ꏠꑸꑤꁧꇉꃪꄧꎯꂚꃧꃨꅿꉗꌑꐩꀕ
ꄜꃑꄮꈉ:2012-08-10 | ꁰꄻꊿ:ꀙꅿꈚ ꁱ ꇁꀦ:ꆃꎭꑍꄜ ꉜꃷꁨ:

ꋍꈓꋍꃢꎯꂚꃧꃨꀕꈍꀕꄮꑟꇁꌦꀐ,ꆎꆹꂚꃨꀕꌠꂾꃚꊌꈧꈨ,ꂚꃨꅿꉗꌑꐩꀕꌠꅿꇀꇁꇆ?eXN彝族人网
    ꀋꄸꄷꆹꅲꌒꑟꌠꂚꃨꃨꌠꂾꃚꊌꈨꂯꇬꆹ,ꀋꄸꄷꆎꆹꎔꇁꃨꌠꂚꃨꀕꁍꃅꈋꃄꏦꉜꆫꇁꂯꇬꆹ,ꆏꑴꌠꀒꎂꄉꏠꑸꇁꌠꀠꍯꑌ,ꀋꉬꀐꇬꊨꏦꍮꊪꇽꌊꇁꇈ,ꏠꑸꑤꌭꈈꐦꑣꂚꃨꁍꇬꆫꈩꇁꅊꇈ。eXN彝族人网
    ꏠꑸꑤꂚꃨꆹꈍꄮꇬꇯꆐꂒꋦꂓꅑꅷꇁꌠ,ꀊꅰꌠꆏꌭꈈꐦꑣꏲꄷꁧꇉꁦꀑꇬꐛꌠꐯꅑꎍꌠꊰꃪꎖꂿꂚꃨꀕꁍꆹ,ꋍꈓꇀꅉꀕ4ꆪꅑ7ꆪꑟꌠꆏ,ꁦꀑꁧꄩꇿꇬꑌꂚꃨꀕꈍꀕ,ꉘꁱꅪꋑꉜꌒꑟ,ꅿꉗꌒꃅꌑꐩꀕ,ꃨꁍꈬꄔꉆꎍꇬꊿꋌꎼꉌꂵꁧꃅꁦꉘꀕ。ꆫꈩꊿꋌꎼꉌꐡꌊꑠꃅꉉꌠꐥ:“ꁧꎔꇉꎔꃢꎔꈚꎔꄉꂚꃨꋩ,ꈩꇁꀜꌒꏠꑸꋔꂷꀊꃴꅿꉗꀊꅰꌑꐩꀕ”、“ꉬꆪꁧꄩꂚꃨꒊꇔꄑꄉꃄꇖꄹꊂꐋꋩꊇꋩꌒ;ꆀꃅꃀꀕꑵꉙꐛꑾꇗꈭꀕꄉꁧꈐꁧꉈꉂꏣꁊ”ꄷ。eXN彝族人网
    ꐮꂿꉂꌠꐋꀨꑠꁥꌋꆀꐯꇯꁰꒌꍑꅍ、ꎬꃶꑠꊭꄎꌊꄉ,ꇁꌊꌭꈈꐦꑣꂚꃨꀕꁍꇬꑟꇈ,ꉜꌦꁰꒌꍑꌦꃅ,ꃨꋋꁍ、ꁧꋋꂷ、ꏜꋋꋇ、ꃄꏦꋽꉻꋋꈨ,ꑞꑌꀋꎺꃅꇬꆏ,ꊿꋌꎼꇫꉪꁧꇬꎷ、ꇫꉂꁧꇬꎷꌠꉬ。eXN彝族人网
