ꀋ ꆗ ꃀ
ꄜꃑꄮꈉ:2013-08-18 | ꁰꄻꊿ:ꐙꈌꃺꐂ ꇁꀦ:《ꆃꎭꉜꇐꁱꀕ》 ꉜꃷꁨ:

(ꉉꀽ:ꉇꇷꁰꒌꆹ ꀐꄸꇖꑳ ꍑꌠ)sUv彝族人网


   ꋌꑓꍻꃅꏮꀠꅪꃅꒈꇤꏢꁮꑌꄉꒈꋌꌠꁦꋠꀊꋨꂷꉜꎍ,ꑓꋪꋍꇅꂯꉈꀋꈻ,ꀋꇊꆏꎷꇺꀊꎴꐯꀊꎴꑠꑍꏢꌊꋯꀊꄶꇱꄉꌠꌡ。ꁦꋠꀊꋨꂷꆧꁨꎹꌦꈧꌠꉜꉏ,ꋍꂷ ꋍꂷꃅꃷꉆ;ꇷꊨꑠꋀꏤꒈꑌꇤꀮꏡꌠꃤꌋꆀꐯꃙꄉꏽ,ꊝꀕꃅꐯꀋꌡꍇꌠꆏ,ꒈꑌꇷꊨꏡꌠꇬꋦꌠꇌꑐꈧꌠꀉꄂꉬ;ꉦꏪꂶꌠ,ꀋꇊꆏꃪꊭꑍꂷꇁꐯꑕꄉꇬꀉꏯ, ꈍꃅꄉꀉꇨꀱꋦꉏ。ꀆꐒꈧꌠꃬꋍꇭꀧꉖꇬ,ꋋꇅꄷꆏꑻꇫꈜꀒꁨꑟ,ꋍꍈꂯꇬꅑꇊꀋꄐ。……ꀊꅰꉜꀊꅰꋌꇬꁭ,ꀊꅰꉜꀊꅰꋍꉌꃹ,ꀉꉌꋛꂷꉂꃅꉂꇫꎍ。ꀉꁁ ꈧꌠꄷꀋꁧ,ꁦꋠꂶꌠꆼꄅꇬꎑꌠꏝꈧꌠꂯꋌꇫꉌꃹꇁ,ꇬꁭꇁ。ꋍꉌꂵꈐꑠꃅꉪ:“ꉢꈍꄮꑲꆀꒆꌊꌞꁦꋠꋋꂷꌋꆀꐯꌟꇁꂯ?
   ꋌꀄꊭꃅꋍꑍꇯꆅꇬꎷ,ꑠꅹꋍꇭꀧꌋꆀꉪꇐꉪꏣꑠꒅꄟꎃꐚꊿꀋꌡ,ꌞꊿꊂꊰꏭꃅꐙ——ꏮꇬꉜꇬꅋꅝ、ꆄꈻ、ꇰꏭꃅꐙ。ꀏꄩꀊꂥꐨꆹꋍꎁꃅꑍꇯꇫꒆ,ꄚꃷꅍ ꀉꄂꒆ,ꎹꌧꆊꌧꑠꆏꂷꏦꏢꀉꏯ,ꇭꀧꀊꂥꐨꌋꆀꐯꀋꋭ。ꈺꄮꐰꄈꊼꇅꍑ,ꊷꄮꐰꋍꀂꄁꋌꇔꄉꐹꄮꇬ,ꋋꇅꃅꊿꎺꀆꏹꇩꏤꊿꂿꀊꃶꃅꇬꊐꄉꇈꀊꋨꈨꄀ—— ꄚ,ꋋꂷꆹꄓꇯꄓꇧꐺꂷ,ꀊꅰꃅꌞꎹꀕꇤ。ꑠꅹ,ꋀꁡꇤꊿꇬꏭ“ꀉꑳꑍꅝꀋꇎꂶꌠ”ꉬꄷ。
   ꋌꎼꈎꑲꆀꊯꇖꈎ,ꄚꋌꇯꍝꃅꀕꈎꃅꆪꃅꑍꋋꈨꇁꉚꉇꀋꑍꀐ。ꋀꏤꑳꊂꌧꅗꏽꏾꏢꊰꀏꃄꅉꇬꅞꇬꂯꋌꉜꇬꄮꈉꑍꂷꈁꌠꌡ。ꏮꇊꌞꁦꋠꈯꄿꆧꁨꂄꋋꈨꉜꄷ ꆏ,ꋌꋋꇅꃅꄉꒆꀉꒉꇁꑟꉂ,ꄷꀋꁧꌤꏡꏢꃅꄉꉌꈲꊂꑇ——ꃮꁮꌺꐳꃅꉀꒆꌠꁬꋌꀉꄂꃷ,ꊾꃤꆏꀋꐥꀐꄷ。ꀄꊭꇬꂯꋌꒆꌊꁦꋠꇨꑠꂷꐛꄉ,ꋌꉚꄸ、ꋍꏭꇁ ꇬꎷꌠꊿꈧꌠꋌꌌꎸꌠꀄꂻ。ꋌꋋꈨꂻꐺꄮꇬ,ꀀꐚꇁꄷꆏꇨꇅꃃꐯꃃ——ꀄꂻꈐꏭꋌꇨꐯꇨꃅꐺꈧꌠꄻꏾ。
   ꋍꃢ,ꋌꋰꀋꄐꃅꋍꀉꄉꏭꅲ:“ꀉꄉ,ꉢꈍꄮꑲꆀꌞꊿꀉꏯꆧꁨꎹꌧꇨꃅꑠꑌꇁꄎꂯꇆ?”ꄷ。ꀉꄉꂶꌠꆹꋍꌺꋋꂷꌤꋌꐘꇬꑠꃅꉜꁨꌠꋌꇫꅉꀋꐚꄉꇬꏭ“ꊰꏃ ꊰꉆꄮꆏꒆꑠꃅꐙꇁꀋꆆ。”ꄷ。ꌺꂶꌠꉪꇬꑌ,ꀉꄉꆹꀎꋏꉬꌠꉨ,ꋌꉉꌠꈍꃅꑌꐯꉂꃅꉪ。ꑠꅹ,ꋌꇫꄉꇁꉚ,ꉘꁮꈞꆈꃹꒉꄷꆏꋍꉌꂵꒊꆭꀕ。ꑞꃅꉘꁮꈞꆈ ꃹꁧꄷꆏꒊꆭꀕ?ꋋꆹꋌꌊꁦꋠꇧꂷꐛꇁꂯꇬꃅꑍꋍꑍꀁꑌꀐꐛꅹꌠꉬ。
   ꀊꉘꋋꂷꆹꌿꁧꁡꇤꂽꌋꄇꉼꄰꌺꄂꃮꐔꂶꌠꉬ。ꀈꈥꌿꁧꁡꇤꂓꄷꄸ,ꏮꇬꉜꇬꌿꁧꀕꊿꋋꀋꂿ,ꊽꑓꐛꌠꆹꋚꁧꒉꁧꑠꀉꄂꉬꌐ。ꁡꇤꋋꂷꆹꉽꐯꉱꀕꂷꀉꏯ,ꁦꌺꇈꌺꇱꇊꇢꊭꊐꄉ,ꋌꈚꇬꍯꃅꅔꃅꑞꑌꐥ,ꄚꋚꒉꑠꆹꀊꅰꉌꉪꐛꃅꊌꀋꄐ。
   ꂽꌋꄇꉼꀊꏀꃅꄉꄮꇬ,ꊾꏦꌋꆀꃅꇕꂶꄟꑠꊿꇫꏦ,ꁡꇤꋋꂷꑮꆜꑠꋍꊂꈹꐚ。ꄚ、ꋍꉌꂵꆹꀑꑌꄰꀋꃋꃺꏦꃀꀉꄂꉌꃹ。ꐰꇑꎭꈓꋋꐊꄉ,ꃺꏦꃀꇯꍝꃅꋍꑮꃀ ꐛ。ꋍꑊꐯꇯꄉꐥꌒꄻꌒ、ꐮꉂꐮꅉ、ꆏꉉꉢꒉꏽꃅꑠꇕꉬꈎꐥꀐ,ꄚ、ꋧꃅꃰꊿꃅꈋꌤꆿꑠꊿꇫꄉꀧꀋꄐ、ꐈꇁꇬꑓꋪꇅꋏꉗꇯꀋꈁ,ꃌꒆꑋꇢꊭꉂꏣꑠꐤꅉꐤꅉ ꎒꐡꇁꀐ。ꂴꆽꑠꃅꐮꉂꐮꅉꌠꑞꃅꑠꃅꐙꇁꌠꉫꆏ?ꁡꇤꃷꇎꀋꃀꊈꌌꇫꄉꍣꇬ,ꃺꏦꃀꀋꃋꌕꍈꍇꌠꀀꊭꇄꌠꇬ,ꄇꉼꏮꋍꑮꃀꉜꇈꏏꄉꋋꄷ:“ꀋꃋꃅꀋꃋꀉ ꄂꏃꑲꌧ!”ꄷꇈ,ꑊꑍꄄꆈꌡꇬꅜ。ꀊꉗꏢꀋꑌꃅ,ꌾꄷꋌꄓꉈꏭꈜꀒꁧꑟ,ꑮꃀꀉꑳꀀꊭꀀꀋꊭꑠꋌꇵꌕꑍꈛꃅꄷꎭꇈꀐ。
   ꋌꉈꏭꁧꄷꆏ,ꏃꑍꏃꉔꐛꑲꆀꀋꇁꀋꉆꃅꀱꀁꇬꑟꇁ——ꎧꑱꌌꀨꆽꀋꐥꃅ、ꑘꀡꂷꐛꇈꊿꐔꌊꀁꇬꁖꇁ。ꋌꇈꉈꅑꅸꇁꌠ,ꄇꉼꄰꃌꒆꑋꐯꊨꃚꑍꀕꈐꇬꌕꃢꃷꇎꃷꇤꈨꇁꃅꐙꀐ。
   ꑠꃅꐙꅸꃮꈓꄹꈎꌠ,ꄇꉼꄰꌳꃈꅪꌕꍈꍇꌠꁦꎆꇄꌠꇬꑲꆀ,ꋍꑊꑍꃅꑄꄂꀋꅑꇬꅜ——ꋍꌳꃈꁮꆸꅝꈧꌠꇱꄉꇬ,ꅑꅸꌺꋋꂷꑟꌠꊯꊪꑻꉬꀐ。ꀋꃋꇫꐥꌠꆹꐯ ꇯꃘꑼ。ꄇꉼꐴꍈꇤꇬꄀꄉꇈꂯꐛꅹꃅ,ꋌꎆꀵꄽ。ꀉꁌꀋꁧꍸꋌꁳꄉꇈꌠꐎꂷꏂꄿꑠꏓꂱꍔꃚꄰꌌꁧꌐꄊꏽꀐ,ꀋꄸꄷꀋꃋꋋꃢꇯꌹꍈꀋꉬꇮꇬ,ꄇꉼꆹꇯꍝꃅꇫ ꐥꉈꀋꑌꀐꌠ。ꃮꐔꌺꋋꍈꉬꄮꇬ,ꋍꉌꂵꈐꇬꄡꇗꀋꃋꂷꉬꀐꌦꀞꉂꄉ,ꋌꏛꃅꌤꋌꐘꅉꐚꀋꏾꐛꅹꋌꄂꃷꇎꅍꈩꁧ。ꊁꃷꇎꈧꌠꌹꍈꉬꄷꇬꏭꀟꄮꇬ,ꋌꇿꌌꋌ ꈯꋌꀋꌅ,ꏛꃅꋍꁘꌺꄷꑟꇁꑟꉂꄉ,ꐛꅉꀋꂿꃅꐚꇁ。ꑭꄔꀋꐽꐛꅹꑘꀡꇱꉔꎼꒉꄉ,ꑊꇱꇁꑳꊂꌩꇺꏢꄩ,ꑓꋪꂯꋌꎼꁖꀋꇊ!ꌦꅪꇰꀮꍝꃅꇁꀁꇬꋍꌺꍇꌠꄌ ꄉꀒꉜꑟ,ꑊꇱꇬꌦꀋꆏꃅꅐꇁꑴꇬ,ꋌꇇꇀꃶꁆꌠꀅꌳꀕꃅꋌꄹꀉꑳꄌꀨꈏꊐꄉ,ꇯꍝꃅꌹꂷꉫꉬꌠꍤꄻꐺ——ꀋꃋꃅꀋꃋꉬꇬꎷꄉ,ꄇꉻꋍꑓꋪꀋꑇꃅꇇꌌꄉꊨ ꄅꐺ!
   ꂓꀉꁁꑠꋉꇬꋬꀋꂻꂵꉂꄉ,“ꃮꐔ”ꄷꋋꇬꋍꀿꃶꂷꇱꄻꇫꂓ。
   ꃮꐔꑊꑍꉪꅍꐥꐯꐤꀱꋦꄉꌞꁦꋠꒈꋌꐺꂶꌠꉜꄉꐛꅹ,ꁦꋠꂶꌠꀆꐒꈨꋌꃬꃮꐔꉖ。ꃮꐔꋋꇅꇬꑲꆀꋍꒌꉪꌠꋧꃅꂶꌠꇬꄉꍝꐚꇁ。
   “ꃮꐔ!ꑞꉬꌠꉬꇆ?……ꑠꊌꂿꀋꋻꅀ?”
   “ꉢꇫ——ꀋ——ꉜꇆ!ꇯꍝꃅ——ꀋꉜ!”
