ꀉꄉꂘꅇꀋꎺꄮꀋꐥ
ꄜꃑꄮꈉ:2012-08-10 | ꁰꄻꊿ:ꏦꌦꆿꉈ ꇁꀦ:ꆃꎭꑍꄜ ꉜꃷꁨ:

ꉠꀉꄉꆹꋍꀿꋍꃀꐊꁰꅐꇁꈽꋪꀕꁍꃴꈚꌠꇬꁧꊂꎼꈎꆏꊝꇉꀕꑍꊏꑋꈓꐛꀐ。ꋌꁦꄮꇬ,ꆅꀋꇖꈻꀋꈻꃅꌕꃅꌕꈈꀕ,ꉪꌺꁮꌺꇖꏭꀂꁍꈿꀿꈿꁧ、ꀿꐊꃀꐊꁧꄉꉬꃅꐥꁧꀑꄷꑌꀋꄹ,ꏃꂷꈁꂷꍈꊭꄎꀀꁳ、ꃢꃅꈚꎔꍈꀨꎹꀂꇢꎼꁧ、ꃄꂷꁆꀁꊪ、ꇋꏢꈎꀂꁳꃄꂿꁧꎻ,ꃮꃬꑌꑿꈨꈎꀂꁳꅸꁧꎻꄷꑠꇬꑌꀋꇖꀋꂟ,ꈂꀸꋌꂭꐯꇯꄉ,ꌋꐓꊿꀀꌐꊂꂶꌠꇬꆏ,ꋌꎼꏸꄹꇫꈴꁧ,ꌺꇖꋌꎼꉘꇉꉘꀋꅐꇧꎭ,ꋌꁧꋋꄹꈎꋌꏃꊰꀉꄂꈎꑴꌦ。ꊿꄹꇬꊾꆹꀋꌦꆏꀋꃀꑵꉬꄷ,ꊿꉉꇬꀿꌗꃀꌗꊷꆣꀕ,ꃰꌗꉈꌗꈺꄂꀕ,ꃱꇌꈪꏣꉬꄷꌠꄚꄉꈤ,ꌺꁮꌺꇖꄚꄉꋌꎼꉘꇉꊂꈘꁨꇬꅜꇈꀐ。jQU彝族人网
jQU彝族人网
   ꉠꀉꄉꁧꇈꉈꉡꆹꀉꄉꀋꉂꄮꀋꐥ,ꎧꏬꎰꃔꂿ、ꅳꍩꎬꄵꂿ、ꂗꍵꑱꃀꂿ、ꃆꇭꃅꃨꂿ、ꃅꍋꃅꊀꂿ、ꌩꈪꇁꄉꌋꆀꀊꈪꀊꏢꀉꌺ、ꈄꀕ、ꀥꄖꋋꈨꂿꄷꆏꀉꄉꎺꀉꄉꉂꇁꑟꃅ,ꑞꃅꆏꉠꀉꄉꆹꐍꋩꏁꋩ、ꐯꋩꎷꋩꀋꇮꇈꉈꀉꁁꌩꃅꂷꃅ、ꇓꉼꀕ、ꊖꁋꄃ、ꑲꋉꇣꄉ,ꌩꊨꇓꊨꑞꑌꋌꀋꇮꅍꀋꐥꄉ,ꊿꃅꁦꋠꋋꂷꆹꋍꑓꋪꇬꊝꌠꉬꄷꆏ,ꑞꑌꋋꇅꃅꋌꌷꐛ、ꑞꑌꋌꃅꇮꂷꉬ,ꋋꒉꄸꃅꀋꉊꃀꋌꀊꏀꃅꄉꄮꇬꌅꃀꄰꑲꋉꋺ,ꑲꋉꌐꄉꑳꃹꄹꉖ,ꋌꆶꀋꇮꇬꌅꃀꄰꇱꌉꇧꎭꀐꌠꉬꄷꊿꑠꃅꉉ,ꋋꆏꆈꌠꇗꅉꃅꇬ“ꆀꃅꅏꆏꀗꑃ、ꌅꑳꋉꌐꆏꇔꇷꌉꑵꉬ”ꄷꄉꑠꃅꌠꉬꄷ。ꀎꋏꇐꀳꇬ:“ꑭꐨꈤꅲꇬꇇꐪꈤꀋꅲ”ꄷ,ꀋꃋꆸꈐꉠꀉꄉꋉꄉꇈꌠꊨꑳꈲꑳ、ꌬꃆꉁꈾ,ꌬꀮꌬꑽꋋꈨꂿꄷꆏꉢꎼꀉꄉꋋꂷꀋꎺꀋꉆ、ꀋꉂꀋꄐꃅꎍꄉ,ꉠꑓꁴꈧꌠꇿꀕꅐꇁꀋꐛ,ꉠꈯꉡꌅꀋꄐꇬꎷ。jQU彝族人网
