ꀨꏾꌠ > ꆈꌠꃆꂮ

ꆈꌠꃆꂮ

ꍏꉸꊿꋅꇢꊭꇬ,ꆈꌠꑌꌳꃅꌳꈄ,ꐩꋊꀉꎴꑠꑷꉬ。ꄯꒉꏂꀨꇬꄉꎭꎼꇁꇬ,ꆈꌠꂴꑱꊨꏦꁱꂷꌬꐨꀁꑌꃅꄉꇬꑌꑍꄙꎖꈎꐛꀐ。ꊻꂷꃷꁨꆹ,ꆈꈀꌠꃅꇬꀋꃋꏃꉐꎖꃪꐥꏭꐛ。ꉪꍏꇩꑭꊂꃅꇬ,ꊿꋅꉬꊯꎖꋇꐥ,ꋌꈨꇢꊭꇬ,ꊻꂷꃷꁨꉪꆈꌠꑍꀋꋌꌠ,ꉌꈲꇱꇬꑌꀉꁁꃘꁯꀉꄂꐥ。ꁧꐙꎵꑳꀕꌠ、ꒊꃀꆈꑎꀕꌠ、ꌩꋦꆈꊉꀕꌠꉪꆈꌠꃅꈋꐛ!o0W彝族人网(彝人网)- 彝族文化网络博物馆

ꊿꋍꈨꋋꈨꑠꃅꉉ:ꉪꆈꌠꋋꑷ,ꀃꌋꀊꆨꀨꇬꆹꁭꅐꏭꀀꑷꉬꏭꐛ,ꊂꆏꀑꁨꀑꁨꇁꃅꇁꌊꉸꉼꒊꃀꐧꊬꌠꇬꋍꈭꀀ,ꋌꈭꐨꆀꋍꈨꁘꒈꂪꏭꉜꄉꁧ、ꋍꈨꀱꈌꄸꉻꏭꉜꄉꇁꌋꍰꄖꐟꈯꀀꑠꉬꌠ。ꈬꉻꐈꆀꑌꄚꄉꐞꌠꉬꏭꐛ。o0W彝族人网(彝人网)- 彝族文化网络博物馆

ꉪꆈꌠꇱꀧꈯꄿꌋꆀꌧꇐꁱꀕꃆꂮꇬꉜꎼꇁꇬꆹ,ꀃꌋꀊꆨꇰꅹ:ꍜꇰꀉꇐ,ꈧꇁꆧꌺꁻ;ꀋꌠꆿꋒꅐ,ꌧꇐꁱꀕꅐ;ꇍꈨꀊꏂꄑ,ꈈꂱꑣꌜꄙ;ꅉꁮꅉꎹꇨ,ꄹꀦꃰꃅꄙ。ꆈꌠꀋꁌꀋꁧꑠ,ꄩꆹꃅꃴꃅꏸꈝꃀꌧ,ꀏꆹꈬꌩꈬꇓꈬꉙꈬꃪꃆꂮꌧ!ꒊꆈꃅꈋꅿꊈꑪꄷꑠꂷꄿ,ꂷꏼꃰꃅꏭꁏꄉꃅꐎꑍꊏꈎꀋꇊꌉ;ꃮꈓꉼꏸꆈꌠꃅꈋꈴꄮꇬ,ꈢꐯꑻꄿꑘꀨꍰꈿꌦꅝꐮꐊꉼꏸꏃꆈꌠꃅꄷꈴꁧꄮꇬ,ꆈꌠꄿꏀꄚꄉꉼꏮꄻꁧꌠꌐꀋꉆ;ꇂꏦꃺꌒꄾꄮꇬ,ꒊꆈꌜꂶꌠꌅꈌꋌꌌꏦꏠꏃꏭꁏ;ꁉꉘꇁꄿꏭ,ꂽꄏꂽꎹꌊꂽꌒꁯꆮꃰ、ꍩꄿꂸꃃꌡ,ꍩꈌꃅꏸꋦ,ꃏꏸꋌꀋꄿ、ꄊꁉꇬꀋꀗ,ꇭꂱꄉꂽꂿꄚꄉꆺꀕꂃ、ꂽꌦꄚꄉꑘꄂꐛꋺꑴ!o0W彝族人网(彝人网)- 彝族文化网络博物馆

ꁌꄝꇈꉈꆏ,ꆈꌠꏓꂱꍏꇩꇭꍣꄈꏃꅉꇂꃴꄉ,ꄓꇁꐚꌋꐯꁦꃆꂮꇠ,ꄇꈜꐍꊏꀕꌠꍬ。ꄯꒉꏂꀨꅑ,ꃅꇁꈄꌠꎷ,ꆈꌠꃅꈋꐥ!“ꀉꁌꑞꅉꑟ,ꀊꃯꑟꅉꑟ”ꄸꌠ;ꉪꆈꌠꏓꂱꋍꏅꃅ,ꄈꏃꌠꇂꃴꄉ,ꈒꇤꊋꇤꌊꆀꃅꋈꄻꑲꆏ,ꀉꁌꑞꅉꑌꑟꀋꋌ,ꀊꃯꑞꅉꑌꑟꀋꋌꁧꌠꉬ!o0W彝族人网(彝人网)- 彝族文化网络博物馆