   “ꄡꀋꉜꃅꇯꆏꃅ!ꀊꄶꉜꉐ!ꑓꌬꅍꍻꉢꀳꄉꇬꎷꇬꉨ。”
   “ꉢ……ꉢ——ꆏꋋꂷꑞꂷꉜꅍꐤꄜ?”ꌞꊿꋌꒈꇁꇚꑴꉂꄉ,ꂱꉪꄉꇫꌠꀋꉉꃅ,ꂱꀯꇬꄉꃶꇌꂿꇌꃅꅇꂷꀉꁁꇬꋌꆦꄚꀒꅞꑟ。
   “ꁧꀕꁧ!ꄚꄡꑌ,ꑞꀉꑳꂷꉫꆏ。……ꁦꋠꁦꋠꐮꑊꏦꌠꄈꇨ,ꉻꐯꉺꂷꀋꇊ!”ꄷꇈꉉꑌꃅꀏꇓꂵꈯꒉ。ꃮꐔꋋꇅꃅꎷꈌꏭꀋꋌꃅꀒꆰꑟ——ꋌꅉꐚ,ꇓꂵꊿꀉ ꁁꇵꌠꌋꆀꁦꋠꋋꂷꇵꌠꆹꐯꀋꌡ。ꆧꁨꑠꃅꇨꑠꁆꌌꄉꇓꂵꇵꌞꐃꁆꌸꇬ,ꈍꃅꑌꍩꇓꀉꏯꎹꌧꇬꃹꁧꌠ,ꎼꊿꌸꇈꊰꀏꃄꅉꇬꎍꇈꑠꉪꂯꇬꄡꉪ!
   ꃮꐔꊯꉬꈓꀐ!
   ꃮꐔꊰꃘꈓꀐ……
   ꉈꑴꈎꋍꂷꏅꈴꅐꁦꌦꂯꄉꀐ!
  ꀉꄉꉉꇬꊰꏁꊰꉆꈓꄷꆏꇭꀧꒆꐛꒆꇁꄎꄷ。ꄚ、ꃮꐔꈎꄜꋋꂷꑟꀐꇬꇙꁱꇯꀋꋏ。ꋌꉌꋲꀕꃅꇬꀀ。ꑞꉬꌠꉬꀋꐚ,ꌞꊿꋌꀋꄜꌠꇭꀧꒆꌊꋌꌟꀋꋌꌐ,ꋋꌋꆀꐮ ꄜꈧꌠꆹꂯꉉꄻꀋꅐꀐ。ꄚ、ꉈꋍꁁꏯꈴꄉꉪꇬꑌ、ꀉꄉꈱꇫꊏꄡꀋꑟꀞꉂ。ꆧꁨꍇꌠꀖꌞꑞꋓꅞꇬ,ꊿꇱꆸꐔꇧꎭꄎꃅꐙ。ꃮꐔꉌꂵꈐꇯꍝꃅꊰꐯꊰ!
   ꋍꑍ,ꎆꆫꅈꇬꄉ,ꃮꐔꌕꈎꇬꄩꒉꑠꍈꇱꎸꈌꊰ。ꋌꉌꂵꋰꀋꄐꃅ,ꀥꋍꀉꄉꏭꈍꄮꑲꆀꁦꋠꄾꂷꐛꌠꅲꂿꉂ。ꐂꄇꂿꑭꃹꆹꄮꇬ,ꀉꑐꂷꋌꇷꊼꇅꁵꄉꇓꂵꂷꋌ ꇱꀨꊰꃮꐔꀂꏾꌸ,ꋋꇅꃅꌦꈧꌠꑠꑪꀕꃅꁖꇁ,ꀉꂿꂶꌠꇓꂵꊰꀏꃄꅉꌸꌠꂾꃚꈨꄉꅐꇁꄮꇬ,ꋌꇷꌊꈍꃅꇮꀋꐚ。ꋌꄷꀋꁧꃷꇎꑠꑷꁬꋌꈨꐥꅊꇈꄉ,ꌥꆹꅐꀋ ꇁꀐ。ꄚꃮꐔꋌꇱꇤꀊꅰꃅꀑꃀ——ꋍꇅꋋꇅꇬꃶꌠꌡ。
   ꋌꊿꇱꀨꎹꇣꁁꋍꀀꅉꇬꏀꄉ。
   ꈊꃀꌋꐓꄮꇬ,ꋌꀉꄉꎦꈌꈂꆶꃅꇁꌺꀂꏾꂷꊂꉜꇁ,ꃮꐔꌤꋍꉌꂵꋥꑣꀕꏡꌠꌌꄉꀉꄉꏭꀒꅲꑟ:“ꀉꄉ、ꉠꇭꀨꑞꐛꅹꑠꃅꈧꐚꌠꉬꇆ?”ꄷ。
  ꀉꄉꎧꑱꑓꋪꋓꌠꏮꇫꊼꇅꉜꇈ,ꉉꈌꀉꇖꐆꃅꋌꄷ:“ꃮꐔꌺ,ꉡꑌꃅꅍꎷꀋꊌꂷꄸꇆ!ꋙꑌꇎꃅꎼꆎꍈꄉ,ꋠꌊꇿꃹꁧꌐꌠꉬꀋꐚ。ꀉꑳ、ꅽꃀꌠꑌꃅꅍꎷꀋꊌ ꂷꄸ,ꆏꋋꍈꊌꂿꄷꄉꑣꇬꇥꀯꇱꈹꅸꁇꁈꌋꆀꈌꊰ,ꎆꏣꆿꂷꑠꀵꇎꀵꄽꀐꌠꀋꂸ!……ꀀꃆꁧꉬꄉꑭꋍꇱꄹꅽꐴꀠꊐꑟꁈꀋꐥ。”
   “ꋋꈨꆹꆏꀋꉉꇬꑌꌞꊿꉉꉡꇰꋺ!”
   “ꀉꁁꆏꉉꌊꅑꅉꀋꊌꃄꄉ-ꃮꐔꌺꀋ!”
   “ꉐ?”
   “……ꀋꉊꄻꈎꉪꏤꃮꃀꂶꌠꃮꁮꌺꈍꑋꂷꏃꌠꆏꎺꀕꑴꌦ?”ꃮꐔꀉꄉꎧꑱꀱꀋꋦꃅꋌꄷ。
   “ꎺꑴꌦꇅ!……ꃮꁮꌹꌋꆀꉢꐮꃆꂮꐥꅀ?”
   “ꎺꑴꌦꄷꆏꍑ!ꈍꑋꂷꏃꌠꆏꁨꉉꉏ?”
   “ꊯꊪꂷ!”
   “ꉬ。ꊂꄽꂫꍇꌠꈍꃅꐙꍈꉬꌠꆏꎺꑴꌦꀞ?”
   “ꀈꋓꍈ。ꄷꀋꁧꀄꊭꐯꀄꊭ!”
   “ꑞꄜ?ꉢꈍꃅꄉꃮꁮꌹꍈꌡꄜ!?”ꃮꐔꉪꀋꐛꏭꃅꋌꄷ。
   “ꉢꉉꆎꇰꂿ,ꅽꀉꂿꈲꋌꈧꌠꆹꅽꅫꃀꈧꌠꇱꏶꌌꁧꌐꐛꅹ,ꆏꑠꃅꀄꊭꆘꅝꌠꉬꀐ?”
   “……?!”
   ꃮꐔꋍꃀꌠꇱꉉꀑꆊꈪꇁꑲꀋꌧꏭꃅꐙꇧꎍ。ꋌꋍꌺꉌꊋꊐꂿꉂꄉ,ꐪꊛꄉꋌꄷ:“ꈴꀕꇈꄵꎭꇱꈴꊼꇅꁵꄉ,ꇭꀧꒆꀉꁁꈧꌠꀋꏣꆘꅝ。”
   “ꀉꄉ,ꃮꁮꄵꎭꈴꄷꇬꊿꑇ,ꄚꊾꑌꄵꎭꈴꑵꉬꑴꅀ?”ꃮꐔꑊꑍꇣꋲꏭꃅꏮꋍꀉꄉꉜꎍ。
   “ꑞꑌꌦꑌꌗꑌꇘꇙ,ꐯꌟꀋꆆ。ꆎꆹꄵꎭꀋꉬꃅꄉ,ꑊꋌꇱꑽꊼꇅꁵꅀꑞꃅꀋꐚ。”
   “ꀒ——!ꉢꊨꄅꀐ!”ꀈꈥꋍꈂꀸꋍꃅꉉꄸ,ꄡꊼꇅꊨꀋꄅꏭꃅꐙꑴꌦ。
   “ꊁꀉꒉꄮꆏ,ꃮꀠꇨꐯꇨꑠꂷꐛꌠꆏꇬꀋꎺꀐꅀ?”
   “ꎺ——ꌞꇯꍝꐯ!”
   ꃮꐔꆹꀉꄉꋍꏭꉉꋋꈨꋌꇫꉪꀋꐛ,ꄚꉉꌊꁢꊧꍈꑌꐥ,ꋍꉌꃹꐛꅹꋌꇬꑇꏭꃅꐙ。ꄚ,ꃮꁮꌺꄵꎭꈴꀊꋨꂷꊁꃮꀠꇧꂷꆹꐛꑴꇬ,ꊁꊿꇱꌉꋠꆘꅝꌠꐛꐪꋋꍈꋍꄻ ꀋꈴꐯꄻꀋꈴ。ꀱꆽꃅꋌꉪꅷꃮꀉꁁꈧꌠꌕꊰꇖꊰꏣꀉꄂꐥꃅꊿꌉꋠꈧꌠꄀꇬꆏ,ꋌꄡꇗꉌꂵꇿꌦꀐ。ꑠꃅꄉ,ꋌꀑꃶ、ꀂꏾꆅꌟꃅꀋꐛꃅꃀꌠꂶꌠꉥꑣꃅꋌꀨꎹꇬ ꏀ。sUv彝族人网


   ꌤꆿꑞꑌꄮꈉꌌꄉꊨꄅꀨꄅꇬꎷꑵ——ꊝꀕꃅꏛꃅꊨꄅꅀꑎꃅꊨꄅꑠꇅꇬꀉꄂꍣ。ꆏꈍꃅꐈꋓ,ꁈꏂꁈꇭꄉꂁꉱꄿꂿ,ꇗꂷꀋꈯꂷꉬꑲꆏ,ꑋꆳꈍꑌꃢꁏꄿꂿ,ꑋꉐ ꈍꑋꃢꌸꄿꂿꈍꃅꑌꅿꁮꇙꀋꄐꇬꎷꌠ,ꉌꂵꋍꑍꇈꋌꑍꃅꂴꉉꅇꏡꌠꐞꇁ,ꀋꇊꆏꆀꈜꉷꈜꐞꃅꐞ,ꐝꅉꎳꅉꑟ,ꐝꅉꐮꅉꑟ。ꀊꅰꃅꁡꇤꌠꆗꑠꂷꂒꇬꄻꋋꋉꇈ ꉈ,ꋌꃶꐚꐯꃶꐚꃅꋍꀉꄉꅇꀋꑇꆘꅝꀐ!
   ꂓꋋꇬꆏ“ꀋꆗ꒜”ꉬꄷ。ꋀꊇꌠꆗꈧꌠꌌꌧꍣꇬ,ꂽꌋꃮꐔꆹꇯꍝꃅꀋꆗꃅꈛꎂꐂꃀꌠꊐꇬꃹꁧꂷꉬꑴꄷ。ꑞꃅꄷꆏ,ꌞꊿꆹꈍꃅꄿꂿꄚꋍꊭꇬꄿꐯꄿꃅꐺ(ꇭ ꀧ、ꆊꌧ、ꊋꑠꐮꐊꐙꌐ),ꄚꃮꐔꆹꄿꄮꊬꌠꑞꇅꇬꉬꀋꐚꊿꇫꊨꀋꄅ,ꉜꇈꂾꆏꐈꃀꌠꂷꌡꄊꏽꇫꎍꀐꅊꇈ。ꀍꑐꑠꀋꉙꃅꋌꐛꃅꀊꏂ,ꄷꀋꁧꇂꇯꇂꈪ;ꑊꇱ ꇬꑊꈴꁮꂿꄷꇬꊎꄐꏤꇰ——ꐪꀕꈨꉜꅐꇁꉆꀐ;ꇇꏧꇁꏥꇁꊋꀋꑌꑍꁆꌠꑕꇭꀧꀊꃶꂶꌠꎑꄉ,ꀋꇊꆏꇇꀊꎴꌠꀊꑙꈧꌠꊼꇅꌡ;ꊿꍒꇯꆏꀄꊭꀐꄷꇈ,ꀊꅰꃅꈧ ꐚꈧꌠꎼꄚꇱꇬꆏꀄꊭꐯꀄꊭꀐ。ꇭꀧꇯꀄꊭꁈꀋꐥꁵꇯꁵꇵꑴꌦ。
   ꃷꇎꐀꌒꀉꁌꂶꌠꂓꋋꇬꈨꈭꐨꈍꉗꏢꒉꑲꆀꋌꄷ:“ꌞꂓꋋꇬꑞꂷꋉꌠꉬꀋꐚ,ꋉꌊꌸꅈꌸꐯꌸꇬꉬ!”ꄷ。
   ꐀꌒꀉꁌꌧꑌꃅꄉꄮꇬ,ꂽꌋꀉꁌꆹꉌꂵꐒꏭꃅꏮꈜꎴꃅꄷꉜꎍ,ꃚꋒꀉꇖꐆꃅꋌꄷ:“ꉠꀋꃋꈧꌠꆹꊱꆏꊱꃅꊿꒃꌊꁧꌐꀐ。ꉠꌺꂶꌠꆏꀱꆽꃅꑮꃀꒃꊌꀋꄐꇧ ꎍ,ꀋꇊꆏꉢꋧꃅꋋꂷꑟꇁꄷꆏꌞꌺꑮꃀꀉꄂꉘꇁꌠꌡ……”“ꆏꎆꀋꐥꂷꆹꀋꉬ,ꋍꂷꒃꇬꁳꄷꆏꍑꀋꆆ!”ꉉꅉꃅꑓꋪꋑꌠꀏꈴꄉꏮꇫꊼꇅꉜ,ꉌꂵꈐꅽꑠꀋꐒ ꅍꐒꂷꉬꀐꉂꃅꉪ。
   “ꇣꋲ……ꑮꆜꂷꇫꉌꃹꅲꑠꂷꀋꐥ,ꑞꉬꀋꐚ……ꀈꍂ,ꑊꋌꃀꐈꂷꇱꑽꊼꇅꁵꏭꐛ!”