   ꆹꌊꌭꈈꐦꑣꁖꅔꋂꒈꀑꅉꏯꐛꌠꃨꉜꅉꄻꄉꈚꌠꀂꏽꉆꄉꉜꇬꆏ,ꋍꁧꇈꋍꁧ、ꋍꁍꇈꋍꁍ、ꋍꏬꇈꋍꏬ、ꋍꋇꇈꋍꋇꈿꂅꄉꃨꌠꂚꃨꆹ,ꊽꑓꋪꋌꈻꌊꐺ,ꊽꉌꂵꑌꋌꊏꋌꅰꌊꐺ。ꊽꉂꏣꉂꑟꑠꑌꋌꇱꈻꌊꃨꁍꈬꇬꄉꏮꅷꐺ。ꑓꋪꋮꁧꄉꆫꅷꈜꎴꃅꄷꑟꃅꇬ,ꅉꀕꀊꃴꌠꂚꃨꌩꁧꀉꂥꌠ、ꀁꂥꌠ,ꅉꀕꃴꏸꃴꆧꁏꇬꎷꌠꂚꃨꌩꅉꀮꑠꀁꂥꌠ、ꀉꂥꌠ,ꅚꏫꃅꅉꄩꉱꎍꌠ……ꋍꑞꋍꑵꂚꃨꈍꑋꊰꑵꁧꄩꄉꆏꎔꉢꎔꂅ、ꆏꃨꉢꃨꋓ、ꐛꇷꐛꏦꆏꍔꉢꍔꉔꇫꎍ。ꐎꃅꐍꊭꀕꌠꆏ,ꃰꐛꌩꁧꀊꃴꁧꄩꎍꌠꌡ;ꅪꃅꅩꇉꀕꌠꆏ,ꏂꅪꁱꂷꏿꌊꌩꁧꀊꃴꇬꎑꄉꌠꌡ;ꀊꃴꀕꍗꀕꌠꆏ,ꌩꁧꀊꃴꈽꄉꃴ……ꌩꁧꌩꏾꃴꍗꀕꌠꇂꃴ,ꋍꑞꋍꑵꐛꌠꂚꃨꀊꅰꋭꋽ,ꀊꅰꎔꃨ。eXN彝族人网
    ꄇꈜꋮꁧꉆꄉꉜꇬꆏ,ꎯꂚꃨꃄꏦꋽꇐꆹꈀꂿꇁꌠꋽ,ꈀꂿꇁꌠꎔ,ꆏꃨꉢꃨꂅꌠꂚꃨꑠꆏ,ꃆꄉꃧꃨꌡ,ꇴꒉꆸꒉꌊꆫꈩꊿꋩ;ꂱꇭꃧꃨꌟꃅꄉ,ꊾꒌꐛꄉꎔꌊꊿꋋꑕꏾ;ꆃꉷꃨꌟꃅꊖꇬꁖꌠꊖꁳꀋꍍ,ꊿꋌꎼꉌꂵꉪꃅꉨꇐꈤ;ꍫꇂꃧꃨꌟꃅꄉ,ꅿꉗꌒꃅꌑꐩꀕ,ꊿꋌꎼꅿꉗꌒꈬꄉꎧꑱꌟꃅꑱ,ꃶꇌꂿꇌꀄꂻꀕꌠꀉꏮ;ꆀꃅꀉꐔꌟꃅꎔ,ꎲꃅꐜꋒꆫꈩꊿꂿꈬꐯꂿꈬ,ꊿꋌꎼꃧꃨꉬꎻꀋꈁ,ꀉꂿꁨꀋꎺ,ꀱꁧꊊꀋꉂ。eXN彝族人网
   ꐋꀨꌋꆀꐮꐊꃨꁍꈬꄔꃹ,ꂚꃨꁍꇬꈭꄉꁰꒌꍑꅍꇇꊭꌊꉌꇿꐨ、ꉌꌒꐨ、ꎔꃨꐨ、ꎺꄅꐨ……ꑠꑞꑌꍑꁰꒌꍑꅍꇬꊐꌊꁦꑟꉂ。ꆲꌙꀕꌠꃅꆳꋍꄲꁏꇁꇬꆏ,ꅿꉗꅳꁖꐬꇬꃹꇈ,ꇭꀧꇬꈴꇈꍅꎼꇁꉌꂵꇬꊭ,ꇭꀧꀉꄂꀋꑱꃅꉌꂵꇬꇯꑱ。