꅿꉂꏣꉂꑟ、ꑆꊋꑠꀋꎺꇁꀋꉆ!ꀉꅰꃅꍰꄖꇓꈓꌧꍧꊿꋅꄯꒉꅐꅉꇫꐥꌠꉠꀿꃶꀉꈌꀕꄸꂶꌠ,ꋍꃀꁨꀋꑌ、ꉌꂵꄅꀋꑌꃅꉠꇬꇇꀤꌠꏭꈁꎭꀕ!ꏪꐦꑤꀕꊈꎼꏹꇍꈩꐎꎆ(ꉌꈲꂓꆏꀙꒄ)、ꑤꍈꁮꒀꃴꇤ(ꉌꈲꂓꆏꒀꑪꉸ)ꑌꏣꀋꑌꃅꆈꌠꊂꋊꆈꌠꁱꂷꌊꆈꌠꁱꇐꁱꌠꁌꒉꄣꅼ、ꋍꑊꏣꀋꑌꃅꉠꇬꈐꊟꊋꊡꇬꎷꌠꏭꈁꎭꀕ!ꉠꐋꀨꎭꂵꈬꏣꏤꃅꋋꈨꅿꉌꎔꑌꃅꉠꇬꇇꀤꇇꄻꌠꀋꎺꇁꀋꉆ! kOd彝族人网
  ꉡꆹꇯꍝꃅꉌꂵꄷꈐꄉꆍꏮꈁꎭꀕꀐ!kOd彝族人网
  ꆍꏭꇗꅉꃅ!!kOd彝族人网
  ꋬꂻꆍꁳ!!!kOd彝族人网
  ꈨꅪꆍꁳ!!!!kOd彝族人网
  ꄽꂫꆏꏓꇁꋍꇬꃅꉉ:kOd彝族人网
  ꆈꌠꊿꋅꊫꂫꐥꍂꁤꇅꀕ!kOd彝族人网
  ꆀꉙꁱꇐꐥꍂꃅꀋꑍꀋꈤ!!kOd彝族人网
  ꅽꉪꉂꏣꐥꍂꃅꀋꑍꀋꈤ!!!kOd彝族人网
  ꅽꉪꊇꉂꏣꐥꍂꃅꎵꑳꀕ!!!!kOd彝族人网
  ꌟꃅꆹꅇꌐ,ꍶꈄꆹꈜꁌ!!!!!kOd彝族人网

kOd彝族人网
ꀉꈌꏬꌋꄯꒉꉜꐺkOd彝族人网
kOd彝族人网
ꀉꈌꏬꌋꁰꒌꍑꐺ
kOd彝族人网
ꀉꈌꏬꌋꀕꆀꀠꃀꐎꁬꃀkOd彝族人网
kOd彝族人网
ꀉꈌꏬꌋꀕꆀꐛꄃꂶꏦ
ꉒꈌꈬꇬꉂꏣ(ꋍ)http://yi.yizuren.com/plus/view.php?aid=118kOd彝族人网
ꉒꈌꈬꇬꉂꏣ(ꑍ)http://yi.yizuren.com/plus/view.php?aid=119
ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:ꆈꌠꎸꑣꁰꁱꏁꇅꁤꇅꁏꌠꆫꃬ...
ꊁꁬꌠ:ꑋꈌꊷꆣꀕ ꁬꃨꅪꋜꀕ...