   “ꌞꐮꊜꋽꌠꀋꐥꌦꌠꀋꆆ,ꐮꉌꃹꇁꄡꑟꑠꋒꐥꑵꀋꆆ。”
   “ꄚ,ꊿꋌꉪꀋꐛꌠꆏꋌꌋꅪꂷꋴꇯꒉꀋꀬ,ꈴꀕꇈꌋꅪꂷꏭꌧꈩꄉꉂꅇꑟꅇꑠꆹꉉꇯꉉꀹꀋꄉ……”
   “ꆎꂷꀋꐒꅍꐒ,ꌞꀋꃅꄮꈉꀋꑟꑴꌦꌠꀋꆆ,ꌩꃨꇓꃨꑋꈌꑟꄷꆏꃨ,ꃅꍵꑟꄷꆏꌨꏾꇓꏾꆴꃅꆴ。……ꈅ——ꅽꀋꆗꃀ——ꀌ,ꀋꉬ!ꅽꌺꋋꂷꀋꃅꈍꑋꈐꀐꌠꉬꆏ?”ꐀꌒꀉꁌꈌꑽꄉꀋꆗꃀꄷꇫꌠꋌꉉꎼꆹ,ꄚꋌꃅꊭꏢꆗꄷꆏꇌꑭꇌꇇꇖꁆꇽꃅꇽ,ꋋꇅꄷꋌꄺꀱꄚꀒꎭꑟ。
   “ꀋꃅꎼꈎꆏꊰꉆꈎꀐꌠꀋꆆ!ꄚꆏꀋꄶꊿꂶꌠꉜꉏ,ꑮꃀꂷꒃꇬꁳꄉꇬ,ꑮꃀꇱꇵꑱꇉꊐꑵꌠꀋꂸ。ꈴꀕꇈꉪꏣꃀꏣꑟꈍꃅꇬꏭꉉꄿꂿ,ꑮꃀꈁꀋꅲꀦꌠꀊꅰꃅꊿꋌꎼꈌꊰ、ꉌꂵꐒ。”ꂽꌋꃀꌠꉉꌐꇈꌗꀊꎴꑠꄲꏂ。
   “ꇣꋲꂷꉬꀐ!ꉠꌺꂶꌠꀋꃅꑲꆀꊰꃘꈓꇬ,ꑮꃀꂷꒃꀂꁳꄷꋌꇗꅷꈌꊰ,ꑞꎆꃀꂷꌌꃼꄷꌠꉬꀋꐚ。”
   “ꋍꈨꆏꁨꈁꄷꇬꈁꀋꅲ,ꋌꈨꆏꊨꏦꇯꑭꄑꄉꇫꇖꐺ!”
   “ꉢꉪꇬ,ꂽꌋꀉꁌ——ꀈꍂ,ꅽꌺꋋꂷꑮꆜꋒꀋꋻꑴꌦꌠꉬꀞ?”
   “ꋋꈨꆏꉢꇫꊨꀋꄅꀐ!——ꌋꅪꏭꇯꁱꐭꀋꀬꑠꂷ,ꈍꃅꄉꌋꅪꋒꂯ?”
   “ꌋꅪꋒꋻꄷꆏ,ꄾꑌꄚꄉꀒꄿꑟ,ꇭꀧꑌꄚꄉꀒꒆꑟ,ꀋꇊꆏꃮꁮꌺꁬꋌꌌꄉꍈꎼꆹꌠꌋꆀꐯꌟ。ꀊꋨꇅꑟꇬꆏ,ꆏꇫꄀꇗꄻꀋꅐꃅꋌꄈꂯꀱꅽꄹꎹꇁꌠꉬ!”
   “ꃅꃤꄷꆏꃫꂷꀉꏯꀁꇬꀀꇁꂷ,ꑞꂷꋍꋴꇁꂯ?ꋍꉔꌠꇵꌦꅍꀂꏾꈎꂣꈐꇱꄉꇢꇑꋴꑌ——ꉢꋍꇇꀨꄉꆹꎹꒉꀋꉆ!”
   “ꉢꉪꇬꆏꎆꃀꈍꑋꉐꂷꄻꇬꁳꄉ,ꋌꁳꉈꏭꈩꒉꎻꄷꆏ,ꋀꊨꏦꋌꐛꋌꐙꃅꐯꎷꁧꑲꌧꌠꉬ。ꀋꇊꆏꐚꌋꆀꃧꃨꌡ。”
   “ꌞꆏꉉꎼꇁꇬꁢꊧꍈꑌꐥꀒ!”
   “ꀊ——ꂽꌋ,ꇫꄉꌧꌠꀋꉬꀐ,ꉣꑊꇌꌞꀂꃆꇬꃹꆹꀐ,ꐚꃅꑐ……”ꐀꌒꃀꌠꃶꇌꂿꇌꃅꋍꎊꈭꈧꌠꀨꎹꐺ。ꑐꋪꆏꏮꋠꀋꌐꑴꌦꌠꉷꃅꎭꋐꈧꌠꉜꄉ,ꋰꀋꄐꃅꋌꄷ:“ꀈꍂꀃꑍꅽꋂꄮꋋꑍꇯꈌꁉꌐ……ꍨ,ꅽꉥꑣꃅꀨꎹꄉꉏ。”
   “ꆏꌌꀁꇬꄉꋠꁧ!”ꂽꌋꀉꁌꋍꉌꇿꇁꄉꋌꄷꉉ。
   “ꀋꍑꄿꉬꇆ!ꋟꑌꋠ,ꌌꑌꌌꑠꐥꑵꀋꉬꀐ。ꀞꐕꀐ,ꀞꐕꀐ!”ꉉꑌꃅꇇꇀꑳꁆꌠꌌꋌꄌꋍꐣꁙꇬꊐ……
   “ꆾꆾꀕ!ꃪꐛꇋꏢꀋꂸ……”ꃀꌠꑍꂷꌠꋓꃅꀥꇌꈧꌠꏭꉜꄉꆹ。
   ꃘꊰꎖꈎꀐꌠꂽꌋꀉꁌꀊꂵꑋꐮꇖꄉꎆꃀꈍꑋꉐꂷꄻꌺꁵ,ꀋꆗꃀꌬꎼꁧꀋꁧ,ꈍꃅꄉꌬꎼꁧ,ꑞꐛꅹꃅꌬꎼꁧꑠꋍꑊꋍꇬꂯꇬꀋꍣ。ꀱꆽꃅꀉꄉꀉꂿꑋꃄꄟꋌꐘꀋꆗꃀꋌꎼꉌꋲꀕꃅꐙ。
   ꄚ,ꌤꆿꑞꑌꁰꍋꄟꍣ。ꀋꇊꆏꃏꍏꃅꈋꊿꋅꑠꑵꌩꋚꇓꂷꌌꄉꄃꋠꇬ,ꇇꑌꇬꄃꇬꎷ,ꈂꀸꇬꊫꃴꑠꑌꁐꇬꇯꇬꎷꃅꄃꋠꌠꌡ。ꋀꋠꎼꇁꇬꈍꃅꄉꂄꀱꋦꉏ!ꀋꄸ ꄷꋋꈨꄻꉪꍈꇬꈀꄸꂷꑠꋠꆹꂯ?ꋋꆏꋻꅑꄟꉬꀐꌠ,ꌞꅇꂷꑠꇬꐥ:“ꋌꐛꋌꐙꃅꐙꆏꋻꅑꇁ,ꋻꅑꃅꐙꆏꋌꐛꋌꐙꇁ”ꄷ,ꅇꂷꋋꇬꉉꌊꐯꀕꐯ,ꀋꃅꀋꆗꃀꑌ ꀅꌳꀅꌳꃅꋻꄀꇁꀐ:ꋌꂴꇬꂾꈍꑋꑍ,ꎆꃀꈧꌠꋍꐣꁙꀀꇬꌌꌬꑲꀋꌧ,ꈜꀕꇈꎆꃀꋋꈨꋍꐣꁙꀀꇬꉌꂵꇯꐒ——ꆘꅝ、ꌬꅉꀋꌬꇬꀉꄉꀉꂿꌌꏈꌠꏦ。ꄚꇯꍝꃅ ꆙꅝꇢꋍꅉꑟꇬꑌ,ꀉꄉꀉꂿꆹꇫꅉꀋꐚꌠ,ꀋꆗꃀꊨꏦꉉꇫꇰꌠꀋꉬꑲꆏ。ꄷꀋꁧꋍꃀꌠꉜꇬꆹꎆꃀꇬꀋꀀꇬꄈꋍꉌꂵꇿ——ꋍꌺꎆꃀꌌꄉꌫꅉꇬꌬꀐꉂꃅꉪ。
   ꀋꆗꃀꎆꃀꇇꈐꑌꄷꆏ,ꋌꇱꊭꄎꌌꋌꃼꅍꑠꃼ。ꅺꌡ ,ꋌꀄꊭꃅꋍꑍꇯꆐꉌꃹꅷꇁꌠꂽꃢꈜꋬꈭ。ꎆꃀꋌꏓꊭꅷꃼꇎꄮꑟꇬꆏ,ꋌꎼꏦꎫꁧꀐ,ꀏꄫꃅꆦꄉꀱꉈꑴꑟꇁꄮꆏ,ꋍꀉꄉꋌꇷꊼꇅꁳ:ꀎꇓꆏꀒꋤꃤꀊꏂꑠꂷ ꅑ,ꒉꇯꀉꒉꐯꀉꒉꂷ,ꀂꏾꂱꏶꃅꐙꂶꌠꀎꇓꀉꇰꋋꂷꇂꃴꉈꐺꇬ,ꀋꇊꆏꀭꂷꄻꈂꉌꀉꒉꁬꇂꃴꐕꄉꌠꌡ。ꀂꄁꋬꈬꌠꆹꂽꃤꑵꌠꉬꀐ!ꋌꄹꇬꋋꈨꈚꄉꆈꌩꏪ ꇓꏯꇬꀀꇬꊿꇫꌋꀋꄐꀐꄷꉌꂵꇿꐯꇿ。ꄚꊿꋋꉪꀋꐛꌠꆏꋌꆈꌩꏪꇓꏪꇬꀀꌌꑞꃅꌠꉬꀋꐚ?ꂽꆞꈧꌠꆹꎃꐚꆞꐰꀋꋌ,ꄻꊿꈧꐚꋋꂷꇢꎼꇁꇬꆏ,ꃮꁮꌹꂷꄌꋍ ꆞꑭꇬꊐꉆꄉꏽ。ꂽꏹꑮꀊꏂꁧꏢꀊꂥꋓ “ꉅ”ꐺ——ꏹꑮꏣꀨꏡꌠꇯꁮꇧꎍꀐ。ꋍꊂꀉꑳꉌꋲꑊꑍꅑꑠꁥꇯꐊꄉꒈꅉꃅꄇꂿꑭꅐꇁ。
   ꂽꌋꀉꁌꀉꑳꈧꌠꋌꈹꇧꎭꈭꐨ,ꇬꏭ:“ꅽꋋꈨꇿꄉꆏꎼꌊꇁꈨꉬ?”
   “ꏦꎫꄉꃼꌊꇁꌠꄸꇆ!”
   “ꑞꌌꃼ?”
   “ꎆꃀ。……ꀉꁁꑞꌌꃼꄷꌠꉬ?”
   “ꅽꎆꃀꇿꌌꇁ?”
   “ꀉꄉ,ꆏꇬꀋꎺꀐꄿ?ꀋꑍꊂꈍꑋꑍꅑꅸꇁꌠꀉꂿꆐꑊꎆꃀꈨꄻꉢꁳꇬꎷꌠꆹ……”
   “ꀋꑍꊂꎆꃀꄻꆏꁳꈧꌠꌌꃼꌠꅀ?ꅽ——ꏯ——ꌌ——ꋋꈨꃼꄷꄿ?”ꂽꌋꀉꁌꇨꇅꃃꌌꃵꋩꏭꃅꀱꀁꇬꃹꁧ。
   ꀉꂿꂶꌠꊌꂿꇬꆏ,ꃚꋒꀅꌳꃅꌺꂶꌠꏭ:“ꆏꑞꃅꅽꀉꄉꇨꇅꃃꅍꑠꀉꄂꃅꇬꎷꂷꉬꀒ!”
   “ꄚ、ꀉꂿ,ꆐꑊꎆꃀꋋꈨꄻꉢꁳꇬꌌꄉꃢꈜꃢꇓꑠꃼꀋꉆꄷꀋꄹꃅꄉ?ꈴꀕꇈꉠꏯꌌꄉꉈꏭꈩꇬ,ꐰꈩꉎꈩꄮꇬ,ꌬꋭꅈꌬꄷꀋꆆ?”ꀋꆗꃀꉪꀋꐛꏭꃅꋌꄷ。
   “ꃢꈜꃼꌠꆹꀱꀉꂿꄹꎹꇁꑵꉬꀐ,ꋋꈨꆹꄻꆏꁳꄉꉈꏭꈩꐺꇬ,‘ꐋꀨꐺꊈ’ꐊꐺꇬꌬꄷꌠꀋꆆ!”ꀉꂿꉉꄮꇬ“ꐋꀨꐺꊈ”ꄷꇬꌠꃚꋒꊼꇅꀊꂥꃅꉉ。
   “ꀒ——ꉢꅉꐚꀐ!”