ꃨꁍꈬꄔ,ꋍꈨꋋꈨꆏꃨꉂꃨꍻꀋꇊꃨꃅꄉ,ꀋꇊꆏꋋꇅꇬꑲꆀꀀꐚꇁꌠꑮꆜꅩꊪꀕꑠꍈꌡ,ꈮꈜꃅꋍꅿꃨꁯꋌꍔꌊꆎꋩ,ꋍꅿꌑꐩꀕꌠꅿꉗꋌꌌꊽꇭꀧꇬꆼꒆꄉ,ꊿꋌꎼꀋꎺꃅꇬꆏ:“ꋧꃅꈁꎔꀕꌠꄚꇬꐥ,ꈩꇁꀜꌒꎹꌠꄚꇬꀋꇁꇂ!”ꄷꉪꑟꃅ。eXN彝族人网
    ꁯꋒꉘꁮꑭꇂꃴꂚꃨꀊꅰꃅꋽ,ꈀꄸꑌꇭꀧꀱꇬꉌꂵꊌꀋꀱ,ꀋꄸꄷꃨꁍꋋꈨꆹꈍꄮꑌꑠꃅꐛꇬꆹ,ꈍꃅꃪꂯꀋꐚꄷ,ꄚꄉꆎꑌꑎꉔꄹꈎꈍꃅꑌꄚꂚꃨꉜꇁꌦꄷ,ꉡꑌꑎꉔꄹꈎꈍꃅꑌꀋꎪꃅꇁꌠꉬꄷ,ꐋꀨꐮꐊꌠꋌꎼꉌꂵꏟꈯꀕꃅꉈꑴꋍꃢꃨꁍꉜꇁꌠꏤꌦꌠꉬ!eXN彝族人网
ꂚꃨꋌꑵꆹ,ꉪꆈꌠꀉꄂꁧꄩꂚꃨꃅꉉꌠ,ꉌꈲꆹꄗꏨꉵꄷꉉꌠꐥ,ꑴꎫꉼꄷꉉꌠꐥ,ꂓꀉꑌꑵꐤꑟꉬ,ꃅꄷꋍꈚꇬꋍꑵꃅꉉ,ꉜꆫꅍꐥꊿꈀꄷꑌꇫꉜꏾꑠꑵ,ꀋꃋꉪꇩꏤꆏꂚꃨꋌꑵꀄꊭꃅꁸꎼꇁꇬꆏ650ꎖꑵꐥ,ꀉꑌꄹꁆꌠꆏꉪꇩꏤꑾꌋꈤꁁꏯꈬꉘꃅꈋꋦꌠ,ꄚꀉꅰꃅꎔꃨ、ꐛꉻꀉꒉꌠꆏꄡꇗꏠꑸꑤꁧꇉꂚꃨꋋꁍꉬꄷ。eXN彝族人网
    ꌧꃀꑠꈨꉉꇬ,ꏠꑸꂚꃨꆹꃨꍔ50ꎖꑵꐥ,2006ꈓ5ꆪꇬ,ꏠꑵꑤꆹꀊꆨꇇꊂꂓꅑꅉ、ꃅꀹꊿꀹꌋꆀꌄꆣꌠꐥꋊꁱꀕꑠꄜꌊꋧꃅꇣꄧꇰꈴꂿꄷ,ꉘꃀꃢꌠ“ꍏꇩ•ꌧꍧ•ꏠꑸꂚꃨꋩꑍ”ꌠꀞꌊꊋꐛ,ꈀꄸꉉꇬꑌ,ꂚꃨꈁꎔꌠꆹꀉꉷꏠꑸꃨꁍꉬꄷ,ꀋꉜꐜꇈꑟꄷ。eXN彝族人网