jQU彝族人网
   ꉠꀉꄉꆹꌞꊿꀉꏮꇴꒉꉺꒉ、ꆧꁨꑭꇇꀊꃚꑵꌠꀋꉬ,ꋋꆏꇴꐭꂷꄸꑴꇬꑬꌈꇇꑴ,ꀑꁮꅺꐳꄉꌧꇐꐋꄩꎆꑵꌠ,ꋍꈭꐨꈌꀺꉏꑳ、ꑌꇐꑲꇐꃪ,ꐭꎹꐭꄉ,ꒉꎹꒉꄉ,ꐭꂿꆏꐭꐋ、ꒉꂿꆏꒉꐋ,ꀺꃅꊈꌐꐊ,ꑳꃅꋊꃤꐊ,ꇮꃅꐋꀨꐊꂷꉬꄉ,ꉪꌺꇖꇫꐥꌠꀉꄂꋌꉂꌠꀋꉬꃅꉠꃅꄷꊿꃅꇫꉂꌐꑠꂷꉬꄉ,ꋌꃀꐚꄮꇬꊿꈫꇌꅐꌊꋌꇯꇁ,ꑻꅰꑻꇅ、ꍶꎭ、ꈿꆦꁁꋐ、ꎆꃀꑠꅐꌊꇁꌠꀋꃷꎵꃅꐥ。ꌞꊿꋍꑞꋍꑵꅐꌊꇬꇯꇁꌠꑍꂱꌕꑵꃅꐥ,ꄹꁆꆏꊈꇴꌐꏦꀂꏽꃅꇁ,ꄹꁆꆏꋊꇴꃣꉻ、ꐋꇴꊇꉻꃅꇁ,ꄹꁆꆏꌦꊿꐤꄮꑆꊋꋌꇤꊾꃅꊿꄉꇈꄉꌌꇁ,ꄹꁆꆏꌦꊿꌺꇖꀉꇨꄉꌺꇖꀑꑊꃅꇁꑠꑵ,ꉠꀉꄉꃤꆹꉪꌺꇖꀑꑊꃅꀕꇁꌠꋍꍈꑌꀋꐊ,ꋋꆏꋍꑴꅉꀂꏽꃅꇁꌠꀉꄂꉬꌐ。jQU彝族人网
jQU彝族人网
   ꉠꃅꄷꊿꀎꋏꊂꋊꃅꇫꈌꐛꌐ,ꈀꋩꉉꇬꑌꉠꃀꌠꋋꂷꆹ“ꆈꌠꌦꌺꂷ”ꄷ,ꋋꆏꉠꃀꌠꀑꁮꀂꏽꃅꉉꌠ,ꉢꉜꃅꇬꑌꌦꌺꆹꀋꉬꑴꇬ,ꀑꁮꐋꄩꎆꑵꌠꆹꉬ。ꑞꃅꆏꉢꎺꇁꊂꃅꋍꑍꅥꉢꄀꀋꋻ,ꈍꃅꇨꇅꃃꑌꇗꅉꇬꈴꄉꂘꇬꅥꌠꏭꀋꋌꃅꉢꎺꄉꃅꇬꎷ。ꆃꎭꂴꅑꄉꂱꇠꌤꃅꈽ,ꀁꇬꁨꇐꄉꇐꑞꑌꋌꏮꍔꃚꇇꇬꊐ,ꐙꇠꆈꇠ、ꐍꇠꊱꇠ、ꃅꇠꊁꇠꋍꃤꀋꇠꂴꅞ,ꃅꇌꍶꑿ、ꎆꃮꑠꋌꈎꂴꎭ,ꎆꃤꋙꃤꌋꆀꐙꁏꀊꉘꑠꋍꏮꂴꎭꄉꂱꇠꌤꃅꏣꀋꑌꊾꂷꐛ,ꄱꃏꃛꄮꇬꋌꎼꏸꇤꄐꇬꐊꄉꌉꈿ,ꏣꃀꏣꑟꋌꂘꌌꍔꃚꏭꁏꂷꀋꐊ,ꋌꎼꂴꅑꄉꎹꍈꄻꄉꉼꊞꎹꄻ,ꃛꊥꊤꄻꃅꄉꍔꃚꇫꁌꒉꊾꂷꐛ。