   “ꅉꐚꀐꆏꍑ、ꅽꀉꄉꏭꑽꀐꄷꉉꀽꆹ!”
   ꀋꆗꃀꆞꑭꀊꐯꈫꌠꌋꆀꐯꇯꀃꈈꁬꌠꈏꃹꆹ……

   ꃅꃤꇁꀐ,ꆧꁨꂶꌠꀀꑌꇴꑓꋪꎑꄉꈛꑀꌊꑊꌦꅍꁧꎏꇬꁖꇁ。ꋌꒊꆭꀕꃅꁨꑭꋌꄔꃅꈊꇬꑲꆀꄓꑘꃅꇁꌠꒆꇐꈧꌠꀨ!ꋌꄔꇁꄹꇭꄺꑓꀨꄷꆏ,ꁮꑧꇇꈧꌠꃘꌺꅲ ꇢꈻꑠꒇꎼꇁꀐ;ꋌꄔꑳꐮꍯꃅꀨ,“ꌺꒉꀉꃈ”ꃛꁙꀊꃚꐆꃅꑘꀕꇕꇰ;ꋌꄔꁡꇤꋴꐛꌠꄸꉺꂶꌠꀨ,ꌠꆗꑮꆜꒈꃚꈧꌠꐝꄧꀕꃅꇫꈌꐚ。ꋋꈨꄻꐯꇯꎼꇁꇬꆏ, ꀋꇊꆏꑵꉙꑵꑠꋉꄚꁧꑭꇂꃴꑌꄉꇰꀋꃀꃅꑵꉙꊱꑵꌠꌡ。
   ꀉꁌꀊꂵꌋꆀꀉꑳꑠꆹꃬꀉꏯꀀꁧꌐꀐ!ꈊꃀꄮꇬꋧꃅꋋꂷꆹꀊꋧꋪꃅꀊꏀꊈꈧꌠꃣꂷꐛꇫꎍ!
   ꀋꆗꃀꋋꍂꃅꄉꂴꇬꂾꃢꌠꉈꏭꈩꇁ,ꋌꃅꈊꌠꋧꃅꋋꂷꂿꇬꉌꋲꐨꀊꅶꐯꀊꅶꃅꐥ,ꀋꇊꆏꇬꂾꃢꌠ“OK”ꄜꇬꃹꆹꌠꌡ。ꃷꇎꐀꌒꀉꁌꄰꌻꑘꊰꃘꈓꂶꌠꋍꑊꐮꐊꄉꆧꑭꇂꃴꄸꉺꊿꋧꅈꈚꌠꇬꃹꁧꀐ……
   ꐀꌒꀉꁌꄰꌻꑘꆹꃅꇢꂓ,ꋍꇭꀧꑠꒆꌊꄉꏷꀧꅍꇧꎍ,ꀋꇊꆏꃮꁮꌺꃮꎔꁬꋌꍈꄉꂷꌡ。ꄚ、ꋍꇭꀧꀊꂥꐨꆏꑿꅰꂷꈋꉐꀋꐂ,ꋍꃢꋌꀉꇙꏣꌊꀁꇬꇀꄮꇬ,ꇓꂃ ꂷꀉꇙꀨꎼꇁꄉ“ꃛꄷꋍꏜꆫꁯꂶꌠꋌꅧꃪꃹꊐ,ꇭꀧꀀꊭꑠꍈꀊꉬꄷꆏꏜꆫꁯꀉꄂꃪꃹꀕꒉꌠꀋꉬꃅ,ꀂꏾꂶꌠꑌꉥꑣꄷꇫꃹꁧꀐꌠ。ꑠꅹ,ꌤꋌꏢꅐꇈꉈ,ꋌꋍ ꀉꄉꀉꂿꇭꀧꑠꃅꀀꊭꑠꍈꀉꄂꄻꋌꁳꄉꇈꐛꅹꃅꉌꂵꇿꐯꇿ。ꐀꌒꃅꇢꉈꏭꈩꁧꄷꆏ,ꆞꑭꋌꍤꄉ,ꏸꑮꆃꉳꋓꌠꀡꄅꀡꄅꃅꀋꆗꃀꂾꐊ,ꑘꀡꈧꌠꀜꇁꄮꇬꆏ, ꀋꆗꃀꂶꌠꄐꏤꄉꇬꀉꏯꉇꉜꄉꊼꇅꐂꃅ,ꊿꑍꂶꌠꇘꄟꈧꌠꈳꏦꐥꃅꇫꈜꒉ……
   “ꀊ——ꈊꏹ!……ꇁꀕꇁ!ꄚꑌꇁꍰ!”ꀊꄸꃄꌒꂶꌠꑭꇇꑾꂖꌊꇁꀋꆗꃀꌋꆀꐮꇇꉩꇈ,ꋍꑋꅉꂶꌠꋍꏆꇬꁳ。ꋀꋍꈨꌌꇫꄉꌧꇬ,ꀊꄸꃄꌒꋋꂷ“ꐫꇓ”ꂷꈁ ꐛꄷꇬꋌꇫꃹꀋꆹꀋꋻ,ꃄꇽꋋꇽꃅꂓꅑꀐꑠꂷꉬꄷ。ꋌꇭꀧꑌꀉꒉ、ꊊꑌꂄ,ꑠꅹ,ꋍꉔꋑꀋꋒꌋꅪꂷꀉꄂꐞꋍꈚꃹꒉꌠꋌꊌꂿꄷꆏ,ꆿꅪꉆꈹꃅꈹ,ꈍꃅꆏꈍ ꃅ,ꀈꈥꀕꃅꋌꄝꇫꀋꎭꌠꉬ。
   “ꀊꁠ!ꃄꌒ,ꆏꑞꃅꑠꃅꀺꇆ?”ꀋꆗꃀꂶꌠꎖꋪꀋꐥꄉꑊꏦꐆꃅꇁꇫꑌ。ꈜꎴꃅꄷꆹꋌꇬꊌꀋꂿꀐ,ꈛꑌꃅꄷ——ꋍꂲꆽꑽꏃꊐꄉꌠꎧꐎꏣꇧꎍ,ꋌꅉꐚ:ꁡꇤꌠꆗꋋꈨꎧꐎꋋꈨꅝꇬꀆꐒꅝꌠꌋꆀꐯꌟ。ꀋꄸꄷꊿꀉꇨꌠꊌꇬꆹ,ꋍꁠꆧꀉꄂꃅꅝꌐꄷꇬꂯꋀꌌꒈꅉꀋꐥꏭꐛ。
   “ꈅ!ꉢꋍꀘꈈꉠꀋꆗꃀꊼꇅꄐꉏ!”ꀊꄸꃄꌒꇇꇀꑳꁆꌠꇿꈴꒉꀋꐚꎧꏣꌠꋌꄌꌊꇬꉆꎍ。
   “ꃄꌒ,ꉢꎧꅝꑲꀋꌧ!ꇯꍝꃅ……ꇫꅝꑲꀋꌧ。”
   “ꎧꅝꑲꀋꌧ?ꊿꑞꂷꉨꂴꒆꎼꇁꄷꆏꎧꅝꑲꌧ?ꈀꄸꂷꉬ?……ꁦꋠꈧꌠꀋ,ꆍꊇꉜꇬꆹ?”
   “ꀥꋚꇯꀋꎑ!”
   “ꌞꃄꌒꉉꅇꉬ!”
   “ꉡꆹꇬꀋꀥ……”
   “ꌦꌺꂷꀋꉬꑲꆏꒆꎼꇁꉚꀋꂪꃅꌧꌠꐥꑴꅀ?”ꋍꁥꌠꐙꈌꋊꎼꒉꇄꌠꀉꏯꆏꉉꉢꉉꇥꂅꈩꇧꎍ。
   “ꁦꋠꈧꌠꀋ……ꐋꀨꈧꌠ……”ꀋꆗꃀꅇꂷꇬꌌꄉꋀꊇꏯꉉꂿꉂꇬ,ꋀꊇꂾꃚꀊꂥꈧꌠꍅꎼꇁꇬꆏ,ꁬꃷꋙꋠꃙꍈꂯꀋꌡꀐ。ꋀꊇꂾꃚꈧꌠꊼꇅꀁꋌꊰꒉꇬꆏ,ꀋꆗꃀꍝꄷꄉꀒꉉꑟ:
   “ꎧꅝꄉꎧꑱꄷꆏꀃꌐꀁꇬꁧꀋꄐ!”
   “ꆎꂷꀋꐒꅍꐒ。ꑞꂷꐒꄷꌠꉫꄜ?ꀃꌐꎧꑍꀘꅝꄉꄷꆏ,ꊷꑌꊸ、ꉌꂵꑌꀉꒉ……ꑮꆜꍈꁳꆏꏁꁧꏭꑲꆏꍑꀋꆆ,ꉱ——ꉳ!”ꀊꄸꃄꌒꋌꉉꋌꒉꀋꇔꃅꋌꄷ。
   ꊿꄚꈭꇍꑌꈧꌠꃅꒉꇧꎍꌐ,ꀋꆗꃀꀉꄂꀱꆽꃅꒈꃚꋋꈨꀕꇬꋍꎬꈷꍅꏭꃅꐙ。ꋍꄮꇬ,ꐀꌒꃅꇢꂶꌠꑊꑍꒉꑌꇴꃅꄓꌊꀋꆗꃀꑞꋓꄉꇫꆼꁠꅥꄉꋌꄷ:“ꆏꃄꌒꐊꄉꇬꆹ,ꅽꉌꂵꋍꒈꑠꍈꂯꐒꄻꀋꅐꌠꉬ。”ꋌꉉꑌꃅꇇꀉꁁꁆꌠꌌꄉꀄꊭꐯꀄꊭꌠꃆꂮꄜꑠꍈꄻꇬꀦ。
   ꋀꊇꋌꁥꐮꇖꄉꇬꀉꏯ,ꆏꋍꇬꉉꉢꋍꇬꉉꃅ,ꀋꆗꃀꅿꎧꏸꇬꂾꁠꆧꌠꋀꊇꌠꆗꑮꆜꋋꈨꅿꊋꇤꏡꇤꌠꇂꃴꄉꈌꁌꎼꒉꀐ。ꎧꏸꈧꌠꀋꆗꃀꇬꇉꈜꒉꇬ,ꀋꇊꆏꄔꁧꇬꁖꇁꌠꇓꋌꒉꅩꇉꃅꐙꀊꋨꈨꌟꃅ,ꑞꊐꇬꈴꒉꆏ,ꑞꊐꇬꋍꇱ“ꐗ”ꊼꇅꁵꃅꐙꇫꎍꀐ。
   ꀋꃉꌌꎧꀊꋨꏣꇤꀐ,ꃄꌒꉈꑴꑍꏣꃼꇬꅜꌦ,ꀊꉗꀋꈁꃅꋀꇱꑍꌐꌦꀐ!ꎧꅝꀋꋻꌠꀋꆗꃀꆹꋋꇅꇬꆏꇬꇉꃆꄔꐞ,ꄷꀋꁧꀑꃀꏭꃅꇯꐛ。ꋋꇅꇬꆏꋌꉪꌤꐘꄀ: ꉠꀉꄉꀉꂿꉠꏯꉉꇬ,ꎆꃀꌌꄉꌬꋭꅈꌬ,ꐋꀨꐡꊈꑠꎹꄷꀋꂸꉂꄉ,ꋍꇇꇀꑳꁆꌠꎧꌗꑘꒀꌠꇱꐔꌊꆞꐣꁙꇬꄉ,ꎆꃀꊰꂷꋋꀖꐀꌒꃅꇢꁵꇈꇬꏭ:“ꃅꇢ,ꉢꊼ ꇅꀑꃀꀐ,ꆏꉠꎁꃅꎧꉬꏣꃼꌊꇁꉏ!”ꄷ。
   ꐀꌒꃅꇢꒈꅉꃅꄓꇁꇈ,ꋌꄷ:“ꀊꁠ,ꆏꋋꂷꉌꂵꋍꑋꑍ,ꀋꃼꑌꉆꀐꌠꀋꂸ!”ꄷꈂꀸꋍꁁꏯꉉ,ꇇꋍꁁꃅꀕ。ꎆꃀꊰꂷꌠꋌꒃꌊꄚꈴꀒꁧꑟ……
   ꃄꌒꆹꎦꈌꅾꐆꃅꑮꆜꋍꊈꌋꆀꐯꏀꇧꎍ,ꏮꇬꉚꇬꀋꆗꐯꀋꆗꀱꋦ。ꋍꁥꌠꆏꈈꉢꄎꉢꈈꆏꄎꃅ,ꎧꏸꃅꉒꃴꃅꃴꇧꎍꀐ!ꆧꑭꇂꃴ,ꌠꆗꈧꌠꎧꑍꍔꅝꄉꇬꆏ, ꇇꑍꁆꌠꑠꁧꀋꎴꇁ。ꑮꆜꋍꈨꋋꈨꆹꐳꃅꄉꇇꁆꌠꋀꇱꏶꊼꇅꁵꇈ,ꋀꑅꎸꂶꌠꑌꋋꇅꄷꀒꆶꑟ;ꋍꈨꋋꈨꆹꎧꑱꀐꌠꅀ,ꌌꉪꐨꀋꐥꀐꌠꉬꀋꐚ,ꈴꃪꀕꌠꀉꏯ ꋀꁳꈁꏾꃅꀰꏢꎻ。
   ꀋꆗꃀꇇꁆꌠꃄꌒꇱꈻꌊꐛꀈꎵꃀꂷꇭꀧꇬꉜꄉꆹꇬꎷ。ꌋꅪꂶꌠꏮꀋꆗꃀꊼꇅꉜꇈꀱꃄꌒꏭꋌꄷ:“ꑞꁦꋠꂷꉫꆏ,ꃶꀐꌠꅀ!ꃀꌠꀐꇬꑞꉪꌠꉬꂯ?……”
   ꀋꆗꃀꋍꊨꏦꑴꅉꊯꈬꀉꄂꈎꑴꌦꌠꋌꅉꐚ,ꌤꋌꐘꆹꋌꊨꄅꐯꊨꄅ,ꀋꇊꆏꋍꊨꏦꑴꅉꂶꌠꌺꃰꂷꉬꌠꌋꆀꐯꌟ。ꑠꃅꄉ,ꅇꂷꋋꇬꈨꇬꇯꍝꃅꋍꉌꀋꌒꐯꉌꀋꌒ,ꑊꑍꄸꄉꇬꏭꋌꄷ:
   “ꉢ——ꀈꃀꀐꄷꌠꅀ——”ꋍꉌꂵꈐꑮꆜꋋꂷꀋꃉꌌꅇꂷꋌꉉꑽꇫꌠꄺꀱꇚꑴꉂꄉꋌꄷ。ꄚꑮꆜꂶꌠꅇꀱꎼꇁꇬꋍꉌꂵꁦꎆꋍꊐꊰꀐ。
   “ꉬ!ꆏꀈꃀꀐ,ꑠꀋꉬꑲꆏꊿꑞꃅꅽꏯ‘ꀋꆗꃀ’ꄷ?”