    ꀋꃋ,ꏠꑸꑤꁧꇉꂚꃨꀕꁍꇬꆫꈩꇁꌠꆏ,ꀉꑌꄹꁆꌠꆹꂿꈬ、ꃀꁧ、ꏪꐦ、ꀭꄮꑠꃷꇎꑤꈧꌠꇬꄉꇁꌠꐋꀨꈧꌠꉬ,ꉈꑴꋍꈨꋋꈨꆹꌜꉈꄉꇁꌠꑌꐥ,ꀊꅰꀉꑌꌠꆏꄡꇗꏠꑸꈏꇓꀀꌠꉹꁌꈧꌠꉬꏭꐛ,ꁧꇉꃨꁍꃧꄮꆏ,ꆏꑍꇬꎹꄉ,ꑱꈐꋍꁯꃅꐮꐊ,ꀋꉬꀐꇬꐋꀨꑍꂷꌕꑻ、ꇕꉬꑻꐮꇴꌊꄉ,ꎬꃶꀵꌊꁧꇉꃨꁍꇬꄉꒈꒉꉎꉐꈩꀜꅷꐺꇬꎷꌠ,ꁰꒌꍑꅍꌌꎔꇁꃨꌠꋍꄮꇬꐛꒌꍑꌊꇁꃅꇬꎷꌠ。eXN彝族人网
    ꏠꑸꄉꂚꃨꆫꈩꌠꄮꈉꉾꐯꉾꊬꌠꆏ,ꉬꆪꅑꃘꆪꊬꌠꇬꄈꀊꅰꃅꉾꃪ,ꆎꆹꇫꉜꆫꇁꑲꆏ,ꀒꎂꄉꏠꑸꇁꌠꀠꍯꑌꇁꑌꍑ,ꊨꏦꃅꍯꊪꇽꌊꇀꑌꍑ,ꍯꊪꑌꌊꏪꐦꈴꇈ,ꏠꑸꎯꂚꃨꁍꇬꑟ(ꌭꈈꐦꑣꁖꅔꋂꈭꇍꐛ,ꄇꈜꋮꁧꌐꀺꒊꀋꄿꑠꈨꋉꇫꐛꄉꌠꉨ,ꍯꊪꈐꑌꎍꇬꂯꌐꅍꈧꌠꊌꂿꉆ),ꉈꑴꆏ,ꍰꄖꇓꈓꄉ,ꏠꑸꇁꌠꀠꍯꑌꌊꏠꑸꃨꁍꇬꑟꇁꇬꑌꍑ。ꑤꋋꂷꇬꀙꊻꁆꋌꐛꋌꐙꌋꃅꏳꆏ,ꋠꅝꌠꌋꆀꀀꅉꑠꌌꆫꈩꊿꁧꃤꃅ,ꀋꄸꄷꆏꈈꑲꆏ,ꀉꁁꋍꑞꋍꑵꁧꃤꃅꌠꑌꁵꉆ,ꆏꁳꉌꇿꄉꉜꆫꈩꀜꎻ,ꒈꅉꃅꇁ,ꇿꅉꃅꀱ,ꄷꀋꁧꆏꋋꉪꇬꀋꑟꌠꑠꊌꐨꑌꐥꉆꌠꉬ。eXN彝族人网
    ꀃ,ꁧꇉꎯꂚꃨꁍꆹ,ꐤꅉꎔꅉꑟ,ꋍꅿꎔꇁꃨꌠꍔꄉꃄꇖꄹꊂꏣꋩꑞꋩ、ꐋꋩꊇꋩ、ꊈꋩꌐꋩꐺ,ꋧꃅꐋꀨꃨꁍꈁꎔꀕꌠꉜꂿꉂꌠꆏ,ꏠꑸꂚꃨꀕꁍꆹꈍꄮꑌꒊꆭꀕꌠꑊꑍꌌꄉꆎꋩꌠꉬ,ꀋꄸꄷꐋꀨꇫꉜꆫꇁꑲꆏ,ꎺꄉꁰꒌꍑꅍꀵꌊꇁꅊꇈ,ꋌꀋꉬꑲꆏꃨꁍꉜꆫꄮꑲꆀꉌꆐꅑꂵ。eXN彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:ꉒꈌꈬꇬꉂꏣ(ꋍ)
ꊁꁬꌠ:ꀉꄉꂘꅇꀋꎺꄮꀋꐥ