ꋌꀄꊭꃅꋍꑍꇯꆏꋌꀑꑌꀉꂿ、ꀑꑌꌺꑠꄷꄉꃆꃀꅺꊈꌷꃅꇈ,ꋌꊯꌕꈎꇬꄑꑮꑟꅺꊈꑆ、ꊿꌦꅇꉉ、ꋂꈩꃭꊭꆗ、ꀈꈬꉙ、ꇐꀳꇐꏢꋌꀋꇮꅍꀋꐥꂷꐛꄉ,ꅇꉉꅷꒈꃅꄓꍣ、ꒈꏂꁌꐘ、ꐱꇁꀭꄮ、ꆺꃅꏪꐦ、ꆿꁮꀒꎂꌕꅔꋥꁕꇬꃅꉉꈴ,ꊁꆃꎭꍏꅇꂷꁱꂷꌤꃅꊈꑼꉼꇬꊙꌊꉉꋑꁧꋺ,ꋍꈭꐨꋋꆹꈎꌋꆪꄏꇮ,ꆈꌠꁱꂷꌧꄷꀋꁧꌌꃀꈿꅉꇬꄉꎺꁱꄎ。ꋌꁱꂷꌧꐛꅹ,ꑮꑟꃆꂮ、ꊿꌦꀂꆅꅇꉉ、ꈎꌋꃆꂮ、ꈎꏅꆪꆷꄮꌗꃅꏢꐓꈼꍣꌠꑞꑵꈍꃅꉉ,ꉉꅍꑞꐥꌠꃅꋌꇱꇇꁱꇬꐓꄉꇈꌐꄉ,ꀃꑍꋋꄮꉢꌌꌬꌠꆹꉬꇮꉠꃀꌠꍸꉢꁳꄉꇈꌠꄯꒉꋋꈨꇬꅑꌠꉬꌐ。ꋍꈭꐨꋋꆹꀊꆨꃤꃷꋪꏦꃤꀉꑌꃅꌧꄉꅊꈭꂷꐛ,ꃣꈌꐘꏈꇬꋌꀋꇁꌦꋩꀋꉉꃅꋋꇁꉚꇬꎷ。jQU彝族人网
jQU彝族人网
  ꆺꑳꀉꄉꇆ,ꉠꉂꇁꅉꌠꀉꄉ,ꀋꎺꀋꉆꀋꄐꌠꀉꄉ,ꆎꆏꑞꃅꑠꃅꏃꃅꀕꉎꑠꂷꇬꂿꈬꌠꉬ,ꏃꃅꀕꉎꋌꈚꇬꇇꅑꑘꀋꃅ,ꑭꅑꈜꀋꎼ,ꀀꄉꃢꈜꈚ、ꑌꄉꋙꋠꈚꉬꄿꑞꃅꌠꉬ?ꋌꀋꉬꑲꆏꑞꃅꑠꇨꊸꇨꆰꃅꁧ?ꑞꃅꑊꀋꊪꀘꀋꊔꌦꇯꆏꌕꈈꀕ、ꒊꌋꀕꃅꁧꌠꉬꇆ,ꅽꌺꂷꉬꄷꑾꆈꃙꋦ、ꑿꏂꈌꅪꂷꌌꅽꇬꀋꉃꌦ,ꃮꃀꀑꐎꑭꊛꂷꌌꅽꇬꀋꉃꑴꌦ,ꆏꏁꌌꏓꂱꑱꑼꂷꇬꀋꒉꌦ,ꑱꌜꂷꄷꆅꀋꍤ,ꁬꋌꀋꄐꌦꇯꆏꁧꌠꉬ?ꆈꃅꋌꌕꑟ、ꉷꃅꋌꌕꑟꌠꌌꆏꀋꄐꌦꇯꆏꁧꌠꉬꀋꆾ,ꅽꌺꅽꇖꆹꉈꌦꅉꂷꇬꀋꐛꀐꂼ。ꀉꄉꇆ,ꉠꉂꇁꅉꌠꀉꄉꅽꑠꂷ,ꅽꌺꉢꋋꂷꀋꎺꂯꇬꁦꀑꎺꁧꂾꆏꎺꇁ,ꇉꅶꉂꁧꂾꆏꉂꇁꇬꎷ,ꌞꑮꑟꅪꏷ、ꊿꌦꀂꆅ、ꅠꈭꆈꁏꀕꌠꂾꆏꎺꆏꄀ,ꅽꈌꁯꑓꂷꈧꌠꉠꑓꐛꇁ、ꅽꅇꉉꉐꉇꅇꂷꈧꌠꉠꅺꉼꇁꇬꎷꀐꂼ,ꉢꈍꃅꂯ!jQU彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:ꏠꑸꑤꁧꇉꃪꄧꎯꂚꃧꃨꅿꉗꌑꐩ...
ꊁꁬꌠ:ꆈꌠꎸꑣꁰꁱꏁꇅꁤꇅꁏꌠꆫꃬ...