   “ꑠꃅꄡꉉ……”ꀋꆗꃀꎧꑱꄉꊼꇅꈌꇖꆹꀐꌠꅀꇨꇅꃃꄉꈌꇖꆹꀐꌠꉬꀋꐚꇧꎍ。
   “ꌞꀋꆗꃀꉉꌊꐯ——ꑠꃅꄡꉉ。ꁠꆈꃹꒉꄷꆏꀈꃀꀐꌠꅀꀊꏀꑴꌦꌠꊨꄅꀨꄅꄳꇓꁧꑎꅞꇬꀉꏯꂪꀘꀐꌠꆹꀒ!”ꃄꌒꂶꌠꀋꆗꃀꁆꏯꉆꄉꋌꄷ。
   “ꉢꅽꏯꀋꏈ!”ꀈꎵꃀꂶꌠꏮꃄꌒꉜꄉꋌꄷ。ꃄꌒꑊꑍꊋꐛꀱꋦꁬꎑꄉ,ꇬꉚꄉꈌꌦꑓꆽꄷꇈꋌꄷ:“ꆎꆹꉠꏯꁱꀋꐭꑴꇬꉢꅽꏯꁱꐭꏾꀐꌠꆹ!”ꄷꉉꑌꃅꀏꈴ ꄉꋌꌎꌞꐃꁆꇬꄀ。ꄚ,ꆏꏈꉢꏈ,ꆏꉉꉢꉉ,ꆏꍡꉢꍡꋓꃅꇧꎍꐛꅹ,ꊾꂷꂯꇬꀋꌋ。ꈜꀕꇈꂿꃅꇬꎑꌠꆧꁨꂶꌠꂯꇬꊌꂿꀋꐚ?

   ꌋꐓꀐ。
   ꈍꄮꇄꌠꁧꌠꉬꀋꐚ,ꑍꍈꑍꍈꃅꏻꇫꈴꁧꌐ。ꀋꆗꃀꂴꆽꉪꄉꇬꀊꑞꀊꑱꃀꄷꑠꍈꐊꄉꊼꇅꌧꈿꂿꉂꌠ,ꎧꏸꑍꀘꃅꐛꅹ,ꋌꀉꄂꈩꀜꅈꋋꂷꏢꁮꇬꀀꇊ。ꋋꐊꐺꌠꆹꆧꁨ,ꋋꐊꀀꌠꀌꀠ,ꁮꑧꇇꈧꌠꂯꍡꉙꀀꑌꇴꊱꌠꂢꎼꆹꀐ……
   ꌤꆿꑞꅐꄿꂿ,ꄽꂫꐛꐨꈍꃅꐙꄿꂿ,ꎹꄓꈧꌺꄡꇗꀉꄻꀕꃅꋍꅏꄮꇄꌠꆏꁭꅐꏭꁆꌠꅐꇁꇬꎷ,ꈧꌺꋋꂷꅐꅔꅞꄷꆏꃅꑍꀊꏀꋍꑍꄚꄉꊨꄅꌦꀐ。
   ꋋꄹꉇ,ꉘꁮꅐꈍꂤꃅꅑꀐꇬ,ꀋꆗꃀꄡꇗꀀꑌꇴꌣꄹꇬꀀꑴꌦ。ꀉꂿꑸꑽꋍꁍꏬꂔꇬꑲꆀꀀꑌꇁ,ꋌꈍꄮꀁꇬꑟꇁꌠꉬꀋꐚꋍꊨꏦꑴꅉꂯꇫꊨꀋꄅ.ꀀꀋꑌꇬꄈꑞ ꑌꀋꌋ,ꀀꑌꇁꄷꆏ,ꋍꀂꏾꂶꌠꊫꀕꊪꃅꆅꇧꎍ,ꀋꇊꆏꁱꆰꂷꄚꈏꄉꀰꏢꐺꌠꌡ。ꋍꇭꀧꇖꌋꈧꌠꑠꎧꑱꄮꆏꃄꈌꄐꃅꌌꇿꏶꇬꎷꌠꉬꀋꐚ,ꑞꈚꌠꇬꑌꆅꌠ ꌡ,ꑞꈚꌠꇬꑌꐛꀋꌒꌠꌡ。ꋌꀱꋋꁆꏯꀀꌦ、ꀱꀊꋨꁆꏯꀀꌦꃅꇧꎍ……
   ꀉꂿꆹꌺꂶꌠꀀꑌꌠꋌꊌꈨꄉꇬꏭ:“ꃮꐔꌺ,ꄓꋙꋠꇁꌶ。ꑞꃅꑠꃅꑱꌠꉬꀋꇂ?”
   ꃮꐔꇫꅇꀋꀱ。
   “ꊨꏦꑴꅉꇭꀧꂶꌠꎖꄉꅝꑵꉬꀐꌠꆹ——ꎧꀋꐕꄷꆏꊼꇅꄉꄐꃅꅝꀋꉆꅀ。”
   “ꋀꊇ꒔ꁥꌠꆏ꒔ꀘꉢ꒔ꀘꃅꌌꉢꄎꇬꎷ,꒔ꂷꃤꅝꇈ,ꀉꁁꂶꌠꃤꀋꅝꇬꑌꑵꋪꀋꐥꄉ——ꉜꇈꂾꆏꎧꑱꀐꅊꇈ。”ꀋꆗꃀꊋꀋꑌꐆꃅꋋꇬꉉꎼꇁꇈꀀꀱꃙꈨꌋꆀꐯꇯꇣꁁꈌꐚ。
   “ꇤꇫꊼꇅꏀꄉ!ꑠꊝꀋꋻꃅꀋꅞꉖꆏꋌꎼꊼꇅꀙꀐꌠꄷ。”ꂽꌋꀉꁌꌺꉈꇬꄉꋌꄷꀊꂵꏭꉉ。
   ꂽꌋꀊꂵꎆꋊꅸꇈꈬꁦꄮꇬ,ꂽꌋꀉꁌꂶꌠꉌꌤꏭꃅꇁꃮꐔꀀꈤꋴꄉꇬꏭꋌꄷꅲ:
   “ꀋꅞꉖꆍꊇꑞꀕꈨꐮꐊꈩꇆ?”
   “ꀉꄉ,ꈀꎭꀕ,ꑠꃅꑵꀋꉬꀐ。ꉢꀂꏾꆆꌦꄉꏽꑴꌦ,ꉢꁳꊼꇅꀀꏯꌦ……”
   “ꆏꉠꅇꀱꀐꄷꆏꉢꆎꀀꀋꄖꀐꌠꆹꀒ!”
   ꌺꂶꌠꋌꇎꈌꊰꏭꃅꐙꀐ。
   “ꑞꈨꉬꄷꌠꉬ,ꃅꇢ、ꃄꌒ、ꀈꉼ——ꀉꑌꈨꄸ,ꉢꋋꃷꆎꇰꌐꀋꄐ。”
   “ꄚ——ꀉꁁꌋꅪꑠꆏꀋꐊꄿ?”ꂽꌋꀉꁌꋍꊨꏦꑴꅉꄈꅉꐚ,ꉬꂾꀋꉬꂾꋋꆹꌤꋋꈨꂿꋺꈨꋻꌠꀒꋏꂷꉬꀐ,ꄚꋌꋍꌺꈍꃅꄉꈩꌠꅲꏾꄉ,ꉘꇉꌠꉌꃀꑌꄉꋌꄷꅲ。
   “ꐊꑴꇆ!”
   “ꉬꀐ——”ꂽꌋꀉꁌꈂꀸꈌꌦꄷꊼꇅꒉꇈꐪꊛꄉꋌꄷ:“ꊁꆏꈍꃅꐙ?”
   “ꑞꉨꆀꊁꆏꈍꃅꐙꄷꌠꄜꀋ?”
   “ꑮꆜ!ꆎꌋꆀꑮꆜꈍꃅꐙꄷꌠꄜ!”
   “ꌞꊿꆹꈍꃅꐙꀋꐚꉢꇫꊨꀋꄅ。ꉢꎧꉬꏣꃼꀊꄶꎭꇈ,ꊁꈧꌠꆏꈍꃅꐙꀋꐚꇫꊨꀋꄅꆸꅝꀐ!”
   “ꎧꀉꄂꃼꇧꎭ?ꌺꇰꐯꌺꇰ……”ꂽꌋꀉꁌꉌꂵꈢꏭꃅꋰꀋꄐꃅꀂꏾꈩꄉꋌꄷ。ꈍꉗꏢꐛꑲꆀꐪꊛꄉꉉꇬ:“ꆏꃀꅉꑮꆜꍈꄡꌌꄉꊼꇅꑌ‘ꌧꀋꈿ’ꄿ?……ꃃꃔꀐ!ꀃ——ꀂ!ꑠꆏꇯꍝꃅꌞꌺꄸ  ꄷꄸꀋꅲ,ꀀꌺꉔꄷꉔꀋꅲꌠꉬꀐꂸ!”
   “ꑞ‘ꄸ’ꑞ‘ꉔ’ꄷꌠꄜꇆ?”ꀋꆗꃀꄓꇫꑌꄉꇬꏭꅲ,ꋍꄮꇬꆏꀉꂿꂶꌠꀱꉈꑴꑟꇁꀐ,ꑠꅹꂽꌋꀉꁌꃛꁙꀀꊭꃅꄉꀋꆗꃀꏭ:“ꑮꆜꇆ——ꌤꆿꑠꃅꇬ‘ꀋꉬꀋꉆ’ꍇꌠꉜꄉꃅ!”ꄷꉉꇈꅐꉈꏭꈴꁧꀐ。
   ꀋꆗꃀꀀꄓꇀꄮꇬꆏꂵꆪꑍꁥꁨꀐꅊꇈ,ꋌꈌꑰꉐꏻꏭꃅꑸꑽꀉꈠꑍꂷꋌꇣꋠꇈ,ꈄꀕꂷꌋꆀꉊꉂꏼꋌꎹꐯꇯꌌꇌꏜꒇꁧ。
   ꇁꌊꁡꇤꅶꁉꀀꃆꏪꋴꑟ,ꑍ꒜ꑍꇁꌊꄚꋌꈚꑟꇁꄷꆏꇌꏜꑠꆹꀋꐒꀐꌠ,ꄚꀃꑍꋌꊼꇅꊋꀋꑌꏭꃅꐙꐛꅹ,ꉪꑞꄀꆏꑞꋌꇫꃅꐒꏭꃅꐙ。ꋌꏮꁡꇤꍇꌠꊼꇅꉜꇈ,ꈄꀕꋌꄻꉈꑌꄉꅞꀏꑌ。ꋌꀉꁁꑞꑌꇁꀋꉜ,ꁡꇤꌠꆗꄚꏜꒇꇁꌠꑠꂷꀉꄂꇁꉚꐺ……
   ꀊꉗꍈꀋꐛꃅꐀꌒꃅꇢꂶꌠꑌꀀꑌꇴꈁꑓꅑꌌꄉꄚꁖꇁ,ꋌꀋꆗꃀꂶꌠꇫꑌꇈꌠꊌꂿꇬꆏ,ꉏꎸꃄꅉꃅꄉꇬꏭ:“ꀋꆗꃀ,ꆏꄈꄓꏜꒇꄐꀋꂸ!”ꄷ。“ꁦꋠ,ꉢꀋꅞꉖꀀꊭꍈꀋꉬꑲꆏꎧꑱꌦꀋꇊꀐ.ꉢꆍꊇꏯꎧꅝꀋꄐꄷꀋꄿ,ꄀꇗꇱꄉꆍꇱꄐꌦꀋꇊꀐꀋꂸ!”
   “ꑠꃅꐙꋋꇅꇬꑲꆀꉌꂵꀉꒉꇁꄉ,ꑞꑌꉉꀬꑞꑌꃅꀬꀋꆆ。”
   “ꑞꑌꉉꀬꑞꑌꃅꀬ?ꄡꉉꀐꄡꉉꀐ,ꀊꋨꇅꇬ,ꉢꑞꂷꃅꄎꑴꌦꂯ?ꃄꅉꂶꌠꑠꏮꉠꄩꅞꌦꏮꉠꇂꃴꃸꌦꃅ,ꊽꐬꆠ!ꀊꋨꇅꇬ,ꉢꂶꌠꆹꈌꎧꑱꂷꀉꏯꇧꎍꀐꇬ。”
   “ꌞꐮꑌꐯꑴꀞ。ꆏꇯꍝꃅꎧꀋꐕꅊꇈ……ꉏꑴ!ꆏꇫꉌꃹꌠꐉꐊꇆ?”ꐀꌒꃅꇢꊿꒈꑊꑍꅑꄉꇬꏭꋌꄷꅲ。
   “……ꐉꆹꐊ,ꄚ……”ꀋꆗꃀꋍꑊꏦꏭꃅ。
   “ꄚ……ꄚꈍꃅꐙꇆ?”
   “ꎧꑱꄉꊁꇿꃹꁧꀋꐚꀐ!”
   ꈀꄸꂷꄜꂯ!
   “……”
   “ꑞꂷꉬꌠꄜꇆ?”
   “……”
   ꀋꆗꃀꄡꇗꁱꀋꐭ,ꄚꃅꇢꋌꎼꀒꁨꋍꊐꃅꉌꌤꐯꉌꌤꇧꎍꀐ。
   “ꆏꁨꉉꇆ!ꑞꂷꉬ!ꑞꉬꆏꀋ,ꀋꆗꃀꋋꂷꌋꅪꂷꀉꏯꑊꏦꐯꑊꏦꀋꂸ。”
   “ꀈꍂ——ꀈꍂ——ꀊꑞꃀꀊꋨꍈꇆ!”
   “ꀍ——ꉢꅉꐚꀐ。ꌞꍑꍈꉬ……”
   “ꃅꇢ,ꄚꀊꑞꃀꋋꂷꐛꊈꈍꃅꐙꍈꉬꀋꐚꀐꆏ?”
   ꊾꇠꐯꊾꇠ,ꐛꊈꂷꇯꅲ。ꒃꌊꑮꃀꃅꂿꄷꈨꆹꀋꉬ,ꌤꑠꃅꑭꋧꃅꅱꑣꌊꑞꃅꄷꌠꉬꇆ?ꈀꄸꑌꄚꉌꇿꌠꎹꇁꈨꀋꆅ。ꃅꇢꀋꆗꃀꉪꄟꋋꑵꇬꉪꀋꐛꐯꀋꐛ,ꀋꇊ ꆏꌞꊿꇬꏭꅽꀉꄉꆹꌋꅪꂷꃅꌠꌋꆀꐯꌟ,ꋌꇫꉪꀋꐛ。ꄚꀋꆗꃀꉌꂵꈐꆹꇯꍝꃅꊜꋽꄷꆏꒃꌊꑮꃀꃅꂿꉂꌠ。ꋌꌞꀉꁁꌠꆗꀊꋨꈨꀉꏯ,ꋍꉔꉌꇿꌠꀉꄂꎹꇈꑞꑌ ꀋꅲꑵꌠꀋꉬ,ꈴꀕꇈꋌꀕꃀꌋꅪꂷꐊꀋꋻꄉꉌꂵꑠꃅꐙꌠꑌꀋꉬ。ꌺꃰꌋꅪꇢꊭꌤꆿꋋꈨꋌꅉꐚꇈꉈ,ꋌꉌꃀꈐꈍꄮꑌꀋꎪꐯꀋꎪꃅꑠꃅꉪ:ꋋꍂꃅꌋꅪ꒔ꂷꀉꄂ ꐊꅷꐘꁍꂿꉂ!
   ꀋꆗ꒜ꑠꃅꉪꐺꄮꇬ,ꃅꇢꂶꌠꉊꈬꏼꌠꌌꋌꋖꈄꀕꇬꋉꇈꋌꄷ:“ꑞꐒ,ꀃꌐꈊꃀꉡꐊꇁ,ꐋꀨꋋꈨꐯꈇꋋꇅꐮꇇꀋꀨꑲꆏꀉꁁꑞꃅꑴꌦ!”
   ꀋꆗꃀꏮꇬꉚꄉꊼꇅꒉꇈꇬꏭꋌꄷ:“ꍑ。ꉢꀇꌐꈊꃀꆏꅽꉘꇉꀐ。……ꋋꆏꉣꑊꇌꏜꒇꁧꌶꄿ?”
   “ꍑ、ꑐ!”sUv彝族人网

  ꃅꈊꇁꀐ。ꀋꇊꆏꂪꌦꀉꆈꁬꇁꄚꋧꃅꋋꂷꉱꇁꌠꌡ,ꋍꄮꇬ,ꁡꇤꋋꂷꄡꇗꑍꃀꑍꌋꆀꐯꌟꃅꇫꎍ,ꐯꀋꌡꌠꆏꊝꀕꃅꑓꀉꄂꑓꀋꂿꆘꅝ。ꀊꏀꊈꈩꅈꈚꌠꇬꋦꈭ、ꌤ、ꊿꈧꌠꄡꇗꀋꐈꄊꏽ,ꀋꇊꆏꄆꒌꆏꉜꋺꑠꂷꌌꉇꋍꃢꃑꄉꉜꌠꌡ。
   ꉪꄉꏡꄉꇁꐛꅹ,ꀋꆗꃀꀋꅞꉖꑋꀉꏯꄐꌐꀋꐥꃅꀋꐺꀐ。ꋌꀈꈥꋀꊇꐊꄉꒊꅍꀖ、ꎧꅝꄹ,ꉌꂵꈐꑠꆏꀊꑱꃀꌤꑞꍈꃅꐺꌠꋌꉜꋍꉌꂵꇬꊐꄉꌐ,ꌠꆗꀉꁁꈧꌠꇬ ꏭꒊꅍꋍꇬꀖꇬꑠꋍꉌꂵꄻꀋꈴꌦꄉꏽ,ꈜꀕꇈꇇꐛꇬꄀꈧꌠꑠꆹꀊꅰꃅꉉꌋꀋꌸ——ꋌꃅꀋꄐꐛꅹꀋꆆ,ꇯꍝꃅꌉꋍꉆꐔꊐꀬ。
   ꋌꈍꉗꏢꊋꇤꏡꇤ,ꁈꏂꁈꇭꀐꌠꉬꀋꐚ,ꉘꀋꇉꃅꋌꇱꐰꇙꌊꀊꑱꃀꑞꋓꑌꎍꀐꅊꇈ。ꋋꇅꇬꋍꇭꀧꂶꌠꑋꆳꆲꌙꀕꃅꑠꄲꇬꄉꃰꈧꐺꌠꌡ,ꉌꃀꑠꐓꌦꀕꃅꇧꎍꀐ。ꀈꈥꀊꑱꃀꋍꑞꋓꑌꀋꏾꀱꌂꀋꆆ,ꋍꉌꂵꑠꆹꈍꄮꑌꇿꇬꎷꌠꉬ。
   ꊿꋍꈨꄚꋊꍬ、ꇇꀨꐺꐛꅹꃅ。ꈩꇁꀜꌒꅈꋌꈚꄽꂫꆏꀋꆗꃀꌋꆀꋍꉌꃀꈐꉂꊿꂶꌠꑋꀉꄂꇫꑌꇈꀐ。ꈭꀕꇍꀕꌙꃄꌙꈈꀕ、ꁮꊭꂷꇯꇬꀋꊭ,ꃅꉒꇢꊭꑆꐺꌠꆧꁨꂶꌠꂯꀋꃉꆏꊕꑣꄉꇫꈴꒉ。
ꋋꇅꇬ,ꀋꆗꃀꉌꂵꂶꌠ“ꄏ——ꄏ”ꄹꐂꈂꀸꇬꁖꇁꄊꏽ,ꄷꀋꁧꋍꊨꏦꑴꅉꅲꇬꐁꃚꇯꂿꐯꂿꌠꌡ。ꋌꀅꌳꀕꃅꀏꐘꄉꏮꀊꑱꃀꊼꇅꆈ:ꀊꁠ!ꋍꉂꊿꋋꂷꑓ ꋪ、ꅳꁖ、ꂱꀯꑞꍈꑌꄉꄐꃅꎖꄉꄻꇬꅑꄉꌠꌡ,ꑞꍈꑌꋌꉜꇬꋽ,ꄷꀋꁧꃀꆏꋍꁆꆼꈘꁧꀐꇬꑌꋍꉜꇬꋽꐯꋽ。ꀊꅰꃅꀕꆳꄲꁏꇁꄉꀍꏶꇣꌠꇬꅿꉗꈧꌠꋌꁏꎼꇁ ꇬꆏ,ꀋꆗꂿꋌꎼꇭꀧꇖꌋꃅꑑꃹꈴꌐ,ꀋꇊꆏꇭꀧꂶꌠꋍꋋꀋꌅꃅꇬꊎꄉꇙꐺꌠꌡ。
   “ꊿꋋꈨꋋꇅꃅꇿꃹꁧꌐꌠꉬꀋꐚꀉꂸ?”ꀊꑱꃀꇬꏭꋌꄷ。
   “ꉢ——ꇫ——ꊨꀋꄅ,……ꋀꊇꋋꇅꃅꀱꉈꑴꇁꑴꀞ!”ꀋꆗꃀꉌꊸꌊꁱꐭꑲꀋꌧꏭꃅꐙ。
   ꅇꋋꑍꇬꐮꏮꀱꈭꐨꈍꉗꑠꍈꂱꇬꃅꇧꎍ。
   “ꀊꑱꃀ……”ꀋꆗꃀꆏꉘꀋꇉꃅꋍꇬꋌꈌꋊꎼꆹ,ꋋꇅꇬ,ꋌꈌꋊꎼꒉꄎꀐꐛꅹꃅꋍꊨꏦꑴꅉꋌꀕꉚꒉꌦꄉꏽ。
   “ꉐ——”
   “ꉢ……ꉢꌤꍈꌌꅽꏯꊼꇅꉉꂿꉂ。”
   “ꑞꉬ?”ꀊꑱꃀꏮꇬꉚꄉ,ꉌꂵꈐꆏꊿ“ꀈꃀ”ꋋꂷꑞꈨꃄꂿꉂꃅꉪ。ꋌꀋꆗꃀꄩꑍꈓꒉ,ꅪꁧꑠꆹꀊꅰꃅꄞꅐꑵꌠꆹꀋꉬꇬ,ꄡꇗꇐꑌꏭꃅꐙꑠ。ꀋꄸꄷꋍꊨꏦ ꉌꃹꑓꐛꌠꀋꉬꃅ,ꀋꆗꃀꇫꄀꇗꇱꇁꇢꇬ,ꄽꂫꐛꐨꆹꈍꃅꑌꀋꆗꃀꊋꐛꀋꄐꌠꉬ。ꄚ,ꀋꆗꃀꉌꂵꑌꑠꃅꀋꉪ,ꋋꁁꏯꃆꂮꀀꊭꌺꃅꑠꍈꂯꉪꀋꋻ,ꋌꉪꇢꋍꅉ ꑟꑲꑌꃅꀋꄐꌠꋍꊨꏦꑴꅉꄈꀊꅰꃅꊨꄅ。
   “ꆏ……ꅽꉌꂵꈐꊿꆏꇫꉌꃹꑠꐤꀕꀐꇆ?”
   “ꆏꑠꈨꅲꌊꑞꃅ?……ꐥꇢꋍꅉꑟꇬꑌꈍꃅꑌꆏꀋꉬꌠ。”
   “ꀊꁠ!……ꋍꍈꂯꆐꀋꉬꀐꅀ?”
   “……”ꀊꑱꃀꏮꀋꆗꃀꋋꍈꉜꇬꋍꎭꃅꉈ,ꋌꈍꃅꄉꇫꅇꀱꇢꀋꐚꋌꋋꀋꌧꇫꎍ。ꉪꅉꉪꅉꈍꃅꑌꀋꆗꃀꊨꏦꁳꈌꊰꏭꄉꍑꀞꉂꄉꋌꄷ:“ꇯꍝꃅꉉꄷꆏ,ꉢꀋꑍ ꊂꑲꆀꉠꀑꑌꏤꅍꄉꐮꏈꄉꀱꀁꇬꇁ,ꀋꃅꉉꀋꐛꃅꇧꎍꑴꌦ。”ꌤꋋꐘꇯꍝꃅꐮꑌꀋꐚꈰꑌꀋꐚ,ꀋꆗꃀꆹꌤꋋꏢꅿꃆꂮꇁꈜꑠꍈꂯꈨꀋꋻ,ꄚꋌꄡꇗꐪꊛꄉꇬ ꏭ:“ꁦꋠꆎꇤꇧꎭꋋꂷꑠꆹꊾꇰꂷꉬꀐꌠ。”
   “ꊾꇰ?ꋀꄹꇬꋀꄈꀑꁮꄷꀋꆆ!ꌞꋍꇅꉜꄷꆏꇫꅑꀵꅍꑌꀋꐥ——ꉪꏤꀁꇬꌢꎭ!”
   “ꌢꎭ?!ꌢꎭꌣꀋꎭꌠꆹꊨꏦꊋꇤꐵꀋꑷꇿꀋꆆ!”
   “ꀋꆗꃀꀋ!”
   “ꉐ……”
   “ꆏꇯꍝꃅꀉꑳꂷꌡꑴꌦꅊꇈ!”ꀊꑱ꒜ꉌꂵꈐꀋꆗꃀꋋꉌꃹꌠꋌꅉꐚ,ꄚ,ꋌꇯꍝꃅꊿꉪꇐꏡꇐꒆꐛꀋꒆꌦꌠꋋꂷꇯꀉꑌꃅꌧꈩꀋꏾ。ꑠꐛꅹꋌꌊꈴꄉꉉ——ꈛꎂꃅꉉꎼꇁꇬꋍꉌꀋꃹꏦ。ꄚꀊꑱꃀꇫꊨꀋꄅꌠꆹꀋꆗꃀꅿꇬꂾꉂꊿꂶꌠꐛꌠꌤꋋꐘꉬ。
   “ꊿꀉꑌꄹꁆꌠꉢꋋꂷꀂꏾꊼꇅꐛꀋꐛꂷꉬꄷꉉꌐ,ꋋꆹꉢꀄꊭꃅꋍꑍꆅꊌꇬꎷꌠꏵꅀꑞꃅꑌꀋꐚ。ꀉꁁꈧꌠꆹꉢꇫꄉꀧꀋꄐ,ꉠꊨꏦꑴꅉ——ꊨꏦꑴꅉꅿꉂꏣꑠꊋꐚꅀꊋꀋꐚꌠꆹꉢꇫꄉꀧꄎꌠꉬ。”
   “ꆏꋋꈨꌌꉠꏯꉉꌊꑞꃅꂯ?ꐮꃆꂮꀋꐥꄿꉬ?”
   “ꌧꁇ……ꌧꁇꐯꇯꂿꄷꌠ,”ꀋꆗꃀꂴꉪꄉꈧꌠꉉꎼꇁꀋꄐꃅꋌꄷ。
   “ꋋꆏꑠꃅꄉꅀ?ꃅꈊꀐ,ꉢꀁꇬꁦꀐ——ꀊꇁ!ꉠꀉꂿꄻꉢꁳꄉꌌꋂꋐꃼꁧꌠꎆꃀꈧꌠꇿꁧꆸꅝꀋꐚꀐ!”
   ꀃꌋꂴꆽꋌꎆꃀꈨꌌꑠꃆꂮꑠꍈꂯꉉꀋꋻ。
   “……ꉢ……ꉢꑍꇯꌌꑴꌦ,ꋋꈨꇎꀕꀋꐚ?”ꄷꇈꎆꃀꋌꄻꀊꑱꃀꃃꈐꊐ,ꋍꇇꇁꀊꑱꃀꇇꂪꇬꄆꑙꇬꀉꏯꐙ。
   “ꎆꃀꑌꁵꄻꀋꅐꀐ,ꆏꌌꁦꈨꆹꀋꉬ。”
   “ꑽꀋꐥ——ꋋꈨꄻꉠꐣꁙꊐꄉꇬꑌꀈꈤꃅꇬꀀꈨꄸ。”
   “ꋋꆏꄻꉡꉛꄉꃅꄉꀋꆆ……ꀋꍑꈨꀋꂸ!”
   “ꑽꀋꐥ,ꆏꈍꄮꊌꆏꈍꄮꄻꉢꁳ。”
   “……”
   “ꉢ——ꉢꆏꏁꅽꀁꇬꎭꆹꂿ!”
   “ꏃꄻꀋꅐ,ꉢꄆꄨꌌ。”ꀊꑱꃀꇨꊸꏭꃅꉉ。
   “ꑽꀋꐥ,ꉢꆏꏁꆹꂿ!”
   “ꏃꄻꀋꅐꏃꄻꀋꅐꃅꇬꉨ,ꑞꂷꉬꆏ!”ꋌꉉꌐꄷꆏꍝꄷꄓꇫꈜꁧ。ꀋꄸꄷꆦꌊꀉꁁꁡꇤꌠꆗꑠꐛꄷꆏ,ꈍꃅꑌꋀꂲꆾꎍꌠꑮꆜꋋꂷꄝꇬꀋꎭꀐꌠ。ꄚ,ꋋꇅꇬꋍꉌꂵꀂꏽꋦꐯꋦꌠꆹ——ꀊꑱꃀꋬꂻꃅꀁꇬꑟꅀꀋꑟꏡꌠꉬ。
   ꑠꐛꅹ,ꀋꆗꃀꄡꇗꄓꇫꊂꈹꒉ,ꀊꑱꃀꌋꅜꇬꆏ,ꄗꇬꉆꄉꏮꉇꀋꆗꃀꉜꄉꋌꄷ:
   “ꆏꀱꁨꉇꒉ,ꉠꊨꏦꀁꇬꂷꉠꊨꏦꆹꑲꀋꌧꅀꑞꃅ?ꆏꑞꃅꑠꃅꄀꇗꇱꂷꉬ?ꉠꀁꇬꊿꊌꂿꇬꈍꃅꂯ?”
   ꀋꆗꃀꋌꊨꄗꇫꈍꉗꏢꉆ,ꀊꑱꃀꀊꎴꐕꒉꑲꆀꋌꍝꐚꇁ,ꄚꋌꇫꉈꇬ,ꉌꂵꋍꂷꇬꇯꎍꐛꅹ,ꋌꆈꌊꄉꋍꊁꐊꆹꌦꀐ……
   ꇁꌊꀊꑱꃀꏤꑳꐮꉶꄅꏡꌠꈜꆹꄮꇬ,ꈜꐯꉳꀸꇬꄉꁦꋠꂷꐂꇁꇈ,ꀊꑱꃀꌋꆀꑞꀕꈨꌧꀋꐛ,ꉉꑌꉉꑌꃅꐣꁙꎆꃀꊐꁆꌠꇬꄉꎊꈬꑠꈨꋌꀖꁦꋠꂶꌠꁵ,ꁵꌐꈭꐨ ꁦꋠꂶꌠꀊꑱꃀꋌꆼꃬꄉꇈꌌꄉꉨꑣꐺ。ꀋꆗꃀꉪꐙ,ꋍꎆꃀꆹꊿꋋꂷꊏꌊꁧꀐꉂ,ꑠꃅꑴꇬꋌꉌꃹꑓꐛꃅꄻꇬꁳ,ꇑꌊꁧꌠꀋꉬꌠꉨꋌꉌꆐꀋꅑ。ꀱꆽꃅꁦꋠꀊꋨ ꂷꀊꑱꃀꉨꑣꐺꈧꌠꄈꋍꇨꇅꃃꐯꃃ——ꋋꑍꂷꐮꐊꄉꋋꊏꇁꌠꉬꏭꀋꉉꃅ。ꋌꋰꀋꄐꃅꋌꐂꆹꁦꋠꂶꌠꀵ!
   ꎭꈐꄸ,ꁦꋠꋋꂷꀋꆗꃀꇫꃆꂮꑵꌠꀋꉬ。ꑍꇇꌕꇇꀉꄂꃅꀋꆗꃀꋌꅥꈌꆅꂷꑋꀉꏯ꒧ꀡꇬꊐꄉꀐ。ꋍꁱꐭꌗꅐꄟꌋꆀꑭꇇꇘꄟꈧꌠꉜꇬꁡꇤꌠꆗꂷꆹꉬꐯꉬꀐ,ꄚ ꀋꆗꃀꊿꄃꁭꅐꁮꐚꒈꂪꒈꀑꊨꀋꄅꐛꅹꃅꇬꉜꎼꇁꀋꄐꀐ。ꋍꅳꀧꀂꏽꒊꇙꒋꇙꃅꇬꐙꇁꌠꆹ——ꀊꑱꃀꌋꆀꁦꋠꀊꋨꂷꆏꉉꉢꒉꏽꃅꐮꆼꃬꌊꀀꏪꇬꃹꁧꈧ ꌠ……
   ꀋꆗꃀꑠꃅꄉꀉꑌꃢꊿꊎꋠꀐꑴꇬ,ꑞꇅꌠꇬꑌꋍꉌꃹꑓꐛꃅꄉꃅꇬꎷ,ꋍꇅꇯꆏꉌꆐꅑꃅꀋꐛ。ꋌꋍꉌꂵꈐꉂꊿ——ꀊꑱꃀꊼꇅꉜꂿꉂꄉ,ꊋꒉꌠꋍꉔꋑꀋꋒꉈꏭ ꈩꁧꇬꎷ——ꋍꉔꋑꀋꋒ“ꊌꅍ”ꍈꑋꀋꐥꑴꇬ。ꀊꑱꃀꌋꆀꃄꌒꑋꄐꏤꌌꄉꀋꆗꃀꎆꃀꀉꑌꈨꋉꀸꌌꒉꀐ,ꄷꀋꁧꀊꑱꃀꂶꌠꋍꃢꋑꀋꋒꎆꃀꍇꌠꒃꇇꈐꊐꄉꄷ ꆏ,ꅇꂷꊾꉂꋌꑠꈍꑋꇬꋌꄻꀋꆗꃀꉌꂵꇬꊐꇈꇬꎷ。ꊿꇫꎭꃅꉈꌠꀋꆗꃀꆹꅇꂷꋋꈍꑋꇬꊌꄷꆏꋍꉎꀋꐥꃅ,ꉌꃀ“ꎧꑱꃅꑱ”ꇧꎍꇈꇬꎷ。
   ꈎꏅꇁꀐ,ꀋꆗꃀꀕꌠꏤꃮꀠꇨꃅꑠꋒꉘꄉ,ꂽꌋꀉꁌꉌꂵꆹꋍꌺꈍꑋꁮꆪꅑꅸꇁꌠꎆꃀꒃꌊꁧꇬꎷ,ꄷꀋꁧꋍꉔꋑꀋꋒꈩꅷꈍꄮꈍꄮꑟꇬꑲꆀꀱꇁ,ꋍꉌꂵꈐꇬꈍꃅꑌꌱꃀꅪꎔꑠꂷꋌꉜꇫꎼꄉꀐꉂꄉꉌꂵꒊꆭꀕꃅꎍ。
   ꈎꏅꀒꄹꉇꌠ,ꀋꆗꃀꄡꇗꑍꃀꑍꌋꆀꐯꌟꃅꉈꏭꈩꁧ,ꋌꀋꅞꉖꀊꑱꃀꊌꀋꂿꐛꅹꑊꑍꂶꌠꂷꉐꐛꇁꄊꏽꇧꎍ。ꋍꉌꂵꋰꀋꄐꐛꅹ,ꀃꑍꆏꋚꏛꃅꋠꇈꐳꃅꋌꅐꉈ ꏭꈴꁧ……“ꀊꁠ!ꑞꉬ?ꉢꉜꑽꌠꆹꀋꉬꀞ?”ꀋꆗꃀꅐꒉꄮꇬꀊꑱꃀꋀꏤꑳꐮꇭꋓꑌꌠꋌꊌꂿꇬꆏ,ꋍꈌꋌꀋꌅꃅꑠꄷꉉꎼꇁ。ꋍꉌꂵꂶꌠꋋꇅꃅꄉꁦꉘꀕꇬ ꅜ,ꀋꇊꆏꐕꍯꇽꌊꇈꈬꇉꃪꈝꃀꀋꉾꅈꈧꌠꏮꄽꇈꀋꃉꇁꄇꈜꁤꇅꀕꑠꏢꇬꈜꒉꌠꌡ。ꑊꑍꂶꑌꋋꇅꃅꀕꑄꇫꀒꅞꑟ。ꄷꀋꁧꀊꑱꃀꂶꌠꇯꇬꏭꉜꄉꇇꃭ,ꉌꂵꈐ ꇬ,ꇣꋲ!ꀃꑍꉠꉂꊿꉠꏯꉜꄉꇬꂾꃢꌠꇇꃭ!ꃅꐛꃅꐙꁏꇁꌠꉬꅀꃅꉪꇬꉆꎍ。ꈜꀕꇈꀊꑱꃀꂶꌠꇯꈛꎼꋍꏭꉜꄉꇁ,ꋌꋋꈨꊌꂿꇬꆏꋍꈯꋌꀋꌅꃅꀒꀥꑟ,ꏹꑭ ꄔꈌꐔꃮꐔꇬꃸꑌꋌꇬꀋꅲꀐ……
   ꌗꁮꌗꏂꃅꋌꀥꇁꀊꑱꋴꑟ。ꇬꏭ:
   “ꆏꀋꅞꉖꌤꀋꐥꀞꄜ?……ꀊꁠ,ꉢꆏꊊꀋꂿꄉꋌꎼꉌꂵꐛꀋꐛꃅꇧꁠꀋꇊꀐ”ꄷ。
   “ꌤ……ꌤꀊꅰꀉꒉꐘꀋꐥ……”ꋌꉉꎼꇁꇬꀋꇊꆏꉉꅐꇁꀋꌐꏭꃅꐙꌠꌡ。
   “ꑞꌤꐘꉬꇆ?”
   “ꆏꑴꌠꉉꀉꁁꊿꄡꇰꂸ!”
   “ꉢꉉꊿꀉꁁꀋꇰ,ꉉꇬꀋꇰ”。
   “ꉪꋍꁥꀋꅞꉖꇪꎹꈩꒉꇈ,ꐚꅪꁡꇤꀉꑳꈨꌋꆀꉪꐮꇤꄉ,ꌞꁦꋠꑠꂷꉪꇱꄃꀙꇬꏀꄉ,……ꌤꐯꇯꃅꌠꉬꀐꄷꄉ,ꁬꋌꁋꑌꉪꐯꇯꏓꇬꁳꑲꆀꍑꄷ。ꑠꅹꉢꎆꃀꍈꈉꇧꎍ——ꆏꅉꐚ,ꉪꏤꆹꀊꃶꃵꑷꉬ,ꆏꉡꊼꇅꇇꀨꄎꇚꑴꉂꄉꉢꅽꄹꅐꇁꌠꉬ”ꄷ。
   “ꆍꊇꑞꄹꄉꑠꃅꐮꇤꀙꌠꉬ?”
   “ꎧꑍꀘꅝꄉꇯꆏ,ꆏꋍꇬꉢꋍꇬꃅꏈꆹꄉ,ꉜꇈꂾꆏꋍꁥꌠꋧꄉꌞꊿꋀꇱꄃꃄꅉꇬꆏꇬꐓꄉꀐꅊꇈ……”
   “ꀉꁁꈧꌠꈀꄸꈨꉬꌠꉉꉡꇰꉆꀕ?”
   “ꀈꍂ,ꆏꑠꑋꑍꅲꌊꑞꃅꇆ?……”
   “ꃆ——”ꀋꆗꂿꑞꉉꇢꀋꐚ,ꑞꅲꇢꀋꐚꃅꇧꎍ。
   “ꀉꁁꆏꌧꌠ……ꆏꌧꌠꐀꌒꃅꇢꂯꐊ!”ꀊꑱꃀꃅꇢꀋꅞꉖꏦꎫꁧꇈꀱꀁꇬꀋꇁꌠꋌꅉꐚꄉꋌꄷ。
   “ꀒ——ꍑ!ꎆꃀꈍꑋꂷꈁꀋꐛꀐꆏ?”
   “ꑍꉐꂷꈁꅀꑞꃅꀋꐚ!”
   “ꉢꉠꀁꇬꊿꄷꒃꆹꂿ,ꒃꌊꇁꀋꄐꅊꇈꇬꉠꅑꄡꀵꂸ!”
   “ꈀꎭꀕꀐ!”
   ……
   ꎆꃀꋌꒃꌊꈝꃀꈢꑠꇁꇬꆏ,ꐀꌒꃅꇢꎧꆅꈁꑓꅑꌌꇁꋋꋒ。ꀋꆗꃀꅉꀋꐚꎴꃅꇬꏭ:“ꀋꅞꉖꇿꇬꈩꌠꉨ,ꏮꅽꑊꑍꉜꇬꑠꃅꀀꐵꀱꋦꌠꉬ?”
   “ꐋꀨꈨꐊꄉꎧꑱꌦꀋꇊꀐ!ꋌꎼꈌꊰꐯꈌꊰ!”
   ꀋꆗꃀꉌꂵꈐꇬ,ꋀꊇꌞꊿꌋꆀꐮꇤꌤꋋꐘꂁꄉꌠꉨ,ꃅꇢꅇꐚꉉꋌꀋꇰꀐꀞꉂꄉꄀꇗꇱꄉꁨꀋꅲ。ꑠꐛꅹꋌꃅꆳꄲꌟꃅꐳꐯꐳꃅꀕꇢꋴꈴꀒꁧꑟ。ꃅꇢꂶꌠꀋꆗꃀꃅꐨꋋꈨꋌꊌꂿꇬꆏꇬꏭ:“ꀋꆗꃀ,ꇿꁧꏢꉨꌠꉨꑠꃅꐳꃅꐺꌠꉬ?”
   “ꄡꄉ,ꄚꀋꏯꊼꇅꒉꑲꆀꀱꇁꂿ!”ꄷꀋꂪꀋꂪꇬꌟꃅꇫꈴꁧ。
   ꎆꃀꑍꉐꂷꋌꄻꀊꑱꁵꀐ。ꉘꀋꇉꌠꆏ,ꀋꆗꃀꂶꌠꉌꂵꀉꒉꌊꈌꋊꄉꇬꏭ:“ꀊꑱꃀ,ꉢꆎꉌꃹ!”
   ꀊꑱꃀꏮꇫꊼꇅꉜꇈ,ꎆꃀꋌꄻꐣꁙꇬꊐꄉꇬꏭ:“ꋋꈨꉢꅉꐚ!”
   “ꋋꆏꉢꉠꀁꇬꊿꏭꉉꄉꆎꒃꇁꇬꍑꀕ?”
   “ꑞꀋꆗꃀꂷꉬ!ꆏꉉꅷꇿꀕꈴꁧꌠꉫꆏ?”
   “ꉢꇯꍝꃅꅽꏯꉉꀐꌠꀋꂸ!”
   ꋌꉪꇬꀋꆗꃀꋋꂷꇯꍝꃅꁨꇁꂷꉬꀐꀞꉂꄉ,ꏡꁈꑞꏢꏂꄉꉈꑴꄙꇧꎭꑲꆀꍑꀋꐚꀐꉂꃅꉪ。
   “ꀉꁁꈨꆹꀋꉬ,ꅽꉣꑊꈍꃅꄉꋍꁯꋍꑷꐛꁧꂯ?ꆍꏤꆹꌣꈚ,ꉪꏤꆹꌢꎭ,ꈍꃅꑌꆐꀋꉬꌠꉬ。”
   “ꈀꄸꂷꇫꅉꐚ?ꆏꀋꃅꄚꉠꋴꄉꀉꄂꑠꃅꄷ,ꁨꃛꇀꄮꆏꅽꑠꌅꈌꍈꂯꐜꀋꈨꉆꌠꉬ。”
   “ꆏꁨꐪꊛꄉꉉꉏ!”
   “ꂸꄸꂶꄸꉢꉬꅲ(ꉠꀁꇬꊾꑌꉬꅲ),ꄚꅽꀉꄉꏤꑠꊿꇇꇐꀋꐥꋌꏠꊌꂿꄷꆏꉉꂯꉉꀋꉆꌠꉬ——ꋌꈍꃅꑌꇫꉬꀋꅲꌠꄸ。”
   “ꌤꋋꐘꆹꏮꉢꇯꄉ,ꆏꇬꐒꄻꀋꅐ!”
   ꀊꑱꃀꋌꉉꈌꊰꀐ,ꃅꅍꎷꀋꊌꃅꑠꄷꇬꏭꉉ:“ꀋꆗꃀ,ꆏꑠꃅꄀꇗꄡꇱꀐ。ꉢꂱꋍꃢꌞꄹꑋꐛꋺ。ꋍꁁꏯꈴꄉꉉꄷꆏꇯꍝꃅꁧꀋꎴꀐꑠ……”
   “ꌞꊿꀉꁁꈍꃅꉜꄿꂿ,ꋋꈨꉢꉜꇬꑽꀋꐥꄷꆏꍑꀋꆆ!”
   “ꆏꉠꈌꄡꇑꃅꄉꇆ!ꉢꁳꉉꌐꏯ。……ꋍꈭꐨ,ꆎꑌꅉꐚ,ꉢꉪꁡꇤꌠꆗꑠꐊꄉꈩꇬꎷ,ꋋꈨꅽꀉꄉꅉꐚꇬꆹꉬꅲꄷꆏꉢꑞꃅꇢꀋꐚꍰ!”
   “ꍑ,ꋋꆏꉢꇫꉉꒉ ,ꆏꀁꇬꄉꉡꇁꉚꄉ!”
   “ꆏꁨꉉꒉ!”
   “ꀋꄸꄷꉠꊿꉢꉉꉬꇈꅽꊿꉬꀋꅲꇬꈍꃅꂯ?”
   “ꐯꏤꄉꄹꌶ,ꈀꄸꂷꊨꏦꊿꉉꈌꊰꀋꄐꆏ……”ꋌꏮꀋꆗꃀꊼꇅꉜꇉꐪꊛꄉꋌꄷ:“ꌤꆿꑞꅐꌠꋍꀂꏾꅑꎍꌐ。”ꄷ。
   “ꍑ!ꋋꆏꑠꃅꉉꄉ。”
   ꀋꆗꃀꐳꃅꋌꀱꀁꇬꑟꇁ,ꈛꑌꃅꄷꐛꌠꅫꃀꈨꇁꌊꇫꐥꌐ。ꀋꆗꃀꑞꑌꀋꅲꃅꈌꋊꄉꀉꄉꏭꇖꂟ,ꀉꄉꂶꌠꅇꂷꋋꈨꀕꌐꄷꆏꇨꇅꃃꌌꀏꄩꐂꐺ, ꇬꏭꆏꌋꅪꆿꏓꑠꂷꒃꎭꐺꀐꄷꇨꇅꃃꐯꃃ。ꅫꃀꈧꌠꑠꆎꂷꋍꇬ,ꉡꂷꋍꇬꃅꀋꇊꆏꌤꋋꏢꄝꊼꇅꀉꈠꄷꆏꀋꍑꌠꌡꃅ,ꐮꆦꄉꀋꆗꃀꏭꉙꂘꇁꇬꎷ。ꀋꆗꃀꋌꎼ ꃃꌌꋍꀀꅉꇬꃹꁧ——ꋋꄹꉖꆐꀋꉬꀐ!
   ꈎꏅꄹꉇꌠ,ꊿꀉꁁꈧꌠꉌꈯꑓꈜꃅꇧꐺꌐ,ꃮꏄꃚꑠꃅꄜꃬꀮꂆꃚꏭꀋꋌꃅꐮꊂꈹꄉꏅꇁ。ꄚ,ꋋꈨꐯꇯꀋꆗꃀꇫꅲꇬꉚꀋꏾ,ꄷꀋꁧꋍꅳꀧꈹꌦꄉꏽ!
   ꋋꄹꉖꈊꃀꋌꀁꇬꊿꏭꇏꄟꌦ,ꄚꀁꇬꊿꉪꐨꏡꌠꅚꍃꁧꀉꏯꇙꋏꄷꀋꄹ!
   ꅂꀧꄹꉇꌠꄡꀱꇬꄷꇕꄟꌦ,ꀉꄉꎧꑱꎴꃅꀀꁧ……
   ꁧꏷꄹꉇꈊꃀ,ꀋꆗꃀꄡꇗꀉꄉꋌꌭꇤꈏꏢꁮꑌꄉꇕꄟ。ꄚꂽꌋꀉꁌꆹꌋꅪꆿꏓꋋꈨꂿꄷꆏꀉꑐꌋꆀꀉꉌꐮꂿꇬꀉꏯ,ꉉꀋꉆꀱꀋꉆꇧꎍ。ꀋꆗꃀꇨꇅꃃꌌꉘꃀꃢꌠꀁꇬꎊꈬꀮꇐꐷꐺ,ꃷꇎꃷꇤꑠꄓꄚꉜꇁꌐ……sUv彝族人网

  ꌋꐓꇤꄸꑭꋚꎹꋠꆹꄮꇬ,ꈾꁯꄸꅥꁬꋌꑠꀺꊖꎐꇬꑐꎍꌠꋌꊌꂿ……ꄮꈉꈍꑋꂷꐛꈭꐨꆏꃅꄜꀐ,ꋍꀉꂿꇫꀀꄖꒈꄮꇬꆏ,ꋌꇷꏅꀋꄐꃅꆍꇬꅜ……ꂾꃚꅲꀋꌒꐯ ꀋꌒꑵꌠꊿꉨꃚꈨꇫꈌꐚꇁꀐ!ꁡꇤꊿꃅꄓꇬꉚꒉꌐ,ꑞꃅꅋꋠꌠꈀꄸꂷꑌꇬꉪꀋꐛ,ꑠꅹꉉꌊꑊꋌꐔꌊꒉꌠꉬꄷ。ꐷꈭꇬꊿꋍꁥꇬꊎꄉꈋꍣꇰ:
   “ꁴꍂ!ꇯꍝꃅꁴꍂꉬꀐꌠ!”
   “ꑠꀋꉉꑞꉉ,ꁧꏷꄹꉇꌠꇯꉬ……”
   “ꀉꁌꀊꂵꑠꇫꐥꌠꀋꌗꀐ,ꃮꀠꇨꌠꏅꇬꁳ,ꎵꃀꃬꏿꑠꄻꇫꍈꂱꑵꀋꐥꀐ……”
   “ꇯꍝꃅꃙꈌꏭꃅꐙꑵꌠꉬ。”
   “ꀋꄹꉇꂯꀉꄻꀕꑴꌦ……ꊿꇬꉪꐛꇁꀋꉆ!”
   “ꀃꑍꊿꌌꇧꎭꀋꉆꑍ,ꃆꏂꄑꃬꀮꂆꄮꄈꈨꀋꉬꑲꆏ?”
   “ꑠꀋꃅꈍꃅꑴꌦꂯ!”
   “ꆍꌠꆗꋍꈨꃅꄜꏛꃅꄓꄉꌩꏓꇁ……”
   “ꈬꑻꆹꑲꆏꍑꌠꉨ,——ꃄꌒꆹ?ꋋꂷꀃꑍꑓꀋꂿꑋꀋꂸ?”
   “……ꋌꏦꎫꁧꇈꀱꀋꇁꑴꌦ。”
   ꊁꄹꉇꉘꁮꑭꇁꏦꎫꑤꍰꇓꈓꆅꉚꅉꇬꌸꄮꇬ,ꀋꆗꃀꃆꄔꇱꐗꀉꑌꈨꀋꐥꀐ!ꄚ,ꆅꉚꅉꀀꑳꇬ,ꀊꑱꃀꌋꆀꃄꌒꑋꐯꇯꀀꀋꑌꃅꇧꎍꑴꌦ——ꀋꆗꃀꎆꃀꋍꑊꊏ ꌊꄉꋍꑊꀉꑳꅥꄉꇈ,ꉪꅍꏡꅍꀋꐥꃅꐯꇯꊷꆣꀕꃅꀀꀨꇂꃴꀀꎍ。ꀋꄸꄷꌤꋋꏢꋍꑊꈨꇢꇬꉌꂵꈐꆹꇿꐯꇿꇧꎍꌠꉬ——ꎆꃀꑍꉐꂷꌠꌢꄻꀋꅐꀐ!sUv彝族人网

sUv彝族人网

ꁰꄻꌠ: ꄜꃑꌠ: beley ꌤꃅꅉ
ꂴꁬꌠ:ꀈꊞꃀꏤꁮꅉ
ꊁꁬꌠ:ꉒꈌꈬꇬꉂꏣ(ꊰꉆ)